■ පවිත්‍රා රූපසිංහ
කොරෝනා වසංගතය දැන් දිස්ත්‍රික්ක ගණනාවක පැතිරෙමින් තිබෙනවා. මඩකලපුව දිස්ත්‍රික්කයේ ජනතාව වසංගතයට පූර්ව සූදානමක සිටිනවාද?
ඇත්තටම දැන් ලංකාවම මෙම වසංගතයට හසුවෙලා තියෙන්නේ. මඩකලපුව දිස්ත්‍රික්කයේ මහ නගර සභා සීමාවේ 60,000 ක් පමණ පිරිසක් ජීවත් වෙනවා. මේ මිනිස්සු පර්චස් දහයක වගේ කුඩා බිම්කඩවල් ඇතුළේ ගෙවල් හදාගෙන ජීවත් වෙන, කුලී වැඩකින් එදාවේල හම්බකරගන්න ජීවත් වෙන අයයි. මේ හැට දහසක ජනතාව වසංගත තත්ත්වයක් තුළ අසීරුතාවකට පත්වීම වළක්වන්න බැහැ. මහ නගර සභාවෙන් පිටත ධීවරයෝ සහ ගොවිතැනින් ජීවත්වන මිනිස්සු සිටිනවා. අනෙක් අතට පසුගිය මාසවල මිනිස්සු මාළු ආහාරයට ගැනීම ප්‍රතික්ෂේප කිරීම නිසා අපේ ධීවරයින් විශාල අර්බුදයකට මුහුණපෑවා. ඉස්සන් අපනයනය අඩුවීම නිසා ඉස්සන් කොටු වැහුණා. වසංගතයේ අතුරු ප්‍රථිඵල විදියට ඔහුන්ගේ එදිනෙදා ජීවිත කඩා වැටිලායි තියෙන්නේ. මඩකලපුවේ ජීවත්වන ගොවීන්ගේ තත්ත්වයත් ඒ වගේම තමයි. වසංගතයේ දෙවන රැල්ල වළක්වාගන්නට වඩා ආණ්ඩුවට ඕන වුණේ විසිවන ව්‍යවස්ථා සංශෝධනය ගේන්න. කොරෝනාවලට රට විවෘත කළා වගේ දෙයක් තමයි එහිදී සිදුවුණේ. ඔවුන්ගේ දේශපාලන අභිලාශ මුදුන්පත් කරගන්න වසංගත අවස්තාවකදීත් අයුතු විදියට පාලකයින් වැඩ කළා.
බුරවි සුළි කුණාටුව ඔබගේ දිස්ත්‍රික්කය ඇතුළු පළාතට තර්ජනයක් සිදුකළා. ප්‍රමාණවත් පරිදි අවතැන් වූ පොදු ජනතාව වෙනුවෙන් මැදිහත්වීමක් සිදු වුණාද?
සුළි කුණාටුව මිනිස්සුන්ටත් ඔවුන්ගේ දේපළවලටත් තදින් බලපා තිබෙනවා. ප්‍රමාණවත් තරම් මැදිහත්වීමක් සිදුවුණා කියන්න බැහැ. මේ වගේ ස්වභාවික ව්‍යවසනයකදී මිනිසුන්ට උපකාර කරන පරිත්‍යාගශීලීනුත් මේ වසංගත අවස්ථාවේ කිසියම් ආර්ථික අභියෝගයන්ට මුහුණපා සිටිනවා. ඒ නිසාම ඔවුන්ගේ උපකාරත් මේ අවස්ථාවෙදී ජනතාවට ලැබුණේ නැහැ. මම කොවිඞ් පළමු රැල්ලේදී මට ඇති ජන පදනම හරහා දිස්ත්‍රික්කයේ ජනතාවට ආධාර කළා. නමුත් මේ අවස්ථාවේ අවතැන් වුණු පුද්ගලයින් බොහෝ සේ පීඩාවට පත්වුණා. රටක් වශයෙන් ආර්ථික කඩාවැටීමක සිටින මේ අවස්ථාවේ ජන ජීවිත බිඳවැටීම් වැළැක්වීම දුෂ්කරයි. ඒ ගැන කණගාටු වෙනවා.
දකුණේ කිසියම් ජනතා මර්දනයක් දැන් වැඩෙනවා. මඩකලපුවේ සහ පොදුවේ උතුරු නැගෙනහිර ජනතාව දකුණේ සිදුවන මෙම බල දේශපාලනය ගැන දැනුවත්ද?
මේ ආණ්ඩුව දකුණ පමණක් නොවෙයි මුළු රටම මර්දනයකට ලක්කරමින් සිටින්නේ. උතුරේ යුද්ධයෙන් මිය ගිය පුතා සිහිපත් කරන්න අද උතුරේ අම්මලාට අධිකරණයෙන් අවසර ගන්න වෙලා තියෙනවා. එල්ටීටීයේ සාමාජිකයෝ කියල ආණ්ඩුව කිව්වට ඒ අම්මලට නැහැ එල්ටීටීය ගැන දැනුමක්. අම්මලා හරිහැටි දන්නෙ තමන්ගේ පුතා මැරුණා කියන කාරණය විතරයි. දැන් ඒ අම්මලා තමන්ගේ මැරුණු පුතා මතක් කරන්න උසාවියෙන් අවසර ගන්න ඕනෑ තත්ත්වයට පත්වෙලා තියෙනවා. ඒ වගේම මුස්ලිම් මිනිස්සුත් කොරෝනා ආසාදිතව මියගිය ඥාතීන්ගේ මියගිය සිරුර ඉල්ලා අධිකරණයට යමින් සිටිනවා. වතුරවලට වෛරසය එකතු විය හැකි බව ආණ්ඩුව කිව්වත්, පොළොවේ අඩි 300 ක් හාරලාත් වතුර එන්නෙ නැති ප්‍රදේශ ගැන අප හොඳින් දන්නවා. ඒවන් ප්‍රදේශ තෝරාගෙන ඒ මැරුණු මිනිසුන්ට භූමදාන අයිතිය ලබාදිය හැකියි. ආණ්ඩුව එය මඟඅරිනවා. අයිඩීඑච් රෝහලේ ඉවතලන වතුර එකතු වෙන්නේ කොහාටද? මේව තමයි ඇත්ත ප්‍රශ්න. අනෙක් පැත්තෙන් කාඩිනල්තුමා පාස්ත්‍ර ප්‍රහාරයේදී මියගිය කතෝලිකයින්ගේ අයිතිය වෙනුවෙන් තවමත් උසාවි යමින් ඉන්නවා. ආණ්ඩුව මුලදි කිව්වෙ වහාම ඒ වරදකරුවන් මතුකරනවා කියලයි. ආණ්ඩුව පත්වෙලා අවුරුද්දක් මොකද කළේ. එසේම මහර බන්ධනාගාරයේ මියගිය අයගේ අම්මාවරුන් ඒ මියගිය පුතුන්ගේ අයිතීන් වෙනුවෙන් උසාවි යන්න පටන්ගෙන. මේ ආණ්ඩුව රටේ හැම ජන කොටසක්ම මර්දනයට ලක්කරමිනුයි සිටින්නේ. උතුරු නැගෙනහිර ජනතාවට මෙම තත්ත්වය හොඳින් දැනෙනවා.
ජාතිවාදය, අන්තවාදයක් රටේ කොරෝනා වසංගතයත් සමඟ හිසඔසවමින් තිබෙනවාද?
රටේ සෑම ජන කොටසකම සියයට දහයක් වගේ ඉතා කුඩා පිරිසක් අන්තවාදී සිතුවිලි දරාගෙන සිටිනවා. සිංහල, දමිළ සහ මුස්ලිම් පොදුවේ සෑම මිනිසෙක්ම ජාතිවාදී හෝ අන්තවාදී අදහස් ඔළුවෙ තියාගෙන නැහැ. ඉතාම කුඩා පිරිසකගේ එනම් සියයට දහයක් වගේ පිරිසකගේ හැසිරීම් නරකයි කියල අපි පිළිගත යුතුයි. එහෙත් එය පොදුකරණය කිරීම වරදක් විදියටයි මා දකින්නේ. මුස්ලිම් පිරිසක් පුරාවිද්‍යා ඉඩමක් අල්ලාගෙන ගෙවල් හදනවා කියල මාධ්‍ය තුළ විශාල ප්‍රචාරණයක් ලබාදී අර අනෙක් ජන කොටසේ ඉතාමත් සුළු කොටස ප්‍රකෝපයට පත්කරන අවස්ථා තිබෙනවා. මුස්ලිම් පමණක් නොවෙයි, පුරාවිද්‍යා ඉඩම් සිංහල මිනිස්සුත් අල්ලාගන්න අවස්ථා අප දැක තිබෙනවා. ආණ්ඩුවක නැත්නම් පවුලක යහපැවැත්ම වෙනුවෙන් රටේ ජනතාව අයුතු ආකාරයට පාවිච්චි කිරීමක් තමයි මා මෙහිදී දකින්නේ.
යුද්ධයෙන් පසුව මඩකලපුවේ ජනතාවගේ ජීවිතවලට වෙනසක් ලැබුණාද?
ඒ ගැන කතාකරන්න ඕනෑ. 1990 ගණන්වල පටන් ත්‍රස්තවාදය වැළැක්වීමේ පනත යටතේ හිරබත් කන මඩකලපුවේ මිනිස්සු තාමත් සිටිනවා. පසුගිය අවුරුද්දේ එක් පුද්ගලයෙක් හිරේදීම මියගියේ අවුරුදු 30 ක් හිරේ ඉඳලයි. ප්‍රශ්නය වන්නේ ඔහු වෙනුවෙන් අදටත් චෝදනා නැහැ. මේ හිරේ සිටින අය චෝදනා නැතිවයි ඉන්නේ. ආණ්ඩුව පිල්ලෙයාන් සම්බන්ධයෙන් ගත් තීන්දුව කවුරුත් දන්නවා. 2015 දී ජෝසප් පරරාජසිංහම් පල්ලියක් ඇතුළේදී මැරුවාය කියන සැකයට පිල්ලෙයාන් අත්අඩංගුවට ගත්තා. එහෙම පුද්ගලයෙකුට ඇප දෙන්න බැරි නමුත්, නීතිපති දෙපාර්තමේන්තුව පසුගිය සතියේ ඔහුට ඇප ලබා දුන්නා. මඩකලපුවේ ජනතාව අතර සමහර පිරිස් තවමත් යුද්ධයේ පීඩනයට හසුකරලා තිබෙනවා.
දකුණේ දේශපාලඥයින් ජනතාව රවටනවා. උතුරේ දේශපාලඥයිනුත් යම් පමණකින් උතුරේ ජනතාව රවට්ටමින් සිටිනවා නේද?
මම කතා කරන්නේ දෙමළ ජාතික සන්ධානය ගැනයි. අපි කවදාවත් උතුරේ ජනතාව රැවැට්ටුවේ නැහැ. දකුණේ දේශපාඥයින්, දකුණේ ජනතාව රවට්ටනවා කියන එක ඇත්තයි. ඒ විතරක් නෙමෙයි දකුණේ දේශපාලඥයින් රටම රවටනවා. වැදගත්ම දේ තමයි දකුණේ දේශපාලඥයින් ඒ ඒ කාලවලදී පටු බල අරමුණු වෙනුවෙන් උතුරේ දේශපාලඥයින් රැවැට්ටවීම. අපි පක්ෂයක් විදියට දෙමළ ජනයාගේ අයිතිවාසිකම් ආරක්ෂා කරන්න මැදිහත් වෙමින් සිටිනවා. දකුණේ දේශපාලඥයින් මැතිවරණ සමයේදී බලයට පැමිණීමට ජාතිවාදය අවුස්සනවා. ඡන්දකාලෙට දකුණේ දේශපාලඥයින් උතුරු නැගෙනහිර දේශපාලඥයින් රැවැට්ටවීම අද පමණක් නෙමෙයි නිදහසේ පටන් කරමිනුයි සිටින්නේ. ටීඑන්ඒ එක 2015 දී මෛත්‍රී ගේන්න කැප වුණේ දින සීයෙන් පාර්ලිමේන්තුව විසිරුවා නව ව්‍යවස්ථාවක් ගේන්න පොරොන්දු වුණ නිසායි. එසේ නැතිව රට බෙදන්න හෝ වෙනත් පටු අරමුණක් අපට තිබුණේ නැහැ. අපි මෛත්‍රී පාලනය සම්බන්ධයෙන් මහත් අපේක්ෂාවෙන් යුතුව වැඩ කළා. නමුත් සිදු වූවේ ඔහු බලයට අවුත් නැවත මහින්ද රාජපක්ෂ අගමැති කරවීමට තරම් වෙනස් ගමනක් ආරම්භ කිරීමයි. ඒ ආකාරයට දකුණේ දේශපාලඥයින් සෑම යුගයකම කළේ මැතිවරණ ජයග්‍රහණයට අපේ දේශපානඥයින් රවටා ගැනීමයි. මේ අතර මේ ආණ්ඩුවත් එක්ක එකතුවෙලා සිටින උතුරේ දේශපාලනඥයින් කරන්නේ උතුරේ ජනතාව මුලා කිරීම තමයි.■
