■ අනුරංග ජයසිංහ
කල්ලාරු පරිවාර රක්ෂිත වනාන්තරය එළි කිරීම සම්බන්ධයෙන් පෞද්ගලික මුදලින් එයට හිලව් ලෙස වන වගා කළ යුතු බවට අභියාචනාධිකරණය ලබා දී ඇති තීන්දුවට එරෙහිව රිෂාඞ් බදියුදීන් මහතා ශ්‍රේෂ්ඨාධිකරණයේ අභියාචනයක් ගොනු කිරීමට බලාපොරොත්තු වන බව වාර්තා වෙයි.
මේ වන විට ඔහුගේ නීතිඥයන් ඒ සඳහා ලිපිගොනු සකස් කරමින් සිටින අතර ඉදිරි සතියේ අභියාචනය ගොනු කිරීමට සැලසුම් කර ඇත.
අභියාචනාධිකරණ විනිසුරුවරුන් වන ජනක් ද සිල්වා සහ බන්දුල කරුණාරත්න නොවැම්බර් 17 වැනිදා තීන්දුව ලබා දී තිබුණි. එම නඩුව, මරිච්චිකට්ටු ප්‍රදේශයේ නැවත පදිංචිකිරීම්වලදී කල්ලාරු රක්ෂිතයට හානි සිදු කර ඇතැයි සඳහන් කරමින් රිට් ආඥාවක් ඉල්ලා පරිසර යුක්ති කේන්ද්‍රය ගොනු කර තිබුණි. රිෂාඞ් බදියුදීන් එහි හත්වැනි වගඋත්තරකරු විය. ■
