අධිකරණ අමාත්‍ය අලි සබ්රිට ඥාතිත්වයක් ඇති මිය ගිය කාන්තාවකගේ දේහයක් ඒ සම්බන්ධයෙන් කරන ලද පළමු පරීක්ෂණයේදී කොවිඞ්-19 ආසාදිතයෙකු බවට තහවුරු වී තිබියදී භූමදාන කර ඇතැයි වාර්තා වේ.
රත්මලාන බොරුපන වළගම්බා මාවතේ පදිංචි අහමඞ් ජුනයිදීන් ෆාතිමා නලීෆා නම් නොවැම්බර් 15 වැනිදා මිය ගොස් ඇති අතර එම මරණය ආරංචි වීමෙන් පසු එහි පැමිණි මහජන සෞඛ්‍ය පරීක්ෂකවරුන් කොවිඞ්-19 පරීක්ෂණ සඳහා එම දේහය කළුබෝවිල ශික්ෂණ රෝහලට රැගෙන ගොස් ඇත. එහිදී කරන ලද පීසීආර් පරීක්ෂණයේදී එම කාන්තාවට කොවිඞ්-19 වැළඳී ඇතැයි තහවුරු වී ඇත. ඒ අනුව ප්‍රදේශයේ මහජන සෞඛ්‍ය පරීක්ෂකවරුන් මියගිය කාන්තාවගේ ආශ්‍රිත පවුල් තුනක 12 දෙනෙකු පමණ නිරෝධායනයට යොමු කර ඇත.
ඉන්පසු එම මළසිරුර සම්බන්ධයෙන් ඉහළ බලපෑමක් මත දෙවන පීසීආර් පරීක්ෂණයක් සිදු කර ඇත. එම කාන්තාවට කොවිඞ්-19 වැළඳී නැතැයි වාර්තා ලැබුණු බව පවසමින් එම මරණය භූමදාන කිරීම නොවැම්බර් 17 වැනිදා සවස රත්මලාන ප්‍රදේශයේ මුස්ලිම් සුසාන භූමියකදී සිදු කර ඇත. අනිද්දා කළ විමසීමකදී රත්මලාන ප්‍රදේශයේ සෞඛ්‍ය වෛද්ය නිලධාරී කාර්යාලය යටතේ සේවය කරන නිලධාරියෙකු ප්‍රකාශ කළේ, සෞඛ්‍ය නිලධාරීන් මෙම කාන්තාවගේ සිරුර කළුබෝවිල රෝහලට බාරදුන් බවත්, පසුව එම කාන්තාව වෙනුවෙන් සිදු කළ පීසීආර් පරීක්ෂණයෙන් ඇය ආසාදිත කාන්තාවක බව දැනගන්නට ලැබුණු බවත්ය. ඉන්පසු සිදු වූයේ කුමක්දැයි නොදන්නා බවත් ඔහු කීය. ඇය කොවිඞ්-19 රෝගියෙකු සමඟ සම්බන්ධතා පැවැත්වූ බවට කිසිදු තොරතුරක් නොලැබුණු බවද ඔහු වැඩිදුරටත් කීය. කෙසේ වෙතත් එම සිදුවීමෙන් පසු කාන්තාවගේ ආශ්‍රිතයන් වන පවුල් තුනක් නිරෝධායනයට යොමු කළ බව නිලධාරියා වැඩිදුරටත් ප්‍රකාශ කළේය.
මෙම සිදුවීම පිළිබඳ විමසීම සඳහා අධිකරණ අමාත්‍ය අලි සබ්රි සම්බන්ධ කරගැනීමට අප ගත් උත්සාහය අසාර්ථක විය. කෙසේ වෙතත් ෆැක්ට්ක්‍රෙස්කෙන්ඩෝ නම් කරුණු පරීක්ෂා කිරීම් කරන ආයතනය කළ විමසීමකදී අලි සබ්රි මහතා කියා තිබුණේ ඇය තමාගේ දුර ඥාතියෙකු වන බවය. ඇයට සිදු කළ පීසීආර් පරීක්ෂණයේ ප්‍රතිඵල විකෘති කිරීමට බලපෑම් කළ බවට එල්ල වන චෝදනා ඔහු එහිදී ප්‍රතික්ෂේප කර ඇත.
කොවිඞ්-19 ආසාදිතයන් හෝ සැක සහිත පුද්ගලයන් භූමදාන කිරීම ලෝක සෞඛ්‍ය සංවිධානයේ නිර්දේශවලට පටහැනි නොවන නමුත්, ශ්‍රී ලංකාවේ සෞඛ්‍ය අමාත්‍යාංශය කොවිඞ්-19 ආසාදිතයන් භූමදාන කිරීම සඳහා අවසර ලබා දී නැත. නිර්දේශිත ක්‍රමවේද අනුව භූමදාන කළහොත් කොවිඞ්-19 පැතිර යන බව කිසිදු විද්‍යාත්මක පර්යේෂණයකින් තහවුරු කර ඇතැයි වාර්තා නොවේ.
අධිකරණ අමාත්‍ය අලි සබ්රි ලෝක සෞඛ්‍ය සංවිධානයේ නිර්දේශ සහ විද්‍යාත්මක කරුණු පෙන්වාදෙමින් පසුගිය කාලසීමාවේ භූමදාන සඳහා අවසර ලබාදෙන ලෙස ප්‍රසිද්ධියේ ඉල්ලීම් කළ අතර, කැබිනට් මණ්ඩල රැස්වීමේදීද භූමදාන සඳහා අවසර ලබාදෙන ලෙස ඉල්ලීමක් කර තිබුණි.
මීට පෙර අවස්ථා කිහිපයකදීම කොවිඞ්-19 තිබේයැයි පීසීආර් පරීක්ෂණයකින් තහවුරු නොවුණත් සැකසහිත යැයි සලකා පුද්ගලයන් භූමදාන කළ බව වාර්තා විය. මැයි 05 වැනිදා මෝදර ප්‍රදේශයේ වාසය කළ අබ්දුල් හමීඞ් මොහොමඞ් රෆයිඩීන් නම් 64 හැවිරිදි මුස්ලිම් ජාතිකයෙකුට කොවිඞ්-19 වැළඳී තිබේද යන්න තහවුරු කර නොගෙන ඔහු සැකසහිත රෝගියෙකු ලෙස සලකා සිරුර ආදාහනය කිරීම එවැනි සිදුවීමකි.■
