හිරු ටීවී ආයතනයේ එක් තේමා පාඨයක් වන්නේ, එම ආයතනය ‘සියල්ලට ඉහළින්’ සිටින බවය. දැන් පෙනෙන්නට ඇත්තේ එම ආයතනයට නීතියටත් ඉහළින් සිටීම සඳහා අවසර ඇති බවය.
ඔක්තෝබර් 31 වැනිදා කොළඹ දිස්ත්‍රික්කයේ නිරෝධායන නීති ක්‍රියාත්මක වන අතරතුර එම නීති උල්ලංඝනය කරමින් තලවතුගොඩ පිහිටි හිරු ලයිෆ් ස්ටුඩියෝ නම් ස්ථානයේදී ‘හිරු ස්ටාර්’ නම් රියැලිටි වැඩසටහන සජීවීව පවත්වා තිබුණි. එම රියැලිටි තරගයට ඉදිරිපත් වන තරගකරුවන්ගේ පවුල්වල සාමාජිකයන්ද එම වැඩසටහනට සහභාගි වී තිබුණු අතර නිරෝධායන නීති කඩ කරමින් ඔවුන් වැඩසටහනේදී කටයුතු කර තිබුණි.
මෙම වැඩසටහන ක්‍රියාත්මක කරන අතරතුර ලංකාදීප ආයතනයේ මාධ්‍යවේදියෙකු කොළඹ ප්‍රදේශය භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්ගෙන් ඒ ගැන විමසීය. ඔහු එම වැඩසටහන පිළිබඳ නොදන්නා බව ප්‍රකාශ කර තිබුණි. ඊට අමතරව ශ්‍රී ලංකා තරුණ ජනමාධ්‍යවේදීන්ගේ සංගමය නොවැම්බර් 01 වැනිදා මේ ප්‍රවෘත්ති අධ්‍යක්ෂ ජෙනරාල්වරයාට යවන ලද ලිපියකින් මේ පිළිබඳ දැනුම් දී තිබුණි.
මේ වන විට ලංකාවේ කොවිඞ්-19 මර්දනය කිරීමේදී ප්‍රධාන ප්‍රශ්නයක් වී ඇති බව ආණ්ඩුවම කියන්නේ සාමාන්‍ය ජනතාව නිරෝධායන නීති අනුගමනය නොකිරීමයි. නොවැම්බර් 01 වැනිදා කොවිඞ් මර්දන කාර්යසාධක බලකාය හමු වූ අවස්ථාවේ ජනාධිපති ගෝඨාභය රාජපක්ෂ පවා වගකීම් විරහිත ලෙස කටයුතු කිරීම ගැන ජනතාවට දෝෂාරෝපණය කර තිබුණි.
ආණ්ඩුවට ඉතා හිතවත්, රටේ දැවැන්ත රූපවාහිනී ආයතනයක් ප්‍රසිද්ධියේ නීති කඩකරන විට සාමාන්‍ය ජනතාවගෙන් ඊට වඩා වෙනස් තත්වයක් අපේක්ෂා කරන්නේ කෙලෙසද?
කොවිඞ්-19 පාලනය සඳහා 1897 අංක තුන දරන නියෝධායන හා රෝග වැලැක්වීමේ ආඥා පනත අනුව නිරෝධායන නියෝග සෞඛ්‍ය අමාත්‍ය පවිත්‍රා වන්නිආරච්චි මහත්මිය ගැසට් කළාය. ඒවා නිීත්‍යනුකූලද, කොවිඞ් මර්දනය වෙනුවෙන් නව පනතක් පාර්ලිමේන්තුවේ සම්මත කළ යුතුද, යන්න වෙනම සාකච්ඡා කළ යුතු කාරණයකි. ඇඳිරි නීතියේ නීත්‍යනුකූලභාවය ගැන පවා ප්‍රශ්න ඇත. එහෙත්, ඒවා ප්‍රශ්න කරන උදවිය පවා මේ වන විට ඇඳිරි නීතිය පිළිපදින්නේ එය වසංගතය පැරදවීමට ඇති ප්‍රධාන ක්‍රමය වන නිසාය.
මේ තත්වය යටතේ වුව මාධ්‍ය ආයතන ප්‍රවෘත්ති වාර්තාකරණය සිදු කිරීම අත්‍යවශ්‍ය කාරණයක් බව සැබෑවකි. ඒ අනුව ජනමාධ්‍යවේදීන්ට ඒ සඳහා අවශ්‍ය පහසුකම් සැලසීම ආණ්ඩුව කළ යුතුය. මේ වන විට මාධ්‍යවේදීන්ගේ ආයතනික හැඳුනුම්පත ඇඳිරි නීති බලපත්‍රයක් ලෙස සලකන්නේ ඒ අනුවය.
හිරු ලයිෆ් ස්ටුඩියෝ නම් ස්ථානයට එම වැඩසටහන වෙනුවෙන් ජනමාධ්‍යවේදීන් හෝ ජනමාධ්‍ය සේවකයන් නොවන, ජනතාවගේ තොරතුරු දැනගැනීමේ අයිතියට අදාල නොවන සැලකිය යුතු පිරිසක් ගෙන්වා තිබුණි. එම පුද්ගලයන් අතර බස්නාහිර පළාතට පිට ප්‍රදේශවල සිට පවා පුද්ගලයන් ගෙන්වා ඇති බව වාර්තා වෙයි. ඒ අනුව සාමාන්‍ය පුද්ගලන්ට බලපාන ඇඳිරි නීතිය එලෙස ගෙන්වූ පුද්ගලයන්ට බලපා නැත.
ඇඳිරි නීතිය පවතින අවස්ථාවක මෙවැනි වැඩසටහනක් හිරු ටීවී ආයතනය පැවැත්වූ පළවැනි අවස්ථාව මෙය නොවේ. අප්‍රේල් මාසයේ ඇඳිරි නීතිය පවතින අවස්ථාවක හිරු ටීවී ආයතනය අවුරුදු උත්සවයක් පටිගත කර තිබුණි. එම වැඩසටනේ පුහුණුවක වීඩියෝපටයක්ද සමාජ මාධ්‍යවල හුවමාරු විය.
එහෙත්, හිරු ටීවී ආයතනයට ඒ සම්බන්ධයෙන් නීතිය ක්‍රියාත්මක වුණේ නැත. ඒ වෙනුවට කළේ එම වැඩසටහන වීඩියෝ කොට සමාජ මාධ්‍යවලට මුදාහරින ලද බව චෝදනා කරමින් හිරු ටීවී ආයතනයේ ප්‍රවෘත්ති නිෂ්පාදකවරයෙකු සහ වේෂ නිරූපණ ශිල්පියෙකු රැකියාවෙන් ඉවත් කිරීමය. එම රැකියාවෙන් ඉවත් කිරීම් සිදු කළේ මූලික කම්කරු නීති අනුගමනය කරමින් නොවේ. ඔවුන් වීඩියෝ මුදාහරින ලද බවට එල්ල කරන ලද චෝදනා තහවුරු කිරීමට සාධාරණ පරීක්ෂණයක්වත් කර තිබුණේ නැත. මේ වන විට රැකියාවෙන් ඉවත් කරන ලද ප්‍රවෘත්ති නිෂ්පාදකවරයා එයට එරෙහිව කම්කරු උසාවියේ හිරු ටීවී ආයතනයට එරෙහිව නඩු පැවරීමක්ද සිදු කර ඇත.
පළමු දිනයේ ඇති වූ ආන්දෝලනයෙන් පසු හිරු ටීවී ආයතනය දෙවැනි දිනයේදී සජීවී ප්‍රේක්ෂාගාරය නොමැතිව, තරගකරුවන් සහ විනිශ්චය මණ්ඩලය පමණක් සහභාගි කරවාගනිමින් වැඩසටහන පවත්වා තිබුණි. එය සාපේක්ෂව යහපත් තත්වයක් වුණත්, ඔවුන් නිරෝධායන නීති ප්‍රසිද්ධියේ කඩ කිරීම පිළිබඳ නීතිය ක්‍රියාත්මක නොවීම බරපතළ තත්වයක් ලෙස සැලකිය යුතුය.
මෙම වැඩසටහනට අදාලව නීතිය ක්‍රියාත්මක කරන්නේදැයි විමසීමට පොලිස් මාධ්‍ය ප්‍රකාශක අජිත් රෝහණ සහ ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් සම්බන්ධ කරගැනීමට අප ගත් උත්සාහය අසාර්ථක විය.
නිවෙස්වල සිර වී සිටින ජනතාවට විනෝදාස්වාදය සඳහා විවිධ වැඩසටහන් විකාශය කිරීම නරක කාරණයක් නොවේ. එහෙත්, විනෝදාස්වාදය සඳහා ඇති එකම ක්‍රමය මෙවැනි වැඩසටහන් පැවැත්වීම පමණක් නොවන බවත් සිහි තබාගත යුතුය. ලොවපුරා බොහෝ වැඩසටහන් අවදානම් කාලසීමාවේ තම තමන්ගේ සජීවී වැඩසටහන් පවත්වන සජීවී ප්‍රේක්ෂකාගාර වසා දමා තිබුණි. කොටින්ම කිවහොත්, ඩොලර් මිලියන ගණන් වටිනා ඇමෙරිකාවේ දැවැන්තම විනෝදාස්වාද වැඩසටහනක් වන ‘සැටඬේ නයිට් ලයිව්’ වැඩසටහන පවා එරට කොවිඞ්-19 පැතිර ගිය මුල් අදියරේදී කර තිබුණේ සජීවී ප්‍රේක්ෂකාගාර වසා දමා, නිවෙස්වල සිටය.
පසුගිය කාලසීමාව වන විට ඇමෙරිකාව ඇතුළු ලොව ඇතැම් රටවල විනෝදාස්වාද වැඩසටහන් පැවැත්වීමට සජීවී ප්‍රේක්ෂකාගාර කිහිපයක් විවෘත කර ඇත. එහෙත් ඒ සඳහා විශේෂ අවසර ලබාගෙන, පවතින නීතියට අනුකූලව ඒවා සිදු කර ඇත. එය සිදු කරන්නේත් වැඩසටහනට සහභාගී වන සියළු දෙනා පීසීආර් පරීක්ෂාවලට නිරන්තරයෙන් ලක් කරමින් ය. වැඩසටහන්වලට සහභාගී වන පුද්ගලයන් පවුල්වලින් වෙන් කර තැබීම ඇතුළු නොයෙකුත් ක්‍රමවේද එවැනි රටවල්වල පාවිච්චි කරයි.
විශේෂයෙන් මෙවැනි වැඩසටහන්වලට සහභාගී වන සේවයකයන්ගේ ආරක්ෂාවටත් එසේ නොකිරීමෙන් අවදානමක් එල්ල වේ. අප්‍රේල් මාසයේදී හිරු ටීවී ආයතනයේම වේෂ නිරූපණ ශිල්පිනියක පටිගත කිරීම්වලට සහභාගී වන පුද්ගලයන්ගේ සෞඛ්‍යාරක්ෂාව සඳහා ක්‍රමවේදයක් සකසන ලෙස ප්‍රධානීන්ගෙන් ඉල්ලීමක් කර තිබුණි. එම ඉල්ලීම කිරීමෙන් පසු ඇගේ රැකියාවත් අහිමි වී තිබුණි.
මෙවැනි වැඩසටහන්වල පටිගත කිරීම්වලට කැමරා ශිල්පීන්, වේෂ නිරූපණ ශිල්පීන්, සුළු සේවකයන්, ප්‍රවාහන සේවා ඇතුළු විවිධ පිරිස් සහභාගී වේ. මෙවැනි වැඩසටහනක් පවත්වන්නේ නම් ඔවුන්ගේ ආරක්ෂාව පිළිබඳවත් සැලකිලිමත් විය යුතුය.
එසේ නොකර, නීතියත් කඩ කරමින් ‘හිරු ස්ටාර්’ පැවැත්වීම හුදු නීතිය නොතකා කටයුතු කිරීමක් පමණි. හිරු ස්ටාර් නොතිබුණාට අපේ පුරවැසියන්ට විනෝදාස්වාදය ලබාගැනීමේ ක්‍රමවල අඩුවක් වන්නේ නැත.
දේශපාලන නායකයන්, මාධ්‍ය ආයතන හා අනෙකුත් ප්‍රසිද්ධ පුද්ගලයන් හිතුමතේ නීති කඩකිරීම් ප්‍රසිද්ධියේ සිදුවන තරමට සාමාන්‍ය ජනතාවගෙන්ද නීති රැකීමක් අපේක්ෂා කළ නොහැකි බව අමුතුවෙන් විස්තර කළ යුතු නැත.
