ජනාධිපති කාර්යාලයත් අමාත්‍යාංශයක් වෙයි
20 විවේචනය කළ වාසුට, විමල්ට වරදාන
කැබිනට් අමාත්‍යවරුන්ට හා රාජ්‍ය අමාත්‍යවරුන්ට විෂයන් කාර්යයන් හා රාජ්‍ය ආයතන ලබාදීම සඳහා ජනාධිපතිවරයා නිකුත් කළ නිවේදනය සති හතක කාලයකදී යළි වෙනස් කර තිබේ.
කැබිනට් අමාත්‍යාංශ 28ක් හා රාජ්‍ය අමාත්‍යාංශ 40ක් සඳහා එම නිවේදනය මුලින්ම නිකුත් කරනු ලැබුයේ අගෝස්තු 9 වැනිදාය. එම නිවේදනය යළි වෙනස් කර තිබෙන්නේ සැප්තැම්බර් 25 දින සිට ක්‍රියාත්මක වන පරිදිය.
මෙම වෙනස් කිරීමේදී කැබිනට් අමාත්‍යාංශ ප්‍රමාණය හෝ රාජ්‍ය අමාත්‍යාංශ ප්‍රමාණය වැඩිකර නැත. එහෙත් සමහර කැබිනට් හා රාජ්‍ය අමාත්‍යවරුන්ට පැවරූ කාර්යයන් හා රාජ්‍ය ආයතන වෙනස් කර ඇත. විශේෂම කාරණය වී ඇත්තේ ඉතිහාසයේ පළමු වතාවට අමාත්‍යාංශ විෂයන් වෙන් කිරීමේ ගැසට් පත්‍රයක ජනාධිපති කාර්යාලයද අමාත්‍යාංශයක තත්වයකට පත්කර ඊට අදාළ කාර්යයන් හා ආයතනද නම්කර තිබීමය.
විද්‍යාත්මකව වෙන්කරන ලද අමාත්‍යාංශ හා ඒවාට අයත් ආයතනත් කාර්යයනුත් සති හතක කාලයකින් වෙනස් කිරීමට සිදුවීමෙන් පෙනෙන්නේ එහි ඇති විද්‍යාත්මක බවට වඩා අවිද්‍යාත්මක බවය. එය මොහොතකට පැත්තකින් තිබ්බත් මෙම ගැසට් නිවේදනය තුළට ජනාධිපතිවරයාගේ කාර්යාලය පැමිණීම විශේෂයෙන් සැලකිය යුත්තකි. එම විශේෂත්වය තුළ ඇති කරුණු කාරණා සාකච්ඡාවට පෙර කැබිනට් හා රාජ්‍ය ඇමතිවරුන්ට අලුත් තත්වය තුළ වී ඇති දේ සලකා බැලුවහොත් එම වෙනස්වීම් මේ ආකාරයට පෙළගැස්විය හැකිය.
ඇමති බලතල වෙනස්වීම්
අග්‍රාමාත්‍යවරයාද වන මුදල් ඇමති මහින්ද රාජපක්ෂට අලුතින් ආයතන කිහිපයක්ම එකතු කර ඇති අතර රාජ්‍ය සේවා අන්‍යෝන්‍ය අර්ථසාධක සංගමය හා එම ගැසට් නිවේදනයේම ඈවර කිරීමට නියමිත ලෙස සඳහන් කර ඇති මාංශ භෝග හා ධාන්‍ය පර්යේෂණ සහ නිෂ්පාදන අධිකාරිය, සීමාසහිත ජනතා ෆර්ටිලයිසර් එන්ටර්ප්‍රයිසස්, සීමාසහිත හිඟුරාන සීනි කර්මාන්ත සමාගම හා දරුවන් සුරකිමු ජාතික භාර අරමුදල යන ආයතන ඒවා වේ.
සමෘද්ධි ගෘහ ආර්ථික, ක්ෂුද්‍ර මූල්‍ය, ස්වයං රැකියා, ව්‍යාපාර සංවර්ධන හා ඌන උපයෝජන රාජ්‍ය සම්පත් සංවර්ධන රාජ්‍ය අමාත්‍ය ශෙහාන් සේමසිංහට ලබාදී තිබූ ජාතික ව්‍යවසාය සංවර්ධන අධිකාරිය ඔහුගෙන් ඉවත් කර කර්මාන්ත අමාත්‍ය විමල් වීරවංශට එම ආයතනය ලබාදී තිබේ. ඊට අමතරව විමල් වීරවංශට ‘අපේ ගම’ද ලබාදී තිබේ. නාගරික සංවර්ධන, වෙරළ සංරක්ෂණ, අපද්‍රව්‍ය බැහැරලීම හා ප්‍රජා පවිත්‍රතා කටයුතු රාජ්‍ය අමාත්‍ය නාලක ගොඩහේවාට සෙලෙන්දිව ඉන්වෙස්ට්මන්ට්ස් ලිමිටඞ් නම් අලුත් සමාගමක් අලුතින් ලබාදී තිබේ.
රාජ්‍ය සේවා, පළාත් සභා හා පළාත් පාලන අමාත්‍ය ජනක බණ්ඩාර තෙන්නකෝන් යටතේ තිබූ රාජ්‍ය සේවා අන්‍යෝන්‍ය අර්ථසාධක සංගමය ඉවත් කර ඇති අතර ඔහුට අලුත් සුවිශේෂ ප්‍රමුඛතාවක්ද ලබාදී තිබේ. ඒ සංස්ථා, අර්ධ රාජ්‍ය, බැංකු සහ පෞද්ගලික අංශය සඳහා සේවක අර්ථසාධක අරමුදලට අමතරව දායකත්ව විශ්‍රාම වැටුප් ක්‍රමයක් හඳුන්වාදීමය.
අධ්‍යාපන අමාත්‍ය ජී.එල්. පීරිස්ට දහම් පාසල්, භික්ෂු අධ්‍යාපන, පිරිවෙන් හා බෞද්ධ විශ්වවිද්‍යාල රාජ්‍ය ඇමතිවරයා යටතේ තිබූ බුද්ධශ්‍රාවක භික්ෂු විශ්වවිද්‍යාලයත්, බෞද්ධ හා පාලි විශ්වවිද්‍යාලයත්, නිපුණතා සංවර්ධන, වෘත්තීය අධ්‍යාපන, පර්යේෂණ හා නව නිපැයුම් රාජ්‍ය අමාත්‍ය සීතා අරඹේපොල යටතේ තිබූ ශ්‍රී ලංකා උසස් තාක්ෂණ අධ්‍යාපන ආයතනයත් ලබාදී ඇත.
පරිසර අමාත්‍ය මහින්ද අමරවීරට ශ්‍රී ලංකා ක්ලයිමේට් ෆන්ඞ් ප්‍රයිවට් ලිමිටඞ් නම් ආයතනය අලුතින් එකතු කර ඇති අතර වනජීවි රැකවරණය, අලිවැට හා අගල් ඉදිකිරීම ඇතුළු ආරක්ෂිත වැඩපිළිවෙළවල් හා කැළෑ නැවත වගා කිරීම හා වන සම්පත් සංවර්ධන රාජ්‍ය අමාත්‍ය විමලවීර දිසානායකට සංචාරක අමාත්‍ය ප්‍රසන්න රණතුංග යටතේ තිබූ ජාතික සත්වෝද්‍යාන දෙපාර්තමේන්තුව ලබාදී ඇත.
කෘෂිකර්ම අමාත්‍ය මහින්දානන්ද අමරවීර යටතේ තිබූ අපනයන කෘෂිකර්ම දෙපාර්තමේන්තුව හා සීමාසහිත ඇල්කඩුව වැවිලි සමාගම ඔහුගෙන් ඉවත් කර ඇත.
පොහොර නිෂ්පාදන හා සැපයුම්, රසායනික පොහොර හා කෘමිනාශක භාවිත නියාමන රාජ්‍ය අමාත්‍ය මොහාන් ද සිල්වාට ලබාදී තිබූ මාංශ භෝග හා ධාන්‍ය පර්යේෂණ සහ නිෂ්පාදන අධිකාරියත් සීමාසහිත ජනතා ෆර්ටිලයිසර් එන්ටර්ප්‍රයිසස් සමාගමත් ඔහුගෙන් ඉවත් කර ඇත.
වාරිමාර්ග අමාත්‍ය චමල් රාජපක්ෂ යටතේ තිබූ ජල සම්පත් මණ්ඩලය ඔහුගෙන් ඉවත් කර ජල සම්පාදන අමාත්‍ය වාසුදේව නානායක්කාරට ලබාදී ඇත. වැවිලි අමාත්‍ය රමේෂ් පතිරණ යටතේ තිබූ කුඩා තේ වතු සංවර්ධන අධිකාරිය සමාගම් වතු ප්‍රතිසංස්කරණ, තේ වතු ආශ්‍රිත භෝග වගා, තේ කර්මාන්ත ශාලා නවීකරණය හා තේ අපනයන ප්‍රවර්ධන රාජ්‍ය අමාත්‍ය කනක හේරත්ට ලබාදී ඇත. ඊට අමතරව සීමාසහිත ඇල්කඩුව වැවිලි සමාගම, රබර් සංවර්ධන දෙපාර්තමේන්තුව, රබර් පර්යේෂණ ආයතනය හා සීමාසහිත රබර් නිෂ්පාදන සහ අපනයන සංස්ථාව ඔහුට ලබාදී ඇත. රබර් කර්මාන්තයට අදාළ එම ආයතන ඊට පෙර තිබුණේ පොල්, කිතුල්, තල් හා රබර් වගා ප්‍රවර්ධනය හා ආශ්‍රිත කාර්මික භාණ්ඩ නිෂ්පාදන හා අපනයන විවිධාංගීකරණ රාජ්‍ය අමාත්‍ය අරුන්දික ප්‍රනාන්දු යටතේය.
උක්, බඩඉරිඟු, කජු, ගම්මිරිස්, කුරුඳු, කරාබුනැටි, බුලත් ඇතුළු කුඩා වැවිලි භෝග වගා සංවර්ධනය ආශ්‍රිත කර්මාන්ත හා අපනයන ප්‍රවර්ධන රාජ්‍ය අමාත්‍ය ජානක වක්කුඹුර යටතේ තිබූ හිඟුරාන සීනි කර්මාන්ත සමාගම ඉවත් කර ඇති අතර ඔහුට අපනයන කෘෂිකර්ම දෙපාර්තමේන්තුව ලබාදී ඇත.
වැදගත්ම දෙය වන්නේ ක්‍රීඩා අමාත්‍ය නාමල් රාජපක්ෂ යටතට පත්කර තිබූ රාජ්‍ය ආයතනයක් නොවූ ක්‍රිකට් පාලක මණ්ඩලය ඉන් ඉවත් කිරීමය.
20 වන සංශෝධනය ආරක්ෂා කරමින් කථා කරන අයට වඩා එය විවේචනය කරමින් කථා කරන වාසුදේව නානායක්කාර, විමල් වීරවංශ වැන්නවුන්ට අමාත්‍යාංශ විෂයන් වෙනස් කිරීමේ මෙම සංශෝධනයේදී යම් ආකාරයකට සලකා ඇති බව පෙනේ.
ජනාධිපති කාර්යාලය
අමාත්‍යාංශවලට මෙන්ම ජනාධිපති කාර්යාලයටද ඉතිහාසයේ පළමු වරට රාජ්‍ය ආයතන වෙන් කිරීමද, ඊට අයත් විෂය පථය, කාර්යයන් හා කර්ත්‍යවයන් පැහැදිලි කිරීමද, සුවිශේෂ ප්‍රමුඛතා නිර්ණය කිරීමද සිදුකර ඇත.
ඒ අනුව ජනාධිපති ලේකම් කාර්යාලය යටතට නිල වශයෙන්ම පත් කර ඇති ආයතන වන්නේ ශ්‍රී ලංකා විදුලි සංදේශ නියාමන කොමිෂන් සභාව හා අනුබද්ධිත ආයතන, තොරතුරු හා සන්නිවේදන තාක්ෂණ නියෝජිතායතනය හා ඊට අනුබද්ධිත ආයතන, ශ්‍රී ලංකා පරිගණක හදිසි ප්‍රතිචාර සංසදය, ශ්‍රී ලංකා ආයෝජන මණ්ඩලය, කොළඹ වරාය නගර ව්‍යාපෘතිය, ශ්‍රී ලංකා ටෙලිකොම් සමාගම හා එහි පාලිත සමාගම් සහ ආශ්‍රිත ආයතන, සියලුම තොරතුරු තාක්ෂණ උද්‍යාන, ත්‍රිවිධ හමුදා සාමාජිකයන් කොරෝනා වෛරසය ආසාදනයෙන් වළක්වා ගැනීම සඳහා සෑම හමුදාවක් විසින්ම ගත යුතු ක්‍රියාමාර්ග අධ්‍යයනය කර එකී පියවර ක්‍රියාත්මක කිරිම සඳහා උපදෙස් ලබාදීම පිණිස වන ජනාධිපති කාර්ය සාධක බලකාය, සුරක්ෂිත රටක්, විනය ගරුක, ගුණ ගරුක හා නීති ගරුක සමාජයක් ගොඩනැගීම සඳහා වන ජනාධිපති කාර්ය සාධක බලකාය, කොවිඞ් 19 අමාත්‍යාංශ කාර්ය සාධක බලකාය, නැගෙනහිර පළාත තුළ පුරාවිද්‍යාත්මක උරුමය කළමනාකරණය සඳහා වන ජනාධිපති කාර්ය සාධක බලකාය, ශ්‍රී ලංකාවේ අධ්‍යාපන කටයුතු පිළිබඳ ජනාධිපති කාර්ය සාධක බලකාය හා ආර්ථික පුනර්ජීවනය හා දරිද්‍රතාව තුරන් කිරීම සඳහා වන ජනාධිපති කාර්ය සාධක බලකාය යන රාජ්‍ය ආයතන, රාජ්‍ය සමාගම් හා කාර්ය සාධක බලකා වේ.
ශ්‍රී ලංකා ටෙලිකොම් සමාගම යටතේ ශ්‍රී ලංකා මොබිටෙල් සමාගම ඇතුළු අනුබද්ධ සමාගම් 9ක් ඇති අතර තොරතුරු හා සන්නිවේදන තාක්ෂණ නියෝජිතායතනය යටතේ රාජ්‍ය අංශයට අදාළ ව්‍යාපෘති 28ක් ක්‍රියාත්මක වේ.
ඒ ආකාරයට රාජ්‍ය ආයතන රැසක් යටතට ගෙන ඇති නිල නොවන අමාත්‍යාංශයක් යැයි කිව හැකි ජනාධිපති කාර්යාලයේ කාර්යය හා කර්තව්‍යයන් වන්නේ සෞභාග්‍යයේ දැක්ම ප්‍රතිපත්ති ප්‍රකාශයට අනුකූලව සහ රජය මගින් ක්‍රියාත්මක කරනු ලබන ජාතික ප්‍රතිපත්තීන් මත පිහිටා ජනාධිපති කාර්ය සාධක බලකායන්ගේ ද දායකත්වය ලබා ගනිමින් අදාළ අමාත්‍යාංශ හා සම්බන්ධිකරණය කරමින් එම ගැසට් නිවේදනයේ දැක්වෙන අමාත්‍යාංශ යටතට පත්කර ඇති රාජ්‍ය ආයතන අපේක්ෂිත ඉලක්ක කරා මෙහෙයවීම, අධීක්ෂණය හා පසුවිපරම් කිරීම වේ.
අමාත්‍යංශ තිබුණද අනෙක් ඇමතිවරුන්ට ජනාධිපතිවරයාගේ කාර්යාලයේ අනුමැතියෙන් තොරව කිසිවක් කිරීමට ජනාධිපතිවරයා ඉඩ ලබාදී නොමැති බව මෙම සංශෝධිත ගැසට් පත්‍රයෙන්ම පෙනේ. 20 වන සංශෝධනය සම්මත වීමටත් පෙරම තත්වය මෙය නම් 20 වන සංශෝධනය මේ තිබෙන ආකාරයට ම සම්මත වුවහොත් සිදුවනු ඇත්තේ නාමික අමාත්‍යාංශ ඇති, නාමික අමාත්‍යවරු හා නාමික අග්‍රාමාත්‍යවරයෙකු පාර්ලිමේන්තු මන්ත්‍රීවරු අතරෙන් පත්වන ජනාධිපතිවරයා ඔහුගේ නිලධාරීන් හා කාර්ය සාධක බලකා සාමාජිකයන් සමඟ ඔහුගේ හිතුමනාපයට පාලනය කරන රටක් නිර්මාණය වීමය.■
