රුසියාවේ තානාපතිවරයෙකු ලෙස කටයුතු කළ උදයංග වීරතුංග ඉදිරිපත් කරන ලද පැමිණිලි බාරගැනීමට දේශපාලන පළිගැනීම් පිළිබඳ සොයාබලන ජනාධිපති කොමිසම තීරණය කර ඇත.
එම පැමිණිල්ලෙන් ඔහු කියා ඇත්තේ අපරාධ පරීක්ෂණ දෙපාර්තමේන්තුව හා පොලිස් මූල්‍ය අපරාධ කොට්ඨාසය ඔහුගේ ගිණුම් අක්‍රිය කිරීම, අසත්‍ය තොරතුරු වාර්තාවක් මත අධිකරණයට ඉදිරිපත් කර සැකකරුවෙකු ලෙස නම් කිරීම, ජාත්‍යන්තර රතු නිවේදනයක් නිකුත් කිරීම සහ උදර්පණ නීතිය යටතේ ලංකාවට රැගෙන ඒම යන කරුණු පිළිබඳවය.
ඔහුගේ පුද්ගලික භාණ්ඩ ඇතුළත් කන්ටේනරයක් රේගුව භාරයේ තබාගෙන නිදහස් නොකර තිබෙන බවද ජනාධිපති කොමිසම හමුවේ ඔහු කියා ඇත.
එමෙන්ම ඔහු කීර්තිමත් රාජ්‍ය තාන්ත්‍රික නිලධාරියෙකු ලෙස රුසියාව හා ශ්‍රී ලංකාව අතර ගොඩනැඟූ මිත්‍රත්වය බිඳ දැමීමට යහපාලන ආණ්ඩුව කටයුතු කළ බවද වැඩිදුරටත් කියා ඇත.
උදයංග වීරතුංග යනු රාජපක්ෂ පාලක පවුලේ ඥාතියෙකි. ඔහු රුසියාවේ හා පසුව යුක්‍රේනයේ දැරූ තානාපතිකම්ද දේශපාලන පත්වීම්ය. නොඑසේව ඔහු විදේශ සේවයේ නිලධාරියෙක් නොවේ. රාජ්‍ය සේවයේ නිලධාරියෙකු හෝ ඉන් විශ්‍රාම ලැබූවෙක්ද නොවේ. ඔහුට තානාපතිකම් ලැබෙන්නේ රාජපක්ෂ පවුලේ ඥාතීත්වය නිසාය. ඔහුට තානාපතිකම් ලැබීමට ඔහුගේ පැමිණිලිවල සඳහන් චෝදනාවන්ට අදාළ හේතුද තිබිය හැකිය.
තානාපති සේවයට යවන මෙවැනි දේශපාලන පත්වීම්ධාරීන් ආණ්ඩු මාරුවීමත් සමඟ ආපසු කැඳවීම සාමාන්‍ය දෙයකි. විදේශ සේවයේ අයද ආණ්ඩු මාරුවීමකදී ආපසු කැඳවීම හෝ මාරු කිරීම සිදුකරයි. ඒවා දේශපාලන පළිගැනීම් යැයි කියන්නට හේතු නැත.
ඒ නිසාම විදේශ සේවයේ නිලධාරියෙකුද නොවන උදයංග වීරතුංග දේශපාලන පළිගැනීම් පිළිබඳ සොයාබලන ජනාධිපති කොමිසමට පැමිණිලි කිරීමට සුදුසුකම් ලබා තිබෙනවාද යන ප්‍රශ්නය පැන නගී.
මෙම ජනාධිපති කොමිසමට පැමිණිලි බාරගත හැක්කේ 2015 ජනවාරි මස 08 සිට 2019 නොවැම්බර් 16 තෙක් දේශපාලන පළිගැනීමට ලක් වූ රජයේ නිලධාරීන්ගේ, රාජ්‍ය සංස්ථාවල සේවකයන්ගේ, සන්නද්ධ හමුදා සාමාජිකයන්ගේ හා පොලීසියේ සාමාජිකයන්ගේ පමණය.
එමෙන්ම එම ජනාධිපති කොමිසම ස්ථාපිත කිරීම සඳහා ජනාධිපතිවරයා ප්‍රකාශයට පත් කර ඇති ගැසට් පත්‍රයේ පැහැදිලිවම සඳහන් කර ඇත්තේ පොලීසිය, අල්ලස් හෝ දූෂණ චෝදනා විමර්ශන කොමිසම හා නීතිපතිවරයා ගනු ලැබ ඇති හෝ ගනු ලැබිය හැකි කිසිදු පියවරකට මෙම කොමිසම මගින් අගතියත් සිදු නොවිය යුතු බවයි.
අධිකරණ කටයුතු තවමත් අවසන් නැති උදයංග වීරතුංගගේ ඉහත සමහර කරුණු පිළිබඳ පැමිණිලි බාරගැනීමෙන් ජනාධිපති කොමිසම සිදුකර ඇත්තේ ඉහත සඳහන් ආයතනවල කටයුතුවලට අගතියක්ද?
නිශ්ශංක සේනාධිපති මෙන්ම උදයංග වීරතුංගද තමන්ගේ නිර්දෝෂීභාවය ඔප්පු කර පෙන්විය යුත්තේ අධිකරණයේදීය.■
