සමගි ජන බලවේගයේ පාර්ලිමේන්තු මන්ත්‍රී
පාර්ලිමේන්තු මැතිවරණයෙන් සමගි ජනබල වේගය බලාපොරොත්තු වූ ඡන්ද ප්‍රතිඵලය ලබා ගන්න හැකි වුණාද?
ලැබුණු ප්‍රතිඵලය දිහා බැලුවාම, ජනාධිපතිවරණයේදී ශ්‍රී ලංකා පොදුජන පෙරමුණට ඡන්දය ලබා දුන් සියලු දෙනාම වගේ මේ මැතිවරණයේදීත් පොදුජන පෙරමුණටම ඡන්දය ලබා දීලා තියෙනවා. ඒත් අපිට ලබා දුන් ඡන්ද ප්‍රමාණය සමගි ජන බලවේගය සමඟ එකතු වුණු එක් එක් පක්ෂවලට බෙදිලා ගිහින් තියෙනවා. එහි ලොකු වෙනසක් වෙලා නැහැ. එක්සත් ජාතික පක්ෂය සමඟ සන්ධානගත වෙලා පාර්ලිමේන්තු මැතිවරණයට ඉදිරිපත් වුණා නම් මීට වඩා වැඩි ඡන්ද ප්‍රමාණයක් අපිට ගන්න තිබුණා. එසේ නම් පාර්ලිමේන්තුවේ තවත් ආසන 10 ක් පමණ අපිට වැඩි කරගන්න පුළුවන්කමක් තිබුණා.
ඒ කියන්නේ ඔබ ඇතුළු කණ්ඩායමත්, එජාපයත් එකිනෙකා වෙන්වීම නිසා කළකිරීමෙන් ඡන්ද අඩු වූ බවද?
අපි බලාපොරොත්තු වුණ ඡන්ද ප්‍රමාණය අපිට ලැබුණේ නැහැ. විශේෂයෙන්ම අපේ බෙදීම අපිට ඡන්ද නොලැබෙන්න හේතුවක් වෙන්න ඇති. එය තමයි සත්‍ය කතාව. අපිට විශාල ඡන්ද ප්‍රමාණයක් ලැබුණේ නැත්තේ එක්සත් ජාතික පාක්ෂිකයෝ මේ දෙකඩ වීමට අකමැති නිසා. ඒ බෙදී ගිය නිසා බොහෝ පාක්ෂිකයන් තමන්ගේ ඡන්දය ප්‍රකාශ කරන්න ඡන්ද පොළට ගියේ නැහැ.
සමගි ජන බලවේගයට සිංහල ජනතාවගේ ඡන්දවලට වඩා දෙමළ හා මුස්ලිම් ජනතාවගේ ඡන්ද වැඩිපුර ලැබිලා තියෙන බව පේනවාද?
සිංහල ඡන්ද සමගි ජන බලවේගයට ලැබිලා නැහැ කියලා කියන්න බැහැ. සිංහල ඡන්දත් අපිට ලැබිලා තියෙනවා. සිංහල ඡන්දවලින් බහුතරයක් පොහොට්ටුවට ගිහින් තියෙන්නේ. ඒකයි අපිට සිංහල ජනතාවගේ ඡන්ද සුළු ප්‍රමාණයක් ලැබිලා තියෙන්නේ. විශේෂයෙන්ම පසුගිය ජනාධිපතිවරණයේදී පොහොට්ටුවේ සාමාජිකයන් මේ රටේ මතයක් ඇති කළා සිංහල බෞද්ධ රාජ්‍යයක් පිළිබඳව. මේ විදියට ජාතිවාදය ඇවිස්සීමේ දේශපාලන ක්‍රමය අපේ රටට අලුත් දෙයක් නෙවෙයි. බණ්ඩාරනායක මහත්මයා පවා කළේ මේ ආකාරයේ මතවාද රට තුළ ව්‍යාප්ත කිරීම. ඒ ආකාරයේ මතවාදයක් රට තුළ මහා පරිමාණයෙන් ව්‍යාප්ත කිරීමේ ප්‍රතිපත්තිය තමයි මේ වෙද්දී පොදුජන පෙරමුණේ සාමාජිකයන් පවා අනුගමනය කරන්නේ. 1956 මතවාදය මේ වෙද්දී අලුත් වෙලා ඇවිත්. මේ ආකාරයේ මතවාද පතුරවමින් ඉදිරියේදී රට පාලනය කරන්න බැහැ. මේ ලෝකේ දේශපාලන මතවාද සමඟ ගැළපෙන ආකාරයේ පොරොන්දුවක් නෙවෙයි මේ මතවාදය. ඕක මිනිස්සුන්ගේ හැඟීම් අවුස්සලා හදපු මතවාදයක්. ඔවුන් මේ වෙද්දි බහුතර ඡන්දයක් ලබාගෙන තිබෙනවා.
දහනව වැනි සංශෝධනය අහෝසි කර නව ව්‍යවස්ථාවක් ගෙන එන බව වත්මන් ආණ්ඩුව පවසනවා…
වත්මන් ආණ්ඩුව ප්‍රධාන වශයෙන්ම බලයට එන්නේ ජාතිවාදය, ආගම්වාදය මුල්කොට ගෙන සිදුකළ ප්‍රචාරණ කටයුතුවලින්. දැන් බලය ලබා ගත් පසුව ඔවුන් බලන්නේ රටේ තියෙන ප්‍රජාතන්ත්‍රවාදය කප්පාදු කරලා දාන්න. ඇත්තටම මේ රට යන්නේ භයානක ප්‍රවණතාවකට. ඉතිං අපි බලමු. ජනතාව ඔවුන්ට ලබාදීලා තියෙන වරම නිසා තමයි ඔවුන් මේ දේවල් කරන්න යන්නේ කියලා ඔවුන් කියන්නේ. ජනතාවගේ වරම අවභාවිත කරලා අනිවාර්යයෙන්ම මේ අය රට ආපහු පසුගාමී තැනකට ඇද දමන්න සූදානම් වෙන බව අපි දන්නවා. 19 වෙනි සංශෝධන මගින් අපි ලබා ගත් ප්‍රජාතන්ත්‍රවාදී ආයතන සහ නීති පද්ධති අක්‍රිය කරන්න ඔවුන් ජනතාවගේ වරම පාවිච්චි කරයි.
සමගි ජන බලවේගයේ ජාතික ලැයිස්තුව සම්බන්ධයෙන් මත ගැටුමක් තිබෙනවාද?
ජාතික ලැස්තුවෙන් පාර්ලිමේන්තුවට තෝරා පත් කර ගත යුත්තේ කවුරුන්ද පිළිබඳව කිසිම සාකච්ඡාවකට මම සහභාගි වෙලා නැහැ. ඒ නිසා ඒ පිළිබඳ කිසිම දෙයක් දන්නේ නැහැ. ඒත් සමගි ජන බලවේගය තුළ සාකච්ඡාවක් යනවා මේ ජාතික ලැයිස්තු මන්ත්‍රිධුර බෙදා ගත යුත්තේ කෙසේද කියලා. අපේ නායකයෝ ඒකාධිපති විදියට තනිව තීන්දු අරගෙන ක්ෂණිකව නම් ලැයිස්තු යවන්නේ නෑ. ඊට පස්සේ අනෙක් පක්ෂවල නායකයන්ට තැනින් තැන කෙඳිරි ගාමින් ඉන්න ඉඩ තියන්නේ නෑ. ඒ වෙනුවට නායකයන් සියලුදෙනා සමඟ සාකච්ඡා කරලා, සාමූහික තීන්දුවක් ගන්නවා. ඒ වැඬේ අමාරුයි. ඒත් ඒක තමයි නිවැරදි දේ.
පාර්ලිමේන්තු මන්ත්‍රීවරයෙක් විදියට ඉදිරියේදී ඔබ පාර්ලිමේන්තුව තුළ කරන්න බලාපොරොත්තු වන කාර්යභාරය කුමක්ද?
අපිට කරන්න තියෙන්නේ විපක්ෂයේ අසුන් ගෙන විපක්ෂයේ කාර්යභාරය කිරීම තමයි. ඒක තමයි අපේ වගකීම. විවිධ කමිටුවල වැඩකරන්න වෙනවා.
සමගි ජන බලවේගයේ නායක සජිත් ප්‍රේමදාස ආණ්ඩුවේ ඇතැම් ක්‍රියා ගැන නිහඬ වීම හෝ විරෝධයක් එල්ල නොකිරීම පෙනෙන්න තියෙනවා…
යම් යම් අවස්ථාවල සජිත් ප්‍රේමදාස මහත්මයා කරපු ප්‍රකාශ සම්බන්ධයෙන් සමාජයේ වැරදි මතයක් ගොඩනැගිලා තිබුණා. ඔහු ඒ අවස්ථාවලදී කිව්වේ ආණ්ඩුව යහපත් ක්‍රියාවක් සිදු කරනවා නම් අපි විපක්ෂය විදියට ඒ යහපත් දෙයට සහය ලබා දෙනවා කියලා විතරයි. වෙන අදහසක් එතැන තිබුණේ නැහැ. එහෙත් සජිත් ආණ්ඩුවට සහයෝගය දෙනවාය කියන අදහස ඇතැම් අය ඒකෙන් මතුකරලා පෙන්වන්න උත්සාහ කළා.
නව අමාත්‍ය මණ්ඩලය සහ කැබිනට් මණ්ඩලයේ රාජපක්ෂවරුන් සියලුදෙනාම සිටිනවා නේද?
ඕක අපි මුල සිටම කියපු කතාවක්. අපි මුල සිටම දැනගෙන සිටියා මේ ආණ්ඩුව නිමවෙන්නේ පවුල් පාලනයකින් කියලා. ඒ කියපු දේවල් මේ වෙද්දි පොඞ්ඩ පොඞ්ඩ එළියට එමින් තිබෙනවා. තව ඉදිරියේදි බලාගන්න පුළුවන් වේවි ඉතිරි ටිකත්. පවුලේ තව කට්ටිය ඉන්නවානේ.
මීට කලින් රාජපක්ෂ ආණ්ඩුව කාලයේ කොළඹ ඇතුළු නාගරික ප්‍රදේශවල ජීවත් වූ ජනතාව බලහත්කාරයෙන් ඉවත් කිරීම් සිදුවුණා. කොළඹ නගරයෙන් බිහිවූ මන්ත්‍රීවරයෙක් ලෙස ඒ ගැන අදහස මොකක්ද?
අනිවාර්යයෙන්ම ඒ අය කොළඔ වටිනා ඉඩකඩම් පැහැරගෙන, ඒවා විදේශ සමාගම්වලට විකුණන්නට විශාල ඉඩකඩක් තිබෙනවා. ඒක අපි ඉතිහාසය ඇසුරෙන් කියන්නේ. 2015ට කලින් තිබුණ ආණ්ඩුවේදී ඔවුන් කළා වගේ නැවත අසරණ මිනිස්සුන්ට හිරිහැර කරන්න උත්සාහ දරයි. එකේදී විපක්ෂය හැටියට අපිට විශාල වගකීමක් තියෙනවා, ඒ මිනිසුන් වෙනුවෙන් පෙනී සිටින්න. මිනිසුන්ගේ ජීවත් වීමේ අයිතිය ආරක්ෂා කරන්න ඕනෑ. මූලික අයිතිවාසිකම් ටික රැකගන්න ඕනෑ. අපි විපක්ෂය විදියට ඒ සියල්ල වෙනුවෙන් සටන් කරනවා. යම් පුද්ගලයෙක් රටට අහිතකර තීන්දු තීරණ ගත් වහාම අපි රට වෙනුවෙන් සහ රටේ මිනිස්සු වෙනුවෙන් පෙනී සිටිමින් අපේ කාර්යභාරය ඉටු කරනවා.■
