ව්‍යවස්ථාව කඩා ආරක්ෂක ජනාධිපතිට
ජනාධිපති යටතේ වෙනම ආයතන 7ක්
නම මිස ආයතන නැති ඇමතිවරු
කමල් ගුණරත්න ඇමතිවරුන්ට උඩින්
මහනුවර ශ්‍රී දළදා මාලිගාවට අයත් මඟුල් මඩුවේදී 26 දෙනෙකුගෙන් සමන්විත කැබිනට් මණ්ඩල සාමාජිකයෝද, 39 දෙනෙකුගෙන් සමන්විත කැබිනට් නොවන රාජ්‍ය අමාත්‍යවරුද අගෝස්තු 12 දින දිවුරුම් දුන්නෝය.
මෙය අනුරාධපුර රුවන්වැලි සෑ පුදබිමේදී ජනාධිපතිවරයා දිවුරුම් දීමෙන්ද, කැලණිය රජමහා විහාර භූමියේදී අගමැතිවරයා දිවුරුම් දීමෙන්ද ආරම්භ කරන ලද සිංහල බෞද්ධ උරුමයන් තුළ දිවුරුම් දීමේ සංස්කෘතිය ඉදිරියට ගෙන යෑමකි.
අමාත්‍ය මණ්ඩලය දිවුරුම් දීමට ප්‍රථම අමාත්‍යවරුන්ගේ හා රාජ්‍ය අමාත්‍යවරුන්ගේ බලතල හෙවත් විෂයන්, කාර්යයන්, රාජ්‍ය ආයතන හා ක්‍රියාත්මක කළ යුතු අණපනත් ඇතුළත් අගෝස්තු 09 දින දරන අංක 2187/27 අතිවිශේෂ ගැසට් පත්‍රය නිකුත් කරනු ලැබීය. ඊට අනුව කැබිනට් අමාත්‍යාංශ 28ක් හා රාජ්‍ය අමාත්‍යාංශ 40ක් ප්‍රකාශයට පත්කර තිබුණි. අමාත්‍ය මණ්ඩලය පත් කිරීමේදී අග්‍රාමාත්‍ය මහින්ද රාජපක්ෂට මුදල්, බුද්ධශාසන, ආගමික හා සංස්කෘතික කටයුතු හා නාගරික සංවර්ධන හා නිවාස යන අමාත්‍යාංශ තුනම ලැබීම නිසා කැබිනට් අමාත්‍ය මණ්ඩලයේ තව පිරවිය හැකි හිදැස් එම ගැසට් පත්‍රයට අනුව නොපවතී.
කැබිනට් ඇමතිධුර නොලැබී ඇති ශ්‍රීලනිප නායක හිටපු ජනාධිපති මෛත්‍රීපාල සිරිසේන, හිටපු ඇමතිවරුන් වූ විජයදාස රාජපක්ෂ, එස්.බී. දිසානායක, සුසිල් ප්‍රේමජයන්ත. අනුර ප්‍රියදර්ශන යාපා, චන්දිම වීරක්කොඩි, මහින්ද යාපා අබේවර්ධන, රංජිත් සියඹලාපිටිය, ඩබ්ලිව්.ඩී.ජේ. සෙනෙවිරත්න, මහින්ද සමරසිංහ ආදින්ට කැබිනට් අමාත්‍යධුර ලබාදීමට නම් ජනාධිපතිවරයා අලුතෙන් කැබිනට් අමාත්‍යධුර ඇතිකළ යුතුය.
19 වැනි සංශෝධනයට අනුව කැබිනට් මණ්ඩලයට තව එක්කරගත හැක්කේ සාමාජිකයන් හතරදෙනෙකු පමණි. ඒ කැබිනට් අමාත්‍යවරුන් සංඛ්‍යාව 30කට සීමා කර ඇති නිසාය. 19 සංශෝධනයට අනුව ජනාධිපතිවරයාට කැබිනට් අමාත්‍යධුරයක් දැරිය නොහැකි වුවත් පසුගිය කැබිනට් මණ්ඩලය පත් කිරීමේදී හිස්ව තැබූ ආරක්ෂක ඇමතිධුරය ජනාධිපතිවරයා මේ අවස්ථාවේ ලබාගෙන ඇති බව ප්‍රසිද්ධියට පත්කර ඇත.
එය පැහැදිලිවම ආණ්ඩුක්‍රම ව්‍යවස්ථාව උල්ලංඝනය කිරීමකි. කැබිනට් මණ්ඩලය ගණනය කරන්නේ ජනාධිපතිවරයා නොමැතිව නම් තවත් කැබිනට් අමාත්‍යවරුන් 5ක් අලුත් විෂයන් වෙන්කර හෝ තිබෙන විෂයන් වෙනස් කර පත්කළ හැකිය.
එහෙත් රාජ්‍ය ඇමතිධුර සඳහා ඇත්තේ එක පුරප්පාඩුවක් පමණය. මන්ද 19වැනි ආණ්ඩුක්‍රම ව්‍යවස්ථා සංශෝධනය අනුව රාජ්‍ය හෝ නියෝජ්‍ය ඇමතිවරු 40ක් පමණක් පත්කළ හැකි නිසාය. මේ රාජ්‍ය ඇමතිධුර සංඛ්‍යාවේ එක් පුරප්පාඩුව දැනට මරණ දඬුවම හිමිවී බන්ධනාගාරගතව සිටින රත්නපුර දිස්ත්‍රික් මන්ත්‍රී ප්‍රේමලාල් ජයසේකර (චොකා මල්ලී)ට හෝ ජෝසෆ් පරරාජසිංහම් ඝාතනය සම්බන්ධයෙන් චෝදනා ලබා බන්ධනාගාරගතව සිටින ආණ්ඩුවට සහාය දෙන ටීඑම්වීපී පක්ෂයේ නායක සිවනේසතුරෙයි චන්ද්‍රකාන්තන් හෙවත් පිල්ලෙයාන් යන අයගෙන් කෙනෙකුටද හිමිවිය හැකිය. තමන්ට මහනුවර මඟුල් මඩුවේ පැවැත්වෙන අමාත්‍ය මණ්ඩලය දිවුරුම්දීමේ උත්සවයට පැමිණෙන ලෙස දැනුම්දීමක් ලැබී ඇති බව පිල්ලෙයාන් ප්‍රකාශ කිරීමත්,සිය පියාට මඟුල් මඩුවේ උත්සවයට යෑමට අවසර ගැනීමට කල් මදි වුවත් පළමු පාර්ලිමේන්තු දිනයට යෑමට මේ වනවිට අවසර ලබාගැනීම් කරමින් පවතින බව ප්‍රේමලාල් ජයසේකරගේ දියණිය ප්‍රකාශ කර තිබීමත් ඊට හේතුවය.
අමාත්‍ය බලතල
දිවුරුම් දුන් කැබිනට් අමාත්‍ය හා රාජ්‍ය අමාත්‍යවරුන්ට හිමි බලතල දක්වා ඇත්තේ ඉහත සඳහන් කළ ජනාධිපතිවරයාගේ අතිවිශේෂ ගැසට් පත්‍රයේය. එහි අමාත්‍යාංශ හා රාජ්‍ය අමාත්‍යාංශ විෂයන්, කාර්යයන් ඒවාට අයත් ආයතන හා අණපනත් සඳහන් කර තිබේ.
එය හොඳින් නිරීක්ෂණය කරන විට පෙනෙන්නේ සමහර අමාත්‍යාංශ යටතේ පත්කර ඇති රාජ්‍ය අමාත්‍යවරුන්ට කැබිනට් අමාත්‍යවරුන්ට වඩා බලයක් දී ඇති බවය. සමහර කැබිනට් අමාත්‍යාංශ හා රාජ්‍ය අමාත්‍යාංශවලට එක් රාජ්‍ය ආයතනයක් පමණක් හිමිව ඇති අතර එක් රාජ්‍ය ආයතනයක් හෝ නැතිව නාමිකව තිබෙන රාජ්‍ය අමාත්‍යාංශද පවතී.
ඉතිහාසය පුරාම අමාත්‍යාංශයක් යන්න සැලකීමේදී ඒ යටතේ රාජ්‍ය දෙපාර්තමේන්තු, සංස්ථා, මණ්ඩල, අධිකාරි හා ව්‍යවස්ථාපිත ආයතන ගණනාවක් පැවතීම සාමාන්‍ය දෙයකි. එහෙත් එක් රාජ්‍ය ආයතනයක් පමණක් ඇති හා එක් රාජ්‍ය ආයතනයක් හෝ නැති අමාත්‍යාංශ හා රාජ්‍ය අමාත්‍යාංශ අපට පෙන්වා දෙන්නේ ජනාධිපතිවරයාගේ ප්‍රතිපත්ති ප්‍රකාශය වූ ‘සෞභාග්‍යයේ දැක්ම’ එය නොවන බවය. සිය දේශපාලන අනුගාමිකයන් පිනවීම සඳහා අමාත්‍යාංශ හා රාජ්‍ය අමාත්‍යාංශ ලබාදී ඇති බවයි.
නාගරික සංවර්ධනත්, නිවාසත් නැති මහින්ද
නාගරික සංවර්ධන හා නිවාස ඇමති ධුරය අග්‍රාමාත්‍ය මහින්ද රාජපක්ෂට හිමිවී තිබුණද එම අමාත්‍යාංශය යටතේ ඇත්තේ ජාතික භෞතික සැලසුම් දෙපාර්තමේන්තුව හා හොටෙල් ඩිවලොපර්ස් (ලංකා) පෞද්ගලික සමාගම පමණය. නාගරික සංවර්ධන අධිකාරිය හා නිවාස සංවර්ධන අධිකාරිය යන එම අමාත්‍යාංශයට අයත් ප්‍රධාන ආයතන දෙක ඇත්තේ රාජ්‍ය අමාත්‍යවරුන් වන නාලක ගොඩහේවා හා ඉන්දික අනුරුද්ධ යටතේය.
විදේශ කටයුතු යටතේ රාජ්‍ය අමාත්‍ය ධුරය දරන තාරක බාලසූරියට ඇත්තේ ලක්ෂ්මන් කදිරගාමර් ජාත්‍යන්තර සබඳතා හා ක්‍රමෝපාය අධ්‍යයන ආයතනය පමණය. පළාත් සභා හා පළාත් පාලන කටයුතු රාජ්‍ය අමාත්‍ය සරත් වීරසේකරට ඇත්තේ පළාත් පාලනය පිළිබඳ ශ්‍රී ලංකා ආයතනය පමණය.
සීබීට, මහින්දානන්දට වී ඇති දේ
වනජීවී හා වන සංරක්ෂණ අමාත්‍ය සී.බී. රත්නායකට ඇත්තේ එක් ආයතනයක් පමණය. ඒ රාජ්‍ය දැව සංස්ථාවය. එහි රාජ්‍ය ඇමති විමලවීර දිසානායකට වන සංරක්ෂණ දෙපාර්තමේන්තුවත් වනජීවී දෙපාර්තමේන්තුවත් පවරා ඇත. කෘෂිකර්ම ඇමති මහින්දානන්ද අලුත්ගමගේට ඇත්තේ ආයතන 4ක් පමණය. එහි රාජ්‍ය ඇමතිවරුන් වන ශෂින්ද්‍ර රාජපක්ෂ, මොහාන් ද සිල්වා, ඩී.බී. හේරත් අතර තවත් ආයතන 17ක් බෙදී ගොස් ඇත.
වාරිමාර්ග විෂයේ රාජ්‍ය අමාත්‍ය සිරිපාල ගම්ලත්ට ඇත්තේ මහවැලි අධිකාරිය පමණය. එහි අනෙක් රාජ්‍ය අමාත්‍යවරයා වන අනුරාධ ජයරත්නට ඇත්තේද ගොවිජන සේවා දෙපාර්තමේන්තුව පමණය. ධීවර අමාත්‍ය ඩග්ලස් දේවානන්දාට ඇත්තේ ධීවර හා ජලජ සම්පත් දෙපාර්තමේන්තුවත්, නෝර්ත් සී ලිමිටඞ් ආයතනයත් පමණය. එහි රාජ්‍ය අමාත්‍ය කාංචන විජේසේකරට අනෙක් ආයතන පවරා තිබේ. වැවිලි විෂයේ රාජ්‍ය අමාත්‍ය කනක හේරත්ට ඇත්තේ රාජ්‍ය වැවිලි කළමනාකරණ ආයතනයත්, කළුබෝවිටියන තේ කර්මාන්ත ශාලාවත් පමණය.
වාසුට එක් ආයතනයයි
ජල සම්පාදන අමාත්‍ය වාසුදේව නානායක්කාරට ඇත්තේ ජල සම්පාදන හා ජලාපවහන මණ්ඩලය පමණය. එහි රාජ්‍ය අමාත්‍ය සනත් නිශාන්තට ඇත්තේ ජාතික ප්‍රජා ජල සැපයුම් දෙපාර්තමේන්තුව පමණය.
වරාය හා නාවික රාජ්‍ය අමාත්‍යාංශය හිමිවී ඇති ජයන්ත සමරවීරට කිසිදු රාජ්‍ය ආයතනයක් නැත. ඔහුට ඇත්තේ 1908 අංක 05 දරන පහායන තටාක හා පේටන්ට් දියත් ආඥා පනත හා 1900 අංක දරන බෝට්ටු ආඥා පනත පමණය.
ජොන්ස්ටන්ටත් එක් ආයතනයයි
මහාමාර්ග අමාත්‍ය ජොන්ස්ටන් ප්‍රනාන්දුටත් මාර්ග සංවර්ධන අධිකාරිය පමණය. එහි රාජ්‍ය ඇමති නිමල් ලන්සාට මග නැගුම පමණක් ඇත.
ප්‍රවාහන අමාත්‍ය ගාමිණී ලොකුගේට ජාතික ගමනාගමන කොමිෂන් සභාව ලබාදී තිබුණාට ඉන් නියාමනය වන ලංකා ගමනාගමන මණ්ඩලය ලබාදී නැත. එය ලබාදී ඇත්තේ රාජ්‍ය ඇමති දිලුම් අමුණුගමටය.
නාමල්ට ක්‍රිකට්
තරුණ හා ක්‍රීඩා අමාත්‍ය නාමල් රාජපක්ෂට අයත් ආයතනයක් ලෙස ක්‍රිකට් පාලක මණ්ඩලය ලබා දී ඇත. එයද විශෙෂත්වයක් ගනී. මන්ද ක්‍රිකට් පාලක මණ්ඩලය යනු රාජ්‍ය ආයතනයක් නොවන නිසාය. ක්‍රිකට් පාලක මණ්ඩලය ඇතුළු සියලු ක්‍රීඩා සමාගම් සිදු කරනු ලබන්නේ ක්‍රීඩා සංවර්ධන දෙපාර්තමේන්තුව යටතේ ලියාපදිංචි වීමත් එහි නීතිරීති අනුව කටයුතු කිරීමත්ය. ක්‍රීඩා සංවර්ධන දෙපාර්තමේන්තුව නාමල් රාජපක්ෂ යටතේ ඇති ආයතනයක් නිසා ක්‍රිකට් පාලක මණ්ඩලය විශේෂයෙන් ඒ යටතට නම් කළේ ඇයිද යන්න දන්නේ රාජපක්ෂවරුන් පමණි. මේ අනුව හැට ගණනක් වූ අනෙක් ක්‍රීඩා සංගම් පෞද්ගලික ආයතන වන අතර ක්‍රිකට් පාලක මණ්ඩලය ඉතිහාසයේ පළමු වරට රාජ්‍ය ආයතනයකි.
රාජපක්ෂවරුන් සියලු දෙනාට තනතුරු
එසේම මෙවර මහ මැතිවරණයට ඉදිරිපත් වූ රාපක්ෂ පවුලේ මහින්ද රාජපක්ෂ චමල් රාජපක්ෂ නාමල් රාජපක්ෂ හා ශෂීන්ද්‍ර රාජපක්ෂ යන සියල්ලන්ට අමාත්‍ය ධුර ලැබී ඇති අතර මාතරින් ජයගත් නිපුණ රණවකට මාතර දිස්ත්‍රික් සම්බන්ධිකරණ කමිටු සභාපති ධුරය පිරිනමා ඇත.
මේ ආකාරයේ අමාත්‍යාංශයකට හෝ රාජ්‍ය අමාත්‍යාංශයකට එකිනෙකට ගැළපීමක් නොමැතිව ලබාදී ඇති ආයතන ගැන මීට වඩා සවිස්තරාත්මකව කතාකළ හැකිය. මේ උදාහරණවලිනුත් පැහැදිලි වන්නේ නාස්තියෙන් තොර කාර්යක්ෂම රාජ්‍ය පාලනයකට අදාළ අමාත්‍ය මණ්ඩල ව්‍යුහයක් තිබේද යන්නයි.
ජනාධිපතිවරයා යටතේ ඇති ආයතන
මේ තාක් අමාත්‍යාංශවලට විෂයන් පැවරීමේ අතිවිශේෂ ගැසට් පත්‍රවල නොතිබූ කරුණු කාරණා රාශියක් මෙවර මෙම අතිවිශේෂ ගැසට් පත්‍රයේ ඇත. අමාත්‍යාංශ ලේකම්වරුන් ගණන් දීමේ නිලධාරීන් වශයෙන් සඳහන් කිරීම, රාජ්‍ය ඇමතිවරුන් කැබිනට් අමාත්‍යාංශ මගින් කැබිනට් මණ්ඩලයට යෝජනා ඉදිරිපත් කිරීම, පරිපාලන හා මුදල් රෙගුලාසි අනුගමනය කළ යුතු බව කීම ඒවාය. මේවා අමුතුවෙන් මෙම ගැසට් පත්‍රයට ආ යුතු දේවල් නොවේ. ඒවා මෙතෙක් හැමදාම අනුගමනය කළ ක්‍රමවේදයන්ය.
අමාත්‍යාංශ විෂය ක්ෂේත්‍ර සම්බන්ධයෙන් වෙනසකට ඇත්තේ ඒවා දීර්ඝ වශයෙන් ‘ජාතික ප්‍රමුඛතා’ හා ‘සුවිශේෂ ප්‍රමුඛතා’ යනුවෙන් විස්තර කරමින් ජනාධිපතිවරයාගේ මැතිවරණ ප්‍රකාශය වන ‘සෞභාග්‍යයේ දැක්මට’ ගැටගැසීම සඳහා දීර්ඝ පැහැදිලි කිරීම් කර තිබීමත් ඒ සෑම තැනකම සෞභාග්‍යයේ දැක්ම අවධාරණය කර තිබීමත්ය.
දිස්ත්‍රික් හා ප්‍රාදේශීය ලේකම් කාර්යාල ආරක්ෂක විෂයට
ජනාධිපතිවරයාගේ මෙම විෂයන් වෙන්කිරිමේ ගැසට්ටුව තුළ ඉතිහාසයේ ප්‍රථම වතාවට එක් සුවිශේෂ විෂයන් වෙන්කිරීමක් සිදුකර ඇත. ඒ සියලුම දිස්ත්‍රික් ලේකම් කාර්යාල හා ප්‍රාදේශීය ලේකම් කාර්යාල ආරක්ෂක අමාත්‍යාංශ විෂය යටතට පැවරීමය. ඒ ගැන විත්තිවාචකයක් ලෙස ආණ්ඩුවට කිව හැක්කේ අප එය අභ්‍යන්තර ආරක්ෂක, ස්වදේශ කටයුතු හා ආපදා කළමනාකරණ රාජ්‍ය අමාත්‍ය චමල් රාජපක්ෂ යටතට පත් කර ඇති බව පමණය. මේ අනුව ග්‍රාම නිලධාරීවරයාගේ සිට ඉහළට දිවෙන රාජ්‍ය යාන්ත්‍රණය මින්පසු පාලනය වනු ඇත්තේ ආරක්ෂක අමාත්‍යාංශය යටතේය.
ජනාධිපතිවරයා යටතේ ඇති ආයතන
එම ගැසට් නිවේදනය අනුව කිසිදු අමාත්‍යාංශයකට අයත් නොවී ජනාධිපතිවරයා යටතේ ඍජුව පවතින රාජ්‍ය ආයතන කිහිපයක්ද නම්කර ඇත. ඒවා විදුලි සංදේශ නියාමන කොමිෂන් සභාව හා අනුබද්ධිත ආයතන, තොරතුරු හා සන්නිවේදන තාක්ෂණ නියෝජිතායතනය (ඉක්ටා) හා අනුබද්ධිත ආයතන, ශ්‍රී ලංකා පරිගණක හදිසි ප්‍රතිචාර සංසදය, ශ්‍රී ලංකා ආයෝජන මණ්ඩලය, කොළඹ වරාය නගර ව්‍යාපෘතිය, ශ්‍රී ලංකා ටෙලිකොම් සමාගම එහි පාලිත සමාගම් හා ආශ්‍රිත සමාගම්, සියලුම තොරතුරු තාක්ෂණ උද්‍යාන වේ. ජාතික ප්‍රමුඛතාවන් සඳහා ජාතික මට්ටමේ මඟපෙන්වීම හා සම්බන්ධීකරණය සඳහා ක්‍රියාත්මක වන ආයතන ලෙස ඒවා හඳුන්වා තිබේ.
අමාත්‍යාංශ කාර්යසාධක බලකා යටතට
මෙම ගැසට් පත්‍රයේ ඇති ප්‍රධානම සුවිශේෂත්වය වන්නේ පසුගිය කාලයේ ජනාධිපතිවරයා විවිධ කරුණු අරභයා පත්කරන ලද කාර්යසාධන බලකා යටතට සියලුම කැබිනට් හා රාජ්‍ය අමාත්‍යාංශ පත්කර තිබීමය.
‘ජාතික ආරක්ෂාව, කොවිඞ්-19 වසංගතය පැතිරීමේ අවදානම දුරුකිරීම, මත්ද්‍රව්‍ය පිටුදැකීම, පුරාවිද්‍යා සංරක්ෂණය, අධ්‍යාපන ප්‍රතිසංස්කරණ, දිළිඳුකම පිටුදැකීම හා ආර්ථික පුනර්ජීවනය වෙනුවෙන් ඇති පහත සඳහන් කාර්යසාධක බලකායන් සමඟ සියලු අමාත්‍යාංශ සිය විෂය ක්ෂේත්‍රයන්ට අදාළ කටයුතු සම්බන්ධීකරණය හා ක්‍රියාත්මක කළ යුතුය.’ යන්නෙන් එය සඳහන් කර තිබේ.
එම කාර්ය සාධක බලකා වන්නේ, (1) ත්‍රිවිධ හමුදා සාමාජිකයන් කොරෝනා වෛරසය ආසාදනයෙන් වළක්වාගැනීම සඳහා සෑම හමුදාවක් විසින්ම ගතයුතු ක්‍රියාමාර්ග අධ්‍යයනය කර එකී පියවර ක්‍රියාත්මක කිරීම සඳහා උපදෙස් ලබාදීම පිණිස වන ජනාධිපති කාර්යසාධක බලකාය, (2) සුරක්ෂිත රටක්, විනයගරුක, ගුණගරුක, නීතිගරුක සමාජයක් ගොඩනැගීම සඳහා වන ජනාධිපති කාර්යසාධක බලකාය, (3) කොවිඞ්-19 වසංගතය කාර්යසාධක බලකාය, (4) නැගෙනහිර පළාත තුළ පුරාවිද්‍යාත්මක උරුමය කළමනාකරණය සඳහා වන ජනාධිපති කාර්ය සාධක බලකාය (5) ශ්‍රී ලංකාවේ අධ්‍යාපන කටයුතු පිළිබඳ ජනාධිපති කාර්යසාධක බලකාය (6) ආර්ථික පුනර්ජීවනය හා දරිද්‍රතාව තුරන්කිරීම සඳහා වන ජනාධිපති කාර්යසාධක බලකාය යන ඒවාය.
මේ කාර්යසාධක බලකා හයෙන් අධ්‍යාපනය පිළිබඳ කාර්යසාධක බලකායේ සිටින්නේ අධ්‍යාපන ක්ෂේත්‍රයට සම්බන්ධ අය පමණය. කොවිඞ්-19 අමාත්‍යාංශ කාර්යසාධක බලකායේ ප්‍රධානියා වශයෙන් යුද හමුදාපති හා වැඩබලන ආරක්ෂක මාණ්ඩලික ප්‍රධානී ලුතිනන් කර්නල් ශවේන්ද්‍ර සිල්වාය. ත්‍රිවිධ හමුදා සාමාජිකයන් කොවිඞ්-19න් බේරාගැනීමේ කාර්යසාධක බලකායේ ප්‍රධානියා වන්නේ හිටපු ගුවන් හමුදාපති රොෂාන් ගුණතිලකය. නැගෙනහිර පළාත පුරාවිද්‍යා කාර්යසාධක බලකායේ ප්‍රධානියා වන්නේ ආරක්ෂක අමාත්‍යාංශ ලේකම් විශ්‍රාමික මේජර් ජෙනරාල් කමල් ගුණරත්නය. එමෙන්ම සුරක්ෂිත රටක්, විනයගරුක රටක් කාර්යසාධක බලකායේ ප්‍රධානියා වන්නේද කමල් ගුණරත්නය, ආර්ථික පුනර්ජීවන කාර්යසාධක බලකායේ ප්‍රධානියා වන්නේ බැසිල් රාජපක්ෂය.
මේ මගින් ඇමෙරිකා ශ්‍රී ලංකා ද්විත්ව පුරවැසියෙකු වන බැසිල් රාජපක්ෂට හා ආරක්ෂක අමාත්‍යාංශයේ ලේකම් කමල් ගුණරත්නට රටේ සෑම අමාත්‍යාංශයකම කටයුතුවලට මැදිහත්වීමේ හැකියාව ලබාදී ඇති බව පැහැදිලිය.
ජනතාවගේ විධායක බලය භාවිත කරන අමාත්‍ය මණ්ඩලයට සෞභාග්‍යයේ දැක්ම යටතේ සිදුවී ඇති අභාග්‍යය මේ මගින් පෙන්නුම් නොකෙරේද? ඊට කිසිවෙකු විරුද්ධ වනු ඇතිද?■
