ශ‍්‍රී ලංකා ටෙලිකොම් ආයතනයේ විධායක නිලධාරීන් සඳහා ජුලි 20 වැනිදා සිට 22 දා දක්වා වැඩමුළුවක් පවත්වා තිබුණි. වැඩමුළුව පැවැත්වුණේ නුවරඑළියේ අරලිය ග‍්‍රීන් සිටි හෝටලයේදීය. මේ වැඩමුළුව ටෙලිකොම් ආයතනය අභ්‍යන්තරයේ විශාල සංවාදයක් ඇතිකර තිබෙන්නේය. ආයතනයේ විධායක නොවන මට්ටමේ සේවකයන් තුළ විධායක මට්ටමේ සේවකයන් කෙරෙහි විරෝධයක් ඇතිවන්නටද මේ වැඩමුළුව හේතුවී ඇත. ලොකුම ගැටලූ‍ව වන්නේ ටෙලිකොම් ආයතනයේ සභාපතිවරයා සහ අරලිය හෝටලයේ හිමිකරුවා සහෝදරයන් වීමයි.
වැඩමුළුව සඳහා වූ බිල්පත රුපියල් කෝටි තුනකට ආසන්න බව ටෙලිකොම් ආයතනයේ ආරංචිමාර්ග තහවුරු කරයි. තහවුරු වූ තොරතුරු අනුව එක් නිලධාරියෙකු සඳහා දිනක බිල රුපියල් 36,000ක් පමණ වෙයි. මේ බිල්පත් ටෙලිකොම් ආයතනයෙන් ගෙවා දැම්මාද, නැතිනම් අරලිය හෝටලයෙන් අනුග‍්‍රහයක් ලෙස මේ හෝටලය ලබාදුන්නාද යන්න අපට තහවුරු කරගත නොහැකි විය.
එසේ වුව ටෙලිකොම් ආයතනයෙන් කෝටි තුනක බිල්පතක මුදල් අය නොකර සිටින්නට තරම් අරලිය ග‍්‍රීන් සිටි හෝටලය ත්‍යාගශීලී වීමද අප සියලූදෙනාගේම උනන්දුව අවුළුවන අපූරු සිදුවීමක් බව නොකිවමනාය. ටෙලිකොම් ආයතනය අරලිය හෝටලයට බිල ගෙවා නැත්නම්, එය ටෙලිකොම් නිලධාරීන්ට ලබාදුන් අල්ලසකි. ටෙලිකොම් සභාපතිවරයාට විරුද්ධව ආයතනයේ වෘත්තීය සමිති රැසක් අදහස් දක්වා ඇති මොහොතක මෙවැනි සංග‍්‍රහයක් යනු නිලධාරීන්ට ලබාදෙන දැවැන්ත අල්ලසකි.
මේ වැඩමුළුව පැවැත්විය යුතු වැඩමුළුවක් නොවන බව ආයතනයේ නිලධාරීන් අප සමඟ අදහස් දක්වමින් කියන්නේය. මෙම වැඩසටහන සංවිධානය කළ අවස්ථාවේදී වැඩමුළුවට විරෝධය දක්වා ටෙලිකොම් වෘත්තීය සමිති එකමුතුවේ සාමාජිකයන්ගේ අත්සනින් යුතුව ලිපියක් 2018.07.18 වන දින විෂය භාර අමාත්‍යවරයාටද, ආයතනයේ සභාපතිවරයා සහ ආයතනයේ සියලූ සේවකයන්ට යොමු කර ඇත. සේවකයන්ට ඇති ගැටලූ‍ව වී ඇත්තේ ගෙවීයන 2018 වර්ෂය තුළදී සේවකයන්ට හිමි අතිකාල දීමනා කපාහරින ලද, සේවක ප‍්‍රසාද දීමනා කපාහරින ලද වර්ෂයක්ව තිබීමයි. සේවකයන්ගේ පැත්තෙන් තිබුණු සැලසුම් පවා කපාහරින ලද වර්ෂයකින් පසුව ඉදිරි කාලය සඳහා සැලසුම් සකස් කිරීමට යැයි කියමින් දින දෙකක් නුවරඑළියට යෑම ඔවුන්ගේ විවේචනයට ලක්ව ඇත. වෘත්තීය සමිති විසින් යැවූ එම ලිපියෙහි පැහැදිලිව සඳහන් කර ඇත්තේ මෙම වැඩමුළුව ටෙලිකොම් ආයතනයේ වියදමින් පැවැත්වූ එකක් බවයි.
ටෙලිකොම් ආයතනයේ ඉහළ නිලධාරීන් 250ක් වැඩමුළුවට සහභාගි වී ඇත. වැඩමුළුව පැවැත්වූ දින දෙකේදී අරලිය හෝටලය පුරාවට ටෙලිකොම් කොඩි දමා ඇත. පැකේජ කිහිපයකට අයත් කාමර ලැබී ඇත. මත්පැන්ද ලබාදී ඇත. නුවරඑළියට සේවකයන් රැුගෙන යන්නට පෙර විධායක නිලධාරීන්ට උදෑසන ආහාරවේල ලබාදී තිබුණේ හිල්ටන් හෝටලයෙනි. එතරම් වියදමක් දරා පැවැත්වූ වැඩමුළුවේදී ප‍්‍රධාන දේශනය පවත්වන්නට ගෙන්වා තිබුණේ මේ දිනවල සංවාදයට ලක්ව රොහාන් පල්ලෙවත්තද ඈතින් ජනාධිපතිවරයාගේ නෑදැයෙකි. ජනාධිපධිපතිවරයාද ‘පල්ලෙවත්ත ගමරාළලාගේ’ කෙනෙකි. තවත් අපූරු කාරණයක් වන්නේ මෙම වැඩමුළුවේ අවසාන දිනය වූ ජූලි 22 දා රාත‍්‍රියේ අරලිය ග‍්‍රීන් සිටි හෝටලය විසින් විවෘත කරන ලද 5551 නම් රාත‍්‍රී සමාජ ශාලාවේ විවෘත කිරීමේ උත්සවයටද කුමාරසිංහ සිරිසේන මහතා සහභාගී වීමයි. අරලිය ග‍්‍රීන් සිටි හෝටලය නුවරඑළියේ ඇති සුඛෝපභෝගීම හෝටලයකි. එහි කාමරයක් සඳහා වන අඩුම පැකේජය වන්නේ රුපියල් 25,577ක් වන කාමර පැකේජයයි. අනෙක් පැකේජ සියල්ල සඳහා වන ගාස්තුව ඊට වඩා ඉහළය.
වැඩසටහනට සහභාගි වූ නිලධාරියෙකු කීවේ, රොහාන් පල්ලේවත්ත ඇතුළු හිටපු නිලධාරීන්ගේ දේශන හැරුණුකොට කිසිදු ප‍්‍රයෝජනවක් කටයුත්තක් දින දෙකක වැඩසටහනේදී නොතිබුණු බවයි. එය විනෝද චාරිකාවක් මිස වැඩමුළුවක් ලෙස සැලකිය නොහැකි බවද ඔහු කීය.
රොහාන් පල්ලේවත්ත ප‍්‍රධාන දේශනය පැවැත්වීමෙන් පසුව එයට විරෝධය පාමින් ෆෙස්බුක්හි සටහනක් තබා තිබුණු ටෙලිකොම් ආයතනයේ නිලධාරියෙකු තාවකාලික වැඩ තහනමකට ලක් කිරීමටද වැඩමුළුවෙන් පසුව ටෙලිකොම් ආයතනය කටයුතු කර තිබුණි. එම නිලධාරියා වැඩසටහනට සහභාගි වී නොතිබුණු අතර රොහාන් පල්ලේවත්ත සහ ජනාධිපතිවරයා විවේචනය කරමින් ඔහුගේ දේශපාලන අදහස් ෆෙස්බුක්හි පළකර තිබුණු නිලධාරියෙක් විය.
එකම පවුලක සහෝදර සහෝදරියන් බලවත් ආයතනවල ඉහළ පුටුවල සිටීම ගැටලූ‍වක් නොවේ. ඒවා වැළැක්වීම කළ නොහැක්කකි. එසේ වුව එවැනි අවස්ථාවල ළබැඳියාවන් අතර ගැටුම් ඇතිවන්නට ඉඩ නොදී, සහෝදර සහෝදරියන් ඈත්ව කටයුතු කිරීම වැදගත් කාරණයකි. බැලූබැල්මට හෝටලයක දින දෙකක සංචාරයක් යනු කතා කරන්නට නොවටිනා මාතෘකාවකි. එහෙත් අද සිදුවන දේ සැලකිල්ලට නොගතහොත් හෙට ඊට එහා යමක් සිදු විය හැකිය. මුල් පියවර නොදුටුවහොත් නුදුරේදීම අපට යළි මුණගැසෙන්නේ හිටපු ආණ්ඩුව සමයේ තිබුණු ආකාරයේ සහෝදර හවුල්ය. පවුල් හවුල්ය. ඒවා රටට අවුල්ය.
