ශ්‍රී ලංකා පොදුජන පෙරමුණේ අපේක්ෂක
මැතිවරණය පැවැත්වීම සම්බන්ධයෙන් ඔබ ප්‍රකාශයක් කරලා තිබුණා නේද?
ඔව්, මම පැවසුවේ කොවිඞ්-19 වසංගත තත්වය උත්සන්න වුවහොත් මැතිවරණයට වඩා වටින්නේ මිනිස් ජීවිත බැවින් මැතිවරණය කල් දැමිය යුතු බවයි මම පැවසූවේ. එවැනි අවස්ථාවකදී තෝරාගත යුත්තේ මිනිස්සුන්ව. ඒ නිසයි මම කිවේ යම් අවස්ථාවක මේ වසංගතය වැඩි වුවහොත් අපි මැතිවරණය කල් දැමිය යුතු බව.
ඔබේ මැතිවරණ ප්‍රචාරණ කටයුතුවලදී කොවිඞ් වසංගතය පැතිරීම වැළැක්වීමට අවශ්‍ය මාර්ගෝපදේශ පිළිපදනවාද?
සියයට සීයක් අපිට සෞඛ්‍ය මාර්ගෝපදේශ පිළිපදින්න බැහැ. ඒ ගැන මට බොරු කියන්න බැහැ. අපි මැතිවරණ රැස්වීම් පවත්වන්නේ කුඩා ස්ථානවල. සමහර අවස්ථාවල ඒ ස්ථානවල මිනිසුන් 30ක් මීටරයක් පරතරය තබමින් රැස්වෙන්න බැහැ. මේ වෙනකොට වර්ෂාව තියෙන නිසා ගොඩනැගිල්ලක් තුළ රැස්වීම් පවත්වන්න වෙනවා. අපි ඒ ඒ ප්‍රදේශයේ මැතිවරණ රැස්වීම් සංවිධායකයන්ට උපදෙස් ලබා දිලා තියෙන්නේ විශබීජ නාශක සහ මුඛ ආවරණ දමා පැමිණෙන පුද්ගලයන්ව පමණක් රැලිවලට සහභාගී කරවගන්න කියලා. සමහර මිනිස්සුන්ට තවමත් කොවිඞ් වෛරසය පිළිබඳව අවබෝධයක් නැහැ. අපේ ගමේ කොවිඞ් වසංගතය නැති නිසා අප සෞඛ්‍ය පිළිවෙත් පිළිපැදිය යුතු නැති බව විශ්වාස කරන පුද්ගලයන් කිහිපදෙනෙකුත් අප අතර ඉන්නවා.
සමහර අපේක්ෂකයන් නිරෝධායනය මඟහරිමින් මැතිවරණ ප්‍රචාරයේ ඉන්නවාලු..
අපිත් ඒ බව දැනගත්තා. සෞඛ්‍ය ක්ෂේත්‍රයේ නිලධාරින් ඒ අපේක්ෂකයන්ට කිවා නම් ඔවුන්ට තිබුණා නිරෝධායනය වෙන්න. අපි හැමෝම රටේ මේ අවස්ථාවේ තියෙන නිරෝධායන නීතීයට යටත් විය යුතුයි. අපේක්ෂයන් හෝ නායකයන් කියලා අපිට බැහැ නිරෝධායන නීතී කඩ කරන්න. අපි නිරෝධායන නීතීවලට යටත් විය යුත්තේ අපේ රටේ පුරවැසියන් ආරක්ෂා කරන්න. අපිව රටේ පුද්ගලයන් විශ්වාස කර, අපිට ඡන්දය ලබා දෙන්නේත් ඔවුන් ආරක්ෂා කරයි කියන විශ්වාසය මත. මෙවැනි අවස්ථාවක සෞඛ්‍ය අතින් මිනිසුන්ව ආරක්ෂා කිරීමත්, ඒ විශ්වාසයේ කොටසක් තමයි.
මේ වෙනකොට රටේ ආර්ථික තත්වය ඒ හොඳ මට්ටමක තිබෙන බවක් පෙන්නුම් කරන්නේ නැහැ නේද?
රටේ යම් ආර්ථික කඩා වැටීමක් තිබෙනවා. අපි ඒ පිළිගන්නවා. කොවිඞ් 19 වසංගත තත්වය නිසා මේ ආර්ථික කඩා වැටීම මුළු ලෝකයටම බලපාලා තිබෙනවා. රට තුළ යම් යම් පසුබෑම් තියෙනවා. උදාහරණයක් විදියට සංචාරක කර්මාන්තය සම්පූර්ණයෙන්ම වැසිලා. ඒ වගේම පිටරටල සිටින විදේශගත ශ්‍රමිකයන් මේ දිනවල මුදල් එවීම සම්පූර්ණයෙන්ම නවත්වලා දාලා. මේ වෙනකොට අපි අපනයන කරපු සමහර ද්‍රව්‍ය අපනයනය නවත්වලා. රටවල් අතර තිබෙන සම්බන්ධතාවයන් නවත්වලා දාලා තියෙන්නේ. මේ විදියට අපනයනය නවත්වන්න සිදු වුණාම රටේ ආර්ථිකයට මේක බලපානවා.
කුරුණෑගල ගොඩනැගිල්ලක් ඩෝසර් කිරීම ගැන සංවාදයක් ඇතිවෙලා නේද?
ඩෝසර් කරපු ගොඩනැගිල්ල පිළිබඳව නිශ්චිත තොරතුරක් තවමත් සොයාගෙන නැහැ. ඒ ගොඩනැගිල්ල හෝටලයක් විදියට පවත්වාගෙන ගිහින් තිබෙන බවට කොටසක් පවසනවා. ඒ නිසා මේ සියලු දේවල් ගැන සොයා බලන්නට අගමැතිතුමා වාර්තාවක් කැඳවලා තිබෙනවා. මම විශ්වාස කරනවා අගමැතිතුමාගේ වාර්තාව ඔහුගේ අතට ආවාට පස්සේ මේ ගොඩනැගිල්ල ඩෝසර් කිරීම සම්බන්ධයෙන් වැරැද්දක් වෙලා තිබෙනවා නම් අනිවාර්යයෙන්ම නිතීමය ක්‍රියා මාර්ග ගත යුතු බව. මේ කෑගහන අය පිළිබඳවත් අපි කතා කළ යුතුයි.
මේ වෙනකොට ආණ්ඩුවේ සැලැස්ම වී තිබෙන්නේ පාර්ලිමේන්තු මැතිවරණයේදී තුනෙන් දෙකක බලය ලබා ගැනීම පමණයි නේද?
අපි සෑම මැතිවරණ කොට්ඨාශයකම ඒ සදහා අවශ්‍ය ප්‍රචාරණ වැඩ කටයුතු කරමින් යනවා. පාර්ලිමේන්තුවේදී තුනෙන් දෙකක් ලබාගන්නවා කියන්නේ ආසන 150 ක් ලබා ගැනීම. මම දන්නේ නැහැ අපිට තුනෙන් දෙකක් ලබා ගන්න පුළුවන් වෙයිද කියලා. ගෝඨාභය රාජපක්ෂ මහතා පිළිබඳ ජනතාවගේ විශාල උනන්දුවක් තිබෙනවා. මේ වෙනකොට ඔහුට ජනතාව අතර ඇති පිළිගැනීම ඉහළ ගොස් තිබෙනවා. මම විශ්වාස කරනවා අපිට විශාල ජයග්‍රහණයක් ලබා ගන්න පුළුවන් වේවි කියලා.
ජනාධිපතිවරයා පිළිබඳව ජනතාව තුළ ප්‍රසාදයක් තිබුණත්, රාජපක්ෂ පවුලේ විශාල පිරිසක් මැතිවරණයට ඉදිරිපත් කිරීමත්, පාලනයට මැදිහත් වීමත් ගැන විවේචන තියෙනවා නේද?
විවේචනය කරන්න අයිතියක් තිබෙනවා. ඒ වගේම ඔවුන්ට අවස්ථාවක් තිබෙනවා නුසුදුසු අපේක්ෂකයන්ට ඡන්දය ලබා නොදී ඒ අපේක්ෂකයන් පාර්ලිමේන්තුවට ඒම වළක්වන්න. හරියට ඡන්දය දෙනවා නම් පවුල්වාදය ප්‍රශ්නයක් කරගත යුතු නැහැ.
ඔබලාගේ පක්ෂයේ අපේක්ෂයන් අතර මේ වෙනකොට ගැටුම් ඇතිවෙනවා නේද?
ඔව්, මේ විදිහේ ගැටුම් ඇතිවීම අලුතින් පටන් ගත්ත දෙයක් නෙවෙයි. මේ විදියේ ගැටුම් අපි දන්න කාලේ සිට වෙන දේවල්. අපිටත් ඒ වගේ සිදුවීම් වෙලා තිබෙනවා. ඒ ගැටුම් කිසිවක් පොලිසියට වාර්තා වෙන්නේ නැහැ. ඒ ගැටුම් නිසා අපිට වුණ අසාධාරකම් අපි විඳදරාගෙන ඉන්නවා. මේ පාර්ලිමේන්තු මැතිවරණයේදී පවා අපිට යම් යම් අසාධාරණකම් වෙනවා තියලා අපිට දැනෙනවා. අපි ඒ සියල්ල විඳදරා ගෙන ඉන්නවා. මේ මැතිවරණ ක්‍රමය වෙනස් වෙලා සියයට 70ක් කේවල ක්‍රමයට සහ සියයට 30ක් අනුපාත ක්‍රමය ලෙස වෙනස් කරන තාක් බල දේශපාලනය වෙනුවෙන් මේ වගේ ගැටුම් ඇතිවේවි. ඒ නිසා අනිවාර්යයෙන්ම මැතිවරණ ක්‍රමය වෙනස් කරලා කුඩා පක්ෂ සහ ඒ මතවාදවලට අපි ඉඩක් ලබා දිය යුතුයි.
