නව ආණ්ඩුක්‍රම ව්‍යවස්ථාවක් බව ප්‍රකාශ කරමින් තුනෙන් දෙකක බලයක් ලබාදෙන ලෙස ආණ්ඩුවේ නායකයන් ඉල්ලා සිටියද දැනට ආණ්ඩුව නියෝජනය කරන සන්ධානයේ නායකයන් අතරවත් නව ව්‍යවස්ථාවකට ඇතුළත් විය යුත්තේ කුමක්දැයි එකඟතාවක් නොමැති බව ප්‍රජාතන්ත්‍රවාදී වාමාංශික පෙරමුණේ නායක වාසුදේව නානායක්කාර පවසයි.
ආණ්ඩුවේ පක්ෂ නායකයන් අතර නව ව්‍යවස්ථාවක් පිළිබඳ කිසිම ආකාරයක සාකච්ඡාවක් කර නැති බව ඔහු කීය.
ආණ්ඩු සන්ධානයේ තීන්දු ගැනීම සඳහා වන ඉහළම ආකෘතිය එම සන්ධානයේ පක්ෂ නායක හමුව බවත්, එහි නායකයන් අතර නව ව්‍යවස්ථාවක් පිළිබඳ විවිධ අදහස් ඇති බවත් ඔහු කීය. මහින්ද රාජපක්ෂ, තමා ඇතුළු නායකයන් විධායක ජනාධිපති ක්‍රමය අහෝසි කළ යුතුයැයි විශ්වාස කරන බවත්, උදය ගම්මන්පිළ වැනි නායකයන් විධායක ජනාධිපති ක්‍රමය ශක්තිමත් කළ යුතුයැයි විශ්වාස කරන බවත් ඔහු උදාහරණ ලෙස කීය.
දහනවවැනි සංශෝධනය වෙනස් කළ යුතු බව බොහෝ නායකයන් ප්‍රකාශ කරන නමුත් ඊට පසුව කළ යුත්තේ කුමක්දැයි නායකයන් අතර එකිනෙකට පරස්පර අදහස් පවතින බව ඔහු පෙන්වා දුන්නේය. කෙසේ වෙතත්, 2015 දී බලයට පත් වූ පාර්ලිමේන්තුව පත් කරන ලද ව්‍යවස්ථා සම්පාදන සභාවේදී එකඟ වූ ව්‍යවස්ථා යෝජනා ආණ්ඩුවේ නායකයන් පිළිනොගන්නා බවද ඔහු කීය.
මීට පෙර 18 වැනි සංශෝධනය ගෙන ආ අවස්ථාවේදී මෙන් ආණ්ඩුවේ ඉහළම නායකයන් සකස් කරන ව්‍යවස්ථා කෙටුම්පතකට අත එසවීමට සිදුවේවිදැයි අප විමසූ විට ඔහු ප්‍රකාශ කළේ ඒ ගැන තවම නිශ්චිතව කිව නොහැකි බවයි. ඉන්දියාව වසර 70ක් තිස්සේ එකම ව්‍යවස්ථාවකට එකඟ වී එය රැකීමත්, ශ්‍රී ලංකාවේ එකම දේශපාලන පක්ෂයක කණ්ඩායම් අතර පවා මතභේද පැවතීම ගැන සැලකිල්ලට ගත යුතු බව ඔහු වැඩිදුරටත් කීය.
වාසු ඕවා කියන්න ඕනේ නැහැ , රාජපක්ෂ පවුලට අවැසි දේ වෙනු ඇත