මාධ්‍යවේදී ප්‍රගීත් එක්නැළිගොඩ පැහැරගෙන ගොස් අතුරුදන් කිරීමේ සිද්ධිය පිළිබඳ පරීක්ෂණය කරන රහස් පොලිස් කණ්ඩායම එම පරීක්ෂණවලට අදාළව තවත් හමුදා නිලධාරියෙකු අත්අඩංගුවට ගනු ඇතැයි දැනගන්නට ලැබේ.
ප්‍රගීත් එක්නැළිගොඩ පළමුවර පැහැරගැනීමට සම්බන්ධ ඒඑච්94 යන ආරූඪ නාමයෙන් හඳුන්වනු ලැබූ ගිරිතලේ බුද්ධි කඳවුරට අනුයුක්තව සේවා කළායයි කියන මේජර්වරයෙකු මෙලෙස අත්අඩංගුවට ගනු ඇතැයි වාර්තා වෙයි.
මෙම සිද්ධියේ දෙවන සැකකරු වන කර්නල් සිරිවර්ධනගේ නිවස පරීක්ෂා කිරීමේදී ප්‍රගීත් පළමුවරට පැහැරගැනීමට අදාලව ගිරිතලේ බුද්ධි කඳවුර විසින් සාදනු ලැබූ වාර්තාවක් හමුවී ඇති අතර එම වාර්තාව කොළඹට රැගෙනවිත් අදාළ සම්බන්ධ කිරීම් සිදුකර ඇත්තේ මේ හමුදා නිලධාරියා විසින් බව හඳුනාගෙන ඇත. මෙම නිලධාරියා මෙම පළමු පැහැර ගැනීමේ සිට ප්‍රගීත් අතුරුදන් කිරීම දක්වා සිදුවීම් ජාලයට සම්බන්ධ බව එම පරීක්ෂණවලදී තහවුරු කරගෙන ඇත.
ආරූඪ නාමයෙන් හඳුන්වන එම හමුදා නිලධාරියා කවුරුන්ද යන්න හෙළිකරන්න යැයි රහස් පොලීසිය දිගින් දිගටම යුද්ධ හමුදා බුද්ධි අධ්‍යක්ෂගෙන් අධිකරණය හරහා ඉල්ලීම් කරනු ලැබූවත් එවැනි නාමයකින් හැඳින්වූ හමුදා නිලධාරියෙකු ගිරිතලේ බුද්ධි කඳවුරේ සිට නැතැයි පවසමින් අධිකරණයද පොලිස් පරීක්ෂණ කණ්ඩායමද නොමග යවා ඇත. එහෙත් පසුගිය ජුනි 19 වැනිදා පැවති නඩු දිනයේදී හමුදාව මෙම නිලධාරියා පිළිබද තොරතුරු ලබා දී ඇත.
එම තොරතුරුවලට අදාළව මේ වනවිට පරීක්ෂණ සිදුවෙන අතර ඒ අනුව ඉදිරියේදී අදාළ හමුදා නිලධාරියා අත්අඩංගුවට ගන්නට නියමිතය.•
