සුරක්ෂා සිසු රක්ෂණය යටතේ රුපියල් කිසිදු කොමිස් මුදලක් වෙනත් පාර්ශ්වයකට ලබාදිය නොහැකි බවත් ඒ යටතේ රුපියල් මිලියන 100ක් අධ්‍යාපන අමාත්‍යාංශයේ අරමුදලකට යෙදවිය නොහැකි බවත් එසේ කිරීම සඳහා අධ්‍යාපන අමාත්‍යාංශයට හෝ ශ්‍රී ලංකා රක්ෂණ සංස්ථාවට බලයක් හිමිව නොමැති බවත් රක්ෂණ සේවක සංගමය මාධ්‍ය නිවේදනයක් නිකුත් කරමින් පවසයි.
එම රක්ෂණයේදී රුපියල් මිලියන 1500කට ආසන්න මුදලක් විදේශීය ඉන්දීය සමාගමකට ගෙවීමට සිදුවීම, එමඟින් ශ්‍රී ලංකා රක්ෂණ සංස්ථාවට හිමිවිය යුතු ලාභය අහිමි වීම, රුපියල් මිලියන 100ක් වෙනත් අරමුදලකට යෙදවීම සහ තවත් රුපියල් මිලියන 400ක් ඒ සඳහා යෙදවීමට ශ්‍රී ලංකා රක්ෂණ සංස්ථාවේ සභාපතිවරයා පොරොන්දු වීම මෙම රක්ෂණ ගනුදෙනුවේ සිදුව ඇති අගතීන් බව එම නිවේදනයෙන් අවධාරණය කර ඇත.
එමෙන්ම මේ කටයුතු සඳහා කිසිදු නෛතික පසුබිමක් නොමැති බවත් මේ තත්වය වැළැක්වීම සඳහා අවශ්‍ය නීතිමය ක්‍රියාමාර්ග ගන්නා බවත් රක්ෂණ සේවක සංගමය සිය නිවේදනයෙන් තවදුරටත් අවධාරණය කරයි.•
