කොවිඩ්-19 රෝගීන් හඳුනාගැනීම සඳහා ආණ්ඩුව දැනට සිදුකරන පරීක්ෂණ සංඛ්‍යාව ප්‍රමාණවත් නොවන බවත්, සෞඛ්‍ය අංශවලට තොරතුරු නොමැතිව සමාජයෙහි රෝගීන් සිටීමේ අවදානමක් පවතින බවත් අනිද්දා සමඟ අදහස් දැක්වූ සෞඛ්‍ය ක්ෂේත්‍රයේ විද්වත්තු හා වෘත්තීය සමිති නියෝජිතයෝ කිහිපදෙනෙක් ප්‍රකාශ කළෝය.
මේ වන විට කරන පරීක්ෂණ සංඛ්‍යාවෙන් වැඩි ප්‍රමාණයක් වැලිසර නාවික හමුදා කඳවුරේ සාමාජිකයන් සහ එයට අදාල ආශ්‍රිතයන්ගේ බවත් බාහිර සමාජයේ මීට වඩා පරීක්ෂණ කළ යුතු බවත් ඔවුහු පැවසූහ.
මේ වන විට පරීක්ෂණ 1000ක පමණ සංඛ්‍යාවක් දිනකට සිදුකරන බවත්, එම සංඛ්‍යාව කිහිප ගුණයකින් වැඩිකළ යුතු බවත් ඔවුහු පැවසූහ.
විදේශ රටවල සිට ලංකාවට පැමිණෙන සියලු දෙනා, රෝහල්වලට පැමිණෙන රෝගීන් අතරින් අහඹු ලෙස තෝරාගත් පුද්ගලයන් හා තමන්ට පරීක්ෂණයක් අවශ්‍ය බවට ප්‍රකාශ කරන සියලු දෙනා පරීක්ෂණවලට ලක් කළ යුතු බව මේ පිළිබඳව අදහස් දැක්වූ වෛද්‍ය රසායනාගාර විද්‍යාඥ වෘත්තිකයන්ගේ විද්වත් සංවිධානයේ සභාපති රවී කුමුදේශ් පැවසීය.
මේ වන විට සෞඛ්‍ය අමාත්‍යාංශයේ ප්‍රධානීන් කාරණා දෙකක් පිළිබඳව අත්තනෝමතිකව සහ දැඩි ස්වරයෙන් කටයුතු කරන බව ඔහු කීය. ඉන් එකක් වන්නේ පීසීආර් පරීක්ෂණ පමණක් සිදුකිරීම බවත්, දෙවැනි කාරණය වන්නේ තමන් කැමති පුද්ගලයන්ට පමණක් පරීක්ෂණ සිදුකිරීම බවත් ඔහු කීය.
එහෙත් ඉහත කී පාර්ශ්වයන්ට පරීක්ෂණ සිදුකළ යුතු බවත්, පීසීආර් පරීක්ෂණ සිදුකළ නොහැකි නම් ප්‍රතිදේහ පරීක්ෂණ සහ පොයින්ට් ඔෆ් කෙයාර් පීසීආර් පරීක්ෂණ සිදුකළ යුතු බවත් ඔහු කීය.
මේ පිළිබඳව අදහස් දැක්වූ රජයේ හෙද නිලධාරීන්ගේ සංගමයේ සභාපති සමන් රත්නප්‍රියද ප්‍රකාශ කළේ මේ වන විට කරන පරීක්ෂණ සංඛ්‍යාව ප්‍රමාණවත් නොවන බවත්, පරීක්ෂණ සංඛ්‍යාව වැඩි කළ යුතු බවත්ය. විශේෂයෙන්ම හෙද නිලධාරීන් ඇතුළු සෞඛ්‍ය වෘත්තිකයන් පරීක්ෂාවට ලක් කළ යුතු බව ඔහු කීය. මහජන සෞඛ්‍ය පරීක්ෂකවරුන් කිහිපදෙනෙකුද පැවසුවේ මේ වන විට දිනකට පරීක්ෂණ සඳහා යවන සාම්පල් ප්‍රමාණය අඩු වී තිබෙන බවත්, තවත් පරීක්ෂණ කළ යුතු බවත්ය.
අප කළ විමසීමකදී ලෝක සෞඛ්‍ය සංවිධානයේ හිටපු කලාපීය උපදේශක, ප්‍රජා වෛද්‍ය විශේෂඥ නිහාල් අබේසිංහ ප්‍රකාශ කළේ පරීක්ෂණ සිදුකළ යුතු ප්‍රමාණය පිළිබඳව ගෝලීය වශයෙන් පිළිගත් ප්‍රමිතියක් නොමැති නමුත්, අහඹු ලෙස පරීක්ෂණ කළ හැකි බවය. මේ වන විට ආණ්ඩුව තීරණ ගන්නේ කෙසේදැයි පැහැදිලි කරන්නේ නැති බවත්, එය රටෙහි ඇති ප්‍රධාන ප්‍රශ්නයක් බවත් ඔහු කීය. ඇතැම් තොරතුරු සමාජයට හෙළි නොකරන බවත්, දැනට ආණ්ඩුව පරීක්ෂණ කරන ආකාරය පිළිබඳව අදහසක් ගැනීම අසීරු බවත් ඔහු වැඩිදුරටත් පැවසීය.
කොළඹ, මඩකළපුව, කල්මුණේ, පුත්තලම්, බේරුවල ඇතුළු ජන ගණත්වය වැඩි ප්‍රදේශවල පරීක්ෂණ කිරිම යහපත් බවත් එවැනි තැනකට වෛරසය ගියොත් තත්වය බරපතළ වන බවත් විශේෂඥ වෛද්‍යවරයා කීය.
මේ පිළිබඳව කළ විමසීමකදී වසංගත රෝග විද්‍යා අංශයේ ප්‍රධාන වසංගත රෝග විද්‍යාඥ වෛද්‍ය සුදත් සමරවීර මෙසේ පැවසීය.
‘අපි පිටරට ඉඳන් එන අයව නිරෝධායනය කළාට පස්සේ පරීක්ෂාවට ලක් කරනවා. දෙවැනි කාරණය තමයි වැලිසර කිහිප වතාවක් පරීක්ෂණ කරන්න වේවි. අපි පරීක්ෂණ සංඛ්‍යාව අඩු කරලා නැහැ. තැනින් තැන සාම්පල් පරීක්ෂාවට ලක් කරනවා. සෙම්ප්‍රතිශ්‍යාව වගේ රෝග තියෙන අය පරීක්ෂා කරනවා.
පරීක්ෂණ සංඛ්‍යාව දැනට ඇති සංඛ්‍යාවට වඩා වැඩි කළ යුතු බවට ඇති මතය මිථ්‍යාවක්. අපි ටෙස්ට් කරන්න ඕනෑ ඉලක්කයක් ඇතිව. තුවක්කුවක් අරන් හතර අතේ වෙඩි තබනවා වගේ පරීක්ෂණ කරන්න බෑ. අපි පරීක්ෂණ කරන අයගෙන් සීයට 2ත්, 3ත් අතර තමයි පොසිටිව් වෙලා තියෙන්නේ. තව වැඩිපුර කළාම ප්‍රතිශතය තවත් අඩු වෙනවා. ඒකෙන් තේරුමක් නෑ.’
