කොවිඞ්-19 වසංගත තත්වය නිසා ගම්බිම් බලා යෑමට නොහැකිව කොළඔ, මෝදර ශ‍්‍රී වෙන්කටෙශ්වර හින්දු කෝවිලේ මංගල ශාලාවේ නැවති පිරිසකට ආහාර සහ පානීය ජලය නොමැති බව පෙන්වාදෙමින් මුහුණු පොතේ සටහන් කිහිපයක් උඩුගත කළ තරුණයන් දෙදෙනෙකු මෝදර පොලිසිය මැයි 04 වන දින අත්අඩංගුවට ගෙන ඇත.
කොවිඞ් 19 වසංගතය නිසා මාර්තු 20 දින කොළඔ නගරයට ඇඳිරි නිතීය ප‍්‍රකාශ කිරීමත් දිස්ත‍්‍රික්ක අතර ගමනා ගමනය තහනම් කිරීමත් නිසා බදුල්ල, හපුතලේ වැනි ප‍්‍රදේශ වලින් පැමිණ කොළඔ නගරයේ රැකියාවල යෙදුණු උඩරට දෙමළ ජාතිකයන් 15 ක් කොළඔ මෝදර ප‍්‍රදේශයේ මංගල ශාලාවක නවත්වා සිට ඇත. එයට මැදිහත් වී තිබුණේ ශ‍්‍රී ලංකා කම්කරු කොංග‍්‍රසයේ නායක ආරුමුගම් තොණ්ඩමන්ගේ පුත් සෙන්දිල් තොණ්ඩමන්ගේ ලේකම්වරයෙකි.
මෙලෙස නවාතැන් ගෙන සිටි පුද්ගලන්ට ආහාරපාන හා පහසුකම් නොමැතිකම නිසා ඒ අවට පදිංචිව සිටි තරුණයන් දෙදෙනෙක් එම ස්ථානයට ගොස් මුහුණුපොතෙහි ඒ පිළිබඳව සටහනක් පළකර ඇත. පසුව එම තරුණයන් දෙදෙනාව අත්අඩංගුවට ගෙන ඇත.
අප මේ පිලිබඳව කළ විමසීමකදී පොලිස් මාධ්‍ය අංශයේ නිලධාරියෙකු පැවසූවේ අදාල ශාලාවේ රැදී සිටින පුද්ගලයන්ට සියළු පහසුකම් ඇති බවත් අදාල තරුණයන් මුහුණු පොතේ උඩුගත කළ සටහන ඉවත් කර දෙන ලෙසත් ඉල්ලමින් සෙන්දිල් තොන්ඩමන් පැමිණිල්ලක් කර ඇති බවය. ඒ පිළිබඳව සොයා බැලීමේදී මෙම තරුණයන් එම ශාලාවට ඇඳිරි නීතිය කඩ කරමින් පැමිණ ඇති බවත්, අවසරයකින් තොරව ශාලාවට ඇතුල්වී ඇති බවත් හෙළිවූ නිසා එම තරුණයන්ව අත්අඩංගුවට ගත් බව එම නිලධාරියා පැවසීය. එම තරුණයන්ව මැයි 05 වන දින අලූත්කඬේ ප‍්‍රධාන මහේෂ්ශ‍්‍රාත් අධිකරණයට ඉදිරිපත් කර ඇත.
