ජයවර්ධනපුර මහ රෝහල, විජය කුමාරතුංග අනුස්මරණ රෝහල, පදනම් ආයතනය, වී අලෙවි මණ්ඩලය, රන්මිහිතැන්න වානිජ ආයතන කළ යුතුයි

ආයතන 160ක් සම්බන්ධයෙන් නිර්දේශ මෙන්න

රජයේ වානිජ නොවන ආයතනවලට කරන්න යන්නේ කුමක්ද?

‘රජයට අයත් වානිජමය නොවන ආයතන පිළිබඳ සමාලෝචනය කිරීම’ මැයෙන් 2024.12.13 දින ජනාධිපති අනුර කුමාර දිසානායක විසින් ඉදිරිපත් කරන ලද අමාත්‍ය මණ්ඩල සංදේශයට අනුව පත්කරන ලද රජයට අයත් වානිජමය නොවන ආයතන පිළිබඳ සමාලෝචනය කිරීමේ නිලධාරී කමිටු වාර්තාව අගමැති ආචාර්ය හරිනි අමරසූරියට ලබාදී ඇති අතර එය කැබිනට් මණ්ඩලයටද ඉදිරිපත් කිරීමෙන් පසු එයට අමාත්‍ය මණ්ඩල අනුමැතියද හිමිවී තිබේ.

එම අමාත්‍ය මණ්ඩල තීරණය අනුව රාජ්‍ය ආයතන 166ක් සමාලෝචනය කර සවිස්තරාත්මක වාර්තාවක් මස 02ක කාලයක් තුළ අමාත්‍ය මණ්ඩලය වෙත ඉදිරිපත් කිරීම එම කමිටුවට පැවරී තිබේ.

කමිටුවේ කාර්යභාරය

ඒ අනුව එම කමිටුව විසින් ඉටුකළ යුතු කාර්යභාරයන් වී ඇත්තේ, එක් එක් අමාත්‍යාංශ යටතේ ඇති රජයට අයත් වානිජමය නොවන ආයතන නිශ්චිතවම හඳුනා ගැනීම, එම ආයතන පිහිටුවනු ලැබූ අරමුණු නිශ්චිතවම හඳුනා ගැනීම හා එම අරමුණු වර්තමානයට ඇති වලංගුභාවය හා අවශ්‍යතාව නිශ්චය කර ගැනීම, එම ආයතනවල නිමැවුම්වලට අදාළ වාර්ෂික හා මැදිකාලීන ඉලක්ක, කාර්යසාධන දර්ශක හා පසුගිය වසර 03ක් තුළ එම ඉලක්ක ළඟාකර ගැනීමේ ප්‍රගතිය සමාලෝචනය කිරීම, එම ආයතන වර්තමාන සහ අනාගත සමාජ, ආර්ථික අවශ්‍යතාවන් හා අනුකූල වන පරිදි ඵලදායි ලෙස ප්‍රතිව්‍යුහගත කිරීමට හැකිවන අයුරින් ඒවායේ පරමාර්ථ, බලතල, වත්කම් හා ඒවායේ වර්තමාන භාවිතය, බැරකම්, කාර්ය මණ්ඩල තොරතුරු, මූල්‍යන මූලාශ, වාර්ෂික පිරිවැය, මහජන සේවාවන් සැලසීමේදී අනුගමනය කරනු ලබන ක්‍රමවේද, එම ක්‍රමවේද වඩාත් කාර්යක්ෂම කිරීම සඳහා ගත යුතු සහ ගත හැකි ක්‍රියාමාර්ග ආදි සියලු පැතිකඩ පිළිබඳ සමාලෝචනය කිරීම, එකම හෝ සමාන කාර්යයන් ඉටු කරනු ලබන ආයතතන හඳුනා ගැනීම, එම ආයතන කාර්යක්ෂමව හා ඵලදායීව ක්‍රියාත්මක නොවීමට අදාළව ඇති බාධා හඳුනා ගැනීම, එම සමාලෝචනයට අනුව එම ආයතන ඒකාබද්ධ කිරීම, ප්‍රතිව්‍යුහගත කිරීම සම්බන්ධයෙන් සුදුසු නිර්දේශ ලබාදීම, අමාත්‍ය මණ්ඩල සංදේශයේ ඇතුළත් ආයතන 166ට අමතරව වානිජමය අරමුණෙන් පිහිටුවා ඇතත්, රජයට වැය බරක් වූ/භාණ්ඩාගාරය මත යැපෙන වෙනත් ආයතන සම්බන්ධයෙන්ද කමිටුවේ අවධානය යොමු කිරීම වේ.

අලුත් ආයතන හා සමාලෝචනය කර නැති ආයතන

අමාත්‍ය මණ්ඩල සංදේශයේ ඇතුළත් රාජ්‍ය ආයතනවලට අමතරව කමිටුව විසින් අමාත්‍යාංශ යටතේ ක්‍රියාකාරිව පවතින වානිජමය ආයතන හඳුනාගෙන ඇති අතර ඒ අනුව කමිටුව විසින් හඳුනා ගන්නා ලද ආයතන 03ක් සමාලෝචනයට භාජනය කර ඇත. එසේම අමාත්‍ය මණ්ඩල සංදේශයේ ඇතුළත් වූවත් විවිධ හේතු මත ආයතන 09ක් සමාලෝචනයට නොගැනීමට කමිටුව තීරණය කර ඇත.

කමිටුව විසින් අලුතින් හඳුනා ගන්නා ලද ආයතන වී ඇත්තේ ජනතා වතු සංවර්ධන මණ්ඩලය, ශ්‍රී ලංකා රාජ්‍ය වැවිලි සංස්ථාව හා ජාතික අධ්‍යාපන කොමිෂන් සභාවයි. ආයතනය මෙතෙක් ස්ථාපිත කර නැති හෙයින් ඩිජිටල් පරිවර්තන නියෝජිතායතනය, ආයතනයක් නොවන නිසා ජාතික ක්‍රීඩා සභාව, අරමුදල් මුදල් අමාත්‍යාංශයේ රාජ්‍ය ව්‍යාපාර දෙපාර්තමේන්තුව මගින් සමාලෝචනය කරන නිසා ජාතික ක්‍රීඩා අරමුදල හා ක්‍රීඩා ත්‍යාග අරමුදල, ආයතනය මෙතෙක් ස්ථාපනය කර නොමැති නිසා පාර්ලිමේන්තු අයවැය කාර්යාලය, ආයතනය මෙතෙක් ස්ථාපනය කර නොමැති නිසා විදුලි උපදේශක සභාව, ආයතනය වසා ඇති හෙයින් ජාත්‍යන්තර බේරුම්කරණ මධ්‍යස්ථානය, ආයතනයක් නොවන අධිකරණ අමාත්‍යාංශය යටතේ ඒකකයක් වශයෙන් පවතින නිසා අධිකරණ නොවන නිලධාරීන් පුහුණු කිරීමේ ආයතනය හා ආයතනයක් නොපවතින නිසා ශ්‍රී ලංකා වරාය නීතිගත සංස්ථාව යන ආයතන කමිටුව සමාලෝචනයට භාජනය කර නැත.

මෙම සමාලෝචනයේදී ලිඛිතව ඉදිරිපත් වූ මහජන අදහස් ද උපයෝගී කරගෙන ඇති අතර ඒ අනුව මහජන අදහස් 1723ක් ඉදිරිපත් වී ඇත. ඉන් 1399ක්ම ඉදිරිපත් කර ඇත්තේ ශ්‍රී ලංකා උසස් තාක්ෂණ අධ්‍යාපන ආයතනය (ස්ලිට්) උපාධි ප්‍රදානය කරන තත්වයට උසස් කරන ලෙස ඉල්ලමින්ය. මහජන අදහස් 209ක් ජාතික ආධුනිකත්ව සහ කාර්මික පුහුණු කිරීම් අධිකාරිය හා 29ක් වෘත්තීය හා තාක්ෂණ විශ්වවිද්‍යාලය සම්බන්ධයෙන් ඉදිරිපත් වී ඇත.

ආයතන වර්ගීකරණය

අමාත්‍යාංශ 24ක් යටතේ පවතින වානිජමය නොවන ආයතන 160ක් සමාලෝචනය කිරීමෙන් අනතුරුව කමිටවු ලබාදුන් නිර්දේශ අනුව එම ආයතන ප්‍රධාන කාණ්ඩ 09ක් යටතේ වර්ගීකරණය කර තිබේ. ඒ නියාමන ආයතන සහ රජයට ප්‍රතිපත්තිමය උපදේශ ලබාදෙන ආයතන (අධ්‍යාපන ක්ෂේත්‍රය හැර) 18ක්, කැපී පෙනෙන ව්‍යුහාත්මක ප්‍රතිසංස්කරණ සිදු කිරීමකින් තොරව අඛණ්ඩව පවත්වාගෙන යා යුතු ආයතන (නියාමන ආයතන හා අධ්‍යාපන ක්ෂේත්‍රයේ ආයතන හැර) 16ක්, මනා සම්බන්ධීකරණයක් පවත්වා ගැනීම සහ කාර්යක්ෂම හා ඵලදායී සේවාවක් සැලසීම සඳහා ඒකාබද්ධ කළ යුතු ආයතන 21ක්, ජාතික මට්ටමේ නව පර්යේෂණ ආයතනයක් පිහිටුවීම සඳහා ඒකාබද්ධ කළ යුතු ආයතන 14ක්, ජාතික සමාජ ආරක්ෂණ අරමුදලක් ස්ථාපනය කිරීම සඳහා ඒකාබද්ධ කළ යුතු ආයතන 05ක්, ප්‍රතිසංවිධානය කළ යුතු ආයතන 07ක්, වානිජමය ආකෘතියක් අනුව ක්‍රියාත්මක කළ යුතු ආයතන 09ක්, ක්ෂේත්‍රයේ අත්දැකීම් සහිත විද්වත් කමිටුවක් මගින් අධයයනය කර හෝ ආංශික සමාලෝචනයක් සිදුකර නිර්දේශ ලබාදිය යුතු ආයතන 21ක් හා කළමනාකරණය සඳහා රජයේ මැදිහත් වීම ඉවත්කළ යුතු සහ ඈවර කළ යුතු ආයතන 13ක් වශයෙන්ය.

නියාමන ආයතන සඳහා නිර්දේශ

ඒ යටතේ අමාත්‍යාංශ 13ක් යටතේ ක්‍රියාත්මක ආයතන 18ක් පූර්ණ වශයෙන් හෝ තම කාර්යභාරයේ ප්‍රධාන අංශයක් වශයෙන් නියාමන කාර්යය ඉටුකරන හෝ අදාළ විෂය පිළිබඳව රජයට ප්‍රතිපත්තිමය උපදෙස් හෝ නිර්දේශ ලබාදෙන ආයතන වශයෙන් හඳුනාගෙන ඇත.

ඒ යටතේ රාජ්‍ය නොවන සංවිධාන පිළිබඳ ජාතික ලේකම් කාර්යාලය හඳුනාගෙන ඇති අතර කමිටුවේ නිර්දේශය වී ඇත්තේ 1980 අංක 31 දරන ස්වෙච්ඡා සමාජ සේවා සංවිධාන (ලියාපදිංචි කිරීම හා අධීක්ෂණය කිරීමේ) පනතෙහි අරමුණු සාක්ෂාත් කර ගැනීම සඳහා, ආයතනයෙහි ස්වාධීනතත්වය පවත්වා ගනිමින් නියාමන කාර්ය සිදුකිරීමට අවශ්‍ය පියවර ගත යුතු බවයි.
පාරිභෝගික කටයුතු පිළිබඳ අධිකාරිය පිළිබඳව නිර්දේශ කර ඇත්තේ ආයතනය මගින් දැනට සිදු කරනු ලබන කාර්යයන් පනතෙත් අරමුණු ළඟාකර ගැනීම සඳහා දක්වන ගුණාත්මක හා ප්‍රමාණාත්මක දායකත්වය දුර්වල මට්ටමක පවතින බව නිරීක්ෂණය කරන බැවින් එම අධිකාරි පනත ශක්තිමත්ව ක්‍රියාත්මක කිරීම සඳහා අත්‍යවශ්‍ය කඩිනම් පියවර ගතයුතු බවයි.
ප්‍රසිද්ධ රැඟුම් පාලක මණ්ඩලය සම්බන්ධයෙන් නිර්දේශ කර ඇත්තේ ආයතනය පිහිටුවීම සඳහා පනත මගින් පැවරී ඇති කාර්යයන්ගෙන් අපගමනය නොවෙමින් නියාමන කාර්ය ශක්තිමත්ව ක්‍රියාත්මක කළ යුතු බවයි.

රසායනික අවි සම්මුතිය ක්‍රියාත්මක කිරීමේ ජාතික අධිකාරිය සම්බන්ධයෙන් නිර්දේශ කර ඇත්තේ, එක්සත් ජාතීන්ගේ සම්මුතිය යටතේ ශ්‍රීි ලංකාවේ වගකීම බලාත්මක කිරීම සඳහා එම ආයතනය පවත්වා ගත යුතු බවයි.

රාජ්‍ය භාෂා කොමිෂන් සභාව සම්බන්ධයෙන් නිර්දේශ කර ඇත්තේ වඩාත් ඵලදායී සේවාවක් තහවුරු කිරීම සඳහා එම කොමිෂන් සභාව සමඟ අධිකරණ හා ජාතික ඒකාබද්ධතා අමාත්‍යාංශය යටතේ ක්‍රියාත්මක වන භාෂා සම්බන්ධීකරණ අංශය ඒකාබද්ධ කර පනත අනුව කටයුතු කළ යුතු බවයි.

ශ්‍රී ලංකා තොරතුරු දැන ගැනීමේ අයිතිවාසිකම පිළිබඳ කොමිෂන් සභාව ගැන නිර්දේශ කර ඇත්තේ පනත මගින් පැවරී ඇති කාර්යයන් පමණක් නිසි පරිදි ඉටුකිරීමට අවශ්‍ය ක්‍රියාමාර්ග සැලසුම් කිරීම සහ ක්‍රියාත්මක කිරීම යන්නයි.

ආයුර්වේද වෛද්‍ය සභාව හා හෝමියෝපති වෛද්‍ය සභාව සම්බන්ධයෙන් නිර්දේශ කර ඇත්තේ පනත මගින් පැවරී ඇති නියාමන කාර්යයන් පමණක් නිසි පරිදි ඉටුකිරීමට අවශ්‍ය ක්‍රියාමාර්ග සැලසුම් කිරීම සහ ක්‍රියාාත්මක කිරීම යන්නයි.
ශ්‍රී ලංකා පුවත්පත් මණ්ඩලය සම්බන්ධයෙන් නිර්දේශ කර ඇත්තේ, එම ආයතනය වෙනුවට (හෝ එම ආයතනය පදනම වශයෙන් තබාගනිමින්) වර්තමාන සන්දර්භය තුළ ක්‍රියාත්මක වන බහුවිධ සන්නිවේදන මාධ්‍ය නියාමනයට හැකියාව සහිතව ‘ශ්‍රී ලංකා ජනමාධ්‍ය මණ්ඩලය’ නමින් ආයතනයක් පිහිටුවීම යන්නයි.

ඉදිකිරීම් කර්මාන්ත සංවර්ධන අධිකාරිය හා ශ්‍රී ලංකා උත්තේජක මර්දන නියෝජ්‍යායතනය ගැන නිර්දේශ කර ඇත්තේ පනත මගින් පැවරී ඇති කාර්යයන් පමණක් නිසි පරිදි ඉටුකිරීමට අවශ්‍ය ක්‍රියාමාර්ග සැලසුම් කිරීම සහ ක්‍රියාත්මක කිරීම යන්නයි.
ජාතික ළමා ආරක්ෂක අධිකාරිය සම්බන්ධයෙන් නිර්දේශ කර ඇත්තේ, පනත මගින් පැවරී ඇති කාර්යයන් නිසි පරිදි ඉටු කිරීමට අවශ්‍ය ක්‍රියාමාර්ග සැලසුම් කිරීම, ක්‍රියාත්මක කිරීම සහ විමර්ශන බලගන්වන රාජකාරි සිදුකළ හැකිවන පරිදි පනත සංශෝධනය කිරීම යන්නයි.

ශ්‍රී ලංකා පරමාණුක බලශක්ති නියාමන සභාව ඉදිරියට පවත්වාගෙන යා යුතු බවටත්, මධ්‍යම පරිසර අධිකාරිය ශක්තිමත් නියාමන ආයතනයක් බවට කඩිනමින් පරිවර්තනය කිරීම සඳහා අවශ්‍ය ප්‍රතිසංස්කරණ ක්‍රියාත්මක කරන ලෙසත්, සමුද්‍රීය පරිසර ආරක්ෂණ අධිකාරිය වෙරළ සංරක්ෂණ දෙපාර්තමේන්තුව සමඟ ද්වීකරණ ක්ෂේත්‍ර හඳුනාගෙන ඒවා ඉවත් කිරීමට සුදුසු පියවර ගතයුතු බවත්, ජල සම්පත් මණ්ඩලය පනතේ පැවරී ඇති කාර්යයන් ඉටු කිරීම සඳහා නියාමන සැලසුම් ක්‍රියාත්මක කළ යුතු බවත්, ජාතික ගමනාගමන කොමිෂන් සභාව සුදුසු අධ්‍යයන සිදුකර පනතද සංශෝධනය කර කාර්යක්ෂම හා ඵලදායි නියාමන ආයතනයක් බවට පත්කළ යුතු බවත්, ශ්‍රී ලංකා ගිණුම් හා විගණන ප්‍රමිති සමීක්ෂණ මණ්ඩලය ජාත්‍යන්තර ප්‍රමිතීන්ට අනුකූලව කටයුතු කළ හැකි ස්වාධීන නියාමන ආයතනයක් ලෙස විධිමත්ව පවත්වාගෙන යා යුතු බවත් නිර්දේශ කර ඇත.

අඛණ්ඩව පවත්වාගෙන යායුතු ආයතන

කැපී පෙනෙන ව්‍යුහාත්මක ප්‍රතිසංස්කරණ සිදු කිරීමකින් තොරව අඛණ්ඩව පවත්වාගෙන යායුතු ආයතන ලෙස ටවර් හෝල් රඟහල පදනම, ශ්‍රී ලංකා කලා මණ්ඩලය, ලක්ෂ්මන් කදිර්ගාමර් ජාත්‍යන්තර සබඳතා හා ක්‍රමෝපාය අධ්‍යයන ආයතනය, ශ්‍රී ලංකා සංවර්ධන පරිපාලන ආයතනය, නීති ආධාර කොමිෂන් සභාව, අපරාධයක වින්දිතයන් සහ සාක්ෂිකරුවන් ආරක්ෂා කිරීම සඳහා ජාතික අධිකාරිය, අතුරුදහන් වූ තැනැත්තන් පිළිබඳ කාර්යාලය, ශ්‍රී ලංකා විනිශ්චයකාරවරයන්ගේ ආයතනය, උපරිමාධිකරණ සංකීර්ණ කළමනාකරණ මණ්ඩලය, 1990 සුවසැරිය පදනම, ශ්‍රී ලංකා ජාතික අක්ෂි බැංකු භාරය, ශ්‍රී ලංකා පරිගණක හදිසි ප්‍රතිචාර සංසදය, දත්ත ආරක්ෂණ අධිකාරිය, ශ්‍රී ලංකා පේෂකර්ම හා ඇඟලුම් ආයතනය, ශ්‍රී ලංකා සුනිත්‍යය බලශක්ති අධිකාරිය හා තිරසර සංවර්ධන සභාව නම්කර තිබේ.

ඒකාබද්ධ කළ යුතු ආයතන

මනා සම්බන්ධීකරණයක් පවත්වා ගැනීම සහ කාර්යක්ෂම හා ඵලදායි සේවාවක් සැලසීම සඳහා ඒකාබද්ධ කළ යුතු ආයතන වශයෙන් ආයතන 21ක් නම් කර තිබේ. ඒ අතර ඇති ජාතික සමාජ සංවර්ධන ආයතනය සමාජ වැඩ පිළිබඳ උපාධි ප්‍රදානය කරන ආයතනයක් බැවින් සුදුසු විශ්වවිද්‍යාලයක අනුබද්ධ ආයතනයක් බවට පත් කිරීමට නිර්දේශ කර තිබේ.

ජාතික සමගිය හා ප්‍රතිසන්ධානය සඳහා වන කාර්යාලය සහ හානිපූර්ණය සඳහා වන කාර්යාලය සිදුකරන කාර්යයන් එක් කළමනාකාරිත්වයක් යටතේ ඉටු කිරීමට හැකියාව ඇති බැවින් ඒකාබද්ධ කිරීම සඳහා නිර්දේශ කර ඇත.

නාගරික ජනාවාස සංවර්ධන අධිකාරිය සිදුකරන කාර්යය ජාතික නිවාස සංවර්ධන අධිකාරිය මගින් ඉටුකර ගැනීම සඳහා පුළුල් අවකාශයක් පවතින බැවින් එම අධිකාරිය නාගරික සංවර්ධන අධිකාරිය සමඟ ඒකාබද්ධ කිරීමට නිර්දේශ කර ඇත.

නවීන තාක්ෂණය පිළිබඳ ආතර් සී ක්ලාක් ආයතනය මොරටුව විශ්වවිද්‍යාලයට අනුබද්ධ පර්යේෂණ අංශයක් බවට පත් කිරීමට නිර්දේශ කර තිබේ.

ජාතික යොවුන් සේනාංකය සහ ජාතික තරුණ සේවා සභාව ඒකාබද්ධ කිරීමට නිර්දේශ කර තිබේ. ලංකා කාර්මික සංවර්ධන මණ්ඩලය සහ ජාතික ව්‍යවසාය සංවර්ධන අධිකාරිය ඒකාබද්ධ කිරීමට නිර්දේශ කර තිබේ. ජාතික ශිල්ප සභාව සහ ජාතික මෝස්තර මධ්‍යස්ථානය ඒකාබද්ධ කිරීමට නිර්දේශ කර තිබේ.

මැණික් හා ස්වර්ණාභරණ පර්යේෂණ හා අභ්‍යාස ආයතනය ජාතික මැණික් හා ස්වර්ණාභරණ අධිකාරියේ පර්යේෂණ අංශය වශයෙන් ස්ථාපනය කිරීමට අවශ්‍ය ව්‍යුහාත්මක ප්‍රතිසංස්කරණ සිදුකිරීමට නිර්දේශ කර තිබේ. කුඩා තේ වතු සංවර්ධන අධිකාරිය ශ්‍රි ලංකා තේ මණ්ඩලය සමඟ ඒකාබද්ධ කිරීමට නිර්දේශ කර තිබේ. ශ්‍රී ලංකා රාජ්‍ය වැවිලි සංස්ථාව හා ජනතා වතු සංවර්ධන මණ්ඩලය විෂය පඨය සමාන වන හෙයින් ඒකාබද්ධ කිරීමට නිර්දේශ කර තිබේ. පොල් වගා කිරීමේ මණ්ඩලය, පොල් සංවර්ධන අධිකාරිය හා කිතුල් සංවර්ධන මණ්ඩලය සිදුකරන කාර්යයන් එක් කළමනාකාරිත්වයක් යටතේ වඩාත් කාර්යක්ෂමව හා ඵලදාායිව ක්‍රියාත්මක කළ හැකි බැවින් ඒකාබද්ධ කිරීමට නිර්දේශ කර තිබේ. එමෙන්ම ජාතික වැවිලි කළමනාකරණ ආයතනය වැවිලි කර්මාන්තය පිළිබඳ උසස් ඩිප්ලෝමා පාඨමාලාව ඇතුළු විවිධ පාඨමාලා පවත්වන බැවින් සුදුසු විශ්වවිද්‍යාලයක් සමඟ අනුබද්ධ ආයතනයක් බවට පත්කරන ලෙස නිර්දේශ කර තිබේ.

ජාතික ආපදා කළමනාකරණ මධ්‍යස්ථානය සහ ජාතික ආපදා සහන සේවා මධ්‍යස්ථානය එක් කාර්යයක් සිදුකරන බැවින් වඩාත් කාර්යක්ෂම එක් ආයතනයක් ස්ථාපනය කළ යුතු බවට නිර්දේශ කර තිබේ.

නව පර්යේෂණ ආයතනයක්

ජාතික මට්ටමේ නව පර්යේෂණ ආයතනයක් පිහිටුවීම සඳහා ඒකාබද්ධ කළ යුතු ආයතන 14ක් සම්බන්ධයෙන් එහි විස්තර කර ඇති අතර ඒ අනුව සඳහන් කර ඇත්තේ එම ඒකාබද්ධ කිරීමෙන් පසු ඒ තුළ එක් එක් විෂය ක්ෂේත්‍රයට අදාළ විශේෂ පර්යේෂණ ඒකක නිර්මාණය කළ යුතු බවයි. ඒ අනුව එක් ආයතනයක් නිර්මාණය කිරීම සඳහා ඒකාබද්ධ කළ යුතු ආයතන වශයෙන් සඳහන් කර ඇත්තේ උක් පර්යේෂණ ආයතනය, හෙක්ටර් කොබ්බෑකඩුව ගොවි කටයුතු පර්යේෂණ හා පුහුණු ආයතනය, ශ්‍රී ලංකා කෘෂිකාර්මික පර්යේෂණ ප්‍රතිපත්ති සභාව, පොල් පර්යේෂණ ආයතනය, රබර් පර්යේෂණ ආයතනය, ශ්‍රී ලංකා තේ පර්යේෂණ ආයතනය, ශ්‍රී ලංකා නව නිපැයුම්කරුවන්ගේ කොමිසම, ජාතික නවොත්පාදන නියෝජ්‍යාතනය, කාර්මික තාක්ෂණ ආයතනය, ශ්‍රී ලංකා ජාතික පර්යේෂණ සභාව, ජාතික විද්‍යා හා තාක්ෂණ කොමිෂන් සභාව, ජාතික විද්‍යා පදනම, ජාතික මූලික අධ්‍යයන ආයතනය හා ශ්‍රී ලංකා ජාතික ඉංජිනේරු පර්යේෂණ සහ සංවර්ධන මධ්‍යස්ථානය යන ආයතනයි.

ප්‍රතිසංවිධානය කළ යුතු ආයතන

එහි ප්‍රතිසංවිධානය කළ යුතු ආයතන වශයෙන් සඳහන් කර ඇත්තේ, මාර්ග සංවර්ධන අධිකාරිය, ජාතික පුස්තකාල හා ප්‍රලේඛන සේවා මණ්ඩලය, ශ්‍රී ලංකා අපනයන සංවර්ධන මණ්ඩලය, තල් සංවර්ධන මණ්ඩලය, සෞම්‍යමූර්ති තොන්ඩමාන් අනුස්මරණ පදනම, රණවිරු සේවා අධිකාරිය හා ශ්‍රී ලංකා ගමනා ගමන මණ්ඩලයයි.

වානිජ කළ යුතු ආයතන

එහි වානිජමය අකෘතියක් අනුව ක්‍රියාත්මක කළ යුතු ආයතන වශයෙන් සඳහන් කර ඇත්තේ ජාතික භාෂා අධ්‍යාපන සහ පුහුණු ආයතනය, ශ්‍රී ලංකා ඛනිජ තෙල් සංවර්ධන අධිකාරිය, ශ්‍රී ජයවර්ධනපුර මහ රෝහල, විජය කුමාරතුංග අනුස්මරණ රෝහල, ශ්‍රී ලංකා පදනම් ආයතනය, සුගතදාස ජාතික ක්‍රීඩා සංකීර්ණ අධිකාරිය, වී අලෙවි මණ්ඩලය, රන්මිහිතැන්න මහින්ද රාජපක්ෂ ජාතික ටෙලි සිනමා උද්‍යානය හා පොල්ගොල්ල ජාතික සමූපකාර සංවර්ධන ආයතනය යන ඒවායි.

තවදුරටත් අධ්‍යයනය කළයුතු ආයතන

ක්ෂේත්‍රයේ අත්දැකීම් සහිත විද්වත් කමිටුවක් මඟින් අධ්‍යයනය කර හෝ ආංශික සමාලෝචනයක් සිදුකර නිර්දේශ ලබාදිය යුතු ආයතන (අධ්‍යාපන හා ධීවර ක්ෂේත්‍රවල හැර) වශයෙන් ශ්‍රී ලංකා ජාතික චිත්‍රපට සංස්ථාව, ජාතික පොලිස් අභ්‍යාස ආයතනය, ශ්‍රී ලංකා පරමාණුක බලශක්ති මණ්ඩලය, පුනරුත්ථාපන කොමසාරිස් ජනරාල් කාර්යාලය, අන්තරායකර ඖෂධ පාලක ජාතික මණ්ඩලය, දුම්කොළ හා මද්‍යසාර පිළිබඳ ජාතික අධිකාරිය, ශ්‍රීමත් ජෝන් කොතලාවල ආරක්ෂක රෝහල, ආරක්ෂක සේවා අණ හා මාණ්ඩලික විද්‍යාලය, ජාතික ආරක්ෂක විද්‍යායතනය, ජාතික ආරක්ෂක අධ්‍යයන ආයතනය නම්කර ඇත.

එමෙන්ම ආංශික සමාලෝචනයකින් පසු නිර්දේශ ලබාගත යුතු ධීවර, ජලජ හා සාගර සම්පත් අමාත්‍යාංශය යටතේ ක්‍රියාත්මක වන ආයතන වශයෙන් නම්කර ඇත්තේ, ශ්‍රී ලංකා ජාතික ජලජීවී වගා සංවර්ධන නියෝජිතායතනය, ජාතික ජලජ සම්පත් පර්යේෂණ හා සංවර්ධන නියෝජිතායතනය (නාරා) හා ලංකා ධීවර වරාය නීතිගත සංස්ථාව යන ඒවායි.

ආංශික සමාලෝචනයකින් පසු නිර්දේශ ලබාගත යුතු අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශය යටතේ වන ආයතන වශයෙන් සඳහන් කර ඇත්තේ, විශ්වවිද්‍යාල ප්‍රතිපාදන කොමිෂන් සභාව, තෘතීයික හා වෘත්තීය අධ්‍යාපන කොමිෂන් සභාව, ජාතික අධ්‍යාපන කොමිෂන් සභාව, ශ්‍රී ලංකා උසස් තාක්ෂණ අධ්‍යාපන ආයතනය, ජාතික ආධුනිකත්ව සහ කාර්මික පුහුණු කිරීමේ අධිකාරිය, ශ්‍රී ලංකා වෘත්තීය පුහුණු අධිකාරිය, ජාතික අධ්‍යාපන ආයතනය, ශ්‍රී ලංකා ජර්මානු කාර්මික අභ්‍යාස ආයතනය යන ඒවායි.

රජයේ මැදිහත්වීම ඉවත්කළ යුතු හා ඈවර කළ යුතු ආයතන සම්බන්ධයෙන් මෙහිදී විස්තර කරන්නේ නැති අතර එම ආයතන ලැයිස්තුව පසුගිය සතියේ අපගේ මුල් පුවතින් විස්තර කරනු ලැබීය.

එම කමිටු වාර්තාවේ ඇති ඉහත සඳහන් තොරතුරු තවදුරටත් මහජන අවකාශයේදී සාකච්ඡාවට බඳුන් විය යුතුය යන්න අපගේ තේරුම් ගැනීම වේ. එමෙන්ම රජයේ වානිජ ආයතන ගැන මෙන්ම රජයේ අනෙකුත් ව්‍යවස්ථාපිත ආයතන ගැන මෙන්ම රජයේ දෙපාර්තමේන්තු සම්බන්ධයෙන්ද සමාලෝචනයක් සිදුවිය යුතු බව අපගේ අදහසයි.