No menu items!
24.9 C
Sri Lanka
3 April,2025

පරණ ආණ්ඩු කළ වැඩේම යළිත්… ඡන්දය කටේ තියාගෙන ජනතාවට රස්සා සහ සහන මලු බෙදයි

Must read

ආහාර හා පොහොර සහන දෙයි
අස්වැසුමේ කාලය දීර්ඝ කරයි

 

‘පළාත් පාලන ආයතන ඡන්ද විමසීම ප්‍රකාශයට පත් කිරීමට පෙර ආරම්භ කර තිබූ නිලධාරීන් බඳවා ගැනීම්/ උසස් කිරීම්වලට අදාළ දීප ව්‍යාප්ත වැඩපිළිවෙලක් කල්දැමීමකින් තොරව ක්‍රියාත්මක කළ යුතු යැයි අමාත්‍යාංශ ලේකම්වරයා අපේක්ෂා කරන විටදී හා සමස්ත දිවයිනටම බලපාන පරිදි රාජ්‍ය සේවයට හෝ රාජ්‍ය ආයතනවලට අදාළ වන විධිමත්ව, දේශපාලන මැදිහත්වීම්වලින් තොරව සිදු කෙරෙන වෙනත් බඳවා ගැනීම්/ උසස් කිරීම් සඳහා මැතිවරණ කොමිෂන් සභාව වෙත ඉල්ලීමක් ඉදිරිපත් කර ලිඛිත අනුමැතිය ලබාගත යුතුය.’

‘මෙම කාලසීමාව තුළදී රජයේ ඉඩම් බෙදා දීම්, රජයේ ඉඩම් සඳහා හිමිකම් ඔප්පු හෝ නිවාස අයිතිය පැවරීමේ ඔප්පු ප්‍රදානය කිරීම්, වැවිලි හෝ වෙනත් බෝග කටයුතු සඳහා මුදල් හා විවිධ සහනාධාර, පොහොර, කෘෂි උපකරණ යනාදිය ලබාදීම, සහල් ඇතුළු ආහාර ද්‍රව්‍ය, ක්‍රීඩා භාණ්ඩ, ස්වයං රැකියා සඳහා උපකරණ, පාපැදි, සූර්ය බල විදුලි පහන්, නිවාස ඉදිකිරීම් සඳහා වූ ගොඩනැගිලි ද්‍රව්‍ය යනාදිය බෙදාහැරීමේ ව්‍යාපෘති හා නිවාස ණය නිකුත් කිරීම්/වන්දි මුදල් ප්‍රදානය කිරීම වැනි වැඩසටහන් අත්හිටුවිය යුතුය. එසේ ලබාදෙන බවට රාජ්‍ය නිලධාරීන් විසින් නිවේදන නිකුත් කර ඒ සඳහා ලැයිස්තු සකස් කිරීමද මෙම කාලසීමාව තුළ නොකළ යුතුය. මක්නිසාදයත්, එවැනි කාර්යයන් මගින් ඡන්දදායකයන්ට සංග්‍රහ කිරීමේ වරද සිදුකරන බවට හා දේශපාලන පක්ෂ හා අපේක්ෂකයන් ප්‍රවර්ධනය සිදුකරන බවටත් පැමිණිලි ලැබෙන හෙයිනි.’

ඉහත සඳහන් විස්තර අන්තර්ගතව ඇත්තේ මැතිවරණ කොමිෂන් සභාව 2025.03.03 දින ‘රජයට සහ රාජ්‍ය සංස්ථා, ව්‍යවස්ථාපිත මණ්ඩලවලට අයත් දේපල මැතිවරණ කාල සීමාව තුළදී අනිසි ලෙස භාවිතා කිරීම වැළැක්වීම සහ නිලධාරීන්, සේවකයන් බඳවා ගැනීම/ උසස් කිරීම/ මාරු කිරීම සීමා කිරීම’ යනුවෙන් නිකුත් කර ඇති චක්‍රලේඛයේය. එම චක්‍රලේඛය යවා ඇත්තේ අමාත්‍යාංශ ලේකම්වරුන්, පළාත් සභා ප්‍රධාන ලේකම්වරුන්, කොමිෂන් සභා ලේකම්වරුන්, දිස්ත්‍රික් ලේකම්වරුන්, පළාත් ආණ්ඩුකාර ලේකම්වරුන්, පළාත් සභා අමාත්‍යාංශ ලේකම්වරුන්, පළාත් රාජ්‍ය සේවා කොමිෂන් සභා ලේකම්වරුන්, දෙපාර්තමේන්තු ප්‍රධානීන්, රාජ්‍ය සංස්ථා/ව්‍යවස්ථාපිත මණ්ඩල සභාපතිවරුන් සහ සාමාන්‍යාධිකාරිවරුන් අමතමින්ය.

ඒ අනුව පැහැදිලි කරුණ වන්නේ පළාත් පාලන ඡන්දය ප්‍රකාශයට පත්කළ මාර්තු මස 03 වැනිදා සිට එහි ප්‍රතිඵල නිකුත් කර අවසන් වනතෙක් වන මැතිවරණ කොමිසමට අනුව ‘ඡන්ද විමසීම් කාල සීමාව’ තුළ ඉහත සඳහන් කටයුතු සිදුකළ නොහැකි බවයි. ඒවායින් අත්‍යවශ්‍ය කරුණක් වුවද සිදුකළ හැකි වන්නේ මැතිවරණ කොමිෂන් සභාවේ පූර්ව අනුමැතිය ඇතිව බවයි.
මැතිවරණයක් ප්‍රකාශයට පත් කිරීමෙන් පසු මැතිවරණ කොමිසම එවන් චක්‍රලේඛයක් මගින් රජයේ ඉහළ නිලධාරීන්ට උපදෙස් ලබාදෙන්නේ පැවති සෑම ආණ්ඩුවක්ම පාහේ සිය මැතිවරණ ජයග්‍රහණ වෙනුවෙන් රාජ්‍ය සම්පත් ඇතුළු දේපල අවභාවිතා කිරීමේ සංස්කෘතියක නියැලී සිටි බැවිනි. වත්මන් ජාතික ජන බලවේග ආණ්ඩුව යනු එම පැවති දේශපාලන සංස්කෘතිය අවසන් කර අලුත් දේශපාලන සංස්කෘතියක් රට තුළ ස්ථාපිත කිරීමට ඇප කැප වන බව කී ව්‍යාපාරයකි. එවන් ආණ්ඩුවක පාලනය යටතේ රාජ්‍ය සම්පත් ඇතුළු දේපල අවභාවිත කිරීමක් සිදුවිය නොහැකිය. විශේෂයෙන්ම මැතිවරණ සමයකදී එය කෙසේවත් විය නොහැකිය.

එහෙත් පළාත් පාලන ඡන්ද විමසීම් ප්‍රකාශයට පත් කිරීමෙන් පසු ජාතික ජන බලවේග ආණ්ඩුවද කැබිනට් මණ්ඩල තීරණ ලෙස හා වෙනත් ආකාරයට සිදුකරමින් පවතින්නේ මැතිවරණ කොමිසමේ ඉහත සඳහන් චක්‍රලේඛයට පටහැනි දේවල් බව පෙනේ.
මෙම සටහන ලියන අවස්ථාවට පෙර අවසන් වරට මාර්තු 24 දින පැවති අමාත්‍ය මණ්ඩල රැස්වීමේදී ඒ ආකාරයේ එක් තීරණයක් ගෙන ඇති අතර එම තීරණය වන්නේ ‘කාලීන ආහාර පැකේජය ලබා දීමේ වැඩසටහන ක්‍රියාත්මක කිරීම’ යන්නය. එහි මෙසේ සඳහන් වේ.

‘සිංහල හා දෙමළ අලුත් අවුරුදු සමය තුළදී සහන මිලකට අත්‍යවශ්‍ය ආහාර ද්‍රව්‍ය පැකේජයක් ලබාදීම සඳහා ගරු ජනාධිපති තුමා විසින් 2025 අයවැය යටතේ ඉදිරිපත් කරන ලද යෝජනාව අනුව රුපියල් 5000 ක වටිනාකමකින් යුත් අත්‍යවශ්‍ය ආහාර ද්‍රව්‍ය ඇතුළත් ‘කාලීන ආහාර පැකේජයක්’ රුපියල් 2500ක සහන මිලකට ලබා දීමට සැලසුම් කර ඇත. ඒ සඳහා අස්වැසුම ප්‍රතිලාභ අපේක්ෂාවෙන් අලුතින් අයදුම්පත් ඉදිරිපත් කරනු ලැබ ඇති 812,753ක් වන අයදුම්කරුවන් අතුරින් යෝග්‍ය ප්‍රතිලාභීන් තෝරා ගැනීමට අපේක්ෂා කරනු ලබයි. ඒ අනුව, 2025.04.01 දින සිට 2025.04.13 දින දක්වා කාලය තුළ රටපුරා පිහිටි සතොස අලෙවිසැල් ජාලය සහ ඣධඡත්‍ෑෘ අලෙවිසැල් මගින් ආහාර පැකේජ ප්‍රතිලාභීන් වෙත ලබා දීම පිණිස අවශ්‍ය පියවර ගැනීම සඳහා කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යතුමා සහ වෙළෙඳ, වානිජ, ආහාර සුරක්ෂිතතා සහ සමූපකාර සංවර්ධන අමාතයතුමා ඉදිරිපත් කළ ඒකාබද්ධ යෝජනාව අමාත්‍ය මණ්ඩලය විසින් අනුමත කරන ලදී.’

මෙම වැඩසටහන පැහැදිලිවම මැතිවරණ සමයේදී සිදුවන ඡන්දදායකයින්ට බලපෑම් කළහැකි සහනාධාර වැඩසටහනකි. මන්ද එය අස්වැසුම ප්‍රතිලාභ අපේක්ෂාවෙන් අයදුම්කර ඇති ලක්ෂ 8කට වැඩි පිරිසක් අතරින් තෝරාගත් පිරිසකට එම සහනය ලබාදීමට යන බැවිනි. ඒ නිසා අනිවාර්යයෙන්ම මැතිවරණ කොමිසමේ අවධානය ඒ වෙත යොමු විය යුතුමය.
එසේම එම කැබිනට් තීරණයේ සඳහන් කර ඇති අයවැය යෝජනාව මෙම යෝජනාවට වඩා වෙනස්ය. ‘අලුත් අවුරුදු කාලය තුළ සහන මිලකට අත්‍යවශ්‍ය ආහාර ලබාදීම’ යනුවෙන් ඒ ගැන අයවැය යෝජනාවේ ඇත්තේ මෙසේයි.

‘වැඩිවූ ජීවන වියදම අඩු කිරීම සඳහා ආධාරක පියවරක් ලෙස දැරිය හැකි මිලකට අත්‍යවශ්‍ය ආහාර ද්‍රව්‍ය මිලදී ගැනීමට ඉඩ සලසමින් උත්සව සමය සඳහා ආහාර පැකේජයක් ලබා දීමට රජය තීරණය කර තිබෙනවා. ඒ අනුව, ඉදිරි අලුත් අවුරුදු සමයේදී ලංකා සතොස සමාගම හරහා සහල්, ටින් මාළු, පරිප්පු, ළුෑණු, අර්තාපල් සහ කරවල ඇතුළු වියළි ආහාර සලාකයක් ලබාදීමට යෝජනා කරනවා. මෙම සලාක ලබාදීමේ පිරිවැය වෙනුවෙන් අප රුපියල් මිලියන 1000ක් ලබා දීමට යෝජනා කරනවා.’

අයවැය යෝජනාව තෝරාගත් පිරිසක් ඉලක්ක නොකරන අතර ලංකා සතොස මගින් ඕනෑම පුද්ගලයෙකුට ආහාර පැකේජයක් යෝජනා කර තිබේ. අයවැය යෝජනාවක් යැයි කියමින් මෙහිදී සිදුවී ඇත්තේ ඡන්දයකට අදාළ කරගත හැකි ආකාරයට එය වෙනස් කිරීමයි. එය ජාතික ජනබලවේග ආණ්ඩුව ඉදිරි පළාත් පාලන ඡන්ද විමසීම් වෙනුවෙන් දැනුවත්ව සිදුකළ එකක් ලෙස හඳුනාගත හැකිය.

මේ ආකාරයටම මාර්තු 17 වැනිදා පැවති කැබිනට් මණ්ඩල රැස්වීමේදීම ‘අස්වැසුම සුබසාධක ප්‍රතිලාභ ගෙවීමේ යෝජනා ක්‍රමය සංශෝධනය කිරීම’ යනුවෙන් තවත් තීරණයක් ගෙන තිබේ. එහි මෙසේ සඳහන් වේ.

‘අස්වැසුම සුබසාධක ප්‍රතිලාභ ගෙවීමේ යෝජනා ක්‍රමය 2023.07.01 වන දින සිට ක්‍රියාත්මක කරනු ලබන අතර, අංක 2415/66 හා 2024.12.12 දිනැති අතිවිශේෂ ගැසට් නිවේදනය මගින් මෙම යෝජනා ක්‍රමය අවසාන වරට සංශෝධනය කරනු ලැබ ඇත. 2025 වර්ෂයේ අයවැය ඇස්තමේන්තු මඟින් වෙන් කරනු ලැබ ඇති ප්‍රතිපාදන තුළ දැනට බලපවත්නා අස්වැසුම ප්‍රතිලාභ ගෙවීමේ යෝජනා ක්‍රමය යටතේ ලබාදෙන ප්‍රතිලාභ පහත සඳහන් පරිදි සංශෝධනය කරමින් ගැසට් නිවේදනයක් මගින් ප්‍රකාශයට පත් කිරීම සඳහා මුදල්, ක්‍රමසම්පාදන සහ ආර්ථික සංවර්ධන අමාත්‍ය වශයෙන් ගරු ජනාධිපති තුමා කළ යෝජනාව අමාත්‍ය මණ්ඩලය විසින් අනුමත කරන ලදී.’

එම යෝජනාවේ ඇති විස්තරවලට අනුව අස්වැසුම සුබසාධක ප්‍රතිලාභ ගෙවීමේ යෝජනා ක්‍රමයේ 1 වන උපලේඛනයේ අඩංගු සංක්‍රාන්තික සමාජ කාණ්ඩය සඳහා ප්‍රතිලාභ හිමිවන කාලපරිච්ඡේදය 2025.04.30 දක්වා දීර්ඝ කිරීම, එකී යෝජනා ක්‍රමයේ 11 වන උපලේඛනයේ අඩංගු ආබාධ සහිත තැනැත්තන් සඳහා පිරිනමනු ලබන මාසික ආධාර මුදල සහ වකුගඩු ආධාර ලබන තැනැත්තන් සඳහා පිරිනමන මාසික ආධාර මුදල රුපියල් 7500 සිට රුපියල් 10,000 දක්වා ඉහළ නැංවීම සහ වැඩිහිටි තැනැත්තන් සඳහා පිරිනමනු ලබන මාසික ආධාර මුදල රුපියල් 3000 සිට රුපියල් 5000 දක්වා ඉහළ නැංවීම සහ එම තීරණය 2025 අප්‍රේල් මස සිට ක්‍රියාත්මක කිරීම, 11 වන උපලේඛනයේ දැක්වෙන ආධාර ලබන ආබාධ සහිත තැනැත්තන් සඳහා දීමනාව, වකුගඩු රෝගී තැනැත්තන් සඳහා වන දීමනාව සහ වැඩිහිටි තැනැත්තන් සඳහා වන දීමනාව ඉහත යෝජනාවලට යටත්ව, ගෙවීම් කාලසීමාව 2025.12.31 දක්වා දීර්ඝ කිරීම, 2025 අප්‍රේල් මාසයෙන් පසු සංක්‍රාන්තික සමාජ කාණ්ඩය යටතේ දිමනා ගෙවීම නතර වුවත්, එම පවුල්වල සිටින ආබාධ සහිත තැනැත්තන්, වකුගඩු රෝගීන් සහ වැඩිහිටි පුද්ගලයින් සඳහා පිරිනමනු ලබන ප්‍රතිලාභ දීමනා ගෙවීම් කාලසීමාව 2025.12.31 දක්වා දීර්ඝ කිරීම හා අලුතින් ඉදිරිපත් වී ඇති ආබාධ සහිත තැනැත්තන් සහ වකුගඩු රෝගීන්ගේ අයැදුම්පත් උපරිම සීමාවට යටත්ව, ඇතුළත් කර ගනිමින් සුදුසුකම් ලබන්නන්ට 2025.12.31 දක්වා අදාළ දීමනා ගෙවීම සඳහා අනුමැතිය ලබාදී තිබේ.

එම යෝජනා නම්කර ඇත්තේත් අයවැය යෝජනාවක් වශයෙනි. එහෙත් මෙම කැබිනට් මණ්ඩල යෝජනාවත් අයවැය යෝජනාවත් අතර පරස්පරයක් පවතී. ‘අස්වැසුම ප්‍රතිලාභ ඉහළ නැංවීම’ යනුවෙන් ජනාධිපති අනුර කුමාර දිසානායකගේ අයවැය කතාවේ සඳහන් වන්නේ මෙවැන්නකි.

‘අවදානමට ලක්විය හැකි ප්‍රජාවන් මත පැටවී ඇති බර ලිහිල් කිරීම සඳහා, සමාජ ප්‍රතිලාභ ලේඛණයේ සිටින අය සඳහා මුදල් ප්‍රදාන වැඩි කිරීමෙන් ඔවුන් ආරක්ෂා කිරීමට රජය අවශ්‍ය පියවර ගන්නවා. ඒ අනුව, රජය 2025 වසරේදී සමාජ ආරක්ෂණ වියදම් සඳහා රුපියල් බිලියන 232.5 දක්වා ශුද්ධ වියදම වැඩි කරනවා. දුප්පතුන් සහ අන්ත දුප්පතුන් යන සමාජ කණ්ඩායම් දෙකටම ගෙවනු ලබන මාසික ප්‍රතිලාභ දීමනාව පිළිවෙලින් රුපියල් 8500 සිට රුපියල් 10,000 දක්වා සහ රුපියල් 15,000 සිට රුපියල් 17,500 දක්වා 2025 ජනවාරි සිට ක්‍රියාත්මක වන පරිදි වැඩි කළා. 2025 මාර්තු 31 දින ගෙවීම් අවසන් වීමට නියමිතව තිබූ සංක්‍රාන්ති මට්ටමේ සිටි සමාජ කණ්ඩායම් සඳහා ප්‍රතිලාභ ගෙවීමේ කාලය 2025 අප්‍රේල් 30 දක්වා දීර්ඝ කිරීමට අප යෝජනා කරනවා. තවද, අස්වැසුම වැඩසටහනට ඇතුළත් නොවූ, එහෙත් සුදුසුකම් ලත් අයට යෝජනා ක්‍රමයට ඇතුළත් වීමට තවත් අවස්ථාවක් ලබාදෙමින් 2025 මැයි මාසයේදී නව තෝරා ගැනීම් අවසන් අවසන් කිරීමට අපේක්ෂා කරනවා.’

ඒ අනුව කැබිනට් මණ්ඩල තීරණයේදී, 2025 අප්‍රේල් මාසයේදී දීමනා ගෙවීම නතර වන සංක්‍රාන්තික සමාජ කාණ්ඩයේ පවුල්වල සිටින ආබාධ සහිත තැනැත්තන්, වකුගඩු රෝගීන් සහ වැඩිහිටි පුද්ගලයින් සඳහා ප්‍රතිලාභ දීමනා ගෙවීමේ කාලසීමාව 2025 දෙසැම්බර් 31 දක්වා දීර්ඝ කිරීම සහ අලුතින් ඉදිරිපත් වී ඇති ආබාධ සහිත තැනැත්තන් සහ වකුගඩු රෝගීන්ගේ අයදුම්පත් උපරිම සීමාවට යටත්ව, ඇතුළත් කර ගනිමින් සුදුසුකම් ලබන්නන්ට 2025 දෙසැම්බර් 31 දක්වා දීමනා ගෙවීම යන අලුත් යෝජනා ඇතුළත් වී තිබේ. මෙවැනි අලුත් යෝජනා එන්නේ ඡන්ද සමයකදී වීම සලකා බැලිය යුතු තත්වයකි.

එමෙන්ම පළාත් පාලන ඡන්දය ප්‍රකාශ කිරීමෙන් පසු මාර්තු 10 වැනිදා පැවති කැබිනට් මණ්ඩල රැස්වීමේදී රාජ්‍ය සේවය සඳහා අලුතින් 5882ක් බඳවා ගැනීමට අනුමැතිය ලබා දී තිබේ. රාජ්‍ය සේවයේ බඳවා ගැනීම් ක්‍රියාවලිය සමාලෝචනය කිරීම සහ කාර්ය මණ්ඩල කළමනාකරණය කිරීම යන එම ක්‍රියාවලිය යටතේම ඊට පෙර පෙබරවාරි 19 වැනිදා පැවති කැබිනට් මණ්ඩල රැස්වීමේදී රාජ්‍ය සේවය සඳහා අලුතින් 2003ක් බඳවා ගැනීමට අනුමැතිය ලබාදී තිබෙන අතර පෙබරවාරි 09 වැනිදා පැවති කැබිනට් මණ්ඩල රැස්වීමේදී රාජ්‍ය සේවයට අලුතින් 7456ක් බඳවා ගැනීමට අවසර ලබාදී තිබේ. මේ ආකාරයට මේ වනවිට රාජ්‍ය සේවයට අලුතින් 15,341ක් අලුතින් බඳවා ගැනීමට කැබිනට් මණ්ඩලය අනුමැතිය ලබාදී තිබේ. ඒ සම්බන්ධයෙන් වන කටයුතු මෙම ඡන්ද සමයේදී සිදුවිය හැකිය. ඒ නිසා ඒ ගැන අවධානයෙන් සිටින්නටද මැතිවරණ කොමිසමට සිදුවනු ඇත.

වැවිලි සහ ප්‍රජා යටිතල පහසුකම් ඇමති සමන්ත විද්‍යාරත්නගේ ප්‍රකාශයක් ලෙස මාර්තු 26 වැනිදා මව්බිම පුවත්පත වාර්තා කර ඇත්තේ වෙළෙඳපොළේ රුපියල් 9000ක් වන පොල් වගාව සඳහා යොදන පොහොර මිටියක් රුපියල් 4000ක සහන මිලකට ලබාදීමට කටයුතු සූදානම් කර ඇති බව හා එය මාර්තු මස අවසන් සතිය තුළ ක්‍රියාත්මක කරන බවයි. මෙම සහනාධාරයද ලබාදෙන්නට යන්නේ ද ඡන්ද සමයේය. ආණ්ඩුවේ මෙම සියලු තීන්දු තීරණ මැතිවරණ කොමිසමේ චක්‍රලේඛය අනුව සිදුකළ හැකි ඒවා නොවේ. එමෙන්ම එම තීන්දු තීරණ ඡන්දය ප්‍රකාශයට පත් කිරීමෙන් පසු ගත් ඒවාය. ඒවායේ අත්‍යවශතාවයක් ඇත්නම් අනිවාර්යයෙන්ම මැතිවරණ කොමිසමට දන්වා එහි අනුමැතිය යටතේ ක්‍රියාත්මක කළ යුතු ඒවාය. එහෙත් එම තීන්දු තීරණ ඒ සම්බන්ධයෙන් වගකීම පැවරී ඇති රාජ්‍ය නිලධාරීන් මැතිවරණ කොමිසමේ අනුමැතියට ලක්කරයිද යන්න ප්‍රශ්නයකි.

ඡන්ද සඳහා මේ ආකාරයට රාජ්‍ය සම්පත් භාවිත කරමින් ඡන්දදායකයින්ට අල්ලස් ලබාදීමට ජාතික ජන බලවේගයට අරමුණක් නැතැයි හා සහන ලැබිය යුතු ජනතාවට සහන ලබාදීමක් ලෙස ඒවා ඔවුන් හැඳින්විය හැකිය. එහෙත් ඉහත සඳහන් කැබිනට් මණ්ඩල සහ කැබිනට් මණ්ඩල නොවන තීන්දු තීරණ ඡන්ද සමයේ ක්‍රියාත්මක කිරීම මගින් අනිවාර්යයෙන්ම සිදුවන්නේ ඡන්දදායකයාට බලපෑමක් සිදුකිරීමය. පැවති ආණ්ඩු ඒ ආකාරයට කටයුතු කිරීමේදී එය විවේචනයට ලක්කළ ජාතික ජන බලවේගයට මෙම තත්වය නොතේරෙනවා විය නොහැකිය. ඔවුන් එය සිදුකරනවා ඇත්තේ දැනුවත්භාවයෙන් යුතුවමය. ඡන්දයට බලපෑමක් නොවන ආකාරයට මෙම කැබිනට් මණ්ඩල හා එසේ නොවන තීන්දු තීරණ ක්‍රියාත්මක වීම නැවැත්විය හැක්කේ මැතිවරණ කොමිසමට පමණය. ඒ රාජ්‍ය නිලධාරීන්ගේ දැනුම් දීමක් ලැබීමට පෙර ඒ සම්බන්ධයෙන් ක්‍රියාත්මක වීම තුළින්ය.
එසේම මෙම තීන්දු තීරණ මගින් ජාතික ජන බලවේග ආණ්ඩුව අපට කියා දෙන තව වැදගත් පාඩමක්ද තිබේ. ඒ පැවති දේශපාලන සංස්කෘතිය අවසන් කිරීමේ වුවමනාවක්ද ඔවුන්ට නැති බවය. එය ඔවුන්ද නඩත්තු කරමින් යන බවය.

 

- Advertisement -spot_img

පුවත්

LEAVE A REPLY

Please enter your comment!
Please enter your name here

- Advertisement -spot_img

අලුත් ලිපි