2019 අප්‍රේල් පාස්කු අපරාධය පිළිබඳව ආණ්ඩුව ගන්නට යන පියවර ගැන ඉදිරි 21 දාට පෙර තමන් දැනුවත් නො කළොත්, තමන් පාරට බැස වෙනත් අතක් බලාගන්නා බව, මැල්කම් කාදිනල් රංජිත් හිමි රටට ප්‍රකාශයක් කර තිබේ.
ආණ්ඩුව, ජනාධිපති හා කාදිනල් හිමි අතර සහසම්බන්ධය මනාව පවත්වා ගෙන යාමට කතෝලික ඇමතිවරයෙකු පත් කර තිබේ. කඳානේ පදිංචි ක්‍රිශාන්ත අබේසේන මහතාය. ඔහු මෑතක කාදිනල් හිමිට දන්වා ඇත්තේ, පාස්කු තීන්දු ගැනීමට ආණ්ඩුවට තව මාස දෙක තුනක් අවශ්‍ය බවය. කාදිනල් හිමි ඊට පෙර දිනක පවසා තිබුණේ තමන්ට වසර පහක් බලා සිටිය නො හැකි බවය.
එය, ජාජබයේ සහෝදර සන්ධාන පක්ෂයක් ආණ්ඩුවෙන් ඉවත් වීමට සූදානම්ව කරන ඇඟවීමක් තරමට බරපතළ ප්‍රකාශයකි. ජාජබය බලයට පත් කිරීම සඳහා කතෝලික සභාව හා ජාජබය අතර ගිවිසුමක් පැවති බව රට නො දනී. ජාජබය පිහිටුවා ඇත්තේ සන්ධාන ආණ්ඩුවක් ද නො වේ. කොළඹ කතෝලික සභාව භාර රදගුරු, කාදිනල් රංජිත් හිමි හා ජාජබය අතර කෙබඳු පෞද්ගලික සමීපතාවක් ඇතත්, මහ කතෝලික සභාව හා ජාජබය අතර එ බඳු ගිවිසුම්ගත එකඟතාවක් නැති බව අපි මනාව දනිමු. මහ කතෝලික සභාව (අනු කතෝලික සභා 12 එකතුව) මෙතෙක් එ බඳු ප්‍රකාශයක් කර නැත. එ බඳු තීන්දුවක් ගැනීමට මහ කතෝලික සභාවේ රදගුරු දොළොස් නමට වුව තනි බලයක් නැත.
මහ කතෝලික සභා තීන්දු ගැනීම සඳහා, රදගුරුවරු එක්ව පිහිටුවා ගත් ජාතික රදගුරු වෘත්තීය සම්මේලනයක් ද තිබේ. රටේ රදගුරු දොළොස් නම සමග, කතෝලික සභාවේ මහ ගිහි සාමාජිකයන් ලක්ෂ 14කට ආසන්නය. සේවාර්ජිත රදගුරුවරු කීපදෙනෙක් ද සිටිති. කොළඹ පදවියේ කතෝලික පූජකවරුන් සංඛ්‍යාව ද ඊට ඇතුළත්ය.
සිය ඉහත කී ප්‍රකාශය සමග, 1948 සිට ම සියලු දේශපාලන පක්ෂ බලයට පත්වීම සඳහා ජනතාවට දී ඇත්තේ බොරු පොරොන්දු බව සිහිපත් කරැති කාදිනල් හිමි, අනුර කුමාර ජනාධිපති බලයට පත්වූ විගස කටුවපිටියට පැමිණ තමන්ට දුන් පොරොන්දුව ඉටු නො කළොත්! යන අනතුරු ඇඟවීම ප්‍රසිද්ධියේ ම අවධාරණය කර ඇත.
ජනාධිපතිවරයා තරගයෙන් ජයගත් විගස, කාදිනල් හිමි හා මීගොමු කටුවපිටිය දේවස්ථානයට පැමිණ ශෝකයෙන් මෙන් දෑත් බැඳ හැසිරෙනු රට දුටුවේය. 2019.04.21 දිනට සම්බන්ධ කෞතුකාගාරයක් නරඹනු ද දුටුවේය. කරනව නේ දැයි කාදිනල් හිමි ජනාධිපති ගෙන් විමසනුද රටට ඇසුණේය. ජනාධිපති ඔව් ඔව් හැඟීම මුහුණෙන් පළ කරනු ද රටට පෙනුණි. එහෙත් එහි දී ජනාධිපතිවරයා, කාදිනල් හිමිට දුන් පොරොන්දුව රටට ඇසුණේ නැත. ඒ සිදුවීමට දැන් මාස හය ගෙවෙන්නට ආසන්නය.
මාර්තු 17 අයවැය විවාදයේ දී, සංස්කෘතික හා ආගමික අමාත්‍යාංශ වැයශීර්ෂ විවාදයට සහභාගි වෙමින්, රෝහිත අභයගුණවර්ධන ද කාදිනල් හිමි ගේ අනතුරු ඇඟවීම ආණ්ඩුවට තදින් සිහිපත් කර දුන්නේය. පාස්කු ප්‍රහාරයේ මහ මොළකරු කාදිනල් හිමිට සොයා දීමට වහාම පියවර ගන්නා ලෙස ආණ්ඩුවට බලපෑමක් ද කරමිනි.
එදා පාර්ලිමේන්තුවේ දී රෝහිත අබේගුණවර්ධන මන්ත්‍රී තවත් ඉල්ලීමක් කළේය. පාස්කු ප්‍රහාරය අරභයා, මෙරට මුස්ලිම්වරුනට එල්ලව ඇති චෝදනා වලින් ඔවුන් ද මුදවා ගැනීමට ක්‍රියා කරන ලෙස දන්වමිනි.
රෝහිත මන්ත්‍රී ගේ දෙවන ඉල්ලීමට සමාන ඉල්ලීමක් සහිත ලිපියක්, මාර්තු 16 අනිද්දා පත්‍රය පළ කර තිබුණි. ‘පාස්කු ඉරුදින ප්‍රහාරය හා මුස්ලිම් ජනතාවට එරෙහි ප්‍රහාරයට යුක්තිය’ යන හිසිනි. ලියා තිබුණේ, ‘කිතුසර’ කණ්ඩායම යන නමිනි. මෙ රට මුස්ලිම් ජනතාවට එරෙහිව සිදුවන අනර්ථ ගැන ඒ කණ්ඩායම ඊට පෙර ද අනිද්දා මගින් ම රටට වගඵල කියා තිබුණි. ඔවුහු, මුස්ලිම් සමාජයට සිදුව ඇති අනර්ථ, පාස්කු අපරාධයෙන් කිතුනුවනට වූ අනර්ථය තරමට ම, සමාන කර දක්වති.
2019.04.21 බෝම්බ ප්‍රහාර සියල්ලම කරන ලද්දේ, මුස්ලිම් සමාජයේ ක්‍රියාකාරීන් පිරිසකි. ඔවුන් අපට අනුව අහිංසක සැදැහැවතුන් පිරිසක් විය නො හැක. කුමන හෝ පෙළඹවීමකින් සිය කැමැත්තෙන් අපරාධ කරන්නට පෙළඹී ඇත. මුස්ලිම් සමහරු ඒ ක්‍රියාව කුරානයේ සඳහන් පරිදි, කළ ආගමික ඉටුකිරීමකැයි පවසති. ලෝක මුස්ලිම්කරණයේ පෙළඹවීමක් පරිදි කරන ලද දේශපාලන ක්‍රියාවකැයි ද සමහරු පවසති. විදේශ සංචාරකයන් මෙ රට පැමිණීම වැළැක්වීමේ වුවමනාවක් ද ඔවුන්ට පැවති බවක් අපට නම් පෙනේ. රට තව තවත් ආර්ථිකව බෙලහීන කරවන්නටය.
ඔවුන් ඒ ප්‍රහාර එල්ල කරන්නට පෙර ගොස් තිබුණේ ඉස්ලාම් දේවස්ථාන වෙතය. අල්ලා දෙවිඳුන් ගේ අනුග්‍රහය පතා යාඥා කර ගොස්, ඔවුන් සිය වගකීම ඉටු කර ඇත. අපරාධය පිළිබඳව සැකපිට අත්අඩංගුවට ගෙන ඇති සියල්ලෝම මුස්ලිම් වරුය. රජය වෙනුවෙන් නීතිපති හා වින්දිතයන් පිරිසක් ද, කාදිනල් හිමි හා මරදාන සාමයික කේන්ද්‍රය ද, සැකපිට නඩු පවරා ඇත්තේ, මුස්ලිම් වරුනට ම ය.
දෙමටගොඩ ඊබ්රාහිම් හජ්ජියාර් නමැති කෝටිපති ව්‍යාපාරිකයා ගේ තරුණ පුතුන් දෙදෙනා ද ප්‍රහාර එල්ල කර දිවි තොර කර ගෙනය. (ඵහෙත් කාදිනල් හිමි ඔහු ගැන හ්ම්! කියා නැත. ඔහු ජාජබය පත්කළ පාර්ලිමේන්තු මන්ත්‍රී කෙනෙකු වීමට සූදානමින් සිටි කෙනෙකු වූ නිසාද ?)
පාස්කු මහ ජන සංහාරයට මෙ රට මුස්ලිම් සමාජයේ ඇති ඍජු සබඳතා ලු‍හු කොට සැලකිය හැකිද? සැකපිට අත් අඩංගුවට ගෙන ඇති පුද්ගලයන් ගේ නාම ලේඛනය පිරික්සීමෙන්, ඊට ඇති මුස්ලිම් සබඳතා තවදුරටත් වටහා ගත හැක.
21 ට පෙර මහමොළකරු හෙළි නො කළොත්, තමන් ජාජබ ආණ්ඩුවට දක්වන සමීපතාවෙන් ඉවත්ව අන් අතක් බලා ගෙන පාරට බහින බව පවසන කාදිනල් හිමි ද, 2019.04.21.රාත්‍රී ප්‍රසිද්ධ ප්‍රකාශයක් කරමින් උත්සාහ කළේ, මෙ රට පාස්කු අපරාධයට මුස්ලිම් සබඳතාවක් නැති බව පෙන්වා දෙන්නටය. එහෙත් පසු දවසක සිට එතුමා පවසන්නේ, එය අන්තවාදී මුස්ලිමුන් පිරිසක ගේ කටයුත්තක් බවය. ප්‍රහාරයට පසු දිනම, එදා ජනපති මෛත්‍රිපාල සිරිසේන ජාතික තව්හිද් ජමාත් හා ජමාතෙයි මිල්ලතු ඊබ්රාහිම්) මුස්ලිම් සංවිධාන තහනම් කළේය. සිද්ධිය වූ දින, සිදුවීම පිළිබඳ සත්‍යය වසං කරවීමට, තමන් විසින් ම තමන්ව ඝාතනය කර ගත්තේ කුමන ජාතිකයන් පිරිසක් ද? කුඩා දරු මල්ලන් ඇතුළු පවුල් පිටින්ම තත්ත්වය ඒ සා සහශුද්ධයෙන් ම පිරිසිදුව පෙනෙන්නට තිබිය දී, කිතුසර කණ්ඩායම ඒ තත්ත්වයට සුදුහුණු ගාන්නට තැත් කරයි. මියගිය හා වින්දිතව දුක් විඳින අය කවුදැයි නාම ලේඛනයක් ලෙස ප්‍රසිද්ධ වුවහොත් පාස්කු ප්‍රහාරයෙන් මහ අනර්ථයක් සිදුව ඇත්තේ කාටදැයි බොළඳියකට වුව මනාව තේරුම් ගත හැක. එහෙත් තවමත් එබඳු සත්‍ය නාම ලේඛන දෙකක් රජය අතවත්, කතෝලික සභාව අතවත් නැති බව හෙළිකරන්නේ, මරදාන සාමයික කේන්ද්‍රයේ අධ්‍යක්ෂ රොහාන් සිල්වා නි.ම.නි පියනම ගේ, පරීක්ෂක පිරිසය.
බෝම්බ ප්‍රහාරයෙන් බෝම්බ කරුවන් අට දෙනෙකු ඇතුළු 277ක් මියගොස් 400කට වැඩි පිරිසක් තුවාල ලද බව පොලිස් මූලස්ථානය පාර්ලිමේන්තුවට වාර්තා කර ඇති බවත්, ඔවුනතර ළමුන් 45 හා විදේශිකයන් 40 දෙනෙකු සිටි බව ඒ වාර්තාවේ සඳහන් බවත්, ‘තිත’ කෘතිය උපුටා දක්වයි. ප්‍රධාන සැකකරු ලෙස විමර්ශකයන් හඳුනා ගෙන ඇත්තේ, ජාතික තව්හිඩ් ජමාත් නායක සහරාන් හෂීම් බව ද එහි තවදුරටත් සඳහන්ව ඇත.
කාදිනල් හිමි, පාස්කු ඝාතනාපරාධය හඳුන්වන්නේ, බලය ලබා ගැනීමට රාජපක්ෂවරුන් කළ කුමන්ත්‍රණයක් ලෙසය. 2019 රටේ බලය අල්ලා ගත් ගෝඨාභය රාජපක්ෂ, තමාව බලයට පත් කළේ මෙ රට බෞද්ධ ජනතාව බව ස්තූතිපූර්වකව සඳහන් කළේ, තෙමසක් ඇතුළත පාස්කු මහ මොළකරු ඇතුළු අපරාධකරුවන් හෙළිකර දඬුවම් පමුණුවන බව ද පවසමිනි. ඔහු ඒ තෙමසේ කථාව, ජනපතිවරණයට තමා ඉදිරිපත්වන බව හෙළි කළ දා සිට, කිතුනු ප්‍රදේශවල දී පුන පුනා පැවසුවේය. කාදිනල් හිමිට ද පොරොන්දුවක් දී තිබුණේය. ඒ පොරොන්දුවට තමා රැවටුණු බව, රාජපක්ෂ සමාගමෙන් ඉවත්වූ පසු, කාදිනල් හිමි ප්‍රකාශ කර ඇත. බලයට පත් වූ විගස ෂානි අබේසේකර පහළ තනතුරකට පත් කිරීම ද කාදිනල් හිමි ගේ බරපතළ නොමනාපයට හේතු විය. එතෙක් පාස්කු අපරාධ පරීක්ෂණ කෙරුණේ ෂානි අබේසේකර ගේ නායකත්වයෙනි. ෂානි සමග එක්ව පාස්කු අපරාධය නිරීක්ෂණය කළ අන් සියලු නිලධාරීන් ද ගෝඨා විසින් මාරු කර හැරුණි. පාස්කු අපරාධයේ පසුපස සිටින්නේ තමන් යයි හෙළිදරව් වේය යන බියෙන් ගෝඨා ඒ මාරුකිරීම් කළ බව කාදිනල් මතයය.
ජනක් ද සිල්වා ජනාධිපති පාස්කු කොමිසම, අපරාධයේ මහ මොළකරු ලෙස තුන් වරක්ම සඳහන් කර ඇත්තේ, සහරාන් හෂීම් ය. ඔහු වහාබ්වාදී ඉස්ලාම් භක්තිකයෙකු යැයි ද කොමිසම පවසයි. පාස්කු මහ මොළකරු, නවුපර් මව්ලවි බව, ගෝඨාභය රාජපක්ෂ රජය පැවසුවේය. එහෙත් පාස්කු ජනාධිපති කොමිසම කොතැනකවත් එ සේ නො කියයි.
කොච්චිකඩේ ශා.අන්තෝනි දේවස්ථානයට බෝම්බ එල්ල කරැත්තේ, අහමඩ් මූමාස් නමැත්තෙකි. කටුවපිටියට, මොහොමඩ් හස්කූන් නමැත්තෙකි. මඩකලපුවට, මොහොමඩ් නහාර් මොහොමඩ් නමැත්තෙකි. දෙහිවල ලැගුම් හලට අබ්දුල් ලතීප් නමැත්තෙකි. ෂැන්ග්‍රිල්ලා හෝටලයට ඉල්ලාම් අහමඩ් ඊබ්රාහිම් ය. සිනමන් ග්‍රෑන්ඩ් හෝටලයට ඉන්ෂාන් අහමඩ් ඊබ්රාහිම් ය. (දෙමටගොඩ ව්‍යාපාරික පුතුන් දෙපළ)
සිදුවීමට හය වසර පිරේ. මීගොමු කතෝලික ගිහි මූලික, බි්‍රටෝ ප්‍රනාන්දු, ඒ සැමරුම ද, දැන් කතෝලික පල්ලිවල වාර්ෂිකව කෙරෙන මංගල්ලයක ස්වරූපය ගෙන ඇති බව පවසයි. තවමත් මළවුන් පිළිබඳ හරි සංඛ්‍යා ලේඛන නැත. තුවාල ලද්දන් ගැන ද රටේ කොතැනකවත් හරි සංඛ්‍යාලේඛන නැත.
දැනට කර ඇති පාස්කු අපරාධ විමර්ශන වාර්තා සියල්ල අධ්‍යයනය කර ආණ්ඩුව ගත යුතු ක්‍රියා මාර්ග ගැන උපදෙස් ගැනීමට විශේෂ කමිටුවක් පත්කරන බව ජාජබය මේ වනවිට ඉඟියක් පළ කර ඇත. කාදිනල් හිමි සිටින්නේ ඒ ඉඟිය ගැන පහන්ව නො වේ. බටලන්ද වධකාගාර සිද්ධි ගැන ද කමිටුවක් පත් කරන්නට තීරණය කර ඇති බව පැවසේ. රටේ ගැටලු පිළිබඳව තව තවත් කමිටු පිහිටුවන්නේ තීන්දු ගෙන ක්‍රියා කරන්නට නොව, කල් ගන්නට බව, හැකිනම් පුරවැසියන්ට අමතක වනතුරුම කල්මරන්නට බව, මෙරැටියෝ මනාව දැන සිටිති.
කාදිනල් හිමි දැන් ජාජබ ආණ්ඩුව දෙස බලන්නේ ද ඒ සැකයෙනි.
පාස්කු අපරාධ කරුවන් වහා සොයා, අපරාධ නීතිය යටතේ දඬුවම්කර, වින්දිතයන්හට යුක්තිය කඩිනමින් ඉටුකරන බව ජාජබ ප්‍රතිපත්ති ප්‍රකාශනය පවසා තිබිය දී දැන් තවත් කමිටු කුමට? කාදිනල් හිමි ගේ මෙන් ම, මෙ රට සමස්ත කතෝලික ජනතාව ඉදිරියේම දැන් ඒ ගැටලුව පැන නැගී ඇත. අවශ්‍ය අලුත් කමිටු නො වේ. පරණ කමිටු කොමිෂන් නිර්දේශ අද අදම ඉටු කරන බලය ආණ්ඩුවට ලැබෙන නව නීතිරීති ය. පාර්ලිමේන්තුවේ මහ බලයක් තිබියදීත් එ සේ නොකරන ආණ්ඩුව තවත් පරීක්ෂණ කමිටු පත් කරන්නට යයි. ඒ අතර ජාජබ සංස්කෘතික හා ආගමික ඇමති, පාස්කු අපරාධ කරුවනට සමාව දෙන ලෙස රටේ කතෝලිකයන් ගෙන් ඉල්ලා සිටී. මුල මැද අග සොයා වරදකරුවනට නීතියට එකඟව නො වරදවාම දඬුවම් පමුණුවන බව ජනමාධ්‍ය ඇමති පවසයි.
‘අපි සමාව දීමට සූදානම්. හැබැයි අපට ඊට පෙර මහ මොළකරු හා අපරාධකරුවන් කවුදැයි දැන ගන්නට ඕනෑ’ යි කලකට පෙර කාදිනල් හිමි කළ සඳහන ආගමික ඇමතිගේ අවධානයට යොමු විය යුතුය. 21 මහා අපරාධය සිදුවූයේ කුමන හෝ මහ පන්සලක නම්, සමාව ඉල්ලීමේ ප්‍රකාශය තමන් කරන්නේදැයි, ආගමික ඇමතිගෙන් දැන ගන්නට ද රටවැසියෝ කැමැත්තෙන් සිටිති.
ආණ්ඩුව දැනට ක්‍රියා කරමින් සිටින්නේ පරණ ආණ්ඩු ලෙසටමය හා මන්දගාමීව යයි, බරපතළ චෝදනාවක් රටෙන් ජාජබයට එල්ලවෙමින් තිබේ. ඔවුන් පාස්කු ඝාතනාපරාධය ගැන ක්‍රියා කරන අන්දමින් ඒ චෝදනාව සහතික වන හැඩක් අපට ද පෙනේ.
පාස්කු ප්‍රහාරයෙන් කිතුනුවනට වූ අනර්ථයට සමාන අනර්ථයක් මුස්ලිම් ජාතිකයනට දිගන වැලිගම හෝ අන් කොතැනකදීවත් සිදුව නැත. පාස්කු ප්‍රහාරයෙන් කිතුනුවනට වූ අනර්ථයට වඩා විශාල අනර්ථයක් තිස් අවුරුදු යුද්ධයෙන් ද්‍රවිඩ ජනතාවට සිදුවීය යන්නට නම් අප යම් තරමකට එකඟය.
කාදිනල් හිමි පාස්කු අවනඩුව ගැන, විටින් විට, තැන් තැන්වල, පසුගිය හය වසර තුළ කර ඇති ප්‍රකාශ අතර මෙය ද විය. පාස්කු ඝාතනාපරාධය කොයි පැත්තට හැරුණත්, එය දේව කැමැත්ත සේ පිළිගන්නට තමා සූදානම් බවය.
ඒ අතර කිතුනු සම්බන්ධීකරණ ඇමති ද අලුත් ප්‍රකාශයක් කර තිබේ. පාස්කු අවනඩුව පිළිබඳ අලුත් යමක් මේ මාසයේ සිදුවන බවට ය. කාදිනල් තුමා සන්සුන් කර ගන්නට දෝ හෝ යි අපට සිතේ. මැයි මාසයේ මෙ රට හැබෑ මහ මැතිවරණය පවත්වන්නට රජයට සිදුව ඇති හෙයිනියි යයි ද අපට සිතේ.
