ආයතන 9ක් වානිජ ලෙස ක්‍රියාත්මක කළ යුතුයි
ආයතන 07ක් ප්‍රතිසංවිධානය කළ යුතුයි
ආයතන 21ක් ඒකාබද්ධ කළ යුතුයි
ශ්‍රී ලංකා මහවැලි අධිකාරිය ඇතුළු රාජ්‍ය ආයතන 13ක් ඒවායේ කටයුතු අවසන් කර ඈවර කිරීම හෙවත් අහෝසි කරන ලෙස රජයට අයත් වානිජමය නොවන ආයතන පිළිබඳ සමාලෝචනය කිරීමේ නිලධාරි කමිටු වාර්තාව නිර්දේශ කර තිබේ.
ඒවයේ කටයුතු අවසන් කර අහෝසි කරන ලෙස නිර්දේශ කර ඇති අනෙක් රාජ්‍ය ආයතන අතර ශ්‍රම වාසනා අරමුදල, ජාතික සමුද්‍ර කටයුතු කාරක සභා ලේකම් කාර්යාලය, පළාත් පාලනය පිළිබඳ ශ්‍රී ලංකා ආයතනය, ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය, ජාතික කෘෂිකාර්මික විවිධාංගීකරණය හා ජනාවාස අධිකාරිය හෙවත් හදබිම අධිකාරිය, ශ්‍රී ලංකා ජාතික සාගිනි නිවීමේ ව්‍යපාර මණ්ඩලය(ජාතික ආහාර ප්‍රවර්ධන මණ්ඩලය), ජාතික පසු අස්වනු කළමනාකරණ ආයතනය, ශ්‍රී ලංකා කජු සංස්ථාව, කුළුබඩු හා ඒ ආශ්‍රිත නිෂ්පාදන අලෙවි මණ්ඩලය තිබේ.
අහෝසි කිරීම සඳහා නිර්දේශ කර ඇති ඇති ගාලු උරුමය පදනමට ස්වයං මූල්‍යනය ආයතනයක් වශයෙන් ක්‍රියාත්මක වීමට අවශ්‍ය බලය ලබාදිය යුතු බව සඳහන් කර ඇති අතර වැවිලි කලාපය සඳහා වූ නව ගම්මාන සංවර්ධන අධිකාරිය සතු කාර්යයන් වැවිලි හා ප්‍රජා යටිතල පහසුකම් අමාත්‍යාංශය යටතට ගතයුතු බව සඳහන් කර ඇත.
එසේම ජාතික භාෂා අධ්‍යාපන සහ පුහුණු ආයතනය, ශ්‍රී ලංකා ඛනිජ තෙල් සංවර්ධන අධිකාරිය, ශ්‍රී ජයවර්ධනපුර මහ රෝහල, විජය කුමාරතුංග අනුස්මරණ රෝහල, ශ්‍රී ලංකා පදනම් ආයතනය, සුගතදාස ජාතික ක්‍රීඩා සංගම් අධිකාරිය, වී අලෙවි මණ්ඩලය, රන්මිහිතැන්න මහින්ද රාජපක්ෂ ජාතික ටෙලි සිනමා උද්‍යානය හා ජාතික සමූපකාර සංවර්ධන ආයතනය (පොල්ගොල්ල) යන රාජ්‍ය ආයතන එම කමිටුව විසින් වානිජමය ආකෘතියක් අනුව ක්‍රියාත්මක කළ යුතු ආයතන වශයෙන් නිර්දේශ කර තිබේ.
එමෙන්ම ප්‍රතිසංවිධානය කළ යුතු ආයතන වශයෙන් මාර්ග සංවර්ධන අධිකාරිය, ජාතික පුස්තකාල හා ප්‍රලේඛන සේවා මණ්ඩලය, ශ්‍රී ලංකා අපනයන සංවර්ධන මණ්ඩලය, තල් සංවර්ධන මණ්ඩලය, සෞම්‍යමූර්ති තොන්ඩමාන් අනුස්මරණ පදනම, රණවිරු සේවා අධිකාරි හා ශ්‍රී ලංකා ගමනා ගමන මණ්ඩලය නිර්දේශ කර තිබේ.
මනා සම්බන්ධීකරණයක් පවත්වා ගැනීම සහ කාර්යක්ෂම හා ඵලදායි සේවාවක් සැලසීම සඳහා ඒකාබද්ධ කළ යුතු ආයතන වශයෙන් ජාතික සමාජ සංවර්ධන ආයතනය, ජාතික සමගිය හා ප්‍රතිසන්ධානය සඳහා වන කාර්යාලය, හානිපූර්ණය සඳහා වන කාර්යාලය, නාගරික ජනාවාස සංවර්ධන අධිකාරිය, නවීන තාක්ෂණය පිළිබඳ ආතර් සී ක්ලාක් ආයතනය, ජාතික යොවුන් සේනාංකය, ජාතික තරුණ සේවා සභාව, ලංකා කාර්මික සංවර්ධන මණ්ඩලය, ජාතික ව්‍යවසාය සංවර්ධන අධිකාරිය, ජාතික ශිල්ප සභාව, ජාතික මෝස්තර මධ්‍යස්ථානය, මැණික් හා ස්වර්ණාභරණ පර්යේෂණ හා අභ්‍යාස ආයතනය, කුඩා තේ වතු සංවර්ධන අධිකාරිය, ශ්‍රී ලංකා රාජ්‍ය වැවිලි සංස්ථාව, ජනතා වතු සංවර්ධන මණ්ඩලය, පොල් වගා කිරීමේ මණ්ඩලය, පොල් සංවර්ධන අධිකාරිය, කිතුල් සංවර්ධන මණ්ඩලය, ජාතික වැවිලි කලමනාකරණ ආයතනය, ආපදා කළමනාකරණ මධ්‍යස්ථානය හා අමරදේව සෞන්දර්ය හා පර්යේෂණ කේන්ද්‍රය නිර්දේශ කර තිබේ.
මෙම කමිටු වාර්තාව අගමැතිනී ආචාර්ය හරිනි අමරසූරියට බාර දී ඇති අතර ඇය එම වාර්තාව මාර්තු 17 වැනිදා පැවති කැබිනට් මණ්ඩල රැස්වීමට ඉදිරිපත් කර ඇත. එහිදී කැබිනට් මණ්ඩලය තීරණය කර ඇත්තේ එම වාර්තාවේ ඇති නිර්දේශ ක්‍රියාත්මක කිරීමටය.
එම කමිටුවේ සභාපති වශයෙන් අග්‍රාමාත්‍ය ලේකම් ප්‍රදීප් සපුතන්ත්‍රී කටයුතු කර ඇති අතර සෙසු සාමාජිකයින් වශයෙන් කර්මාන්ත හා ව්‍යවසායකත්ව සංවර්ධන අමාත්‍යාංශයේ ලේකම් ජේඑම්ටී ජයසුන්දර මහත්මිය, කෘෂිකර්ම, පශු සම්පත්,ඉඩම් හා වාරිමාර්ග අමාාත්‍යාංශයේ ලේකම් ඩීපී වික්‍රමසිංහ, වැවිලි හා ප්‍රජා යටිතල පහසුකම් අමාත්‍යාංශයේ ලේකම් ප්‍රභාත් චන්ද්‍රකීර්ති, අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයේ ලේකම් නාලක කළුවැව, භාණ්ඩාගාරයේ නියෝජ්‍ය ලේකම් එච්සීඩීඑල් සිල්වා, විශ්ව විද්‍යාල ප්‍රතිපාදන කොමිෂන් සභාවේ සභාපති මහාචාර්ය කපිල සෙනෙවිරත්න, රාජ්‍ය පරිපාලන, පළාත් සභා හා පළාත් පාලන අමාත්‍යාංශයේ අතිරේක ලේකම් හිරන්සා කළුතන්ත්‍රී මහත්මිය, ජාතික අයවැය දෙපාර්තමේන්තුවේ අධ්‍යක්ෂ ජනරාල් ජූඩ් නිලුක්ෂාන්, කළමනාකරණ දෙපාර්තමේන්තුවේ අධ්‍යක්ෂ ජනරාල් විමල් ලියනගම හා රාජ්‍ය ව්‍යාපාර දෙපාර්තමේන්තුවේ අධ්‍යක්ෂ ජනරාල් අතුල කුමාර කටයුතු කර තිබේ.
