2023 දෙසැම්බර් 31 වැනිදා අලුයම 2.30ට පමණ, මාතර, වැලිගම, පැලෑනේ උ15 හෝටලයට වෙඩිතැබීමේ සිදුවීමේදී අවාසනාවන්ත ලෙස වෙඩි වැදී මියගිය පොලිස් සැරයන් මානින්ගමුව ගෙදර උපුල් චමින්ද කුමාර එසේ මියගියේ, දේශබන්දු තෙන්නකෝන්ගේ පෞද්ගලික වුවමනාවට අනුව හා ඔහුගේ මෙහෙයවීමෙන් කොළඹ පොලිස් අපරාධ විමර්ශන කොට්ඨාසයේ නිලධාරීන් පිරිසක් නීති විරෝධීව හා පොලිස් කාර්ය පටිපාටිය උල්ලංඝනය කරමින් කටයුතු කිරීම නිසා බව දැන් ප්‍රසිද්ධ කරුණකි.
පොලිස් සැරයන් උපුල් මියගියේ තමාගේ නීති විරෝධී අණ ක්‍රියාත්මක කරන්නට ගොස් බව දන්නා එවකට පොලිස්පති දේශබන්දු තෙන්නකෝන්, ‘මත්ද්‍රව්‍ය මර්දනයට ගොස් දිවි පිදීමක්’ ලෙස ඒ මරණය හඳුන්වා, මරණය වෙනුවෙන් පොලිස් අරමුදලෙන් රුපියල් ලක්ෂ 15ක් කඩිනමින් මියගිය අයගේ පවුලට ලබාදුන්නේය. එපමණක් නොවේ. දේශබන්දු තෙන්නකෝන් පොලිස්පති තනතුරට ගෙනඒමට මාරාන්තික උත්සාහක යෙදුණු, එමෙන්ම දේශබන්දුගේ අපාය සහාය මිත්‍රයාවූ එවකට මහජන ආරක්ෂක අමාත්‍ය ටිරාන් අලස් මැදිහත්වී, මියගිය උපුල් වෙනුවෙන් ජනාධිපති අරමුදලෙන් රුපියල් ලක්ෂ 25ක්ද වන්දි ලබාදුන්නේය. මේ දෙදෙනාම කටයුතු කළේ, එමගින් සිය වරදකාරී හැඟීම් නිසාය. ඇත්තට සිදුවුණේ කුමක්දැයි හෙළිදරව් වීම වැළැක්වීම පිණිස දෙදෙනාම සැලකිලිමත් වූහ.
කොළඹ අපරාධ කොට්ඨාසයේ නිලධාරීන් වැලිගමට ගියේ, උ15 හෝටලයට වෙඩි තබා බියගැන්වීමටය. ඔවුන්ට එසේ කරන්නට සිදුවුණේ, උ15 හෝටලයේ හිමිකරු මොහොමඩ් නිෂාම් ජමාල්ඩීන් සමග දේශබන්දු තෙන්නකෝන්ට තිබුණු පෞද්ගලික තරහ නිසා බව පෙනේ. කොළඹ ඩාර්ලි පාරේ ශාන්ත ජෝසප් විදුහල ඉදිරිපිට ඇති ඉඩමකට අදාළව ශ්‍රී ලංකා ක්‍රිකට් ආයතනය, උපදේශක සේවා සඳහා දේශබන්දු තෙන්නකෝන්ට මාසයකට රුපියල් ලක්ෂ එකහමාරක මුදලක් ගෙවා ඇතැයි ජමාල්ඩීන් මාධ්‍ය මගින් ප්‍රචාරය කර ඇති බවට වරදවා විශ්වාස කිරීම නිසා, දේශබන්දු තෙන්නකෝන් හා ජමාල්ඩීන් අතර ආරාවුලක් තිබී ඇත. ඊට පාඩමක් ඉැගැන්වීම සඳහා ඔහුට අයත් වැලිගම හෝටලයට වෙඩි ප්‍රහාරයක් එල්ල කර ඔහු බියගන්වන ලෙසට දුන් අණ අනුව කොළඹ අපරාධ කොට්ඨාසයේ ප්‍රධාන පොලිස් පරීක්ෂක ඇන්ස්ලම් ද සිල්වා ඇතුළු පොලිස් නිලධාරීහු අට දෙනෙක් උඡඡණ 7225 අංකය සහිත සුදු පාට කේඩීඑච් වෑන් රියෙන් කොළඹ සිට එහි ගියහ.
මාතර මහේස්ත්‍රාත්වරයාගේ නිරීක්ෂණ අනුව, දේශබන්දු කොළඹ අපරාධ කොට්ඨාසයේ නිලධාරීන් වැරදි සහගත ලෙස මෙම මෙහෙයුම සඳහා යොදවා තිබේ. එහෙත් ඒ, ‘නඳුන් චින්තක කරුණාරත්න හෙවත් හරක් කටා නමැති නමගිය අපරාධකරුගේ ඝාතක කණ්ඩායමක් එම ප්‍රදේශයේ සිටින බැවින් ඔවුන් අල්ලාගැනීම’ සඳහායැයි කියන ව්‍යාජ හේතුවක් දක්වමිනි. කොළඹින් පිටත්වීමට පෙර මෙහෙයුම සම්බන්ධයෙන් පොලිස් තොරතුරු පොත්වල කිසිදු සටහනක්ද යොදා නොතිබිණ. කොළඹ අපරාධ කොට්ඨාසයේ නිලධාරීන් දකුණු පළාතේ මෙහෙයුමක් සඳහා පිටත් වන බවට ඒ ප්‍රදේශයේ පොලිස් ස්ථානාධිපතිවරයා දැනුවත් කළේද නැත. ප්‍රහාරය සඳහා භාවිත කර තිබුණේ, පොලිසියට අයත් ටී56 ගිනි අවිය. එම අවි ආයුධ ලබාගෙන තිබුණේද නීති විරෝධීවය. ගොස් තිබුණේ පොලිසියට අයත් වෑන් රියකිනි. එම රජයේ දේපළ, නීති විරෝධී වැඩක් සඳහා යොදාගෙන තිබිණ. ඒ අනුව දේශබන්දු යටතේ යටතේ පැරා මිලිටරි කණ්ඩායමක් ක්‍රියාත්මක වී තිබිණ.
කොළඹින් ගිය පිරිස උඡඡණ 7225 දරන සුදු පැහැති කේඩීඑච් වෑන් රථයෙන් ගොස් හෝටලය ඉදිරිපිට නවත්වා වෑන් රථයේ පැති fදාර විවෘත කර, එහි සිටි මධුරංග නම් පොලිස් පරීක්ෂකවරයා හෝටලයට වෙඩි තබමින් සිටියේය. මේ අතර, වැලිගම පොලිසියෙන් රාත්‍රි මුරසංචාරය සඳහා ජීප් රථයකින් පිටත්වූ පොලිස් හා පොලිසියට අනුයුක්ත කළ හමුදා සෙබළුන් සහිත පස් දෙනකුගේ කණ්ඩායමක්, මේ වෙඩිතැබීම දුටුවහ. මේ කණ්ඩායම කල්පනා කළේ එවකට දකුණේ ක්‍රියාත්මක වෙමින් සිටි සංවිධානාත්මක අපරාධ කල්ලියක් හෝටලයට වෙඩි තබනවාය කියාය. එවැනි වෙඩි තැබීමකින් සිදුවිය හැකි ජීවිත හා දේපළ හානි සැලකිල්ලට ගත්, මුර සංචාරක ජීප් රථයේ සිටි කණ්ඩායම භාර පොලිස් සැරයන්වරයා, ප්‍රහාරය එල්ල කරන්නන් මැඬපැවැත්වීමට ඔවුන් දෙසට වෙඩි තබන ලෙස ජීප් රියේ සිටි යුද හමුදා සැරයන් රුචිරංගට නියම කෙළ්ය. එම වෙඩි තැබීමත් සමග කේඩීඑච් වෑන් රිය එම ස්ථානයෙන් පලාගිය අතර, පොලිස් වෙඩි තැබීමෙන් කේඩීඑච් වෑන් රථයේ සිටි කොළඹ අපරාධ කොට්ඨාසයට අනුයුක්ත නිලධාරීන් දෙදෙනකුට වෙඩි වැදිණ.
වෑන් රථය කළේ නීත්‍යනුකූල රාජකාරියක් නම්, වෙඩි වැදුණු දෙදෙනා වහාම අසළ පිහිටි වැලිගම රෝහලට හෝ මාතර රෝහලට ඇතුළත් කළ යුතුව තිබිණි. එහෙත් තමන් කළේ නීති විරෝධී වැඩක් බව දන්නා වෑන් රථයේ සිටි පිරිස, සිදුවීම සඟවනු පිණිස, තුවාලකරුවන් දෙදෙනාද සමග කොළඹටම එන්නට පිටත්වූහ. ඒ සඳහා අධිවේගී මාර්ගයට ඇතුළු වන්නට ගියේ, සිදුවීමට ළඟින්ම පිහිටි කොක්මාදූව පිවිසුමෙන්ද නොවේ, ඈතින් පිහිටි ඉමදූව පිවිසුමෙනි. ඉමදූව පිවිසුමේ ආව්ක්ෂණ රාජකාරියේ යෙදීසිටි පොලිස් නිලධාරීන්ට, වෙඩි වැදුණු තුවාලකරුවන් දෙදෙනකු සමග මේ වෑන් රථය දැකගන්නට ලැබීමෙන් පසු ඔවුන් සිතුවේ, කිසියම් සංවිධානාත්මක අපරාධ කල්ලියක් අපරාධයක් කර පලායන්නට වෑයම් කරන බවයි. ඒ නිසා ඉමදූවෙන් අධිවේගී මාර්ගයට පිවිසීම වළක්වා වෑන් රථයේ සිටි පිරිසගෙන් ප්‍රශ්න කරන්නට පටන්ගැනිණි. අවසානයේ, 1990 ගිලන් රථයක් ගෙන්වා තුවාලකරුවෝ දෙදෙන කරාපිටිය රෝහලට පිටත්කර යවන ලදහ.
රෝහලට ඇතුළත් කරන විටත් පොලිස් සැරයන් උපුල් චමින්ද මියගොස් සිටි බව පොලිස් වාර්තාවලින් හෙළිවෙයි.
මේ අවාසනාවන්ත මරණය සිදුවුණේ කරුණු කිහිපයක් නිසාය. එකක් නම්, දේශබන්දුගේ නීති විරෝධී අණක් ක්‍රියාත්මක කරන්නට යාමෙනි. දෙවනුව, එම සිදුවීමේදී, වැලිගම පොලිසිය විසින් තබන ලද වෙඩි මරණකරුට වැදීම නිසාය. තෙවනුව, වෙඩිවැදුණු වහාම ළඟම තිබෙන රෝහලට තුවාලකරු ඇතුළත් නොකොට, ඔහු කොළඹටම ගෙන එන්නට වෑන් රථයේ සිටි පිරිස ගත් වැරදි තීරණය නිසාය.
අවසාන විග්‍රහයේදී, උපුල්ගේ මරණය, සිදු නොවිය යුතුව තිබුණු නිරපරාද මරණයකි. 2024 ජනවාරි 3 වැනිදා, පොලිස්පති දේශබන්දුත්, මහජන ආරක්ෂක ඇමති ටිරාන් අලසුත්, මහජන ආරක්ෂක අමාත්‍යාංශයේ ලේකම් වියානි ගුණතිලකත් මේ නිකරුණේ මියගිය පොලිස් නිලධාරියාගේ දේහය තිබුණු නිවසට ගොස් අසරණව සිටි ඔහුගේ බිරිඳට, දරුවන්ට, සමීපතමයන්ට, රජයෙන් වන්දි ලබාදෙන බව පොරොන්දු වූහ.
අවසානයේ සිදුවුණේ, දේශබන්දුගේ නීති විරෝධී අණ ක්‍රියාත්මක කරන්නට ගොස් ජීවිතය නිරපරාදේ අහිමිකරගත් පොලිස් නිලධාරියා වෙනුවෙන්, සිය වරදකාරිත්වය සැඟවීම සඳහා දේශබන්දු හා ටිරාන් අලස් මහජන මුදලින් වන්දි ලබාදීමය.
‘මෙම තත්වය තවදුරටත් බරපතළ කරවන කරුණක් වන්නේ, පොලිස්පතිවරයා විසින් අනීතික ලෙස අපරාධ වැරදි සිදුකිරීමට යොදාගත් පිරිස අතර සිටි එක් පොලිස් නිලධාරියකු එම අනීතික ක්‍රියාකලාපයේදී සිදුවූ ආනුෂංගික නීතිය ක්‍රියාත්මකවීමකදී මරණයට පත්ව තිබීමයි.
එසේ හෙයින් එම අනීතික ක්‍රියාකලාපය මගින් රාජ්‍යයට පුරවැසියකුද, පොලිස් දෙපාර්තමේන්තුවට නිලධාරියකුද, බිරිඳකට ස්වාමි පුරුෂයකුද, කිසිවක් නොදන්නා අහිංසක දරුවන් තිදෙනකුට සිය රැකවරණයද, ආරක්ෂාවද, ආදරයද, අධ්‍යාපන පහසුකම්ද සපයන ලද පියකුද අහිමිකර තිබීමයි.’ යනුවෙන් මාතර මහේස්ත්‍රාත්වරයා, වැලිගම වෙඩි තැබීම පිළිබඳව සිය නිරීක්ෂණ සටහන් කරමින් කියයි.
