මාසික දීමනාව රු. 150,000යි
දුරකතන දීමනා, ලැප්ටොප් හා වෛද්‍ය රක්ෂණයක්
අනිවාර්ය නිවාඩු යවා තිබෙන පොලිස්පති දේශබන්දු තෙන්නකෝන් සිය ආරක්ෂක කවුන්සිලයේ උපදේශක ලෙස පත්කර ගැනීමට ශ්‍රී ලංකා ක්‍රිකට් ආයතනය තීන්දුවක් ගෙන තිබෙන බව පාර්ලිමේන්තු මන්ත්‍රී හේෂා විතානගේ මාර්තු 20 වැනිදා පාර්ලිමේන්තුවේදී පැවසීය.
මන්ත්‍රීවරයා පැවසුවේ ශ්‍රී ලංකා ක්‍රිකට් ආයතනයේ එම විධායක කමිටු රැස්වීම 2021 ජුලි මස 21 දින ශ්‍රි ලංකා ක්‍රිකට් වත්මන් උප සභාපතිවරයාගේ ප්‍රධානත්වයෙන් නවලෝක රෝහලේදී පවත්වා ඇති බවයි.
එම විධායක කමිටු තීන්දුවට අනුව එවක ජ්‍යෙෂ්ඨ නියෝජ්‍ය පොලිස්පති වශයෙන් කටයුතු කළ දේශබන්දු තෙන්නකෝන්ට 2021 අගෝස්තු 16 දින සිට ශ්‍රී ලංකා ක්‍රිකට් ආයතනයේ ආරක්ෂක උපදේශක ලෙස වසර දෙකක කොන්ත්‍රාත්තුවක් ලබාදීමට තීරණය කර ඇති බවත් ඒ සඳහා දීමනාව වශයෙන් මාසයකට රුපියල් 150,000ක මුදලක් ලබාදීමට තීරණය කර ඇති බවත්ය.
ඊට අමතරව ජංගම දුරකතනය සඳහා රුපියල් 5000ක මාසික දීමනාවක්ද, ලැප්ටෝප් පරිගණකයක් හා වෛද්‍ය රක්ෂණයක් ලබාදීමට තීරණය කර ඇති බවද ඔහු පැවසීය.
ශ්‍රී ලංකා ක්‍රිකට් ආයතනය දේශබන්දු තෙන්නකෝන් සම්බන්ධයෙන් ගත් එම විධායක සභා තීන්දුව පාර්ලිමේන්තුවේ සභාගත කිරීමටද හේෂා විතානගේ මන්ත්‍රීවරයා කටයුතු කළේය.
මන්ත්‍රීවරයා වැඩිදුරටත් ක්‍රීඩා ඇමතිවරයාගෙන් ඉල්ලා සිටියේ මෙම චෝදනා ලැබූ පිරිස් ශ්‍රී ලංකා ක්‍රිකට් ආයතනයේ ඉදිරි නිලවරණයටද ඉදිරිපත් වී සිටින බවත් එය වැළැක්වීම සඳහා කටයුතු කරන ලෙසත්ය.
රජයේ සේවකයකු ලෙස දේශබන්දු තෙන්නකෝන්ට ඒ ආකාරයට වෙනත් ආායතන සමඟ කටයුතු කළ නොහැකි බවත්, පොලිස්පතිවරයා ඒ ගැන පරීක්ෂණයක් කළ යුතු බවත් ඔහු පැවසීය.
ශ්‍රී ලංකා ක්‍රිකට් ආයතනය සම්බන්ධයෙන් මතුකරන කරුණුවලට ආණ්ඩුව පාර්ශවයෙන් පිළිතුරු ලබාදෙනවා වෙනුවට ශ්‍රී ලංකා ක්‍රිකට් මුදල් වෙනුවෙන් විපක්ෂයේ මන්ත්‍රීවරුම ලියාදුන් එකම කොලය කියවන බවද එහිදී මන්ත්‍රීවරයා වැඩිදුරටත් කීවේය.
