රනිල් වික්‍රමසිංහ දැනුවත්ව පැවැත්වුණු බටලන්ද වධකාගාරය

• කොමිසම් වාර්තාව ජනාධිපති චන්ද්‍රිකාට ලැබෙන්න 12 වතාවක් ප්‍රමාද වුණා
• නීතිඥ වෘත්තියේ කළු‍ දිනයක් වූ විජයදාස ලියනආරච්චිගේ මරණය
• නිවාස වෙන් කරන්න කීවේ රනිල්
• නිවාස ඉදිරියේ තරුව ලකුණ

හිටපු ජනාධිපති රනිල් වික්‍රමසිංහ මහතා සමඟ අල් ජසීරා නාලිකාව පැවැත්වූ හෙඩ් ටූ හෙඩ් වැඩසටහන පසුගිය සතියෙහි විශාල කතාබහකට ලක් වූ සම්මුඛ සාකච්ඡාවක් විය. එම සම්මුඛ සාකච්ඡාවේදී රනිල් වික්‍රමසිංහ මහතාගෙන් බටලන්ද කොමිෂන් වාර්තාව පදනම් කරගනිමින් බටලන්ද බධකාගාරය පිළිබඳව වැඩසටහන මෙහෙය වූ මාධ්‍යවේදීන් ඇසූ ප්‍රශ්න සහ වික්‍රමසිංහ මහතා ලබා දුන් පිළිතුරුද පසුගිය සතියෙහි දැඩි කතාබහකට ලක් වූ මාතෘකාවක් විය.
මාර්තු 11 වෙනි දින පැවැති කැබිනට් මාධ්‍ය හමුවේදී මාධ්‍යවේදීන් ඇසූ ප්‍රශ්නවලට පිළිතුරු දෙමින් කැබිනට් මාධ්‍ය ප්‍රකාශක නලින්ද ජයතිස්ස පවසා සිටියේ බටලන්ද කොමිෂන් වාර්තාව මෙම සතිය තුළ පාර්ලිමේන්තුවට ඉදිරිපත් කිරීමට බලාපොරොත්තු වන බවය. ඒ බටලන්ද කොමිෂන් වාර්තාව ජනාධිපති චන්ද්රිකා බණ්ඩාරනායක මහත්මියට ලබා දී අවුරුදු 27කට පසුවය.

බටලන්ද කොමිසම

1988 – 1990 කාලවකවානුවේදී බියගම බටලන්ද නිවාස යෝජනා ක්‍රමය තුළ, පොලිස් නිලධාරීන් කණ්ඩායමක් විවිධ පුද්ගලයන් අනීතිකව පැහැරගෙන ගොස්, වධහිංසා කර ඝාතනයට ලක් කර තිබුණු බව එවක ජනාධිපති චන්ද්‍රිකා බණ්ඩාරනායක කුමාරතුංග පත් කරනු ලැබූ කොමිෂන් සභාවේ වාර්තාවෙන් හෙළිදරව් විය.
ජනාධිපති චන්ද්‍රිකා බණ්ඩාරනායක මහත්මියගේ මැතිවරණ උද්යෝග පාඨයක් ලෙස ඉදිරිපත් වූ ‘දූෂණයට – භිෂණයට එරෙහිව’ මැතිවරණ පොරොන්දු මාලාවේ ප්‍රධාන පොරොන්දුවක් වූයේ එක්සත් ජාතික පක්ෂ රජය යටතේ සිදු වූවායැයි පැවැසෙන වධහිංසා සහ ඝාතනවලට යුක්තිය ඉටු කරන බවය. ඒ පොරොන්දුව අනුව ජනාධිපතිනිය බලයට පත්වී කෙටි කාලයකින් බටලන්ද වධකාගාරය සහ එහි සිදු වූවා යැයි පැවැසෙන ඝාතන සහ වධහිංසා සම්බන්ධයෙන් පරීක්ෂණයක් පැවැත්වීමට ජනාධිපති කොමිෂන් සභාවක් පිහිටුවා තිබිණි.

එම කොමිෂන් සභාවේ මුල් අවධියේදී ලේකම්වරයා ලෙස ශ්‍රී ලංකා පරිපාලන සේවයේ හිටපු නිලධාරියෙකු වූ නීතිඥ එස්. ගුණවර්ධන කටයුතු කර, ඉල්ලා අස්වී තිබුණු අතර පසුව පරිපාලන සේවයේ නිලධාරියෙකු වූ ජී. කේ. ජී. පෙරේරා කොමිසමේ ලේකම්වරයා වශයෙන් කටයුතු කර තිබිණි.

එවකට රජයේ නීතිඥ යසන්ත කෝදාගොඩ, ජනාධිපති නීතිඥ ආර්.අයි. ඔබේසේකර, අභියායාචනාධිකරණයේ විනිසුරු ඩී. ජයවික්‍රම, මහාධිකරණ විනිසුරු එන්.ඊ. දිසානායක, රජයේ නීතිඥ සරත් ජයමාන්න මහත්වරුන් සාක්ෂිකරුවන්ගේ සාක්ෂි විමර්ශනය කිරීමට පත් කර තිබිණී. කොමිෂන් සභාවට අවශ්‍ය විමර්ශන කිරීමට නියෝජ්‍ය පොලිස්පති ටී.වී. සුමනසේකර, ජේ්‍යෂ්ඨ පොලිස් අධිකාරී එස්.සී. පතිරණ, පොලිස් අධිකාරී එච්.එච්. එම්. ආර්. ප්‍රේමරත්න යන මහත්වරුන්ගේ ප්‍රධානත්වයෙන් යුත් පොලිස් නිලධාරීන් කණ්ඩායම් දෙකක් කොමිෂන් සභාවට සහාය වී ඇත.

බටලන්ද කොමිසමේ වාර්තාව 1995 සැප්තැම්බර් 20 දින ජනාධිපතිනියට ලබා දිය යුතු බවට කොමිසමේ නියෝගයේ සදහන් වූවත්, එම වාර්තාව හිටපු ජනාධිපතිනියට භාරදෙන්නේ නියමිත දිනයට අවුරුදු 3කට ආසන්න කාලයට පසුව, එනම් 1998 මැයි 05 වන දින ය.

කොමිසමට පැවරුණු රාජකාරිය

1995 දෙසැම්බර් මස 15 දන දරන අධිකාර පත්‍රයට අනුව, 1990 පෙබරවාරි මස 20 දින හෝ ඊට ආසන්නයේදී උප පොලිස් පරීක්ෂක රෝහිත ප්‍රියදර්ශන අතුරුදහන්වීමට අදාල අවස්ථානුගත කරුණු සහ ඒ අතුරුදහන්වීමට වගකිව යුතු පුද්ගලයන්,  1990 පෙබරවාරි 24 දින හෝ ඊට ආසන්නයේදී උප පොලිස් පරීක්ෂක අජිත් ජයසිංහ අත්අඩංගුවට ගැනීම සහ රඳවා තබා ගැනීමට අදාළ කරුණු සහ එකී අත්අඩංගුවට ගැනීම රඳවා තබාගැනීම ගැන වගකිවයුතු පුද්ගලයන්,
1988 වර්ෂයේ ජනවාරි 01 දින සිට 1990 වර්ෂයේ දෙසැම්බර් 31 දක්වා කාලය තුළ එවකට පැවැති එක්සත් ජාතික පක්ෂ රජය, රාජ්‍ය පොහොර සමාගමට අයත් බටලන්ද නිවාස සංකීර්ණයේ නිත්‍යනුකූල නොවන ආකාරයට පුද්ගලයන් රඳවා තබා ගැනීම සහ අමානුෂික වධහිංසා පැමිණවීම සම්බන්ධයෙන් වගකිව යුත්තෝ කවුද යැයි සෙවීම කොමිසමට පැවරුණු වගකීම් ය.

1996 ජනවාරි 16 දින කොමිෂන් සභාවේ ප්‍රසිද්ධ රැස්වීම් ආරම්භ කර, දින 127ක් පුරා කොළඹ අලු‍ත්කඩේ මහාධිකරණ සංකීර්ණයේ අංක 2 මහාධිකරණ ශාලාව තුළ සැසිවාර පැවැත්විණි. සාක්ෂිකරුවන් 82දෙනෙකුගෙන් සාක්ෂි ලබාගෙනතිබුණු අතර, එවක විපක්ෂනායකවරයා ලෙස කටයුතු කළ රනිල් වික්‍රමසිංහ, ජෝසප් මයිකල් පෙරේරා, ජෝන් අමරතුංග යන මහත්වරුන්ගෙන්ද කොමිෂන් සභාව ප්‍රශ්න කර තිබිණි. වාර්තාවේ ‘විපක්ෂ නායක ගරු රනිල් වික්‍රමසිංහ මහතා කොමිෂන් සභාව කැඳවන තුරු කොමිෂන් සභාවට නොපැමිණ සිටියේය.’ යනුවෙන් සඳහන් කර ඇත. බටලන්ද කොමිසමේ සියලු‍ ලිඛිත වාර්තා වෙළුම් 28 කින් යුක්ත අතර පිටු 6,780කින් සමන්විත වාර්තාවකි.

රනිල් වික්‍රමසිංහ දැනුවත්ද?

1970 දශකයේ මුල් කාලයේදී විදේශික නිලධාරීන්ගේ පාවිච්චිය සදහා බටලන්ද නිවාස යෝජනා ක්‍රමයේ වැඩ නිම කර ඇත. එය වෙන් කළ නිවාස ඒකක 64කින් යුක්ත විය. මූලික වශයෙන් මෙම නිවාස යෝජනා ක්‍රමයේ නිවාස වර්ග 3ක් තිබිණි.
ඒ වර්ගයට අයත් දෙමහල් නිවාසද, බී වර්ගයට අයත් තනිමහලේ නිවාසද විය. එක් ඒකකයකට මේ ආකාරයේ නිවාස දෙකක් ඇතුළත් වී තිබිණි. සී වර්ගයේ නිවාස 43ක් තිබී ඇති අතර එම නිවාස නිදන ශාලා ස්වභාවයට අයත් නිවාස විය. මෙම නිවාස යෝජනා ක්‍රමයේ නිවාසවල පාවිච්චිය සඳහා පොල් ඉඩම් නිවාස යෝජනා ක්‍රමයේ තැන තැන තිබී ඇත. බටලන්ද ගමේ මාර්ගයේ එක් ඇතුල්වීමේ සහ පිටවීමේ ගේට්ටුවක් බැගින් නිවාස යෝජනා ක්‍රමයට ගේට්ටු දමා තිබිණි. නිවාස යෝජනා ක්‍රමය තුළ තාර දැමූ මාර්ග පද්ධතියක් තිබී ඇති අතර නිවාස යෝජනා ක්‍රමයේ වම් පස සහ දකුණු පසට බටලන්ද ගම විහිදී ඇත. පසුපසට විශාල වෙල් යායක් තිබී ඇති අතර සම්පූර්ණ නිවාස යෝජනා ක්‍රමය ආරක්ෂක කටු කම්බි වැටකින් වට කර තිබුණු බව වාර්තාවේ සඳහන් කර ඇත. නිවාස යෝජනා ක්‍රමය මැද කාර්යාල සංකීර්ණයක, සමාජශාලා ගොඩනැගිල්ලක් හා පිහිනුම් තටාකයක්ද තිබී ඇත.

නිවාස සංකීර්ණයේ ඒ 2/2 නිවස 1983 මාර්තු 02 සිට 1989 අප්‍රේල් 30 දක්වා කාලය තුළ එවක රනිල් වික්‍රමසිංහ තමා විසින් දැරූ යෞවන කටයුතු සහ රැකීරක්ෂා අමාත්‍යවරයාගේ සංචාරක බංගලාව වශයෙන් ද, 1989 අප්‍රේල් සිට 1994 අගෝස්තු මස දක්වා කාලය අතරතුර රනිල් වික්‍රමසිංහ මහතා එවක දැරූ කර්මාන්ත අමාත්‍යවරයාගේ නිල නිවස වශයෙන් ද භාවිත කර ඇත.

නිවාස වෙන් කරන්න කීවේ රනිල්

කොමිසමේ වාර්තාවේ සඳහන් වන පරිදි එවකට කර්මාන්ත අමාත්‍යවරයා වූ රනිල් වික්‍රමසිංහ එවකට රාජ්‍ය පොහොර නිෂ්පාදන සමාගමේ ඈවරකරු වූ අසෝක සේනානායක දුරකථනයෙන් අමතා පොලිස් නිලධාරීන්ට බටලන්ද නිවාස සංකීර්ණයෙන් නිවාස කිහිපයක් වෙන් කර දෙන ලෙස ඉල්ලීමක් සිදුකර තිබිණි.

ඒ අනුව ඒ 2/1 නිවස රනිල් වික්‍රමසිංහ මහතාගේ ආරක්ෂක නිලධාරීන්ට වෙන් කර තිබුණි. ඒ 1987 සිට 1989 මැයි මාසය දක්වාත් ඉන්පසුව 1994 වර්ෂයේ අගෝස්තු මස දක්වාත්ය. ඒ 1/7 නිවසේ රනිල් වික්‍රමසිංහ මහතාට වෙන් කළ ආරක්ෂක නිලධාරීන් දළ වශයෙන් 1989 සිට 1994 අගෝස්තු මාසය දක්වා පදිංචි වී සිට ඇති බව කොමිෂන් වාර්තාවේ දක්වා ඇත.

ඒ 2/3 නිවස රනිල් වික්‍රමසිංහ මහතා යටතේ ක්‍රියාත්මක වූ මිනිස් බල උපයෝගිතා අමාත්‍යාංශයට පවරා තිබුණු අතර, වික්‍රමසිංහ මහතාගේ බංගලා භාරකරු වින්සන්ට් ප්‍රනාන්දු මහතා එම නිවසේ 1988 වර්ෂයේ නොවැම්බර් 01 සිට 1994 වර්ෂයේ අගෝස්තු දක්වා පදිංචි වී සිට ඇත.

මෙම නිවාස භාරගෙන ඇත්තේ ‘කඩාකප්පල්කාරී ක්‍රියා මර්දන ඒකකයේ කැලණිය පොලිස් කොට්ඨාසයේ මෙහෙයුම දක්ෂ ලෙස සැලසුම් කොට ක්‍රියාත්මක කළ මහමොළකාරයා යැයි කියනු ලැබූ’ ලෙස කොමිෂන් වාර්තාවේ සඳහන් එවක සහකාර පොලිස් අධිකාරීවරයෙකු ලෙස කටයුතු කළ ඩග්ලස් පීරිස් ය.

පොලිස් නිලධාරීන්ට බටලන්ද නිවාස සංකීර්ණයේ නිවාස ලබා දීම හුදෙක් ම රනිල් වික්‍රමසිංහගේ උපදෙස් මත සිදුවූවක් බව ද, වික්‍රමසිංහ මහතා නිවාස ආරක්ෂක නිලධාරීන්ට ලබා දෙන්න යැයි තමාට උපදෙස් ලබා නොදුන්නේ පොලිස් නිලධාරීන්ට නිවාස ලබා දීමක් සිදු නොකරන නිසා බව රජයේ පොහොර නිෂ්පාදන සංස්ථාවේ ඈවරකරු වන අසෝක සේනානායක කොමිසම හමුවේ සාක්ෂි ලබා දී ඇත. එවකට පොලිපතිවරයා වූ අර්නස්ට් පෙරේරා කොමිසම හමුවේ සාක්ෂි දෙමින් පවසා ඇත්තේ මෙය ‘ඩග්ලස් පීරිස් මහතා හා සංස්ථාවේ නිලධාරීන් සහ අදාළ අමාත්‍යවරයා අතර පෞද්ගලික ගනුදෙනුවක්’ ලෙස පෙනෙන බව ය.

නිවාස ඉදිරියේ තරුව ලකුණ

පුද්ගලයන් නීති විරෝධීව රඳවා තබා වධහිංසා කිරීමට පාවිච්චි කළ නිවාස අංක ඉදිරියේ (★) තරුව සලකුණක් තබා තිබුණු බව වාර්තාවේ සඳහන් කර ඇත. ඒ 1/8 නිවස පිහිටා ඇත්තේ මේ නිවාස ආසන්නයේ බවත් එම නිවස හිස්ව තිබුණේ විශාල වශයෙන් අලු‍වැඩියාවන් කිරීමට තිබුණු නිසා බවත් යම් යම් පොලිස් නිලධාරීන් එය අනවසරයෙන් අල්ලාගෙන සිටි බවට තමන්ට ආරංචි ලැබුණු බවත් පුද්ගලයන් නීති විරෝධිව රඳවා තබා වධහිංසාවට ලක් කිරීමට එම නිවස භාවිත කර බවත් කොමිසම ඉදිරියේ සාක්ෂි ලබා දෙමින් සාක්ෂිකරුවෙකු වූ අජිත් ජයසිංහ පවසා තිබිණි.

1989 සිට 1994 අගෝස්තු දක්වා කාලය තුළ රනිල් වික්‍රමසිංහ මහතාගේ කාර්යාලය ලෙස පාවිච්චි කිරීමට වෙන් කර තිබුණු බී 2 නිවසේ තමා බලහත්කාරයෙන් රඳවා ගත්තේ යැයි කොමිසම හමුවේ සාක්ෂි දෙමින් ටී. එම්. බන්දුල යන අය ප්‍රකාශ කර ඇති අතර, කොමිසම නිවාස සංකීර්ණය පරීක්ෂා කිරීමට ගිය අවස්ථාවේ ඔහු ඒ නිවස හඳුනාගෙන තිබිණි.
බී 1 නිවස රනිල් වික්‍රමසිංහට වෙන් කළ ආරක්ෂක නිලධාරීන් රැඳී සිට ඇති අතර බී 7හි රනිල් වික්‍රමසිංහගේ පෞද්ගලික ආරක්ෂක නිලධාරී පොලිස් පරීක්ෂක සුදත් චන්ද්‍රසේකර රැඳී සිට ඇත.
බී 8 නිවසේ සහකාර පොලිස් අධිකාරී ඩග්ලස් පීරිස්ගේ ආරක්ෂක නිලධාරීන් රැඳී සිට ඇති අතර මෙම නිවසේ තමා බලහත්කාරයෙන් රඳවා තබාගෙන, වධදීමට ලක් කළ බව සාක්ෂිකරු අර්ල් සුගී පෙරේරා හඳුනාගෙන තිබිණි.

රනිල් වික්‍රමසිංහ මහතාගේ නියමය පරිදි සහකාර පොලිස් නිලධාරී ඩග්ලස් පීරිස්ට වෙන් කළ ඒ 1/2 නිවසේ 1984 අගෝස්තු 18 දින සිට 1988 ජූනි 20 දක්වා කාලය තුළ ඩග්ලස් පීරිස් මහතාද, 1988 ජූනි මස මුල සිට මැද දක්වා කාලය තුළ පෑලියගොඩ මූලස්ථාන පොලිස් පරීක්ෂක ඩබ්ලිව්. මහානායකද, 1990 නොවැම්බර් 15 දින සිට 1996 දක්වා කාල සීමාව තුළ කැලණිය සහකාර පොලිස් අධිකාරී එච්.ජී. වික්‍රමසිංහ පදිංචි වී සිට ඇත.

ඒ 1/4 නිවසේ 1986 දෙසැම්බර් සිට 1989 අගෝස්තු දක්වා සහකාර පොලිස් අධිකාරි ආර්. ධර්මරත්නද, 1989 අගෝස්තු 02 සිට 1996 දක්වා කාලය තුළ සහකාර පොලිස් අධිකාරි එච්. චන්ද්‍රදාසද පදිංචි වී සිට ඇත. ඒ 1/5 නිවසේ 1989 අගෝස්තු මස 02 වන දින සිට 1990 මැයි 05 දක්වා කාලය තුළ පොලිස් අධිකාරී නලීන් දෙල්ගොඩ පදිංචි වී සිට ඇත.

ඒ 2/5 පොලිස් අධිකාරී ඩග්ලස් පීරීස් පදිංචි වී සිටි නිවස ආසන්නයේම නීතිවිරෝධී රැඳවුම් මධ්‍යස්ථානයක් හෙවත් වධකාගාරයක් පිහිටා තිබුණු බව කොමිසමේ දී හෙළි වී ඇත.
බී 8 නිවස ඩග්ලස් පීරිස් මහතාට වෙන්කරන ලද ආරක්ෂක නිලධාරී 1988 සිට 1991 කාලය දක්වා පදිංචි වී සිට ඇති අතර තමා නීති විරෝධිව එම නිවසේ රඳවාගෙන වධහිංසාවට ලක් කළ නිවසක් වශයෙන් සාක්ෂිකරුවෙකු වූ අරල් සුගී පෙරේරා හඳුනාගෙන තිබිණී. මෙම නිවස ඩග්ලස් පීරීස් මහතා පදිංචිව සිටි නිවස ඉදිරිපිට ඊට ආසන්නයේ බවත්, රනිල් වික්‍රමසිංහ මහතාගේ පෞද්ගලික ආරක්ෂක නිලධාරී, පොලිස් පරීක්ෂක සුදත් චන්ද්‍රසේකර පදිංචිව සිටි නිවසට යාබදව පිහිටා ඇති බවත් සදහන් වේ.

කැලණිය කඩාකප්පල්කාරී ක්‍රියා මර්දන ඒකකයේ පොලිස් නිලධාරීන්ගේ පදිංචිය සඳහා බටලන්ද නිවාස යෝජනා ක්‍රමයෙන් නිවාස 10ක් අවශ්‍ය බව සඳහන් කරමින් සහකාර පොලිස් අධිකාරී ඩග්ලස් පීරීස් 1989 අගෝස්තු 02 දින එම නිවාස යෝජනා ක්‍රමයේ ඈවරකරු වන අසෝක සේනානායක මහතාට ලිපියක් මඟින් දන්වා තිබිණි. ලිපියේ සඳහන් කර ඇති පරිදි බී 06, බී 08, බී 10, බී 13, බී 20, බී 21, ඒ 2/5 ය, බී 23 යන නිවාසවල කැලණිය කඩාකප්පල් ක්‍රියා මර්දන ඒකකයේ නිලධාරීන් රැඳී සිටින බවත් ඒ 2/15 හා ඒ 1/5 දරන නිවාස ද තම ඒකකයට වෙන්කොට මුදා හරින ලෙස ලිපියෙන් ඉල්ලා ඇති බවත් කොමිසම් වාර්තාවේ සඳහන් කර ඇත.

බී 34 නිවස සපුගස්කන්ද පොලිස් ස්ථානයට පවරා දී තිබිණි. එම නිවසේ තමා නීති විරෝධිව රඳවාගෙන වධදෙනු ලැබූ බවට සාක්ෂි ලබා දුල් සාක්ෂිකරු වාසල ජයසේකර අදාළ නිවස හඳුනාගෙන තිබිණි. බී8 , නිවස බී7 නිවස ආසන්නයේ සහ සහකාර පොලිස් අධිකාරී ඩග්ලස් පීරිස් රැඳී සිටි ඒ 2/5 නිවස ඉදිරිපිට පිහිටා ඇත. 1996 මැයි 24 දින කොමිසමේ නිලධාරීන් නිවාස සංකීර්ණය පරීක්ෂාවකට ගිය අවස්ථාවේදී මෙම නිවසේ වීදුරු ජනේලයක “බ්ලැක් කැට්ස්” ලෙස පින්තාරු කර ඇති බව නිරීක්ෂණය වී තිබිණි.

ඒ 1/8 නිවස කිසිවෙකුටත් පවරා දී තිබී නොමැති නමුත් ඒ අවට පොලිස් නිලධාරීන් නිතර ගැවසෙන බැවින් තමන් පෑලියගොඩ පොලිසියට සහ රනිල් වික්‍රමසිංහ මහතාට ඒ බව දන්වා තිබුණද කිසිදු ක්‍රියාමාර්ගයක් නොගත් බවත් රනිල් වික්‍රමසිංහ මහතාගේ ආරක්ෂකයින් රැඳී සිටි ඒ 1/7 නිවසට යාබදව පිහිටි මෙම නිවස පුද්ගලයින් බලහත්කාරීව රඳවා තබා ගත් ස්ථානයක් ලෙස තමන්ට නිරීක්ෂණය වූ බවත් අජිත් ජයසිංහ යන අය කොමිසම ඉදිරියේ සාක්ෂි ලබා දෙමින් පවසා තිබිණි.

බටලන්ද නිවාස, පොලිස් නිලධාරීන් පදිංචි වී සිටි නිල නිවාස ලෙස නිල වශයෙන් පිළිගැනුණේ නැති බවත් පොලිස් නිලධාරීන් එහි පදිංචිව සිටි බවට හඟවන කිසිදු ලියවිල්ලක් පොලිස් මූලස්ථානයේ නොතිබුණු බවත් කොමිෂන් වාර්තාවේ සඳහන් කර ඇත.

අර්ල් සුගී පෙරේරා

අර්ල් සුගී පෙරේරා 1988 සිට සෞඛ්‍ය අමාත්‍යාංශයට අනුයුක්ත කම්කරුවෙකු වශයෙන් සේවය කර ඇත. ඔහු කිරිබත්ගොඩ මංසන්ධියේ තරුණ බෞද්ධ සංගම් ගොඩනැගිල්ල ඉදිරිපිට සංවර්ධන ලොතරැයි පත් විකිණිමේ කවුළු‍වක් පවත්වාගෙන ගොස් ඇත. 1990 මාර්තු 23 දින පස්වරු 7.30 ට පමණ වෙස් මුහුණු පැලැඳ, ගිනි අවි ඇතැතිව සුදු වෑන් රථයකින් පැමිණි පිරිසක් පැමිණ සිඩ්නි යනුවෙන් තමා ඇමතූ බවත් තමන් සිඩ්නි නොවේ යැයි ඒ පිරිසට කීවත් පිරිස තමන් වෑන් රථයට දමා ගෙන ඉදිරියට ධාවනය කළ බවත් වෑන් රථය තුලදී පිරිස වෙස් මුහුණු ගැලවූ බවත් ඒ අතර කැලණිය කඩාකප්පල්කාරී ක්‍රියා මර්දන ඒකකයේ සාර්ජන්ට් මේජර් රත්නායක සිටි බව තමන් හඳුනාගත් බවත් සාක්ෂි ලබා දෙමින් පවසා තිබිණි.

වාසල ජයසේකර

වාසල ජයසේකර සේවය කළ මහජන බැංකුවට සන්නද්ධ කණ්ඩායමක් කඩාපැන රුපියල් දෙලක්ෂයක් පමණ කොල්ලකා තිබිණි. පෑලියගොඩ පොලිසියට ඒ සම්බන්ධයෙන් පැමිණිලි කළ නමුත් විමර්ශන ප්‍රමාද වී තිබිණි. පසුව බැංකුවේ ආරක්ෂක නිලධාරීන් දෙදෙනෙකු ප්‍රශ්න කිරීම සඳහා අත්අඩංගුවට ගෙන තිබුණි. 1990 වර්ෂයේ ඔක්තෝබර් 18 දින පෑලියගොඩ පොලිස් ස්ථානයේ පොලිස් පරීක්ෂකවරයෙකු සහ සුමනසිරි නැමැති සැරයන්වරයෙකු අත්අඩංගුවට ගෙන තිබිණි. එම සොරකමට තමන්ගේ සම්බන්ධයක් නැතැයි පවසද්දී, තමන්ව නිර්වස්ත්‍ර කර පොලිස් නිලධාරීන් කණ්ඩායමක් තමන්ට පහර දුන් බවත් තමන්ගේ දෑස්වලට මිරිස් කුඩු දමා, ඇඟිලිවලට ඇල්පෙනෙතිවලින් පොලිස් නිලධාරින් ඇන්න බවත් ඉන්පසුව බටලන්ද වධකාගාරයට තමන්ව රැගෙන ගොස් වධහිංසා කළ බවත් වාසල සාක්ෂි ලබා දෙමින් පවසා තිබිණි.

තමන්ව රඳවා තබා සිටි කාලයේ වධකාගාරයේ සිටි වධහිංසාවට ලක් කළ අනෙක් අයගේ අසූචි එකතු කොට නිවසේ වැසිකිළියට දැමීමේ කාර්යය තමන් අතින් සිදු වූ බවත් සාක්ෂි ලබා දෙමින් වාසල කොමිසම ඉදිරියේ පවසා තිබිණි.

නීතිඥ විජයදාස ලියනආරච්චිගේ මරණය

1988 අගෝස්තු 25 වන දින හෝ එදින ආසන්නයේ නීතිඥ විජයදාස ලියනආරච්චි අතුරුදහන් වී තිබිණි.
ඔහුගේ අතුරුදහන් වීම සම්බන්ධයෙන් ජනාධිපති නීතිඥ රංජිත් අබේසූරිය පොලීසියේ පැමිණිල්ලක් සිදුකර තිබිණි. එම පැමිණිල්ලට අනුව නීතිඥ විජයදාස මහතා අත්අඩංගුවට ගෙන ඇත්දැයි එවකට ආරක්ෂක ලේකම්වරයා එවකට පොලිස්පති අර්නස්ට් පෙරේරාගෙන් විමසා ඇති අතර, පොලිස්පතිවරයා කොළඹ ප්‍රදේශය භාර නියෝජ්‍ය පොලිස්පතිවරයාගෙන් විමසා එසේ නැති බව ප්‍රකාශ කර තිබිණි.

වාර්තාවේ සඳහන් කර ඇති පරිදි එවකට ආරක්ෂක අමාත්‍යාංශයේ උපදේශකයෙකු වූ හිටපු ජනාධිපති ජේ. ආර්. ජයවර්ධනගේ පුත්‍රයා වූ රවී ජයවර්ධන පොලිස්පතිවරයාට, නීතිඥ විජයදාස මහතාව තංගල්ල පොලිසිය විසින් අත්අඩංගුවට ගෙන තිබිය හැකි බවට ඉඟියක් පළ කර තිබිණි.

ඒ අනුව පොලිස්පතිවරයා තංගල්ල පොලිස් බලප්‍රදේශයේ පොලිස් අධිකාරී කරවිටගේ ධර්මදාසගෙන් කළ විමසීමක දී එවැන්නක් සිදුවී ඇති බවට ව්‍යංග්‍යාර්ථයෙන් එම නිලධාරියා පිළිගෙන ඇති බවට සඳහන් කර ඇත.

හිටපු පොලිස්පති අර්නස්ට් පෙරේරාගේ සාක්ෂියට අනුව, 1988 අගෝස්තු 31 දින දහවල් 12ට පමණ රනිල් වික්‍රමසිංහ ඔහුව දුරකතනයෙන් අමතා සැකකරු එනම් නීතිඥ විජයදාස ලියනආරච්චි කොළඹට ගෙනැවිත් කැලණි කොට්ඨාසය තුළ ක්‍රියාත්මක වන විශේෂ කණ්ඩායමට භාරදීමට පොලිස්පතිවරයා කටයුතු කරනු ඇති බවට ‘තමා අපේක්ෂා කරන’ බව දන්වා ඇත.

පොලිස්පතිවරයාගේ එම උපදෙස් අනුව කොළඹට ගෙන්වා ඇති නීතිඥ ලියනආරච්චි සැප්තැම්බර් 01 දින භාරගෙන ඇත්තේ කැලණි ප්‍රදේශයේ කඩාකප්පල්කාරී ක්‍රියා මර්දන ඒකකයේ පොලිස් පරීක්ෂක කුලරත්න නම් නිලධාරියෙකු විසිනි. සැප්තැම්බර් 02 දින ප.ව. 11.00ට පමණ තුවාල සහිතව නීතිඥ ලියනආරච්චිව කොළඹ ජාතික ඇතුළත් කර ඇති අතර, මධ්‍යම රාත්‍රිය ගත වී පැය භාගයක් පමණ ගත වන විට ඔහු මිය ගොස් තිබිණි.

කොමිෂන් වාර්තාවට අනුව නීතිඥ විජේදාස ලියනආරච්චිගේ පශ්චාත් මරණ පරීක්ෂණයේදී, ඔහුගේ මරණයට හේතුව ලෙස සඳහන් කර ඇත්තේ “මොට ආයුධවලින් සිදුකෙරුණු පහරදීම්” බවත් ඔහුගේ ශරීරයේ තුවාල 207ක් තිබුණු බවත්ය.

නීතිඥ විජේදාස මහතාගේ මරණය ගැන තොරතුරු රැසක්ිෘැ්එය දf ඛ්අහැර සබ ඡදකසජැ ක්‍දමඑදාහ’ නම් මහාචාර්ය රවින්ද්‍ර ප්‍රනාන්දු ලියූ කෘතියේ සඳහන් කර ඇත. නීතිඥ විජයදාස ලියනආරච්චිගේ ඝාතනයට විරෝධය දක්වමින් එවකට අලු‍ත්කඩේ අධිකරණ භූමියේ විවෘත කිරීමේ උත්සවයට නොයා නීතිඥවරුන් සියලු‍ දෙනාම විරෝධය දක්වා ඇති බවත් සඳහන් වේ.

රනිල් වික්‍රමසිංහගේ සාක්ෂිය

එවකට කර්මාන්ත අමාත්‍යවරයා වූ රනිල් වික්‍රමසිංහගෙන් කොමිසම ප්‍රශ්න කළ අවස්ථාවේදී කොමිසමේ සාක්ෂි දෙමින් ඒ මහතා පවසා ඇත්තේ එම කාලවකවානුව වන විට ඝාතනයට ලක් ව සිටි හිටපු ආරක්ෂක ඇමති රන්ජන් විජේරත්නගේ ඉල්ලීමක් මත මේ සියල්ල සිදු වූ බවය. එම කාරණා සනාථ කිරීමට අවශ්‍ය කිසිදු ලියවිල්ලක් ඉදිරිපත් කිරීමට ඔහු අසමත් වූ බව බවත් එවකට පොලිස්පතිවරයා හෝ පොලිස් මූලස්ථානය මේ පිළිබඳව දැන නොසිටීම නිසා කොමිසම රනිල් වික්‍රමසිංහගේ ප්‍රකාශය ප්‍රතික්ෂේප කරන බවද වාර්තාවේ සඳහන් ය.

ටී.එම්. බන්දුල මහතා කොමිසම හමුවේ සාක්ෂි ලබාදෙමින් බී 2 නිවසේ තමන්ව රඳවා තබාගෙන වධහිංසා පැමිණවූයේ යැයි කොමිසම හමුවේ ප්‍රකාශ කර ඇති බව කොමිසමේ නිලධාරින් රනිල් වික්‍රමසිංහ මහතාට පවසා ඇත. විවිධ කටයුතු සඳහා එම නිවස භාවිත කළ නිසා එවැනි සිද්ධියක් නිවස තුළ සිදු වූවා නම් අනිවාර්යයෙන්ම තමන්ට ඒ සම්බන්ධයෙන් දැනගන්නට ලැබෙන බව ඔහු එවිට කියා ඇත. පුද්ගලයෙකු නීති විරෝධිව රඳවා තබා වධදීම සිදුවිය නොහැකි බව වික්‍රමසිංහ මහතා කියා තිබේ. ඇත්ත වශයෙන්ම එබඳු සිද්ධියක් සිදුවුණේ නම් තමා එම නිවස පාචිච්චි කරන බැවින් එය තමන් අවශ්‍යයෙන්ම දැන සිටිය යුතු වුණේයැයි ඔහු තවදුරටත් කීය. තමාගේ දැනුමක් නැතිව බී 2 නිවස නීති විරෝධී ක්‍රියා සඳහා පාවිච්චි විය හැකි බවක් වික්‍රමසිංහ මහතා මොහොතකටවත් පිළිගත්තේ නැති බව කොමිෂන් වාර්තාවේ සදහන් කර ඇත.

වධකාගාරයේ රැස්වීම්

කොමිෂන් සභාවේ නඩු විභාගය අතරතුර නිවාස යෝජනා ක්‍රමය තුළ යම් යම් රැස්වීම් පවත්වා ඇති බවත්, එහි මුලසුන දරා ඇත්තේ එවකට ආරක්ෂක ඇමතිවරයා හෝ ආරක්ෂක රාජ්‍ය අමාත්‍යවරයා නොවූ, කර්මාන්ත ඇමතිවරයා වූ රනිල් වික්‍රමසිංහ බවත් කැලණිය පොලිස් කොට්ඨාසයේ ජ්‍යෙෂ්ඨම නිලධාරියා වූ ජ්‍යෙෂ්ඨ පොලිස් අධිකාරී නලීන් දෙල්ගොඩ කොමිසමේ රජයේ නිතිඥවරයාගේ ප්‍රශ්න කිරීම් හමුවේ ප්‍රකාශ කර තිබිණි.

තමන්ද එවැනි රැස්වීම් කිහිපයකට සම්බන්ධ වී තිබී ඇති අතර, පළමු අවස්ථාවේදී එම රැස්වීම් පැවතියේ රනිල් වික්‍රමසිංහ නිල සංචාරක බංගලාව ලෙස භාවිත කළ ඒ 2/2 නිවසේ බවටත් පසුව එම රැස්වීම් පැවතියේ එම බංගලාවට ඉදිරිපසින් පිහිටි නිවසේ බවටත් සාක්ෂි ලබා දී තිබිණි. එම රැස්වීම් නීතිය හා සාමය සුරැකීම අරමුණු කරගෙන පැවති බවත් පසුව කඩාකප්පල්කාරීන් මර්දනය කරලීම පිණිස කවර ස්වභාවයේ ක්‍රියාමාර්ගයක් ගත යුතුදැයි සාකච්ඡා කළ බවත් ඔහු පවසා තිබිණි.

මෙම රැස්වීම් පැවැත්වීම සම්බන්ධයෙන් කළ ප්‍රශ්න කිරීම්වල දී කොමිසම ඇසූ ප්‍රශ්නවලට පිළිතුරු ලබා දීමට රනිල් වික්‍රමසිංහ අපොහොසත් වූ බවත් කොමිෂන් වාර්තාවේ සඳහන් කර ඇත.

වගකිවයුත්තෝ

1988 ජනවාරි 01 සිට 1990 දෙසැම්බර් 31 දක්වා කාලවකවානුව තුළ බටලන්ද නිවාස යෝජනා ක්‍රමයේ කිසියම් පුද්ගලයෙකු හෝ පුද්ගලයින් රඳවා සිටියේ නම්, අමානුෂික හා ආත්ම ගෞරවය කෙළෙසන ක්‍රියාවකට ලක් වූයේ නම් එයට සෘජුව සහ අනියමින් වගකිවයුත්තන් බටලන්ද කොමිසමේ වාර්තාවේ දක්වා ඇත.

1986 සිට අවස්ථා කිහිපයක දී එවකට කර්මාන්ත අමාත්‍ය රනිල් වික්‍රමසිංහ විසින් බටලන්ද නිවාස යෝජනා ක්‍රමයේ නිවාස පොලිස් නිලධාරීන්ට ලබා දීමට පොහොර සමාගමේ බලධාරීන්ට නියම කර ඇති අතර, ඔහු හරහා එම නිවාස 13ක් දක්වා ලබා ගැනීමට සහකාර පොලිස් අධිකාරී ඩග්ලස් පිරිස් වගකිවයුතු බවත් නිවාස වෙන් කිරීමට රනිල් වික්‍රමසිංහ නියම කිරීම අමාත්‍යධුරයේ බලතල අයුතු ලෙස භාවිත කිරීමක් බවත් වාර්තාවේ සදහන් කර ඇත.

රනිල් වික්‍රමසිංහගේ මූලිකත්වයෙන් බටලන්ද නිවාස යෝජනා ක්‍රමයේ පොලිස් නිලධාරීන් සම්බන්ධ වූ රැස්වීම් කැඳවීමෙන් ඔහු බලය අයථා ලෙස භාවිත කර ඇති බවත්, පොලිසියේ රාජකාරීවලට සහ නීතිය ක්‍රියාත්මක කිරීමේ ක්‍රියාමාර්ගවලට මැදිහත් වී ඇති බවත් සඳහන් කර ඇත.

නිවාස බී 2, බී 8, බී 34 හා නිවාස ඒ 1/8 යන බටලන්ද නිවාස යෝජනා ක්‍රමයේ නිවාසවල නීතිවිරෝධී රැඳවුම් ස්ථාන සහ වධකාගාර පැවැත්වීමට රනිල් වික්‍රමසිංහ සහ ජ්‍යෙෂ්ඨ පොලිස් අධිකාරී නලීන් දෙල්ගොඩ අනියමින් වගකිවයුතු බවත් මෙම නීති විරෝධී ක්‍රියාවන් දැනගෙන ඒවාට සුදුසු ක්‍රියාමාර්ග නොගැනීම හේතුවෙන් එවකට නියෝජ්‍ය පොලිස්පති එම්.එම්.ආර්. ගුණරත්න, එවකට පොලිස්පති අර්නස්ට් පෙරේරා වගකිවයුතු බව ද වාර්තාවේ සඳහන් කර ඇත.

නිර්දේශ

ජනාධිපති කොමිසමේ වාර්තාවේ සදහන් කර ඇති ප්‍රධාන නිර්දේශයක් වන්නේ ‘පුරවැසියන්ගේ මූලික අයිතිවාසිකම් පිට පිට ම උල්ලංඝනය කර ඇති බවට හඳුනාගනු ලබන පුද්ගලයන්ගේ ප්‍රජා අයිතිවාසිකම් අහිමි කිරීමේ ස්වරූපයෙන් වූ සුදුසු දඬුවම් එම පුද්ගලයින්ට පැනවීමට අවශ්‍ය අධිකරණ බලය ශ්‍රේෂ්ඨාධිකරණයට පැවරීමට’ නිර්දේශ කිරීම ය. අදාළ අධිකරණවලට නීති විරෝධී මෙවැනි කටයුත්තක් සිදුවන ස්ථානවලට ගොස් පරීක්ෂණ පැවැත්වීමේ බලය ලබා දීමට අවශ්‍ය කටයුතු සිදුකළ යුතු බවත් එම වෙනස්කම් සිදු කිරීමට අවශ්‍ය කමිටුවක් පත් කිරීමටත් නිර්දේශ ලබා දී ඇත.

බටලන්ද කොමිෂන් වාර්තාව මේ ලින්කුවෙන් –https://drive.google.com/file/d/10Qk0PDrgrbz8SiTuKcM0qWtANGQpsKwX/view?usp=sharing