පසුගිය ජනාධිපතිවරණයේදී රනිල් වික්‍රමසිංහ මහතාට සහාය දැක්වූ වතුකරයේ දේශපාලන පක්ෂ හා කණ්ඩායම් ඉදිරි පළාත් පාලන මැතිවරණයේදී එක්ව තරග කිරීමට සාකච්ඡා පවත්වමින් සිටින බව වාර්තාවේ.
එම සාකච්ඡා සඳහා ලංකා කම්කරු කොංග්‍රසය වෙනුවෙන් ජීවන් තොන්ඩමාන්, සෙන්දිල් තොන්ඩමාන්, අරවින්ද කුමාර්, වඩිවේල් සුරේෂ් ඇතුළු පිරිසක් සම්බන්ධ වී ඇතැයි වැඩිදුරටත් වාර්තාවේ.
පසුගිය මහ මැතිවරණයේදී අරවින්ද කුමාර් මහතා වෙනම තරග කර පරාජයට පත්වූ අතර වඩිවේල් සුරේෂ් මහතා රන්ජන් රාමනායක මහතා නායකත්වය දැරූ පක්ෂයෙන් තරග කර පරාජයට පත්විය. ජීවන් තොන්ඩමාන් මහතා පාර්ලිමේන්තුවට තේරී පත්වූයේ එක්සත් ජාතික පක්ෂය යටතේ තරග කරමින්ය.
රන්ජන් රාමනායක මහතාගේ නායකත්වයෙන් යුත් පක්ෂ යටතේ තරග කළ හිටපු අමාත්‍යවරයකු වූ පී චන්ද්‍රසේකරන් මහතාගේ දියණිය වන අනූෂා චන්ද්‍රසේකරන් සමඟද එම පිරිස ඉදිරියේදී සාකච්ඡා කිරීමට බලාපොරොත්තු වන බව වාර්තාවේ.
