මහ රෑත් ජනතාවට ශබ්දයෙන් පීඩා කරන්නට සුනිල් සෙනෙවි ඉඩදෙන්න යයි.මහජන පීඩාවන් ඇති නොවන පරිදි එළිමහන් සංගීත ප්‍රසංග ක්ෂේත්‍රයේ දැනට පවතින සීමා සංශෝධනය කිරීම කෙරෙහි රජයේ අවධානය යොමුකර තිබේ. ඒ පිළිබඳ මූලික සාකච්ඡාවක් කලාකරුවන් පිරිසක් සමග පෙබරවාරි 24දා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවිගේ ප්‍රධානත්වයෙන් පවත්වා තිබේ. එළිමහන් සංගීත ප්‍රසංග පැවැත්වීමේ කාලසීමාව දීර්ඝ කරගැනීම හා ශබ්ද විකාශන බලපත්‍ර ලබා ගැනීමේදී ඇතිවන ගැටලු විසඳා ගැනීම ආදිය සම්බන්ධයෙන් සාකච්ඡාවේදී අවධානය යොමු කෙරිණි.
එහිදී අමාත්‍යවරයා සඳහන් කර ඇත්තේ කැබිනට් මණ්ඩලය සමඟ සාකච්ඡා කර, මහජන පීඩා ඇති නොවන පරිදි දැනට පවතින සීමා සංශෝධනයට කටයුතු කරන බවයි.
ඇමතිවරයා කරන්නට හදන සංශෝධනය අනුව, පසුවදා පහන් වන තුරු එළිමහන් සංගීත සංදර්ශනවලින් නැගෙන අධික ඝෝෂාව විඳීමේ මහජන පීඩාවකට එම සංදර්ශන පැවැත්වෙන ස්ථාන අවට සිටින මහජනතාවට අනාගතයේදී මුහුණ දීමට සිදුවනු ඇත. තමන් වාසය කරන ස්ථානය අසළ මහජන ක්‍රීඩාංගණයක් තිබේ නම්, නිතිපතා මේ කරදරය විඳීමට ඔවුන්ට සිදුවනු ඇත. එම ක්‍රීඩාංගණයේ ‘අර මේලා – මේ මේලා’ ආදි නම්වලින් දින ගණනාවක් පුරා එක දිගට සැණකෙළි පැවැත්වුණහොත්, ඒවායේ සංගීත සංදර්ශන දිනපතා පැවැත්වුණහොත්, මේ මිනිසුන්ට අබ සරණය.
එළිමහන් සංගීත ප්‍රසංග පැවැත්වීමේ කාලසීමාව දීර්ඝ කරන්නට මේ කලාකරුවන්ට අවශ්‍ය වන්නේ, දැන් ඒවා පැවැත්විය හැකි උපරිම වේලාව රාත්‍රී 10 දක්වා වන බැවිනි. ඒ නිසා රාත්‍රී 10න් පසු පැවැත්වෙන සංදර්ශනවලට ශබ්ද විකාශන යන්ත්‍ර බලපත්‍ර පොලිසිය විසින් නිකුත් නොකෙරේ. මේ කියන විදියට, සුනිල් සෙනෙවි අමාත්‍යවරයා සංදර්ශන සංවිධායකයන්ට ශබ්ද විකාශන බලපත්‍ර ලබාගැනීමේදී ඇතිවන ගැටලු විසඳාදීමට, එනම් රාත්‍රී 10න් පසුද සංගීත ඝෝෂාව විසුරුවා හැරීමට ශබ්ද විකාශන බලපත්‍ර නිකුත් කිරීමටද කැබිනට් අනුමැතිය ලබාගැනීමට නියමිතය.
‘ආශික් එදිරිව බන්දුල’ නම් (2007) ශ්‍රේෂ්ඨාධිකරණ නඩු තීන්දුව අනුව, රාත්‍රී 10 සිට උදේ 6 දක්වා, ශබ්ද විකාශන යන්ත්‍ර මගින් ශබ්දය විසිරවීම තහනම්ය. ඒ සඳහා ශබ්ද විකාශන යන්ත්‍ර බලපත්‍ර නිකුත් නොකළ යුතුය. ඊට බාහිරව විශේෂ ආගමික කටයුතු සහ වෙනත් විශේෂ උත්සව සඳහා බලපත්‍ර නිකුත් කිරීමට අවශ්‍ය නම්, ඒ අවට පරිශ්‍රවල සිටින පුද්ගලයන්ගේ අදහස් ලබාගෙන පමණක් ඒවා නිකුත් කළ යුතුය. එසේම, ශබ්ද විකාශන යන්ත්‍රවලින් නිකුත් වන ශබ්දය අදාළ පරිශ්‍රයෙන් ඔබ්බට නොයා යුතුය යන දැඩි කොන්දේසියට යටත්ව බලපත්‍ර නිකුත් කළ යුතුය. කොන්දේසිය කඩකරන විට අවවාද කිරීමකින් පසුවත්, බලපත්‍ර කොන්දේසිවලට පටහැනිව කටයුතු කරගෙන යන්නේ නම්, පොලිසිය ශබ්ද විකාශන උපකරණ අත්අඩංගුවට ගෙන රඳවා තබාගත යුතුය. මේ නඩු තීන්දුවේ විධිවිධාන පොලිස් නිලධාරීන්ට දැනුම් දීම සඳහා පොලිස්පතිවරයා විසින් අංක 2031/2007 දරන පොලිස්පති චක්‍රලේඛය නිකුත් කර තිබේ.
හැම ආණ්ඩුවක්ම පත්වු පසු, ඒ ආණ්ඩුව පත්කර ගැනීමට එකතු වුණු කලාකරුවෝ දේශපාලකයන් හමුවී එළිමහන් සංදර්ශනවල ශබ්ද විකාශන කාලය දික්කරන ලෙස ඉල්ලීම් කරති. කලාකරුවන් විසින් ජනාධිපති මහින්ද රාජපක්ෂ වෙත කරන ලද කරුණු දැක්වීම් අනුව, සති අන්තවල බලපත්‍ර කාලය දීර්ඝ කර දෙන ලෙස රජය ශ්‍රේෂ්ඨාධිකරණයෙන් ඉල්ලා සිටියේය. ඒ අනුව සිකුරාදා සහ සෙනසුරාදා දිනවල අලුයම 1ට සහ ඉරිදා දිනවල අලුයම 12.30ට සංගීත හා සංස්කෘතික සංදර්ශන අවසන් කළ යුතු බවට ශ්‍රේෂ්ඨාධිකරණය නියෝග කළේය. එහෙත්, නිකුත් වන ශබ්දය අදාළ පරිශ්‍රයෙන් ඔබ්බට නොයා යුතු බවට අධිකරණය පනවා තිබූ දැඩි කොන්දේසියේ කිසිදු වෙනසක් මෙහිදී සිදු නොකෙරිණ.
කලාකරුවන්ගේ මේ ඉල්ලීම් අනුව, සුනිල් සෙනෙවි ඇමතිවරයාට කිරීමට ඉතිරිව ඇත්තේ සතියේ අනෙක් දිනවලද රාත්‍රි කාලයේ, මේ ශබ්ද දූෂණය සඳහා අලුයම 12.30 දක්වා හෝ අලුයම 1 දක්වා කාලය වෙන් කරදීමයි. සිකුරාදා, සෙනසුරාදා හා ඉරිදා දිනවල පසුදින පහන්වන තුරුම කාලය දික්කර දීමයි. ලංකාවේ එළිමහන් ප්‍රසංගවලින් ජීවත් වන කලාකරුවන් හා ඒ ආශ්‍රිත සේවා සපයන්නන්ගේ මුළු සංඛ්‍යාව සැලකුවහොත්, ඔවුන්ට වඩා, එක් සංගීත සංදර්ශනයක් නිසා අවට ජීවත්වන ළදරුවන්, ළමාළපටින්, පාසල් දරුවන්, විභාගවලට පෙනීසිටින්නන්, වැඩිහිටියන්, මහලු වයසේ අය, ආබාධිතයන්, රෝගීන්, රැකියාවල නියුතු අය ආදි දහස් ගණනක් ශබ්ද දූෂණයට ගොදුරුවන බව අවිවාදිතය. ඔවුන් වෙනුවෙන් කතාකරන්නට කිසිවෙක් නැත.
සුනිල් සෙනෙවි සංස්කෘතික ඇමතිවරයා පසුගිය දිනෙක එකතුවුණු සිරස රූපවාහිනී වැඩසටහනක මාතෘකාව වුණේ, ‘උදාර සංස්කෘතික ජීවිතයක්, සහකම්පනීය ජනතාවක්’ යන්නය. ඔහුගේ ආණ්ඩුවේ උද්යෝග පාඨය වන්නේ, ‘පොහොසත් රටක්, ලස්සණ ජීවිතයක්’ යන්නයි. 2005 දී ඉන්දීය ශ්‍රේෂ්ඨාධිකරණය විසින් දෙන ලද කීර්තිමත් නඩු තීන්දුවකදී අගවිනිසුරු ලහෝටි කළ පහත සඳහන් ප්‍රකාශය අනුමත කරමින් අප ශ්‍රේෂ්ඨාධිකරණයද ඉහත කී නඩුවේදී උපුටා දක්වා ඇත. (උපුටා ගැනීම පෙබරවාරි 16 වැනිදා ආචාර්ය ජයම්පති වික්‍රමරත්න ‘ක්ලීන් ශ්‍රී ලංකා සහ ශබ්ද දූෂණය’ මැයෙන් අනිද්දාට ලියූ ලිපියෙනි.) :
“ඝෝෂාව හුදෙක් කරදරයකට වඩා වැඩි දෙයකි. එය මිනිසුන්ගේ සෞඛ්‍යයට සැබෑ සහ පවතින අනතුරකි. දිවා රාත්‍රී, නිවසේ, රැකියාවේ සහ ක්‍රීඩා කරන විට, ඝෝෂාව දැඩි කායික හා මානසික ආතතිය ඇති කරයි. මෙම ආතතියෙන් කිසිවෙක් නිදහස් නොවේ. ඝෝෂාව නොසලකා හැරීමෙන් අප ඝෝෂාවට හැඩගැසෙන බව පෙනෙන්නට තිබුණත්, ඇත්ත වශයෙන්ම, කන කිසි විටෙකත් නොවැසේ. ශරීරය නොනැවතී, සමහර විට අධික ආතතියකින්, ප්‍රතිචාර දක්වයි. ඝෝෂාව යනු වායුගෝලීය දූෂණ වර්ගයකි. ”
මේ අදහස, ‘උදාර සංස්කෘතික ජීවිතයකට හා සහකම්පනීය ජනතාවකට’ කෙසේ බලපානවාදැයි ඇමති සුනිල් සෙනෙවි වැනි වියතුකට පහසුවෙන් අවබෝධ වෙනවා ඇත.
අනිද්දා වට්සැප් සමුහයට එක්වීමට පහත යොමු භාවිතා කරන්න
Group 01- https://chat.whatsapp.com/FW9ZAqXBotT5vFHZoDCIg1
Group 02 – https://chat.whatsapp.com/KLYP9OhQfhlHubxPspW3J3
Group 03 – https://chat.whatsapp.com/L9NV2gK1MfO6lUCpCyUVTZ
අනිද්දා වට්සැප් චැනලයට එක්වීමට පහත යොමුව භාවිතා කරන්න
https://whatsapp.com/channel/0029Vb7PJ8nDeON9UrGsSx0C
අනිද්දා ෆේස්බුක් චැනලයට එක්වීමට පහත යොමුව භාවිතා කරන්න
https://www.messenger.com/channel/AniddaNews
