රජයේ මාධ්‍ය හමුවේදී කැබිනට් ප්‍රකාශකගෙන් ‘මල්ලෙ පොල්’ උත්තර
පෙබරවාරි 21 දා කොටහේනේදී සිදුවූ මිනීමැරුමට සැක පිට අත්අඩංගුවට ගත් පුද්ගලයන් දෙදෙනකු, පොලිසිය විසින් කොළඹ මෝදර කාක දූපතට ගෙනගොස් වෙඩි තබා ඝාතනය කරනු ලැබීමේ සිදුවීමට අදාළව ආණ්ඩුව නිශ්ශබ්ද ප්‍රතිපත්තියක් අනුගමනය කිරීමෙන්, එම පොලිස් මිනීමැරුම් සාධාරණය කිරීමක් ප්‍රදර්ශනය වෙයි.
කාක දූපතේ පාලු ස්ථානයකට, අලුයම ගෙනගොස් පොලිසිය විසින් සැකකරුවන් දෙදෙනා මරාදමනු ලැබීම ගැන පෙබරවාරි 26 වැනිදා පැවැත්වුණු රජයේ මාධ්‍ය හමුවේදී, ජනමාධ්‍යවේදීන් දිගින් දිගටම කළ ප්‍රශ්න කිරීම හමුවේ, කැබිනට් ප්‍රකාශක අමාත්‍ය නලින්ද ජයතිස්ස, ‘කොහෙද යන්නෙ? මල්ලෙ පොල්’ පන්නයේ උත්තර දෙනු දකින්නට හැකිවිය. ඔහු පිළිතුරු දුන්නේ, සැකකරුවන් දෙදෙනා මරාදැමීම ගැන නොව, සමස්තයක් ලෙස සංවිධානාත්මක අපරාධකරුවන් මර්දනය කිරීම ගැනය.
ජනමාධ්‍යවේදීන් කිහිප දෙනකුම, නිශ්චිතව මෙම පොලිස් ඝාතන ගැන ගන්නා පියවර මොනවාදැයි මාධ්‍ය ප්‍රකාශකවරයාගේත් ආණ්ඩුවේත් මතය විමසූ විට නලින්ද ජයතිස්ස ඇමතිවරයා දුන් පිළිතුරු මෙසේය.
‘මේ සමස්ත සිදුවීම් දාමය බරපතළ ලෙස අපි අරගෙන තියෙනවා. මේ සංවිධානාත්මක අපරාධ කල්ලිවල අය ඝාතනය වීමේ සිට මේකට සම්බන්ධ අය දක්වාම ඒ විමර්ශනවල බරපතළකම අපි අවබෝධ කරගෙන තියෙන්නේ. ඒ නිසා අපේ කැමැත්ත, ආණ්ඩුවේ කැමැත්ත තිබෙන්නේ මේ සියලු දෙනා අත්අඩංගුවට අරගෙන නීතිය හමුවට පමුණුවලා යුක්තිය පසිඳලන්න. ඒකට යම්කිසි තැනක යම් ක්‍රියාවලියක බාධාවක් වෙනවා නම් ආණ්ඩුවක් හැටියට අපි ඒ ගැනත් සැලකිලිමත් වෙනවා. මේ වෙලාවේදි මට සම්පූර්ණ සිදුවීම් දාමය සම්බන්ධයෙන් මෙතන විමර්ශන වාර්තාවක් නැති නිසා ඒ ගැන එකඟද නැද්ද කනගාටු වෙනවද නැද්ද කියන්න බෑ. තාම විමර්ශන අවසන් නෑනේ. කවුරුත් කලබල වෙන්න එපා. තව ගොඩක් තියෙනවා විමර්ශන කරගෙන යන්න. එතකොට මේ සිදුවීම් සියල්ල එළිදරව් වේවි. අන්න එතකොට කියන්න පුළුවන් අපි මොකටද කනගාටු වෙන්න ඕන සහ නොවෙන්න ඕන කියලා.’
ජනමාධ්‍යවේදීන්: මාධ්‍යවේදීන් දිගින් දිගටම ඔබෙන් ප්‍රශ්න ඇහුවේ සමස්ත සිදුවීම් දාමය ගැන නෙවෙයි. නිශ්චිතව අහන්නේ කොටහේනේ සිදුවීම ගැන. අත්අඩංගුවේ සිටින සැකකරුවන් ඝාතනය සම්බන්ධයෙන් රජයේ ප්‍රතිපත්තිය මොකක්ද?
ඇමති ජයතිස්ස: ජාතික ආරක්ෂාව සම්බන්ධයෙන් කතා කළේ එක සිදුවීමක් පදනම් කරගෙන නෙවෙයිනේ. පහුගිය කාලයේ ඇතිවුණු සිදුවීම් දාමයක් පදනම් කරගෙන. ඉතින් මම හිතන්නේ උත්තර දෙනකොටත් එක සිදුවීමක් විතරක් අරගෙන හරියන්නේ නැහැ, දාමයේ කොටසක් හැටියට තමයි ගන්න ඕනෑ. මේ සිදුවීමත් සිදුවීම් දාමයේ කොටසක් හැටියට අරගෙන අපි විමර්ශන කටයුතු කරගෙන යනවා. එතැනදී එන වාර්තා අනුව බලමු මොකක්ද අපේ ප්‍රතිචාරය කියලා.
ජනමාධ්‍යවේදීන්: ඔය කියන්නේ පාතාලය ගැනනේ. පොලිසියයි පාතාලයයි කියන්නේ දෙකක්නේ. අපි අවධානය යොමුකරන්නේ පොලිසියේ සිදුවීම ගැන. ආණ්ඩුව කියන දේ පොලිසිය අහන්නේ නැතිනම් මොකක්ද කරන්නේ කියන එකයි අහන්නේ?
ඇමති ජයතිස්ස: ඔබ දන්නවා විමර්ශන කටයුතුවලදී සක්‍රිය සේවයේ ඉන්න නිලධාරීන් සමහර කෙනෙක් අත්අඩංගුවට පත්වෙනවා. එක්කෝ මේ වෙඩික්කරුවන්ට අනුබල සපයලා. ඔත්තු සපයලා. එහෙම තැන්නම් මුදල් හුවමාරු කරලා. පාතාලය කියන එක වෙන්කරන්න බැරි තරමට තැන් තැන්වල අක්මුල් විහිදිලා තියෙන්නේ. අධිකරණයේදී අංක 9ට ගෙනා කෙනා 5ට ගියේ කොහොමද කියන එක දැන් විමර්ශන වාර්තා කැඳවලා තියෙන්නේ… ඒ නිසා මට හරියටම ඉර ගහලා කියන්න බැහැ මෙතනින් තමයි මේක අවසන් වෙන්නේ, මේ ඝාතනය මෙතැනින් ඉවරයි ආදි ලෙස කියන්න බැහැ, විමර්ශනයට අදාළව කටයුතු ගණනාවක් සිදුවෙමින් පවතින නිසා. මේක ජාලයක්. ජාලයේ සියලු දේවල් අනාවරණය කරගත්තාට පස්සේ අපට කියන්න පුළුවන් වුණේ මොකක්ද කියන එක.
මේ ආකාරයට නලින්ද ජයතිස්ස ඇමතිවරයා අසන ප්‍රශ්නවලට කොහේවත් යන පිළිතුරු දෙද්දී, ජනාධිපතිවරයා ඇතුළු රජයේ කිසිම ප්‍රකාශකයකු, පොලිසිය විසින් කරන ලද මනුෂ්‍ය ඝාතන දෙක ගැන අදහස් පළකරනු දකින්නට නොලැබිණ. ජාතික ජන බලවේගයේ මන්ත්‍රී ලක්මාලි හේමචන්ද්‍රද, 25වැනි අඟහරුවාදා ජාතික රූපවාහිනියේ ‘කරට කර’ වැඩසටහනේදී කීවේ, අපරාධකරුවන් වෙනුවෙන් පෙනීසිටින්නට රජය කැමැත්තක් නොදක්වන බවයි. පොලිසිය හා පොලිස් කොමිසම අතර තිබෙන ප්‍රශ්න ගැන පොලිස්පතිවරයා පසුගියදා කියා ඇති බැවින් ඒ සියල්ලේ එකතුවක් මෙතැන තිබෙන බවද ඇය කීවාය. එහෙත්, පොලිස් ඝාතන දෙක ගැන ආණ්ඩුවේ අදහස කුමක්දැයි අය කිසිවක් කීවේ නැත.
පසුගිය සතියේම රජයේ මාධ්‍ය සාකච්ඡාවට ආ වැඩබලන පොලිස්පති ප්‍රියන්ත වීරසූරිය මාධ්‍යවේදීන්ගේ ප්‍රශ්නවලට පිළිතුරු දෙමින් පැවසුවේ ‘නීතියේ හිදැස් වසන්නට පොලිසියට අනීතිකව කටයුතු කරන්නට සිදුවී ඇති බව’යි. ඔහු තවදුරටත් පැවසුවේ, සිදුවී ඇති සියලුම දේ නීතියේ ක්‍රියාදාමය තුළ සිදුවී ඇති බවයි.
ජාතික ජන බලවේගය ජනාධිපතිවරණයට හා මහමැතිවරණයට පෙර කීවේ රටේ නීතියේ පාලනය පිහිටුවීම තම වගකීම බවත්, නීතියට උඩින් කිසිවකු නැති බවත්ය. පාර්ලිමේන්තුව අමතා කළ සිය පළමු කතාවේදී ජනාධිපතිවරයා කීවේ, තමාද නීතියට යටත් බවයි.
එහෙත්, බැලූ බැල්මටම පොලිසිය කළ ඝාතන බව පෙනෙන මෙම පුද්ගලයන් දෙදෙනාගේ මරණ සම්බන්ධයෙන් මේ වන තුරු කිසිවකු අත්අඩංගුවට ගෙන නැත. එම ඝාතන පිළිබඳව පරීක්ෂණයක් කරන්නට ආණ්ඩුව මෙතෙක් කිසිදු පියවරක් ගෙන නැති අතර, වෙඩි තැබූ පොලිස් නිලධාරීන්ගේ වැඩ තහනමක්වත් සිදු කර නැත.
