ජාතික ජන බලවේග ආණ්ඩුවේ මේ වන විට ප්‍රකටව පෙනෙන ලක්ෂණයක් නම්, එය ක්‍රම ක්‍රමයෙන් ජනතාවට වගකීමේ හා පිළිතුරු දීමේ පුරුද්දෙන් වියෝ වෙමින් සිටින බවයි. ජාජබ ආණ්ඩුවේ අසීමාන්තික හිතවතුන් මේ ගැන තමන්ගේ ආණ්ඩුවට අනතුරු ඇඟවිය යුතු ය.
ලංකාවේ පසුගිය 76 වසර පුරා ම පැවැතුණේ විනාසකාරී පාලනයක් නම්, ඒ පාලන කාලය තුළ දක්නට ලැබුණු වැදගත් ලක්ෂණයක් වුණේ, වරින් වර පාලනය කළ දේශපාලන නායකයන්, පක්ෂවල නායකයන් හා ආණ්ඩුව සමග එකට වැඩ කළ රජයේ ඉහළ නිලධාරීන්, සිතාමතා ම මහජනතාවට වගඋත්තර කීම පැහැර හැරීමයි. ජනාධිපතිවරුන්ගේ සිට ඇමතිවරුන් දක්වා ම, මවා ගත් උද්දච්ඡභාවයක් ඒ කාලයේ දකින්නට ලැබුණු අතර, ජනතාව වෙතින් හෝ මාධ්‍ය වෙතින් නැගෙන ප්‍රශ්නවලට අහංකාර හා උද්දච්ඡ පිළිතුරු ලබාදීම ද ඒ කාලයේ යහමින් සිදුවිය. දශක හතක ලංකාවේ දේශපාලනය මහජනතාවට අරහං වීමට මේ දරුණු වගකීම් විරහිතභාවය ද විශාල දායකත්වයක් සැපයී ය.
ජාතික ජන බලවේගය බලයට පත්වන්නේ ඒ අතීත අත්දැකිම්වලින් උගෙන ගත් පාඩම් සහිතව ය. වෙනත් විදියකින් කියනවා නම්, රටේ විශාල බහුතරයක ජනතාව ජාජබ බලයට ගෙනෙන්නේ, පසුගිය කාලය පුරා ම තමන්ට දේශපාලන නායකයන්, රාජ්‍ය නායකයන් හා ඔවුන්ට හිතැති රජයේ නිලධාරීන් මහජනතාව එලෙස නොසලකා හැරීම නිසා හටගත් කෝපය ද නිසා ය.
ජාතික ජන බලවේගය බලයට පත්වුණේ, මහජනතාවට වග කියන ආණ්ඩුවක් පවත්වාගෙන යනවා ය කියන පොරොන්දුව සහිතව ය. එහෙත් දැන් දැන් පාර්ලිමේන්තුව තුළත්, අනෙකුත් මහජන අවකාශවලදීත් ජාජබ ඇමතිවරුන්, මන්ත්‍රීවරුන් මෙන්ම පක්ෂ නියෝජිතයන් ද හැසිරෙන ආකාරය එම පොරොන්දුවට විශාල ලෙස හානි කරයි.
කොළඹ මහේස්ත්‍රාත් අධිකරණය තුළ සංවිධානාත්මක අපරාධකරුවකු ඝාතනය කෙරුණු අවස්ථාවේ දී මහජන ආරක්ෂක නියෝජ්‍ය ඇමතිවරයා හැසිරුණු ආකාරය ළං වන්නේ, ජාජබ පොරොන්දු වුණු වගකීමක් සහිත පාලනයක ලක්ෂණයක් හැටියට ද, නැතිනම් මීට පෙර සියලුම ආණ්ඩුවල වගකිවයුත්තන් හැසිරුණු වගකීම් විරහිත ආකාරයට ද? පාර්ලිමේන්තුව තුළ දී ජාජබ ආණ්ඩුවේ මැති ඇමතිවරුන් හැසිරෙන්නේ ද ඒ ආකාරයට ම නොවේද?
විශාල මහජන සහයෝගයකින් ජාජප ප්‍රතිපත්ති ප්‍රකාශනය අනුමත වුණු බවත්, එම ප්‍රතිපත්ති ක්‍රියාත්මක කිරීමට ජාජබ ආණ්ඩුවට බලය පැවරුණු බවත් ඇත්ත ය. එහෙත්, ඒ ප්‍රතිපත්ති ක්‍රියාත්මක කිරීමේ දී ආණ්ඩුවක් හැම විට ම පාර්ශ්ව ගණනාවක විමංසනාක්ෂියට ලක් වී සිටින බව වැදගත් කාරණයකි. එක පැත්තකින් ඡන්දය දුන් හා නොදුන් මහජනතාව ය. තවත් අතකින් ඒ මහජනතාවට තොරතුරු ගෙනයන හා, ඔවුන් සහ ආණ්ඩුව අතර සම්බන්ධතාව හදන ජනමාධ්‍ය ය. ඊළඟට ඒ මහජනතාවගේ ම කොටසක් නියෝජනය කරන ආණ්ඩු පක්ෂය නොවන අනෙක් දේශපාලන පක්ෂවල හා සංවිධානවල සාමාජිකයන් ය. මේ කිසිවකුට උත්තර දෙන්නට බැහැ යැයි කියන්නට ප්‍රජාතන්ත්‍රවාදී ආණ්ඩුවකට නොහැකි ය. එපමණක් නොවේ, ඒ කවරකුට වුවත්, පිළිතුරු දෙන්නට ආණ්ඩුවක සාමාජිකයෝ බැඳී සිටිති. ආණ්ඩුව කියන්නේ පක්ෂයක හෝ දේශපාලන නායකයන්ගේ දේපළක් නොව, මහජනතාවගේ වේදිකාවක් වන නිසාය.
76 වසරක ව්‍යසනයකින් රටය ගලවාගැනීමට යන නිසා ආණ්ඩුවේ ඇත්තන්ට බොහෝ වැඩ තිබෙන බව සැබෑ ය. එහෙත් ඒ කිසිවකින් ඔවුන් ඇති වගඋත්තර කීමේ වගකීම අත් නොහැරේ. ‘මේ ගැන ඔබ කියන්නේ කුමක්දැයි’ කවරකු හෝ අසන විට, අසන්නා දෙස නොව ප්‍රශ්නය දෙස බැලීම ආණ්ඩුවක වගකීමයි. ‘ඔයාට උත්තර දෙන්නේ නැහැ, ඔයාට කියන්නේ නැහැ, දැන් කියන්න බැහැ, ඔයා ඕක අහන්නේ ඇයි කියලා අපි දන්නවා, ඔයා කවුද කියලා අපි දන්නවා’ වැනි පිළිතුරු එවැනි ප්‍රශ්නයකට ලැබෙතොත් එයින් පැහැදිලි වන්නේ පිළිතුරු දෙන්නන්ගේ ළාමක, නොදැමුණුභාවය මිස පරිණත, සන්සුන් හා ඉවසනසුලු හැසිරීමක ලක්ෂණ නොවේ.
මේ කාරණාව ගැන සමාජයේ අප්‍රසන්නකමක් ලියලමින් පවතින බව ආණ්ඩුවේ බලය තිබෙන්නවුන්ට දැනටමත් තේරී තිබිය යුතු ය. නැතිනම්, ආණ්ඩුව රැකගැනීමේ අභිලාෂයෙන් වැඩ කරන, දැනුවත් සමාජය ආණ්ඩුවට තීරණාත්මක ලෙස පෙන්වා දිය යුතු ය.
අනිද්දා වට්සැප් සමුහයට එක්වීමට පහත යොමු භාවිතා කරන්න
Group 01- https://chat.whatsapp.com/FW9ZAqXBotT5vFHZoDCIg1
Group 02 – https://chat.whatsapp.com/KLYP9OhQfhlHubxPspW3J3
Group 03 – https://chat.whatsapp.com/L9NV2gK1MfO6lUCpCyUVTZ
අනිද්දා වට්සැප් චැනලයට එක්වීමට පහත යොමුව භාවිතා කරන්න
https://whatsapp.com/channel/0029Vb7PJ8nDeON9UrGsSx0C
අනිද්දා ෆේස්බුක් චැනලයට එක්වීමට පහත යොමුව භාවිතා කරන්න
https://www.messenger.com/channel/AniddaNews
