ගනේමුල්ල සංජීව ඝාතනය : අත්අඩංගුවට පත්වුණේ වෙඩික්කරුමද?

• සීසීටීවී මගින් කී සැකකරුත් සැඟවිලා
• ඔහුත් හමුදාවෙන් පලා ආ අයෙක්
  ගනේමුල්ල සංජීව ඝාතනය කළ පෙබරවාරි 19ට පසු දින එනම් පෙබරවාරි 20 දින කොළඹ මහේස්ත්‍රාත් අධිකරණයට එම ඝාතනයේ වෙඩික්කරු සම්බන්ධයෙන් අපූරු මෝසමක් ඉදිරිපත් වී තිබුණි. ඒ කොළඹ මහේස්ත්‍රාත් අධිකරණයේ සීසීටීවී දර්ශන ඇසුරින් එම ඝාතනයේ වෙඩික්කරු ලෙස පොලීසිය රටට කී මොහොමඩ් අසාම් ෂෙරිෆ්ඩීන් යනු සිය සොහොයුරා බවත්, එහෙත් එම ඝාතනය සම්බන්ධයෙන් පුත්තලම පාලාවිය ප්‍රදේශයේදී ඇත්අඩංගුවට ගෙන ඇති සැකකරු සිය සොහොයුරා නොවන බවත්ය. සිය සොහොයුරා සම්බන්ධයෙන් වන පොලීසියේ එම නිවේදන නිසා සිය පවුලේ සාමාජිකයන් අපහසුතාවට පත්වී ඇති බවත්, ඒ නිසා සුදුසු නියෝගයක් ලබාදෙන ලෙසත් සීසීටීවී දර්ශනවල සිටින සැකකරුගේ සොහොයුරා වෙනුවෙන් පෙනීසිටි නීතිඥයින් අධිකරණයෙන් ඉල්ලා තිබුණි. එම නිවසේ තිබූ සිය සොහොයුරාට අයත් යතුරු පැදියක් ආරක්ෂක අංශ රැගෙන ගිය බවද වැඩිදුරටත් කියා තිබුණි. ඒ වනවිටත් අත්අඩංගුවට ගත් වෙඩික්කරු යැයි කියන සැකකරු අධිකරණයට ඉදිරිපත් කර නැති නිසා සැකකරු අධිකරණයට ඉදිරිපත් කරන අවස්ථාවේදී එම කරුණු ඉදිරිපත් කරන ලෙස අධිකරණය දන්වා තිබුණි.

  එදින වෙඩික්කරු යැයි කියන අත්අඩංගුවට ගත් සැකකරු අධිකරණයට ඉදිරිපත් කළේ නැති අතර පොලීසිය අධිකරණයට දැනුම් දුන්නේ සැකකරු දින 90ක රැඳවුම් නියෝගයක් යටතේ කොළඹ අපරාධ කොට්ඨාසයේ රඳවා ප්‍රශ්න කරන බවයි.

  එම සිදුවීමට අදාළ ගනේමුල්ල සංජීව ඝාතනයේ සැකකරු පිළිබඳ සැකය යළි පෙබරවාරි 25 වැනිදා මතු වී තිබුණි. ඒ පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි බුද්ධික මනතුංග පැවැත්වූ ප්‍රවෘත්ති සාකච්ඡාවේදීය. 

වෙඩි ප්‍රහාරය එල්ල කළේ අත්අඩංගුවට ගත් සැකකරුද යන්න ප්‍රශ්නයක් ඇති බැවින් අත්අඩංගුවට ගෙන ඇත්තේ නියම සැකකරුද යන්න එහිදී විමසා ඇත. සැකකරු ගිනි අවිය දමා යෑම, සැකකරුගේ ඇඟිලි සලකුණු රැගෙන තිබේද හා ඒ අනුව සැකකරු වෙඩික්කරු බවට සියලු තොරතුරු තහවුරු කරගෙන තිබේද යන්න විමසා තිබේ.

පොලිස් මාධ්‍ය ප්‍රකාශකගේ පිළිතුර වී ඇත්තේ සැකකරුගේ දූරකථනය, ඝාතනය අවස්ථාවේ ඔහු ඇඳ සිටි ඇඳුම් හා සැකකරු රාත්‍රී කාලයේ නවාතැන් ගත් හෝටල ආදියෙන් ඒ පිළිබඳ ප්‍රමාණවත් සාක්ෂි ඇති බවයි. එමෙන්ම රස පරීක්ෂක මගින් සීසීටීවී දර්ශනවල ඇති මුහුණ හා අත්අඩංගුවේ පසුවන සැකකරුගේ මුහුණ තහවුරු කර ගැනීම, ඇඟිලි සලකුණු හඳුනා ගැනීම හා ඩීඑන්ඒ තහවුරු කර ගැනීම මගින් එම කටයුතු කරන බවද ඔහු කියා ඇත. සැකකරු සම්බන්ධයෙන් විශේෂඥයන්ගේ මත ලබාගන්නා බවද ඔහු කියා ඇත.

ඇඟිලි සලකුණු නොගැළපුණොත් සැකකරු නිදහස් වෙනවා නේද යන්න තවදුරටත් විමසා ඇති අතර පොලිස් මාධ්‍ය ප්‍රකාශකගේ පිළිතුර වී ඇත්තේ එක සාක්ෂියක් මත පමණක් එය තීරණය නොවන බවත්, අධිකරණය එය තීරණය කරනු ලබන බවත්ය. එමෙන්ම වෙඩික්කරු අත්අඩංගුවට ගත් පුද්ගලයා බවට දැනට විමර්ශන නිලධාරීන් සෑහීමකට පත්වී ඇති බවත්ය.
ගනේමුල්ල සංජීව ඝාතනයේ සැකකාරිය වන පිංපුර දේවගේ ඉෂාරා සෙව්වන්දි රටෙන් පැනගොස් ද යන්න විමසීමේදී පොලිස් මාධ්‍ය ප්‍රකාශක මනතුංග පවසා ඇත්තේ ඇය රට තුළ සිටින බවයි. ඇය නීත්‍යනුකූල ක්‍රමවේදයකින් රටෙන් පිටවීමට ගන්නා උත්සාහයක් පිළිබඳ විමසීමේදී ඔහු පවසා ඇත්තේ එම සියලු ක්‍රම වැළැක්වීමට පියවර ගෙන ඇති බවයි.

පොලීසිය මේ වනවිට ප්‍රකාශ කර ඇති ආකාරයට ගනේමුල්ල සංජීව ඝාතනය සම්බන්ධයෙන් වෙඩික්කරු ලෙස දැනට සැලකෙන දින 90ක රැඳවුම් නියෝග මත රඳවා ප්‍රශ්න කරන මහරගම, දඹහේන පාරේ පදිංචි 27 හැවිරිදි සමිදු දිල්ෂාන් පියුමංග කඳනාරච්චිට අමතරව තවත් කිහිප දෙනෙකු අත්අඩංගුවට ගෙන ඇත. ඉන් එක් අයෙකු වන්නේ කරනන්වාරගේ මහේෂ් සම්පත් ප්‍රියදර්ශන නමැති ප්‍රධාන සැකකරු අත්අඩංගුවට ගන්නා අවස්ථාවේ ගමන් කරමින් සිටි වෑන්රථයේ රියැදුරුය. අවුරුදු 44ක් වන ඔහුගේ පදිංචිය ලෙස සඳහන් වන්නේ ගොඩැල්ලහේන, මිල්ලෑවයි. ඔහු ද දින 90ක රැඳවුම් නියෝග යටතේ රඳවා තිබේ.
එම වෑන්රථය සන්තකයේ තිබී ඇති කුලසෙවණ පාර, කොට්ටාව, පන්නිපිටිය ලිපිනයේ පදිංචි අතුරුගිරිය පොලිස් ස්ථානයේ කොස්තාපල්වරයෙකු වන 37 හැවිරිදි සෙන්කොඩආරච්චිගේ හසිත රොෂාන් අත්අඩංගුවට ගෙන ඇති අතර වෑන්රථයේ චැසි අංකය, එංජින් අංකය සහ අංක තහඩු ව්‍යාජ බවට තහවුරු වීම ඊට හේතුය. ඔහුද මාර්තු 07 දක්වා රක්ෂිත බන්ධනාගාරගත කර ඇත.

අත්අඩංගුවට ගෙන ඇති තවත් සැකකරුවන් දෙදෙනෙකු වන්නේ දැනට අත්අඩංගුවට ගැනීමට නොහැකි වී සිටින ප්‍රධාන සැකකාරිය වන මීගමුව පාර, ජය මාවත, කටුවැල්ලේගම පදිංචි 25 හැවිරිදි පිංපුර දේවගේ ඉෂාරා සෙව්වන්දිගේ මව හා සොහොයුරායි. අවුරුදු 48ක් වන සේසත්පුර දේවගේ සමන්ති හා අවුරුදු 23 ක් වන පිංපුර දේවගේ චමිදු තිවංක වීරසිංහ වන ඔවුන්ට ඇති චෝදනාව වන්නේ මනුෂ්‍ය ඝාතනය සම්බන්ධයෙන් දැනීමක් තිබියදී ඒ සම්බන්ධව තොරතුරු වසන් කර අපරාධයට ආධාර අනුබල දීම යන්නයි. ඝාතනයට පෙර හා පසු ඊට අදාළ තොරතුරු දූරකථන පණිවිඩ මගින් ඉෂාරා සෙව්වන්දි සිය සොහොයුරාට ලබාදී ඇති බවත්, මවගේ බැංකු ගිණුමට ඇය මුදල් බැරකර ඇති බවත් ඒ සම්බන්ධයෙන් පොලීසිය ප්‍රකාශයට පත්කර ඇති තොරතුරුය.

ඊට අමතරව සැකකාරිය සමඟ දූරකථනයෙන් සම්බන්ධතා පැවැත් වූයේ යැයි 26 හැවිරිදි ඇතුගලගේ ලහිරු ප්‍රසන්න ඇතුගල නම් වේපත්අංග, පාදෙණිය පදිංචි මීගමුව අපරාධ කොට්ඨාස විමර්ශන කාර්යාංශයේ පොලිස් කොස්තාපල් අත්අඩංගුවට ගෙන ඇති අතර ඔහු මාර්තු 07 දක්වා රක්ෂිත බන්ධනාගාරගත කර ඇත.

තම්මිට, මාකවිට ගම්පහ පදිංචි 43 හැවිරිදි කුමරසරලාගේ දොන් ජනක උදයකුමාර අත්අඩංගුවට ගෙන ඇත්තේ වෙඩික්කරු කාර්රථයේ රැගෙන ආ රියැදුරු වශයෙන් හා අවි ආයුධ ලබාදීම සම්බන්ධයෙන් වන අතර ඔහුද මාර්තු 07 දක්වා රක්ෂිත බන්ධනාගාරගත කර ඇත.

මල්වත්ත පාර, අස්ගිරිය, ගම්පහ ලිපිනයැති 22 හැවිරිදි හොරණෑකාරගේ දමිඳු ලක්ෂාන් අත්අඩංගුවට ගෙන ඇත්තේ අපරාධය සඳහා යොදාගත් ගිනි අවිය සන්තකයේ තබාගෙන සිට අපරාධයට පෙර දින වෙඩික්කරුට ලැබීමට සලස්වා අපරාධයට ආධාර අනුබල දීම සම්බන්ධයෙනි.

අස්ගිරිවල්පොල, උඩුගම්පොල ලිපිනයැති 25 හැවිරිදි පුල්ලේපෙරුම ආරච්චිගේ දමිත් අංජන නයනජිත් හා ඔහුගේ සොහොයුරු වන 19 හැවිරිදි පුල්ලේපෙරුම ආරච්චිගේ චමොත් ගිම්හාන අත්අඩංගුවට ගෙන ඇත්තේ අපරාධයෙන් පසු වෙඩික්කරු සහ සැකකාරිය ත්‍රීරෝද රථයකින් ප්‍රවාහනය කර අපරාධයට ආධාර අනුබල දීම සම්බන්ධයෙනි.

මීට අමතරව වෙඩික්කරුගේ පෙම්වතිය යැයි කියනු ලැබූ තැනැත්තියක මහරගම ප්‍රදේශයෙන් අත්අඩංගුවට ගනු ලැබුයේ ඔහු සමඟ විදේශගත වීමට සූදානම්ව සිටියේ යැයි කියමින් වන අතර පසුව ඇය නිදහස් කරනු ලැබුවාය. ඇය ගැන වැඩිදුරටත් වාර්තා වූ තොරතුර වූයේ සම්බාහන ආයතනයක සේවිකාවක බවත්, සැකකාර වෙඩික්කරු එහි සේවය ලබාගැනීමට කිහිප වරක් පැමිණ ඇති බවත්ය.

මේ අනුව පෙනෙන්නේ වෙඩික්කරු යැයි කියන පුද්ගලයා හැර ඒ සම්බන්ධයෙන් අත්අඩංගුවට ගෙන ඇති සෙසු පුද්ගලයන් එම අපරාධයට සෘජුවම සම්බන්ධ පුද්ගලයන් නොවන බවයි. එම අපරාධයට සෘජුවම සම්බන්ධ යැයි සැකකරන හා දැනට රට තුළ සිටිනවා යැයි පොලීසිය පවසන පිංපුර දේවගේ ඉෂාරා සෙව්වන්දි පවා මෙම සටහන ලියන මොහොත වනවිටත් පොලීසියට අත්අඩංගුවට ගැනීමට නොහැකි වී තිබේ. ඇය ගැන තොරතුරකට මුදල් තෑගිද පොලීසිය නිවේදනය කර ඇත.

ගනේමුල්ල සංජීව ඝාතනයෙන් පසු මහේස්ත්‍රාත් අධිකරණයේ සීසීටීවී දර්ශන ඇසුරෙන් සැකකරුවන් හඳුනා ගැනීම, සැකකාර වෙඩික්කරු පොලීසිය අත්අඩංගුවට ගැනීම, ඔහු කළැයි කියන පාපොච්චාරණ සිට මේ දක්වා මෙම සිදුවීම සම්බන්ධයෙන් පොලීසිය පාර්ශ්වයෙන් ප්‍රකාශ කර ඇති දේවල් බැලූ විට එය ත්‍රාසජනක පිටපතක් බව පෙනේ. එහෙත් එම පිටපතේ සැක උපදවන අවස්ථා ගණනාවක්ම තිබේ.

සීසීටීවී දර්ශන අනුව මුලින්ම පොලීසිය කියන්නේ වෙඩික්කරු මොහොමඩ් අසාම් ෂෙරිෆ්ඩීන් බවයි. පොලීසිය එය නිකම් කියූවක් වන්නට බැරිය. මන්ද මෙවැනි ආන්දෝලනාත්මක ඝාතනයකදී හුදු අනුමානයක් ප්‍රසිද්ධියේ ප්‍රකාශ කරන්නට තරම් පොලීසිය වගකීම් විරහිත වේ යැයි සිතිය නොහැකි නිසාය. එමෙන්ම වෙඩික්කරුගේ සහායිකාව පිංපුර දේවගේ ඉෂාරා සෙව්වන්දිගේ බවද පොලීසිය කියයි. එය තවමත් එසේම වන අතර එය වෙනස් කර නැත. එහෙත් මොහොමඩ් අසාම් ෂෙරිෆ්ඩීන් යන සැකකරු වෙනස් වී දැන් එම තැනට සමිඳු දිල්ෂාන් පියුමංග කඳනාරච්චි නම් අත්අඩංගුවේ පසුවන සැකකාර වෙඩික්කරු පැමිණ ඇත. ඔහු අත්අඩංගුවට ගත්තේ යැයි කියන අවස්ථාවේදී (එය ලැබුණ ඔත්තුවක් මත අත්අඩංගුවට ගැනීමක් යැයි කියනු ලබයි) මොහොමඩ් අසාම් ෂෙරිෆ්ඩීන් යනුවෙන් ඔහු හඳුන්වා ගත් බවක් වාර්තා වන්නේ නැත. ඔහු කියා ඇතැයි වාර්තා වන්නේ නීතිඥයෙකු බව පමණය. ඒ සඳහා ඉදිරිපත් කර ඇති ව්‍යාජ නීතිඥ හැඳුනුම්පතේ ඇත්තේ කොඩිකාරගේ කසුන් ප්‍රභාත් නිශ්ශංක යන නමය.

මොහොමඩ් අසාම් ෂෙරිෆ්ඩීන් යන නම භාවිත කළේ නම් ඊට අදාල ව්‍යාජ හැඳුනුම්පතක් ඔහු සතුව තිබිය යුතුය. නීතිඥ හැඳුනුම්පත සමඟ සමාන නොවන වෙනත් නමක් ඔහු භාවිත කළේ යැයි ඒ අනුව සිතිය නොහැකිය. එහෙත් ඔහු නීතිඥයෙකු බව කී විට පොලිස් විශේෂ කාර්ය බලකායේ සාමාජිකයන් ඔහුට අපරාධ නඩු විධාන සංග්‍රහයේ වගන්තියක් කියන ලෙස කී බව හා ඊට ඔහු අසමත් වුණ බව කීම නම් හාස්‍යජනකය. තමා නීතිඥයෙකු බව කියන කිසිවකුගෙන් පොලීසිය එසේ අසාවි යැයි සිතිය නොහැකි අතර විශේෂයෙන් අධිකරණ රාජකාරි නොකරන ඒ පිළිබඳ දැනුමක් ඇතැයි සිතිය නොහැකි පොලිස් විශේෂ කාර්ය බලකායේ සාමාජිකයන් එසේ අසාවි යැයි සිතිය නොහැකිය. (ඔහු අත්අඩංගුවට ගත් අවස්ථාවේ ඡායාරූප මගින් පෙනෙන්නේ සුහද බාරවීමක ස්වරූපයක්ය)

කෙසේ වුවද පෙබරවාරි 19 රාත්‍රී පොලිස් මාධ්‍ය ප්‍රකාශක පවත්වන ලද මාධ්‍ය සාකච්ඡාව ඇසුරින් නිකුත් කළ නිවේදනයේ සඳහන් වූයේ, ‘මෙම සැකකරු නම් කිහිපයකින් පෙනී සිටි පුද්ගලයෙකු බවට මේ වනවිට පෙනී ගොස් තිබෙන අතර ඔහු සතුව හැඳුනුම්පත් කිහිපයක් තිබී ඇත. සැකකරු සතුව නීතිඥවරයෙකු වශයෙන් නීතිඥ හැඳුනුම්පතක් ද තිබී ඇත. මොහු පළමු අවස්ථාවේදී මොහොමඩ් අසාම් ෂෙරිෆ්ඩීන් යන නමින්ද, ඉන්පසු සමිඳු දිල්ෂාන් පියුමංග කඳනාරච්චි යන නමින්ද ඔහු විසින් සකස් කරගෙන තිබූ නීතිඥ හැඳුනුම්පතෙහි කොඩිකාරගේ කසුන් ප්‍රභාත් නිශ්ශංක යන නමින්ද පෙනී සිට ඇත.’

‘ඒ අනුව මෙම පුද්ගලයා සම්බන්ධයෙන් ඉදිරි විමර්ශනවලින් අනතුරුව මොහුගේ සැබෑ තොරතුරු හා මොහු සම්බන්ධ වී තිබෙන අපරාධ එමෙන්ම මෙම අපරාධය සිදුකිරීම සම්බන්ධ ඔහුට ආධාර අනුබල දුන් අයවළුන්, මෙම කුමන්ත්‍රණය සම්බන්ධ සියලු තොරතුරු විමර්ශනවලින් අනතුරුව අනාවරණය කර ගැනීමට හැකි වනු ඇත. මේ සම්බන්ධව ඉදිරි විමර්ශන කටයුතු කොළඹ අපරාධ කොට්ඨාසය මගින් සිදු කිරීමට නියමිතය.’

‘මෙම අපරාධයේදී ගරු අධිකරණය තුළ සවිකර තිබූ සීසීටීවී දර්ශන ආශ්‍රයෙන් මොහුගේ ඡායාරූප හා මොහුත් සමඟ මෙම අපරාධයට සම්බන්ධ වූ කාන්තාව හඳුනා ගැනීමක් සිදුකරන ලදි.’ යනුවෙන්ය.

සැකකාර වෙඩික්කරු මුහුදු මාර්ගයෙන් රටෙන් පලා යෑමට නම් කල්පිටිය ප්‍රදේශයට ගියේ ඔහු කල්පිටියේදී බාර ගන්නට හා රටෙන් පිට කරන්නට කිසිවකු සිටිය යුතුය. ඒ සම්බන්ධව සැකකරු දැන සිටිය යුතුය. එහෙත් එම වැදගත් කරුණ සම්බන්ධයෙන් නම් මෙතෙක් අවධානය යොමු වී ඇති බවක් වාර්තා වන්නේ නැත. මන්ද ඒ මගින් මෙම ඝාතනයේ වැදගත් සැකකරුවන් හඳුනාගත හැකි නිසාය.

ඝාතනයෙන් පසු පලා යන්නට වාහනයක් ඇතැයි කීවද එසේ වාහනයක් නොතිබූ බවද, ඒ නිසා දූරකථන යෙදවුමක් මාර්ගයෙන් ත්‍රීවීල් රථයක් ගෙන්වාගෙන මීගමුව ප්‍රදේශයට සැකකරු ගිය බවද කියා ඇත. විශේෂ අවධානයක් යොමු වන මෙවැනි ඝාතනයක් සිදුකර යෙදවුමක් මාර්ගයෙන් වාහනයක් ලැබෙන තුරු උසාවිය අවට රැඳෙමින් සැබෑ ඝාතකයකු අවදානමක් ගන්නේ නැත. එවැන්නකු බලන්නේ ඉක්මණින්ම එතැනින් පිට වන්නටය. ඔහු ඇත්තටම ත්‍රීවීල් රථයේ ගියේ යෙදවුමක් මගින් ඇණවුම් කර නම් එය සැකකරුගේ දූරකථනයෙන් සොයා ගත හැකි අතර ත්‍රීවීල රියැදුරාගෙන් එම ගමන පිළිබඳ තවදුරටත් විස්තර දැනගත හැකිය. එහෙත් එවැන්නක්ද තවම සිදුවී නැත. මේ සම්බන්ධයෙන් එක් අවස්ථාවක කීවේ සැකකරු හා සැකකාරිය මීගමුවට යන අතරතුර ඇඳුම් සාප්පුවකින් ඇඳුම් මිලදී ගෙන ඇති බවය. තවත් අවස්ථාවක කීවේ නුගේගොඩ ප්‍රදේශයෙන් ඇඳුම් ගත් බවය. එවැනි සාප්පුවල සීසීටීවී ඇති බැවින් එයද පහසුවෙන්ම හඳුනාගත හැකිය. එවැන්නක්ද සිදුවී නැත. මීගමුවට ගොස් ඇත්තේ අධිවේගී මාර්ගයෙන් බවද තවත් අවස්ථාවක කිවේය. සැකකරු පමණක් තනිව ගොස් ඇති බවද කීවේය. ත්‍රීවීල්වලට අධිවේගී මාර්ගයේ ගමන් කරන්නට බැරි බව නම් කවුරුත් දන්නා කරුණකි.

අධිකරණයෙන් එළියට ආ පසු පලා යෑමට වාහනයක් නොදුන් පිරිස විශ්වාස කරමින් සැකකරු මීගමුවට ගියේ කවුරු විශ්වාස කර ද යන ප්‍රශ්නයද පැනනඟින අතර ඔහු සමඟම ඔහු පසුපසින් අධිකරණයෙන් පිටතට එන සැකකාරිය ඉන්පසු ගියේ කෙසේද යන්නද ප්‍රශ්නයකි. එසේම ඔහු සමඟ කොළඹ සිට නොගොස් ඇය මීගමුවේදී ඔහුට හමුවීම ද ප්‍රශ්නයකි. රටෙන් පලා යන්නට ඔහු සමඟ කල්පිටියට නොගොස් ඇය රෑඳීසිටීමද තවදුරටත් ප්‍රශ්නයකි. රුපියල් කෝටි එකහමාරක ඝාතන කොන්ත්‍රාත්තුවක් රුපියල් ලක්ෂ දෙකක මූලික ගෙවීමකට සිදු කිරීමද ප්‍රශ්නයකි.

සැකකරුට එදින ඝාතනය සඳහා අවශ්‍ය ගිනි අවිය හා නීතිඥ ඇඳුම ඊට පෙර දිනයක ඔහු හා සැකකාරිය ලැගුම් ගෙන සිටි හෝටලයට ගෙනැවිත් දුන් බව කියා ඇති අතර බාහිරින් ගෙනැත් දෙන ඇඳුමක් හරියටම සැකකරුට හරියන්නේ කෙසේද යන්නද ප්‍රශ්නයකි. එසේම පෙර පුහුණු වීම් සඳහා මීට පෙර අවස්ථාවල අධිකරණයට ඔවුන් ගියේ නීතිඥ ඇඳුම් නැතිවද යන ප්‍රශ්නයද පැනනඟී.

සැකකරු හා සැකකාරිය මීගමුවේදී දෙවන වර ගිය ත්‍රීවීල් රථය ඇතුළු ඉන්පසු කියන විස්තර සැබෑ විය හැකිය. එසේම එම අවස්ථාවන්ට අදාළව අත්අඩංගුවට ගෙන ඇති පුද්ගලයන් ඔවුන් සමඟ ගිය පුද්ගලයා ගැන හැර වෙඩික්කරු කවුද කියා ඇත්තටම දන්නේ නැතිව ඇත. එහෙත් මේ කිසිවක් පොලීසියට වැදගත් වී නැති බවද පෙනේ. මන්ද ආන්දෝලනාත්මක ඝාතනයක් සම්බන්ධයෙන් වගකීම බාරගත් අයෙකු දැන් පොලීසිය බාරයේ සිටින නිසාය. පොලීසියට ප්‍රශ්නයක් පැනනඟින්නේ යම් ඝාතනයක් සම්බන්ධයෙන් සැකකරුවෙකු නොසිටීමේ තත්වයකදී පමණය.

කොටින්ම කිවහොත් ජනවාරි මාසයේ මුල සිදුවූ ගල්කිස්ස බඩෝවිට ද්විත්ව ඝාතනයේ වගකීමද මෙම සැකකරු දැන් බාරගෙන තිබෙන බව පොලීසිය කියා ඇත. ඒ නිසා එම ඝාතන සම්බන්ධයෙන් පොලීසියේ සැකය යොමු වූ පිරිස අවධානයෙන් ඉවත් කරන්නට පොලීසියට හැකිය. සීසීටීවී දර්ශන අනුව බඩෝවිට ඝාතනය සඳහාා යතුරු පැදියකින් එන්නේ දෙදෙනෙකි. එම ඝාතනයේ වගකීම මෙම සැකකරු බාර ගන්නේ නම් යතුරු පැදියේ ගිය අනෙක් පුද්ගලයා කවුදැයි දැනගෙන මේ වනවිට පොලීසිය ඔහු අත්අඩංගුවට ගෙන තිබිය යුතුය. එයද සිදුවී නැත.

ඒ කෙසේ වුවද ගනේමුල්ල සංජීව ඝාතනයෙන් පසු වෙඩික්කරු දමා ගිය ගිනිඅවියේ ඇති ඇඟිලි සලකුණු සන්සන්දනය කිරීමද, සීටීටීවී දර්ශනවල ඇති වෙඩික්කරුගේ මුහුණ හා අත්අඩංගුවේ පසුවන සැකකරුගේ මුහුණ රස පරීක්ෂක මගින් සන්සන්දනය කිරීමද සැක දුරු කිරීම සඳහා අත්‍යවශ්‍ය වනු ඇත. ඒ වෙඩි තැබීම සඳහා අධිකරණයට පැමිණීමට පෙර පසුබිම් විස්තරත්, වෙඩි තැබීමෙන් පසු විස්තරත්, සැකකරු අත්අඩංගුවට ගැනීම හා ඉන්පසු විස්තරත් අතර සැක උපදවන නොගැළපීමක් පෙන්නුම් කරන නිසාය.

සීටීටීවී දර්ශන ආශ්‍රයෙන් පොලීසිය මුලින් කී සැකකරු වන මොහොමඩ් අසාම් ෂෙරිෆ්ඩීන් යුද හමුදා කොමාන්ඩෝ පුහුණුවට ගොස් එම පුහුණුව සාර්ථකව නිම කරන්නට බැරි වීම නිසා යුද හමුදාවේ පොදු සේවා බලකායට අනුයුක්තව සේවය කර ඉන් පලාගොස් ඇති අයෙකි. ඔහුට එරෙහිව අපරාධ සම්බන්ධයෙන් අධිකරණ කිහිපයක නඩු පවා ඇති බවට වාර්තා වේ. ඔහුගේ පවුලේ සාමාජිකයන් අධිකරණයට දැන් වූ ආකාරයට ඔහුද මේ වනවිට අතුරුදහන්ව සිටියි. සැකකාර වෙඩික්කරු ඔහු නොවේ නම් සැඟවී සිටීමේ අවශ්‍යතාවක් ඔහුට පැන නඟින්නේ නැත. පොලීසිය ඔහුගේ නිවසට ගොස් ඔහුගේ යතුරු පැදිය රැගෙන ගියේ ඇයිද යන්නද තවත් ප්‍රශ්නයකි.

අත්අඩංගුවේ පසුවන සැකකාර වෙඩික්කරු වන සමිඳු දිල්ෂාන් පියුමංග කඳනාරච්චි ද යුද හමුදාවේ කොමාන්ඩෝ පුහුණුව ලබා එහි සේවය කර ඉන් පලාගොස් පසුව පොදු සමාව යටතේ ඉන් ඉවත් වූ අයෙකි.

ඒ අනුව මෙම දෙදෙනාම ගිනි අවි පිළිබඳ පුහුණුව ලැබූ හිටපු යුද හමුදා සාමාජිකයන් බව පැහැදිලිය. ඒ නිසා සමානකම් ඇතැයි උපකල්පනය කළ හැකි ඔවුන් දෙදෙනා පිළිබඳ ගැටලුව නිරාකරණය කර ගැනීම අත්‍යවශ්‍යය. ඒ ගනේමුල්ල සංජීව ඝාතනයේ සැබෑ වෙඩික්කරුට දඬුවම් ලබාදීම සඳහාය.

මන්ද ඇඟිලි සලකුණු වැනි අත්‍යවශ්‍ය පරිවේෂණීය සාක්ෂි නොගැළපීම නිසා සැකකරුවන් නිදහස් වන අවස්ථාද, වෙනත් පුද්ගලයන් අපරාධවල වගකීම බාර ගෙන ඇති අවස්ථාද, පොලීසිය නිවැරදි පුද්ගලයන් සැකකරුවන් කර ඇති අවස්ථාද පිළිබඳ උදාහරණ ඕනෑ තරම් ඇති නිසාය.

අනිද්දා වට්සැප් සමුහයට එක්වීමට පහත යොමු භාවිතා කරන්න

Group 01- https://chat.whatsapp.com/FW9ZAqXBotT5vFHZoDCIg1
Group 02 – https://chat.whatsapp.com/KLYP9OhQfhlHubxPspW3J3
Group 03 – https://chat.whatsapp.com/L9NV2gK1MfO6lUCpCyUVTZ

අනිද්දා වට්සැප් චැනලයට එක්වීමට පහත යොමුව භාවිතා කරන්න
https://whatsapp.com/channel/0029Vb7PJ8nDeON9UrGsSx0C

අනිද්දා ෆේස්බුක් චැනලයට එක්වීමට පහත යොමුව භාවිතා කරන්න
https://www.messenger.com/channel/AniddaNews