රූපවාහිනිය රටට හඳුන්වා දීමෙන් පසු තවත් වසර කිහිපයක කාලයකදී ඩෙක් යන්ත්‍රය නම් වූ එයට බාහිරින් සම්බන්ධ කළ හැකි තවත් උපාංගයක් විශේෂයෙන්ම විදේශ රටවල සේවය සඳහා ගිය පිරිස විසින් ගෙන එන ලැබිණ. ඉන් සිදුකරනු ලැබූයේ රූපවාහිනියේ විකාශනය වන වැඩසටහන්වලට අමතරව එහි පෙන්වනු නොලබන චිත්‍රපටි ආදිය බැලීමට උපකාරි වීමයි. මෙම චිත්‍රපටි අඩංගු පීවීආර් යනුවෙන් වූ විශාල ප්‍රමාණයේ කැසට් තිබූ අතර ඒවා ඩෙක් යන්ත්‍රයට ඇතුල් කර රූපවාහිනී තිරය මගින් බැලීමේ අවස්ථාව ලැබුණි. චිත්‍රපටි අඩංගු මෙම කැසට් පට වෙළඳාම් කිරීම හෙවත් කුලියට ලබාදීම සඳහාම වෙනම වෙළඳසැල් නිර්මාණය වී තිබුණි. එම වෙළඳසැලකින් චිත්‍රපටියක් අඩංගු එම විශාල ප්‍රමාණයේ කැසට් පටයක් ගැනීම සඳහා ඒ සඳහා වන කුලී මුදලට අමතරව ජාතික හැඳුනුම්පතද ආරක්ෂණ ඇපයක් ලෙස එහි තැබීම අනිවාර්ය වූ අතර ජාතික හැඳුනුම්පත නැවත ලබා ගැනීම සඳහා ලබාගත් කැසට් පටය ආපසු බාරදීමද අනිවාර්ය විය.
අප පාසල් යන කාලයේ නිසා එම කාලයේ ඒ ගැන එතරම් අවබෝධයක් නැතත්, පසු කාලයේ අවබෝධ කර ගත්තේ ජාතික හැඳුනුම්පත එසේ ලබා ගැනීමේ හැකියාවක් කිසිවකුට නැති බවයි. ජාතික හැඳුනුම්පතක් තාවකාලිකව ලබා ගැනීමේ යම් අවස්ථාවක් තිබුණද, එය තිබුණේද යම් ආයතනයකට ඇතුල් වීමේදී අපගේ අනන්‍යතාව සහතික කර එහි ඇතුල්වන්නන් සඳහා නිකුත් කරන අවසර පත්‍රය ලබාදීම සඳහා පමණය. ආපසු යන විටදී ඇතුල් වීමේ අවසර පත්‍රය ලබාදී ජාතික හැඳුනුම්පත යළි ලබා ගැනීම සිදුවිය. එහිදී ජාතික හැඳුනුම්පත් නැති අයට පිළිගත හැකි වෙනත් හැඳුනුම්පතක් හෝ රියැදුරු බලපත්‍රය වැනි වෙනත් හඳුනා ගැනීමේ බලපත්‍රයක් ලබාදීමේ හැකියාවද පැවතුණි. මෙම තත්වය ජාතික හැඳුනුම්පත් නොමැති අය් සම්බන්ධයෙන් විදේශ ගමන් බලපත්‍රය ලබාදීම සඳහා ද මේ වනවිට දිගු වී ඇති ඇත.
අප මෙහි කියන්නට උත්සාහ කරන්නේද වත්මන් ආණ්ඩුව යටතේ විදේශ ගමන් බලපත්‍රය රඳවා ගැනීමට ලබාදී ඇති නියෝගයක් පිළිබඳවය. ඉහත විස්තර කළ ආකාරයට එය යම් ආයතනයකට ඇතුල්වීමේදී ඒ සඳහා අවසර පත්‍රය ලබා ගැනීම සඳහා විනාඩි හෝ පැය කිහිපයකට වන තාවකාලික රඳවා ගැනීමක් නොවේ. එය ශ්‍රී ලංකා යුද හමුදාවේ මේජර් නිලය සහ ඉන් පහළ සියලු නිලධාරීන්ගේ විදේශ ගමන් බලපත්‍ර ඔවුන්ගේ රෙජිමේන්තු භාරයේ තබා ගැනීම සම්බන්ධයෙන් නිකුත් කර ඇති නියෝගයකි.
2025 පෙබරවාරි 14 දින සහිතව ශ්‍රී ලංකා යුද හමුදාවේ යුද ලේකම් මේජර් ජෙනරාල් යූඑල්ජේඑස් පෙරේරා විසින් සියලු රෙජිමේන්තු මධ්‍යස්ථාන අමතමින් එම නියෝගය ලබාදී තිබේ. එහි උද්ධෘතය ලෙස සඳහන් කර ඇත්තේ මේජර් සහ ඉන් පහළ නිලධාරීන්ගේ විදේශ ගමන් බලපත්‍ර එකතු කිරීම සහ ආරක්ෂිත භාරකාරත්වය යනුවෙන්ය.
ඒ අනුව උපදෙස් ලබාදී ඇත්තේ මේජර් සහ ඉන් පහළ යුද හමුදා නිලධාරීන්ගේ සහ සාමාජිකයන්ගේ විදේශ ගමන් බලපත්‍ර රෙජිමේන්තු මධ්‍යස්ථාන වෙත ලබා ගැනීම වහාම ක්‍රියාත්මක වන පරිදි කළ යුතු බවයි.
එසේ එකතු කර ගන්නා විදේශ ගමන් බලපත්‍රවල ආරක්ෂිත භාරකාරත්වය සහ නිසි නඩත්තුව සම්බන්ධයෙන් රෙජිමේන්තු මධ්‍යස්ථානවල අණදෙන නිලධාරීන් වගකිව යුතු වන බවද, විදේශ ගමන් බලපත්‍ර නැතිවීම හෝ ඒවා වෙත අනවසරයෙන් ප්‍රවේශ වීම වැළැක්වීම සඳහා සුදුසු ආරක්ෂිත පියවර ක්‍රියාත්මක බව එම අණදෙන නිලධාරීන් සහතික කළ යුතු බවද එහි සඳහන් කර ඇත.
එසේ ලබා ගන්නා විදේශ ගමන් බලපත්‍ර ඒවායේ හිමිකරුවන්ට නිකුත් කරනු ලන්නේ යුද හමුදා ලේකම් කාර්යාලයේ අනුමැතියෙන් පමණක් බවද, විදේශ ගමන් බලපත්‍ර නිකුත් කිරීම සඳහා වන ඉල්ලීම් නිසි අණදෙන දාමය හරහා සිදුවිය යුතු බවද එහි වැඩිදුරටත් සඳහන් කර තිබේ.
මෙම විදේශ ගමන් බලපත් නියෝගය පිළිබඳ මාධ්‍ය මාධ්‍ය වාර්තා කර තිබූ අතර ඒ සම්බන්ධයෙන් යුද හමුදාව බලාපොරොත්තු නොවූ කතාබහක් සමාජයේ ඇති විය. ඒ නිසා කලබලයට පත් යුද හමුදා ජනමාධ්‍ය හා මනෝ විද්‍යාත්මක මෙහෙයුම් අධ්‍යක්ෂ පෙබරවාරි 17 දින සහිතව මාධ්‍ය ආයතනවල ප්‍රවෘත්ති ප්‍රධානීන් අමතමින් ලිපියක් යොමු කර තිබුණි. එහි මෙසේ සඳහන්ව තිබේ.
‘ඉහත කරුණ සබැඳිව යුද්ධ හමුදා මූලස්ථානය මඟින් නිකුත් කර ඇති පරිපාලන නියෝගයක් පිළිබඳ පළවන පුවත විවිධ වූ අර්ථකථන පැතිර යන බැවින් ඒ පිළිබඳව නිවැරදි කරුණු පහත සඳහන් පරිදි ඔබගේ අවධානය පිණිස දන්වා සිටිමි.’
‘මෙය හුදෙක්ම යුද්ධ හමුදාව තුළ අන්තර් පරිපාලන කටයුතු පහසු කිරීම සඳහා ගත් පරිපාලනමය ක්‍රියාමාර්ගයකි. ඒ අනුව යුද්ධ හමුදාවේ මේජර් සහ ඉන් පහළ අයගේ විදෙස් ගමන් බලපත්‍ර ඔවුන් අයත් රෙජිමේන්තු යටතේ තබා ගන්නා ලෙස උපදෙස් ලබාදී ඇත. බොහෝ විට යුද්ධ හමුදාව වෙතින් ඉහත සඳහන් නිලයන්ට අයත් අයවළුන් විදෙස් පුහුණුවීම් සහ සාමසාධක රාජකාරී සඳහා නිරන්තරයෙන් යොමු කරන අතර, එම අවස්ථාවන් සඳහා වන පරිපාලන කටයුතු වෙනුවෙන් තත් අයවළුවන්ගේ විදෙස් ගමන් බලපත්‍ර ඉතා කඩිනමින් ලබා ගැනීම අත්‍යවශ්‍ය අතරම, ඒවායේ වලංගුභාවය හා නිවැරදිභාවය තහවුරු කිරීම වැදගත් වේ.’
‘නමුදු ඉහත බොහෝ අයවළුන් රාජකාරි කරනු ලබන්නේ ඉතා දුර බැහැර ප්‍රදේශවල වන බැවින් හා ඔවුන්ගේ විදෙස් ගමන් බලපත්‍ර තම නිවෙස්වල තිබීම හේතුවෙන් ඉතා කඩිනමින් එම ගමන් බලපත්‍ර යුද්ධ හමුදා මූලස්ථානය වෙත ඉදිරිපත් කිරීමට ඔවුන්හට අපහසු වන අතර, ඒ හේතුවෙන් යුද්ධ හමුදා මූලස්ථානයටද විවිධ පරිපාලනමය ගැටලුවලට මුහුණ පෑමට සිදුවේ.’
‘එබැවින් ඉහත කරුණු සැලකිල්ලට ගනිමින් තත් උපදෙස් නිකුත් කර ඇති අතර, එමගින් එම ගුවන් ගමන් බලපත්‍රවල ආරක්ෂාවද සුරක්ෂිත වන අතරම පරිපාලන කටයුතු විධිමත්ව සිදු කිරීමට පහසු වේ.’
‘කෙසේ නමුදු අවැසි ඕනෑම අවස්ථාවක තම විදේශ ගමන් බලපත්‍රය පුද්ගලික අවශ්‍යතාවයන් වෙනුවෙන් ලබාගැනීමට එම සාමාජිකයන්ට අවස්ථාව ලබාදී ඇත.’
‘ඒ අනුව මෙම උපදෙස් හුදෙක්ම යුද්ධ හමුදාවේ අභ්‍යන්තර පරිපාලන කටයුතු පහසු කිරීම සඳහා නිකුත් කර ඇති හෙයින්, පැතිර ඇති වැරදි අර්ථකථන නිවැරදි කිරීම සඳහා ඔබ විසින් මුල් පුවතට ලබාදුන් ප්‍රචාරයම මෙම ප්‍රවෘත්ති නිවේදනය සඳහාත් ලබාදෙන මෙන් කාරුණිකව ඉල්ලා සිටිමි.’
එම පැහැදිලි කිරීමේ නිවේදනයට පෙර එම නියෝගය තහවුරු කරමින් යුද හමුදා මාධ්‍ය ප්‍රකාශක බි්‍රගේඩියර් වරුණ ගමගේ මාධ්‍යයට පවසා තිබුණේ, විදේශ පුහුණුවීම් සහ සාම සාධක බලකා රාජකාරී කටයුතු කඩිනමින් සිදුකිරීම සඳහා යුද හමුදා මේජර් තනතුරට පහළ සියලුම සෙබළුන්ගේ විදෙස් ගමන් බලපත්‍ර රෙජිමේන්තු බාරයේ තබන ලෙස යුද හමුදා මූලස්ථානය සියලු රෙජිමේන්තු බාර අණ දෙන නිලධාරීන්ට උපදෙස් ලබා දී ඇති බවයි.
යුද හමුදා සෙබළුන්ගේ විදෙස් ගමන් බලපත්‍ර රෙජිමේන්තුව සන්තකයේ තබා ගැනීමේදී යම් අපරාධයකට සම්බන්ධ සෙබළුන්ට විදෙස්ගත වීමේ හැකියාව ද අවහිර වන බව ඔහු පවසා තිබුණි.බොහෝ යුද හමුදා සෙබළුන්ගේ විදෙස් ගමන් බලපත්‍ර අස්ථානගතවී ඇති බවද එවැනි විදෙස් ගමන් බලපත්‍ර තෙවන පාර්ශ්වයක අතට යෑමේ අවදානම මේ මගින් අවම වන බවද ඔහු පවසා තිබුණි.
බොහෝ සෙබළුන් දුර පළාත්වල රාජකාරි කරන බවත්, හදිසියේ විදෙස් පුහුණුවීම්වලට යැවීමේදී හා සාම සාධක බළකා සඳහා විදෙස් ගත කිරීමේදී ඇතිවන ගැටලුකාරි තත්ත්ව වළක්වා ගැනීම සඳහා මෙම ක්‍රමවේදය ආරම්භ කර ඇති බවත්, එම විදෙස් ගමන් බලපත්‍රය ආරක්ෂිතව සහ සුරක්ෂිතව තබා ගැනීමට රෙජිමේන්තු අණ දෙන නිලධාරීන්ගේ වගකීම වන බවත් යුද හමුදා මාධ්‍ය ප්‍රකාශකවරයා කියා තිබුණි.
විදෙස් පුහුණුවීම් ලැබෙන්නේ යුද හමුදාවේ සෙසු නිලයන්ට නොවන අතර බොහෝ විට එය ලැබෙන්නේ අධිකාරි ලත් නිලයන්ට පමණී. විදෙස් ගමන් බලපත් නියෝග ක්‍රියාත්මක කර ඇති නිලධාරීන් සම්බන්ධයෙන් ගත් කල මේජර් හා ඊට පහළින් ඇති ලුතිනන් හා දෙවන ලුතිනන් යන නිලයන්ට එය බලපායි. සාමසාධක රාජකාරි සෙසු නිලයන්ටද බලපායි. එහෙත් මෙම හමුදා නියෝගයත් සමඟ පැනනඟින ප්‍රශ්නය වන්නේ මෙතෙක් විදේශ පුහුණුව සඳහා සහ සාමසාධක රාජකාරි සඳහා විදේශගත වීමේදී පැන නොනැඟි විදේශ ගමන් බලපත් ප්‍රශ්නයක් හදිසියේ පැනනැඟී ඇත්තේ කෙසේද යන්නයි.
රටේ යුදමය තත්වයක් නැති තත්වය මත රටේ ඕනෑම ප්‍රදේශයක ස්ථානගත කර සිටින යුද හමුදා සාමාජිකයෙකු ඔහුගේ හෝ ඇයගේ විදේශ ගමන් බලපත්‍රය රැගෙන ඒම සඳහා නිවසට පිටත් කර යවා ගෙන්වා ගැනීම එතරම් ප්‍රශ්නයක් වන්නේ නැත.
නමුත් එම නියෝගයේ ඇති ඇත්ත තත්වය එය නොවන බව යුද හමුදා මාධ්‍ය ප්‍රකාශකවරයා එම නියෝගය සම්බන්ධයෙන් මුල් අවස්ථාවේ මාධ්‍ය වෙත කළ තහවුරු කිරීමේ ප්‍රකාශවලින් හඳුනාගත හැකිය.
ඔහු කියා තිබුණේ යුද හමුදා සෙබළුන්ගේ විදෙස් ගමන් බලපත්‍ර රෙජිමේන්තුව සන්තකයේ තබා ගැනීමේදී යම් අපරාධයකට සම්බන්ධ සෙබළුන්ට විදෙස්ගත වීමේ හැකියාව ද අවහිර වන බවයි. එමෙන්ම බොහෝ යුද හමුදා සෙබළුන්ගේ විදෙස් ගමන් බලපත්‍ර අස්ථානගතවී ඇති බැවින් එවැනි විදෙස් ගමන් බලපත්‍ර තෙවන පාර්ශ්වයක අතට යෑමේ අවදානම ඒ මගින් අවම වන බවයි.
ඉන් ගම්‍ය වන්නේ යුද හමුදා සාමාජිකයන් අපරාධ සිදුකර රටින් පලායෑම වැළැක්වීම සඳහා එම නියෝගය නිකුත් කර ඇති බවයි. අපරාධවලට සම්බන්ධ යුද හමුදා සාමාජිකයන් රටින් පිටවීම වැළැක්වීම සඳහා එය පනවා ඇත්නම් එහි ප්‍රශ්නයක් නැති අතර යුද හමුදා සාමාජිකයන් අපරාධවලට සම්බන්ධ වීම සහ රටින් පලා යෑම ඒ මගින් නැවැත්විය හැකිද යන්න නම් ප්‍රශ්නයකි. මන්ද ප්‍රශ්නයේ ඇත්ත හේතු සොයාගෙන ඒ සඳහා වන විසඳුම් ලබාදීමකින් තොරව වෙනත් ක්‍රියාමාර්ග මගින් ප්‍රතිඵල අත්වන්නේ නැති නිසාය.
මෙහිදී අපගේ අවධානය යොමු වන කරුණු දෙකක් තිබේ ඉන් එකක් වන්නේ යම් අධිකරණ නියෝගයකින් තොරව යුද හමුදා සාමාජිකයකුගේ වුවද විදේශ ගමන් බලපත්‍රය එම ආයතනය සතුව තබාගත හැකිද යන්නයි. ගුවන් තොටුපළකින් හෝ වරායකින් යම් පුද්ගලයකු විදේශ ගතවීම වැළැක්විය හැක්කේ අධිකරණ නියෝගයකින් පමණකි. එසේම විදේශ ගතවීම වැළැක්වීම සඳහා විදේශ ගමන් බලපත්‍ර සිය භාරයට ගන්නේද අධිකරණය පමණය.
යුද හමුදා සාමාජිකයන්ට පනවා ඇති මෙම විදේශ ගමන් බලපත් නියෝගයෙන් සිදුකර ඇත්තේ අධිකරණයේ එම කටයුත්ත යුද හමුදාව විසින් පවරා ගැනීමය. යුද හමුදා පනතේ පවා එහි සාමාජිකයන්ගේ විදේශ ගමන් බලපත්‍රය, ජාතික හැඳුනුම්පත, රියැදුරු බලපත්‍රය ආදිය ලබා ගැනීමේ බලය ලබාදී නැත. ඒ නිසා එය නීති විරෝධී කටයුත්තක් බව අමුතුවෙන් කිව යුතු නැත. එමෙන්ම එකී යුද හමුදා සාමාජිකයන්ගේ මානව හිමිකම් උල්ලංඝනය කිරීමක් බවද සඳහන් කළ යුතුය.
අනෙක් කරුණ වන්නේ සිවිල් විදේශ ගමන් බලපත්‍රයක් යම් යුද හමුදා සාමාජිකයකු ලබාගෙන තිබුණත්, විදේශ ගමන් බලපත්‍රයක් ලබාගෙන නැතැයි කියමින් එය යුද හමුදාවට බාර නොදී සිටීමට ඇති හැකියාවය. එවැනි තත්වයක් යුද හමුදාවට හඳුනා ගැනීමට හැකි වන්නේ එම යුද හමුදා සාමාජිකයන්ගේ ජාතික හැඳුනුම්පත් අංකවලට විදේශ ගමන් බලපත්‍රයක් නිකුත් කර ඇතිද යන්න පරීක්ෂා කිරීමෙන් පසුය.
එම සිවිල් විදේශ ගමන් බලපත්‍රය යුද හමුදාවට බාරදී එය නැති වුණා යැයි පොලිස් පැමිණිල්ලක් ඉදිරිපත් කර තවත් විදේශ ගමන් බලපත්‍රයක් ලබා ගැනීමේ හැකියාවද යමෙකුට තිබේ. එවැනි තත්වයන් වැළැක්වීම සඳහාද තවදුරටත් වෙනත් ක්‍රියාමාර්ග ගැනීමට යුද හමුදාවට සිදුවනු ඇත.
යුද හමුදා නිල ඇඳුමෙන් යුතු විදේශ ගමන් බලපත් ද යුද හමුදා සාමාජිකයන් සුළු පිරිසකට ඇත. එම ගමන් බලපත්‍ර හිමියන් රටෙන් පිටවී යෑමේදී ඒ සඳහා යුද හමුදාවේ අවසරය ලබාගෙන තිබෙනවාද නැද්ද යන්න ආගමන හා විගමන දෙපාර්තමේන්තුව මගින් පරික්ෂාවකට ලක්කළ හැකි වූවත්, රටින් පිටවන අවස්ථාවේදී එය වළක්වන්නේ කෙසේද යන ප්‍රශ්නයද පැන නඟින නිසාය. ඒ සඳහා නීත්‍යනුකූල වෙනම නියෝගයක් ගැනීමට සිදුවේ.
ඒ නිසා සිදුවිය යුත්තේ රටේ යුදමය තත්වයක් නොතිබියදී යුද හමුදා සාමාජිකයන් යුද හමුදාව හැර යන්නේ ඇයිද යන්න පිළිබඳව ගැඹුරින් සොයා බලා ඊට පිළියම් යෙදීම සහ යුද හමුදා සාමාජිකයන් අපරාධකරුවන් බවට පත්වන්නේ ඇයිද යන්න ගැඹුරින් සොයා බලා ඊට පිළියම් යෙදීමය. තවදුරටත් අපරාධවලට සම්බන්ධ යුද හමුදා සාමාජිකයන්ට යුද හමුදා නීතිය යටතේ අවශ්‍ය ක්‍රියාමාර්ග ගැනීමය. නොඑසෙව යුද හමුදා සාමාජිකයන් බහුතරයකගේ මානව හිමිකම් කඩවන ආකාරයට නීත්‍යනුකූල නොවන නියෝග පැනවීම නොවේ.
