තංගල්ල මිද්දෙණිය, කඩේවත්ත මංසන්ධියේදී පෙබරවාරි 18 දින රාත්‍රියේ සිදුවූ වෙඩි ප්‍රහාරයකින් වීරකැටිය මීගස්ආර ප්‍රදේශයේ පදිංචිව සිටි අරුණ විදානගමගේ හෙවත් ‘කජ්ජා’ යන නාමයෙන් ප්‍රකට පුද්ගලයා, ඔහුගේ අවුරුදු 6ක් වූ දියණිය සහ අවුරුදු 9ක් වූ පුත්‍රයාට වෙඩි වැදී තිබිණි.
අරුණ විදානගම එම ස්ථානයේම ජීවිතක්ෂයට පත් වූ අතර බරපතළ තුවාල ලැබූ දරුවන් දෙදෙනා තංගල්ල සහ ඇඹිලිපිටිය රෝහල්වලට ඇතුළත් කර තිබිණි. තංගල්ල රෝහලට ඇතුළත් කළ අරුණගේ දියණිය ප්‍රතිකාර ගනිමින් සිටියදී ජිවිතක්ෂයට පත්ව ඇති අතර, ඇඹිලිපිටිය දිස්ත්‍රික් රෝහලට ඇතුළත් කර තිබූ පුත්‍රයා පසුව රත්නපුර මහ රෝහලේ දැඩි සත්කාර ඒකකයට මාරු කර තිබුණද, පෙබරවාරි 19 වන දින පෙරවරුවේ ජීවිතක්ෂයට පත්විය.
විශේෂ පොලිස් කණ්ඩායම් කිහිපයක් මෙම ඝාතන සම්බන්ධයෙන් විමර්ශන සිදු කරමින් සිටින බව වාර්තා වේ.
අරුණ විදානගම හෙවත් කජ්ජා යනු පසුගිය කාලයේ ලංකාවේ සමස්ත රාජ්‍ය බලය වෙළාගෙන තිබුණු, දකුණේ මැදමුලන දේශපාලනයේ භීෂණ මුහුණුවර සංකේතවත් කළ ප්‍රමුඛ පුද්ගලයෙකි. ඔහු තංගල්ල, මිද්දෙණිය, කරන්දෙණිය, මීගම්ආර, මැදමුලන ප්‍රදේශවල විවිධ අපරාධවල නිරත වූ පුද්ගලයෙකු බවද ඝාතනයෙන් පසු මාධ්‍යවල පළවිය.
එම මාධ්‍ය වාර්තාවලට අනුව, මුදලට බූරුවා ගැසීම වීම ඔහුගේ ප්‍රධාන ආදායම් මාර්ගයයි. මෙම වෙඩි ප්‍රහාරය එල්ල වූ අවස්ථාවේදී සිය දරුවන් මිතුරන්ගේ නිවාසවල නතර කර බූරුවා ගැසීමට ඔහු යමින් සිට ඇති බවද පොලිස් විමර්ශනවලින් හෙළිවී තිබේ.
2024දී බූරුවා ගසමින් සිටි ස්ථානයකට ආයුධ සන්නද්ධව කඩාවැදී එහි සිටි පිරිස බය කර, මුදල් කොල්ලකෑමේ සිද්ධියක් මිද්දෙණියේ කජ්ජා ගැන වාර්තා වි තිබිණ. කොල්ලකෑම්, මිනීමැරුම්, කප්පම් ගැනීම්, ආයුධ ළඟ තබා ගැනීම් ඇතුළු අපරාධ ගණනාවක් සම්බන්ධයෙන් ඔහුට එරෙහිව චෝදනා එල්ල වී තිබෙන බවද පොලිසිය කියයි. 2014දී මිද්දෙණිය ප්‍රදේශයේ නිවසක් කොල්ලකෑම, 2019දී ඇඹිලිපිටියේ පුද්ගලයකුට මරණ තර්ජන කර කප්පම් ලබාගැනීම, එම වසරේම බෙලිඅත්තේදී ජීප්රථයක් කොල්ලකෑම මොහු කර ඇති බවද පොලිසිය පවසයි.
2019 ත්‍රිරෝද රථයක් පැහැර ගැනීම, වීරකැටියේදී ටී56 ගිනිඅවියක් හා ජීව උණ්ඩ 30ක් සමග අත්අඩංගුවට පත්වීම, 2021 බස් රථයක මුදල් කොල්ලකෑම ඇතුළු තවත් අපරාධ ගණනාවක් ඔහුගේ නම ඉදිරියෙන් තිබේ.
තමා රාජපක්ෂ පවුල වෙනුවෙන් ඕනෑම මිනීමැරුමක් කරන ‘රාජපක්ෂගේ අලු‍ගෝසුවා‘ ලෙස හැඳින්වුණු බව හෙළිදරව් කරමින් චමුදිත සමරවික්‍රම සමඟ 2023 නොවැම්බර් 28 දින අරුණ විදානගමගේ සම්මුඛ සාකච්ඡාවක් කර තිබුණි. රාජපක්ෂ පවුල තමන්ට කරන්න යැයි කියූ ප්‍රචණ්ඩ ක්‍රියා සියල්ලටම තමා සහභාගි වී ඇති බවද ඔහු පවසා තිබිණි.
2024 පෙබරවාරි 11 වන දින නැවතත් චමුදිත සමරවික්‍රම සමඟ සම්මුඛ සාකච්ඡාවක් කරමින්, රාජපක්ෂ පවුල සහ මහින්ද රාජපක්ෂගේ පෞද්ගලික ආරක්ෂක නිලධාරී කුප්‍රකට නෙවිල් වන්නිආරච්චි සම්බන්ධයෙන් චෝදනා රැසක් ඔහු කර තිබුණු අතර, අරුණ එම සාකච්ඡාවලදී පවසන්නේ රාජපක්ෂ පවුලට තමා කළ දේට ඇගයුමක් නැති බවත්, දැන් තමාට මරණ තර්ජන ඇති බවත්ය.
2023 දෙසැම්බර් මාසයේදී ජීව අත්බෝම්බයක් සහ රිවෝල්වරයක් ළඟ තබා ගැනීම සම්බන්ධයෙන් අරුණ විදානගම අත්අඩංගුවට ගෙන තිබුණු අතර, චමුදිත සමග සම්මුඛ සාකච්ඡාව අතරතුර ඔහු පවසා තිබුණේ ‘නාමල් රාජපක්ෂගේ ගෝලයෙකු වන සමන්ත නැමැති පුද්ගලයෙකු තමන් අත්අඩංගුවට පත් කිරීමට කළ නාට්‍යයක කොටසක් වශයෙන් එසේ තමා අත්අඩංගුවට ගත් බව’ය. සමන්ත නැමැති පුද්ගලයා වැඩ කරන්නේ කාල්ටන් එකේ බවත් හිටපු ජනාධිපති මහින්ද රාජපක්ෂ මහතාගේ ආරක්ෂක නිලධාරි මේජර් නෙවිල් වන්නිආරච්චිගේ සියලු‍ම දේවල් කරන්නේ සමන්ත නැමැති පුද්ගලයා බවත් ඔහු පවසා ඇත. රාජපක්ෂලා කියුවොත් ඕනෑම අයෙකු මරන්න හෝ ඉදිරිපත් වූ අය රාජපක්ෂලා ළඟ සිටි බවත් ඔහු පවසා තිබිණි.
තමන් දැන් ඩිෆෙන්ඩර් වර්ගයේ වාහනයක් පාවිච්චි කරනවාට රාජපක්ෂලා අකමැති බවත්, අනෙක් පුද්ගලයන් සාටකය ඇඳීම ගැනත් රාජපක්ෂලා අකමැති බවත්, රාජපක්ෂලා සිතා සිටින්නේ සාටකය යනු රාජපක්ෂවරුන්ගේ උප්පැන්නයට ආ එකක් බවත් ඔහු චමුදිත සමරවික්‍රම සමඟ පවසා තිබිණි.
මේ යුටියුබ් සාකච්ඡාවලදී ඔහු කියන දෙයින් පැහැදිලි වන්නේ, කොයි මොහොතක හෝ තමා මරා දමන බව ඔහු හොඳින් දැනසිටි බවයි. ‘එහෙම මාව මැරුවොත් ඔක්කොම එළිකරන්න මං ලෑස්ති කරලයි තියෙන්නේ’ යැයි ඔහු එහිදී කියයි. එමෙන්ම, කාලයක් මේ කියන දේශපාලනඥයන්ගේ අතකොළුවක් ලෙස විවිධ අපරාධ කළත්, දැන් ඔවුන් විසින් තමා අතහැර දමනු ලැබ ඇතැයි කියන අදහසද අරුණ මේ සාකච්ඡාවලදී කියයි. එහි තේරුම කුමක්ද? තමන්ට අවශ්‍ය අපරාධ කරගත් පසු ඒ අපරාධකාරයන් මේ දේශපාලකයන් විසින් අතහැර දමනු ලබන බවද? නැතිනම් ඔවුන් දැන් දේශපාලන භීෂණය හා මැරකම් නවතා සිල්වත් වී ඇති බවද? ඒත් නැතිනම්, දැන් රටේ පවතින වාතාවරණය අනුව තවදුරටත් දේශපාලන මැරකම්වලට ඉඩක් නැති බවද?
අරගලය පැවති සමයේ දී රාජපක්ෂවරුන්ගේ නිවාස හා දේපළ ගිනි තැබීම්වලින් ආරක්ෂා කර ගැනීමට පෙරමුණ ගෙන කටයුතු කළ අයකු බවටද අරුණ ගැන කියැවෙයි. තමා ඝාතනය කිරීමට සූදානමක් ඇති බවත් අඟුණුකොළපැලැස්ස බන්ධනාගාරයේ රඳවා සිටින පුද්ගලයකුට කොන්ත්‍රාත්තුව දී ඇති බවත් ඔහු පවසා ඇත. පසුව සර්ව ජන බලයට ඔහු සම්බන්ධ වී සිටි බවට ඔහුගේ සමාජ මාධ්‍ය පළකිරිම්වලින් පැහැදිලි වෙයි. යම් දේශපාලන පක්ෂයක කොළඹ පිහිටි කාර්යාලයකත් අරුණ කාලයක් සැඟවී සිට ඇති බවට තොරතුරු ද පසුගිය කාලයේ කියැවිණි.
කෙසේ වෙතත්, අරුණ බලාපොරොත්තු වූ පරිදිම ඔහු ඝාතනය කෙරිණි. අවාසනාවකට ඔහුගේ වරදෙහි වන්දි ගෙවන්නට අහිංසක දරුවන් දෙනෙකුටද සිදුවිය. අනෙක් අතින් අරුණගේ ඝාතකයන්ට, දරුවන් දෙදෙනාගේ වුවද ජීවිත වටින්නේ නැති බව මෙයින් පැහැදිලි වෙයි.
අරුණට වෙඩි තිබ්බේ කවුද? දැන් පැනනැගී ඇති වැදගත්ම ප්‍රශ්නය එයයි. ඔහු පසුගිය කාලයේ යූටියුබ් නාලිකාවල හෙළිදරව් කළ පරිදි, මැදමුලන දේශපාලකයන්ගේ පාර්ශ්වයෙන් ඔහු ඝාතනය කෙරිණිද? ඝාතකයන් කවුරුන් වුණත්, ඔවුන් අනිවාර්යයෙන්ම මැදමුලනේ දේශපාලන හිතවත්කම් ඇති, ඒ පාර්ශ්වයේ මෙතෙක් කාලයක් වැඩ කළ හෝ, දැනුත් වැඩකරන අය විය යුතු නොවේද? වෙනත් කොහේ හෝ සිටින ඝාතකයන්ට අරුණ මරාදැමීමෙන් අත්වන ප්‍රතිඵලයක් නැති බැවිනි.
