ගිං නිල්වලා ව්‍යාපෘතියේ ශාක්‍යතා අධ්‍යයනය සඳහා රුපියල් මිලියන 4002ක මුදලක් වැය කිරීම සම්බන්ධයෙන් යළි විමර්ශනයක් “කරන ලෙස ඉල්ලා මහජන ආරක්ෂක අමාත්‍යාංශයට ලැබී ඇති පැමිණිල්ලක් අපරාධ පරීක්ෂණ දෙපාර්තමේන්තුවට යොමු කර ඇතැයි වාර්තාවේ.
හිටපු අමාත්‍යාංශ ලේකම්වරයෙකු වූ හා මිනරල් සෑන්ඩ්ස් ආයතනයේ වත්මන් සභාපතිවරයා වන ටී අශෝක පීරිස් මහතා විසින් මහජන ආරක්ෂක අමාත්‍යාංශයේ ලේකම් විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්නට ඊට අදාළ ගොනුවක් සමඟ මෙම පැමිණිල්ල යොමුකර ඇති අතර ඒ අනුව අමාත්‍යාංශ ලේකම්වරයා පීරිස් මහතාට දැනුම් දී ඇත්තේ ඒ පිළිබඳ විමර්ශනය කිරීම සඳහා අපරාධ පරීක්ෂණ දෙපාර්තමේන්තුවට යොමුකර ඇති බවයි.
චමල් රාජපක්ෂ මහතා වාරිමාර්ග ඇමතිවරයා ලෙස කටයුතු කළ කාලයේදී මෙම සිදුවීම වී ඇති අතර ඒ සම්බන්ධයෙන් වන මුදල් අවස්ථා තුනකදී බාහිර ගිණුම්වලට බැරවී තිබේ. අවසන් මුදල් බැරවීම සිදුවී ඇත්තේ 2015 ජනාධිපතිවරණයට පෙර දිනයේදීය.
එවක වාරිමාර්ග අමාත්‍යාංශයේ ලේකම් ලෙස කටයුතු කළ අයිවන් සිල්වා මහතා යහපාලන සමයේදී ඒ පිළිබඳ පරීක්ෂණ ආරම්භ වීමෙන් පසු නවසීලන්තයට පළාගොස් තිබුණ අතර එෆ්සීඅයිඩීය කළ එම පරීක්ෂණ පසුව නැවතී තිබුණී.
