අධිකරණය වෙනස් වුණත් ඝාතකයා එහි ඉඳලා
පෙබරවාරි 19 වැනිදා කොළඹ මහේස්ත්‍රාත් අධිකරණයේ අංක 5 අධිකරණ ශාලාවේදී වෙඩි තබා ඝාතනය කරන ලද සංජීව කුමාර සමරරත්න හෙවත් ගනේමුල්ල සංජීවගේ ඝාතකයන්ට හා එහි සැලසුම්කරුවන්ට එදින අධිකරණ කටයුතු සම්බන්ධයෙන් වන තොරතුරු පූර්වයෙන් ලැබී ඇති බවට බලවත් සැකයක් මතුවී තිබේ.
ඒ ගනේමුල්ල සංජීව නැමැති සංවිධානාත්මක අපරාධ කල්ලි සාමාජිකයා එදින කොළඹ මහේස්ත්‍රාත් අධිකරණයේ අංක 9 අධිකරණයේ විභාග වීමට නියමිතව තිබූ ලඝු නොවන පරීක්ෂණයක් සඳහා ඉදිරිපත් කිරීමට රැගෙන විත් තිබීමත්, එම අධිකරණයේ මහේස්ත්‍රාත්වරයා නොසිටි නිසා එම අධිකරණයේ අන් සියලු නඩු අංක 02 අධිකරණයට මාරුකර තිබීමත්, එම අධිකරණයට ගනේමුල්ල සංජීව ඉදිරිපත් නොකර නැවත බන්ධනාගාරගත කිරීම සඳහා අධිකරණ නියෝගයක් ලබා ගැනීම සඳහා යැයි කියමින් ඔහු පමණක්, ඔහු සම්බන්ධයෙන් වෙනත් නඩුවක් ඇති අංක 5 අධිකරණයට ඉදිරිපත් කිරීමත් හා ඝාතකයා නිවැරදි ලෙසම ගනේමුල්ල සංජීව විත්ති කූඩුවට කැඳවීමට පෙරම එම අධිකරණයේ නීතිඥවරුන්ට පනවා ඇති අසුනක අසුන්ගෙන සිටීමත් නිසාය.
සිරකරු අයිතිවාසිකම් රැක ගැනීමේ සංවිධානයේ විධායක අධ්‍යක්ෂ නීතිඥ සේනක පෙරේරා අනිද්දා කළ විමසීමකදී ඉහත සඳහන් කළ තොරතුරු තහවුරු කරමින් වැඩිදුරටත් පැවසුවේ, එදින ගනේමුල්ල සංජීව නැමැති සැකකරු අංක 9 අධිකරණයේ මහේස්ත්‍රාත්වරයා නැති බැවින් බන්ධනාගාර නිලධාරීන් අංක 5 අධිකරණයට ඉදිරිපත් කර ඇත්තේ ඔහු යළි බන්ධනාගාරගත කිරීමට අවශ්‍ය නියෝගයක් ගැනීමට බව පවසමින් බවත්, එම අධිකරණයට සැකකරු ඉදිරිපත් කිරීමේදී ඔහු එම අධිකරණයට ඉදිරිපත් කළේ ඇයිද යන්න පිළිබඳ මහේස්ත්‍රාත්වරිය ප්‍රශ්න කර ඇති බවත්ය. ඒ, අංක 09 අධිකරණයේ එදිනට කැඳවීමට නියමිතව තිබූ සියලු නඩු අංක 02 අධිකරණයට යොමුකර තිබූ බැවින්ය.
ගනේමුල්ල සංජීව නැමැති සැකකරු අධිකරණයට රැගෙන විත් ඇත්තේ ඔහුගේ ආරක්ෂාව පිළිබඳ යම් තක්සේරුවකින් පසුව බවත්, ඔහු රැගෙන ඒමේදී බන්ධනාගාර නිලධාරීන්ට අමතරව 12 දෙනෙකුගෙන් යුත් එස්ටීඑෆ් ආරක්ෂාවක් ලබාදී ඇත්තේ ඒ නිසා බවත්, ඔහු රැගෙන ඒමෙන් පසු අවස්ථාවේදී යම් හේතු තිබුණත් ආරක්ෂාව පිළිබඳ එම වුවමනාව ඉටු වී නැති බවත් නීතිඥ සේනක පෙරේරා කීය.
අධිකරණයක් තුළ රතිඤ්ඤා කරලක් පත්තු වුවද අධිකරණයේ ආරක්ෂාව බාරව සිටින හා එහි සිටින ආරක්ෂක අංශ ඒ පිළිබඳ අවධානය යොමු කළ යුතු බවත්, එහෙත් එම අවධානය මෙම සිදුවීමේදී යොමු වී ඇත්තේ ඝාතකයා පලා යෑමෙන් පසු බවත් ඔහු අවධාරණය කරයි.
