නීතිපතිවරයා නිදහස් කරන්න කියන… ලසන්ත වික්‍රමතුංග ඝාතනයේ චුදිතයන්ගේ වැඩ මේවායි…

• උදලාගම: ලසන්තගේ රියැදුරා පැහැරගෙන ගොස් තර්ජනය කරලා

• සුගතපාල: පොලිස් සටහන් ඉරා දමලා

• ප්‍රසන්න: ලසන්තගේ සටහන් පොත අතුරුදහන් කරලා

චූදිතයන් නිදහස් කිරීම අධිකරණ කටයුත්තක් මිස නීතිපතිවරයාගේ කටයුත්තක් නොවේ

ගල්කිස්ස මහේස්ත්‍රාත් අධිකරණයේ විභාග වන සන්ඩේ ලීඩර් පුවත්පතේ හිටපු කර්තෘ ලසන්ත වික්‍රමතුංග ඝාතනය සම්බන්ධ අංක බී 92/2009 නඩුවේ චුදිතයන් තිදෙනෙකුට විරුද්ධව තවදුරටත් නීති මගින් කටයුතු නොකරන බවට දැනුම් දෙමින් නීතිපති පාරින්ද රණසිංහ (කනිෂ්ඨ) විසින් 2025.01.27 දින සහිතව අධ්‍යක්ෂ අපරාධ පරීක්ෂණ දෙපාර්තමේන්තුව අමතමින් යවා ඇති ලිපිය මේ වනවිට ජනමාධ්‍ය ක්ෂේත්‍රයේ මෙන්ම ඉන් බාහිර ක්ෂේත්‍රවලද දැඩි විරෝධයට හේතු වී තිබේ.

එම ලිපියේ වැඩිදුරටත් සඳහන් කර ඇත්තේ නීතිපතිවරයාගේ එම දැනුම් දීම මහේස්ත්‍රාත්වරයාට දැනුම් දිය යුතු බවත්, ඒ සම්බන්ධව මහේස්ත්‍රාත් අධිකරණය වෙත වාර්තා කිරීමෙන් පසුව ඒ පිළිබඳව අධිකරණය ගත් ක්‍රියාමාර්ගය අමුණා ඇති ආකෘතිය මගින්, එම ලිපිය ලැබී දින දාහතරක් (14) ඇතුළතදී නීතිපතිවරයා වෙත වාර්තා කළ යුතු බවත්ය.

එම ලිපියේ වැඩිදුරටත් සඳහන් කර ඇත්තේ ප්‍රේම් ආනන්ද උදලාගම, හෙට්ටිආරච්චිගේ දොන් තිස්සසිරි සුගතපාල හා විතාරණ ආරච්චිගේ සිරිමෙවන් ප්‍රසන්න නානායක්කාර යන චුදිතයින්ට විරුද්ධව තවදුරටත් නීති මගින් කටයුතු කිරීමට අදහස් නොකරන බවත්, ඔවුන් නිදහස් කළ හැකි බවත්, මහේස්ත්‍රාත් වෙත දැන්විය යුතු බවයි.

එහි පිටපත් මහේස්ත්‍රාත්, මහේස්ත්‍රාත් අධිකරණය ගල්කිස්ස, අධ්‍යක්ෂ, පොලිස් නීති කොට්ඨාශය හා ස්ථානාධිපති, සමූහ මංකොල්ල විමර්ශන අංශය, අපරාධ පරීක්ෂණ දෙපාර්තමේන්තුව වෙත යොමුකර තිබේ.

එම ලිපිය සම්බන්ධයෙන් නීතිපතිවරයාට මෙතරම් විරෝධයක් එල්ල වන්නේ ලසන්ත වික්‍රමතුංග ඝාතනය සම්බන්ධයෙන් සිදුකරන ලද විමර්ශනවලදී එම චුදිතයන් සම්බන්ධයෙන් සාක්ෂිකරුවන්ට මරණ තර්ජනය කිරීම හා සාක්ෂි වසන් කිරීම සම්බන්ධයෙන් බරපතළ චෝදනා එල්ල වී ඇති නිසාය.එය හරියටම තේරුම් ගැනීම සඳහා අපට ලසන්ත වික්‍රමතුංග මහතාගේ ඝාතන පරීක්ෂණ සිදුවූ ආකාරය පිළිබඳ අවබෝධයක් ලබා ගැනීමට සිදුවේ.

වික්‍රමතුංග මහතාගේ ඝාතනයෙන් පසු ඒ පිළිබඳ පරීක්ෂණ බාර වූයේ ගල්කිස්ස පොලීසියට වන අතර ඔහුගේ ඝාතනයෙන් දින කිහිපයකට පසු ගල්කිස්ස බඩෝවිට ප්‍රදේශයේ වගුරු බිමක ඇති යතුරු පැදියක් පිළිබඳ තොරතුරක් ගල්කිස්ස පොලීසියට ලැබේ. ඒ අනුව ගල්කිස්ස පොලීසියේ අපරාධ විමර්ශන අංශය එම යතුරු පැදිය සොයා ගනියි. එය රටේ උතුරු පළාතේ යතුරු පැදියක් බවටද අනාවරණය කරගනු ලැබේ. එම තොරතුරු මගින් ඔප්පු කරන්නට උත්සාහ කර තිබුණේ ලසන්ත වික්‍රමතුංග ඝාතනය සඳහා පැමිණි යතුරු පැදිය බඩෝවිට වගුරු බිමේ තිබූ යතුරු පැදිය බවත් හා එල්ටීටීඊ සංවිධානය විසින් ලසන්ත වික්‍රමතුංග ඝාතනය සිදුකරන්නට ඇති බවත්ය.

එතෙක් ගල්කිස්ස පොලීසිය සිදුකළ විමර්ශන මහින්ද රාජපක්ෂ ආණ්ඩුව විසින් පොලිස් ත්‍රස්ත විමර්ශන ඒකකයට පවරනු ලබන්නේ එම තොරතුරුවල ප්‍රතිඵලයක් වශයෙන්ය. ත්‍රස්ත විමර්ශන ඒකකය ඉන්පසු උත්සාහ ගනු ලබන්නේ ලසන්ත වික්‍රමතුංග ඝාතනයට එල්ටීටීඊ සම්බන්ධයක් සෙවීමටය. එහෙත් එම පරීක්ෂණ සම්බන්ධයෙන් සෑහීමකට පත් නොවන ලසන්ත වික්‍රමතුංග මහතාගේ පවුලේ සාමාජිකයන් විසින් කරන ලද ඉල්ලීමක් සලකා බැලීමෙන් පසු ගල්කිස්ස මහේස්ත්‍රාත් අධිකරණය එම ඝාතන පරීක්ෂණ අපරාධ පරීක්ෂණ දෙපාර්තමේන්තුවට පවරනු ලබන්නේ ඉන්පසුවය. එහිදී ද එම ඝාතනය සම්බන්ධයෙන් නිසි විමර්ශනයක් එම දෙපාර්තමේන්තුවෙන් සිදුවන්නේ නැත.

එමෙන්ම ඒ වනවිටත් රාජපක්ෂවරුන් සමඟ අමනාපව සිටි හිටපු හමුදාපති සරත් පොන්සේකාගේ අණ යටතේ කටයුතු කළ කොහුවල ප්‍රදේශයේ ස්ථානගතව සිටි හමුදා කණ්ඩයක් අත්අඩංගුවට ගැනුණු අතර ඔවුන්ට බලකර තිබුනේ ලසන්ත වික්‍රමතුංග ඝාතනය පොන්සේකා මහතාගේ අනුදැනුම ඇතිව කළ එකක් බවට පිළිගන්නා ලෙසයි. ලසන්ත ඝාතනය වෙනත් පාර්ශ්වයක් වෙත පැටවීමේ එම දෙවන උත්සාහයද අසාර්ථක එකක් බවට පත්විය.

මෙම ඝාතන පිළිබඳ නැවත අපාරධ පරීක්ෂණ දෙපාර්තමේන්තුව විමර්ශන ආරම්භ කරන්නේ යහපාලන ආණ්ඩු සමයේදී වන අතර එම විමර්ශනවලදී සොයාගන්නේ එවක පොලිස්පති ජයන්ත වික්‍රමරත්න විසින් ඉහත සඳහන් කරන ලද බඩෝවිට වගුරු බිමේ තිබුණ යතුරු පැදිය පිළිබඳ තොරතුරු ගල්කිස්ස පොලීසියට ලබාදී ඇති බවයි. එමෙන්ම එම යතුරු පැදිය වව්නියාව ප්‍රදේශයේදී අතුරුදහන් වී ඇති එකක් බවටද, අතුරුදහන් වනවිට එම යතුරු පැදියේ ගමන්ගත් පුද්ගලයන් දෙදෙනා ආරක්ෂක අංශ පැහැරගෙන ගොස් පසුව මරා දමා ඇති බවටද සොයා ගනු ලබයි.

එමෙන්ම විමර්ශකයන් සොයා ගන්නා තවත් දෙයක් වන්නේ ඝාතනය වන අවස්ථාවේදී ලසන්ත වික්‍රමතුංග මහතාගේ කාරයේ තිබුණ සටහන් පොතක් නීතිපතිවරයා විසින් ඉදිරි කටයුතු සිදුනොකරන බව දැනුම් දී ඇති ගල්කිස්ස පොලීසියේ අපරාධ විමර්ශන අංශයේ හිටපු ස්ථානාධිපති පොලිස් පරීක්ෂක හෙට්ටිආරච්චිගේ දොන් තිස්සසිරි සුගතපාල හමුවී ඇති බවයි. ඒ පිළිබඳව පොලිස් පරීක්ෂක සුගතපාලගෙන් කළ ප්‍රශ්න කිරීම්වලදී හෙළිවී තිබුණේ එම සටහන් පොතේ ලසන්ත වික්‍රමතුංග මහතා ලුහුබඳිමින් පැමිණි යතුරු පැදිවල අංක සටහන් කර තිබී ඇති බවයි. එම තොරතුරු පොලිස් සටහන් පොතේ පොලිස් පරීක්ෂක සුගතපාල සටහන් කර තිබේ. ඒ සම්බන්ධයෙන් දැන ගන්නට ලැබී නීතිපතිවරයා විසින් ඉදිරි කටයුතු නොකරනවා යැයි දැනුම් දී ඇති එවක ගල්කිස්ස ප්‍රදේශය බාර නියෝජ්‍ය පොලිස්පතිවරයා ලෙස කටයුතු කළ ප්‍රසන්න නානායක්කාර සුගතපාල කැඳවා ඒ පිළිබඳ විමසා තිබේ. එම විමසීමෙන් පසු පොලිස් සටහන් පොතේ එම විස්තර සටහන් කිරීම ගැන ‘උඹට පිස්සුද’ යනුවෙන් කියමින්, ලසන්ත වික්‍රමතුංග ඝාතනය කිරීමේ වුවමනාවක් තිබුනේ එවක ආරක්ෂක අමාත්‍යාංශ ලේකම්වරයා වශයෙන් කටයුතු කළ ගෝඨාභය රාජපක්ෂට බව කියා ඇත. එබැවින් පොලිස් සටහන් පොතේ එම පිටු ගලවා, ලසන්ත වික්‍රමතුංගේ සටහන් පොත ඔහුට ලබාදෙන ලෙස නියෝග කර තිබේ. ඒ අනුව පොලිස් පරීක්ෂක සුගතපාල සිදුකර තිබුණේ පොලිස් සටහන් පොතේ එම පිටු ගලවා, වික්‍රමතුංග මහතාගේ සටහන් පොත සිය ඉහළ නිලධාරියා වන ප්‍රසන්න නානායක්කාරට බාරදීමයි. එසේ වුවද එහිදී පොලිස් පරීක්ෂක සුගතපාල ඉවත්කළ පොලිස් සටහන් පොතේ සටහන් ෆොටෝ කොපිකර තබා ගැනීමද සිදුකර තිබුණි. පසුව ඔහු අපරාධ පරීක්ණ දෙපාර්තමේන්තුවේ විමර්ශනවලදී එම ෆොටෝ කොපි සටහන් ලබාදීම සිදුකර තිබුණි.

හිටපු නියෝජ්‍ය පොලිස්පති ප්‍රසන්න නානායක්කාරගෙන් ඒ පිළිබඳව අපරාධ පරීක්ෂණ දෙපාර්තමේන්තුව ප්‍රශ්න කිරීමේදී ඔහු කියා තිබුණේ පොලිස් පරීක්ෂක සුගතපාලගෙන් ඔහු ලබාගත් ලසන්ත වික්‍රමතුංගගේ සටහන් පොත එවක පොලිස්පති ජයන්ත වික්‍රමරත්නගේ ඉල්ලීම අනුව ඔහුට ලබාදුන් බවයි. ඒ අනුව එවක පොලිස්පති ජයන්ත වික්‍රමරත්න අත්අඩංගුවට ගැනීමට අපරාධ පරීක්ෂණ දෙපාර්තමේන්තුව අධිකරණ නියෝගයක් පවා ලබාගත් අතර වික්‍රමරත්න මහතා එය වළක්වා ගත්තේ ඔහුව අත්අඩංගුවට නොගැනීමේ නියෝගයක් අධිකරණය මගින් ලබා ගනිමිනි.

නීතිපතිවරයා විසින් තවදුරටත් කටයුතු නොකරන බව දැනුම් දී ඇති හිටපු යුද හමුදා බුද්ධි අංශ සාමාජිකයකු වන ප්‍රේම් ආනන්ද උදලාගම ලසන්ත ඝාතන සිද්ධියට සම්බන්ධ වන්නේ එම ඝාතනයෙන් පසු ලසන්තගේ රියැදුරා පැහැරගෙන ගොස් ඔහුට මරණීය තර්ජන කිරීම හේතුවෙනි. ලසන්තගේ රියැදුරා එම ඝාතනයෙන් පසු එම ඝාතනය සිදුකළේ ගෝඨාභය රාජපක්ෂ බවට ඔහුට හමුවන අයට ප්‍රකාශ කරමින් සිට ඇති අතර ඔහුව සුදු වෑන් රථයකින් පැහැරගෙන ගොස් උදලාගම තර්ජනය කර තිබුණේ ලසන්ත ඝාතනයට ගෝඨාභය රාජපක්ෂ සම්බන්ධ බවට යළි කීවොත් ඔහුටද ලසන්ත වික්‍රමතුංගගේ ඉරණම අත්කර දෙන බව කියමින්ය.

ලසන්ත වික්‍රමතුංගගේ රියැදුරා පැහැර ගැනීම ගැන සිදුකළ විමර්ශනයට අදාලව පැවති හඳුනා ගැනීමේ පෙරෙට්ටුවේදී ලසන්තගේ රියැදුරා විසින් හිටපු යුද හමුදා බුද්ධි අංශ සාමාජික ප්‍රේම් ආනන්ද උදලාගමව හඳුනා ගත්තේය. මීට අමතරව උදලාගම රිවිර පුවත්පතේ හිටපු කර්තෘ උපාලි තෙන්නකෝන් ද හඳුනාගත් අතර ඒ ඔහුට පහර දී පැහැරගෙන යෑමට උත්සාහ උත්සාහ කළ පිරිස අතරේ උදලාගම සිටි බව කියමින්ය. එම මහින්ද රාජපක්ෂ ආණ්ඩු සමයේදී ප්‍රේම් ආනන්ද උදලාගමව ජර්මනියේ ශ්‍රී ලංකා තානාපති කාර්යාලයේ සේවකයකු ලෙස පත්කර යැවීමද රාජපක්ෂවරුන් විසින් සිදුකරනු ලැබුවේ ඔහුට රාජපක්ෂවරුන් සමඟ පැවති සමීප සබඳතාව මොනවට ඔප්පු කරමින්ය.

මීට අමතරව ලසන්ත වික්‍රමතුංග ඝාතනයට පෙර ඔහුගේ නිවසේ සේවකයකු මගින් වික්‍රමතුංග මහතාගේ නිවසට සීඩී තැටි කිහිපයක් දැමීමට යම් උත්සාහයක්ද හමුදා බුද්ධි අංශ සාමාජිකයන් විසින් ගෙන තිබූ අතර එය ව්‍යර්ථ වී තිබුණේ එම සේවකයා ඒ සඳහා කැමැත්ත පළ නොකිරීම හේතුවෙනි. එහිදී ද එම සේවකයාට මරණීය තර්ජන එල්ල කර තිබුණි.
ලසන්ත වික්‍රමතුංග මහතා ඝාතනය කළ අවස්ථාවේදී හා ඊට පෙර අවස්ථාවලදී ඔහුගේ රථය ලුහුබැඳ ගොස් තිබුණේ කොළඹ මරදාන ටි්‍රපොලි ගබඩා සංකීර්ණයේ ස්ථානගතව සිටි යුද හමුදා විශේෂ කණ්ඩායමක් බවට අපරාධ පරීක්ෂණ දෙපාර්තමේන්තුව සිය විමර්ශනවලදී හඳුනාගත් අතර ඔවුන් භාවිත කළ දූරකථන අංකද සොයා ගනු ලැබීය. එහෙත් එම දූරකථන භාවිත කළේ කිනම් යුද හමුදා සාමාජිකයන්ද යන්න පිළිබඳ තොරතුරු යුද හමුදාව පාර්ශ්වයෙන් එම අවස්ථාවේදී ලබාදුන්නේ නැත. එමෙන්ම එම දූරකථන සිම් නිකුත් කර තිබූ ඩයලොග් සමාගමද එම දූරකථනවලට අදාළ ඇමතුම් තොරතුරු එම අවස්ථාවේදී ලබාදුන්නේ නැත. උත්ප්‍රාසය වන්නේ එවකට ඩයලොග් සමාගමේ ප්‍රධානියා වශයෙන් කටයුතු කළේ වත්මන් ජනාධිපති අනුර කුමාර දිසානායකගේ ඩිජිටල් ආර්ථික උපදේශක වන ආචාර්ය හාන්ස් විජේසූරිය වීමයි.

නමුත් මේ මෑතකදී පැවති ඒ පිළිබඳ නඩුවේදී ඒ සම්බන්ධයෙන් චෝදනා එල්ල වන ටි්‍රපොලි හමුදා කඳවුරේ එවකට සේවය කළ හමුදා සාමාජිකයන් ඔවුන් එම දූරකථන භාවිත කළ බව පිළිගෙන තිබුණද, දූරකථන සමාගම ලබාදී ඇති දූරකථන කුලුනු වාර්තා ප්‍රතික්ෂේප කරන බව ප්‍රකාශ කර තිබුණි.

ලසන්ත වික්‍රමතුංග ඝාතනය සිදුකර තිබුණේ වෙඩි තැබීමකින් බව මුල්ම මරණ පරීක්ෂණ වාර්තාවෙන් ප්‍රකාශ කර තිබුණද, ඉන්පසු සිදුකළ පරීක්ෂණවලදී තහවුරු වූයේ උල් ආයුධයකින් සිදුකළ පහරදීම් හේතුවෙන් ඔහුගේ මරණය සිදුවී ඇති බවයි. ඒ අනුව අනුමාන කරනු ලැබුයේ බටහිර රටවල ගොවිපළවලදී මස් සඳහා සතුන් මැරීමේදී එම සතා ක්ෂණිකව මියයෑම සඳහා භාවිත කරන උල් කූරකින් සමන්විත අවියක් ලසන්ත වික්‍රමතුංග ඝාතනය සඳහා යොදාගෙන ඇති බවටයි. තවදුරටත් කරන ලද විමර්ශනවලදී අපරාධ පරීක්ෂණ දෙපාර්තමේන්තුව අනාවරණය කරගෙන තිබුණේ මහින්ද රාජපක්ෂ ආණ්ඩු සමයේ රටට ආයුධ ගෙන්වීම සඳහා ඇතිකර තිබූ ලංකා ලොජිස්ටික්ස් ඇන්ඩ් ටෙක්නොලොජීස් ලිමිටඩ් නම්වූ රාජ්‍ය ආයතනය ඒ ආකාරයේ ආයුධ කිහිපයක් ගෙන්වා ඇති බවයි. (රජයේ හමුදා හා පොලීසිය නොවන පෞද්ගලික අංශයේ ආයතන ආයුධ නොවන ආරක්ෂාව සම්බන්ධයෙන් වන යම් උපකරණ ගෙන්වූවද, ඒ සඳහා අවසර ලබාදීමද ඒ සමයේ සිදුකළේ ලංකා ලොජිස්ටික්ස් ඇන්ඩ් ටෙක්නොලොජීස් ආයතනයයි) ප්‍රේම් ආනන්ද උදලාගම යන හිටපු යුද හමුදා බුද්ධි අංශ සාමාජිකයා, හෙට්ටිආරච්චිගේ දොන් තිස්සසිරි සුගතපාල යන හිටපු පොලිස් පරීක්ෂකවරයා හා විතාරණ ආරච්චිගේ සිරිමෙවන් ප්‍රසන්න නානායක්කාර යන හිටපු නියෝජ්‍ය පොලිස්පතිවරයා යන අයට චෝදනා එල්ල වන්නේ ලසන්ත වික්‍රමතුංග ඝාතනය සම්බන්ධයෙන් වන තොරතුරු වසන් කිරීම හා සාක්ෂිකරුවන්ට මරණ තර්ජන කිරීම සම්බන්ධයෙන්ය.

එහිදී ඉතා වැදගත් චුදිතයෙකු වන්නේ හිටපු පොලිස් පරීක්ෂක සුගතපාලය. ඒ ලසන්ත වික්‍රමතුංගගේ සටහන් පොත, ඒ ආශ්‍රයෙන් පොලිස් සටහන් පොතේ සටහන් දැමීම හා ඉහළ නිලධාරි නියෝග අනුව ඒවා ඉවත් කිරීම, එම සටහන් ෆොටෝ කොපිකර තබා ගැනීම යන වැදගත් සාක්ෂිවලට අදාලව ඔහු සතු තොරතුරු නිසාය.

දැනට බී වාර්තාවක් ලෙස ගල්කිස්ස මහේස්තත්‍රාත් අධිකරණයේ තිබෙන ලසන්ත වික්‍රමතුංග ඝාතනය සම්බන්ධයෙන් වන නඩුව යම් හෙයකින් නීතිපතිවරයා විසින් චුදිතයින්ට අධිචෝදනා එල්ල කරමින් මහාධිකරණය හමුවේ නඩු පවරන්නේ නම් එහිදී සාක්ෂි වසන් කිරීම සම්බන්ධයෙන් විත්තිකරුවකු වන පොලිස් පරීක්ෂක සුගතපාල අවශ්‍ය නම් පැමිණිල්ලේ සාක්ෂිකරුවකු වශයෙන්ද ඉතා වැදගත් සාක්ෂිකරුවකු ලෙස යොදා ගත හැකිය.

මන්ද හිටපු නියෝජ්‍ය පොලිස්පති ප්‍රසන්න නානායක්කාර මෙන්ම හිටපු පොලිස්පති ජයන්ත වික්‍රමරත්නද එම පරීක්ෂණ නොමඟ යැවීම සඳහා හා සාක්ෂි වසන් කිරීම සඳහා කළ කී දෑ සහ ඒ සඳහා ඔවුන්ට බලපෑ හේතු ඔහු මගින් අනාවරණය කරගත හැකි නිසාය.

එහෙත් ඉහතින් සඳහන් කරන ලද නීතිපතිවරයාගේ නියෝගයෙන් පෙනෙන්නේ ලසන්ත වික්‍රමතුංග ඝාතනය සම්බන්ධයෙන් යළි විධිමත් පරීක්ෂණ ආරම්භ කර ඒ සඳහා වගකිවයුත්තන්ට නීතිය මගින් දඬුවම් ලබාදෙන බවට වත්මන් ජනාධිපතිවරයා හා ආණ්ඩුව ශපථ කර ඇති තත්වය තුළ එය අඩාල කිරීම සඳහා ඊට අදාල වැදගත් චුදිතයින් අධිචෝදනා ගොනු කිරීමකින් තොරව මුදා හරිමින් සිටින බවයි.

නීතිපතිවරයාගේ මෙම හැසිරීම කිසිසේත් සුළුකොට තැකිය හැකි එකක් නොවන අතර එය අපරාධකරුවන්ට දණ්ඩ මුක්තිය ලබාදීමේ ක්‍රියාවලියකි. එය වත්මන් ආණ්ඩුවේ ජනතා පොරොන්දුවලටද එරෙහි එකක් වන හෙයින් නීතිපතිවරයාගේ මෙමම හැසිරීම සම්බන්ධයෙන් ආණ්ඩුව බලවත් ලෙස සිය සැලකිල්ල යොමු කළ යුතුය. ඒ ලසන්ත වික්‍රමතුංග ඝාතනයේ එම චුදිතයින්ට විරුද්ධව තවදුරටත් කටයුතු නොකරන බව දැනුම් දීමට අමතරව ඔවුන්ව නිදහස් කළ හැකි බවද නීතිපතිවරයා සිය ලිපියෙන් කියා ඇති බැවින්ය. මන්ද යම් සැකකරුවකු, චුදිතයකු හෝ විත්තිකරුවකු නිදහස් කිරීමේ බලය ඇත්තේ අධිකරණයට මිස නීතිපතිවරයාට නොවන නිසාය.