විදෙස් ගමන් බලපත්‍ර නිකුත් කිරිමේදී ඇති වී තිබෙන ප්‍රමාදයන් මඟහරවා ගැනීම සඳහා ආගමන විගමන දෙපාර්තමේන්තුව පැය 24 පුරා ක්‍රියාත්මක කිරීමට රජය තීරණය කර ඇති බව පෙබරවාරි 05 වන දින කැබිනට් අමාත්‍ය නලින්ද ජයතිස්ස මහතා පවසා තිබිණි.
ඒ අනුව දිනකට විදෙස් ගමන් බලපත්‍ර 4000ක් නිකුත් කිරීමට නියමිත බව ඒ මහතා පවසා තිබිණි. සේවය ලබාදීමට අවශ්‍ය අමතර කාර්ය මණ්ඩලය සපයා ගැනීම සඳහා එම දෙපාර්තමේන්තුවේ සේවය කර විශ්‍රාම ලබා ඇති නිලධාරීන්, රාජ්‍ය සේවා කොමිෂන් සභාවේ එකඟතාව මත කොන්ත්‍රාත් පදනම මත සේවයේ යෙදවීමට සහ දැනට රජයේ සේවයේ නිරත නිලධාරින්, රාජ්‍ය පරිපාලන, පළාත් සභා සහ පළාත් පාලන අමාත්‍යාංශය විමසමින් අනුයුක්ත කර ගැනීමට මහජන ආරක්ෂක සහ පාර්ලිමේන්තු කටයුතු අමාත්‍යවරයා ඉදිරිපත් කළ යෝජනාවට මෙලෙස අමාත්‍ය මණ්ඩල අනුමැතිය හිමිව ඇති බවත් පවසා තිබිණි.
අමාත්‍ය මණ්ඩලය විසින් පත් කරන ලද විද්වත් කමිටුවේ නිර්දේශය අනුව ”පී” කාණ්ඩයේ චිපය රහිත හිස් විදේශ ගමන් බලපත්‍ර 1,100,000ක් වත්මන් සැපයුම්කරු වෙතින් සපයා ගැනීමේ ප්‍රසම්පාදන ක්‍රියාවලිය මේ වන විට ආරම්භ කර ඇති බවත් අමාත්‍යවරයා පවසා තිබිණි.
පාස්පෝට් අර්බුදය
ආගමන විගමන දෙපාර්තමේන්තුව නිකුත් කරනු ලබන විදෙස් ගමන් බලපත්‍ර ලබා ගැනීම සඳහා අධික තදබදයක් හට ගත්තේ මීට වසර දෙකක පමණ සිටය. ඉන්පසුව ඊ-පාස්පෝට් නියමිත දිනට ටෙන්ඩර් ලබාගත් සමාගමට ලබා දීමට නොහැකි වූ නිසා එම සමාගමට ම නැවත කලින් පැවති විදෙස් ගමන් බලපත්‍රයම ලබා දීමට පෙර රජය විසින් අනුමැතිය ලබා දී තිබිණි. පෙර රජයේ එම තීරණය අභියෝගයට ලක් කරමින් මීට පෙර විදෙස් ගමන් බලපත්‍ර මුද්‍රණය කළ සමාගම අධිකරණය වෙත ගොස් තහනම් නියෝගයක් ලබාගෙන තිබිණි.
පසුව අධිකරණයේදී ඇති කර ගත් එකඟතාවක් මත පැරණි සමාගම විසින් නැවත විදෙස් ගමන් බලපත්‍ර මුද්‍රණයට එකඟ වී තිබුණු අතර ඒ වන විට මුද්‍රණය කරන ලද විදෙස් ගමන් බලපත්‍ර තොගය සීමිත වූ නිසා දිනකට නිකුත් කළ විදෙස් ගමන් බලපත්‍ර ප්‍රමාණය ද සීමා වීම පසුගිය සමයේ ඇති වු විදෙස් ගමන් බලපත්‍ර ලබාදීමේ තදබදයට හේතු වී තිබිණි.
මුද්‍රණය කළ විදෙස් ගමන් බලපත්‍ර හිඟයත් සමග පෙර පැවති මාර්ගගත ක්‍රමය ඔස්සේ වේලාවක් වෙන් කරගෙන විදෙස් ගමන් බලපත්‍ර ලබා ගැනීමට තිබූ ක්‍රමවේදය ඉවත් කර තිබූ නිසා ඒ වෙනුවට ආගමන හා විගමන දෙපාර්තමේන්තුව වෙත ගොස් එක්දින සේවාව සඳහා දිනයක් වෙන් කර ගැනීමේ ක්‍රමවේදයක් හඳුන්වා දී තිබිණි.
මෙම ගැටලු‍ව සම්බන්ධයෙන් 2024 ඔක්තෝබර් 15 වන දා පැවති කැබිනට් තීරණ දැනුම් දීමේ මාධ්‍ය හමුවේදී අමාත්‍ය විජිත හේරත් පවසා සිටියේ එම සතිය තුළ මුද්‍රණය කළ විදෙස් ගමන් බලපත්‍ර ප්‍රමාණයක් ලැබීමට නියමිත බැවින් මෙම තදබදය ඉක්මනින් ම අවසන් කිරීමට හැකි වනු ඇති බවය. තවද 2024 වර්ෂයේ ඔක්තෝබර් 19 වන දා විදෙස් ගමන් බලපත්‍ර ප්‍රමාණක් ලංකාවට ගෙන ඒමට නියමිත බැවින් ඔක්තෝබර් 21න් ආරම්භ වන සතියේ සිට තත්ත්වය පාලනය කිරීමට හැකි වනු ඇති බව ඔහු එහිදී පවසා තිබිණී.
විද්වත් කමිටුව
විදේශ ගමන් බලපත්‍ර නිකුත් කිරීමේ ක්‍රියාවලිය සම්බන්ධයෙන් විමර්ශනය කිරීම සඳහා විද්වත් කමිටුවක් මෙම රජය විසින් පත් කර තිබිණි. එම කමිටුවේ වාර්තාව ජනවාරි 29 වන දින විෂය භාර අමාත්‍ය ආනන්ද විජේපාල මහතාට භාර දී තිබුණු අතර විදෙස් ගමන් බලපත්‍ර නිකුත් කිරීමේ ක්‍රියාවලිය පවත්වාගෙන යෑමට සහ ක්‍රියාවලිය යළි සාමාන්‍ය තත්ත්වයට පත්කිරීම සඳහා යන්ත්‍ර මගින් කියවිය හැකි නව විදේශ ගමන් බලපත්‍ර මිලියන 1.1 ක් ලබා ගැනීමට නිර්දේශ කර ඇත.
අදාල වාර්තාව භාර ගැනීමෙන් පසුව මාධ්‍ය වෙත අදහස් දක්වමින් විෂය භාර අමාත්‍යවරයා පවසා තිබුණේ වාර්තාව කැබිනට් මණ්ඩලය වෙත ඉදිරිපත් කරන බවත් එහි නිර්දේශ ප්‍රකාරව විදේශ ගමන් බලපත්‍ර නිකුත් කිරීමේ දැනට පවතින ක්‍රමවේදය වෙනස් කරනවාද නැද්ද යන්න සම්බන්ධයෙන් තීරණයකට එළඹෙන බවත්ය. තවද අමාත්‍යවරයා පවසා තිබුණේ මේ වනවිට දෛනිකව විදේශ ගමන් බලපත්‍ර 2900 ක් පමණ නිකුත් කරන බවත් එම සංඛ්‍යාව ඉදිරියේදී තවත් ඉහළ නැංවීමට කටයුතු කරන බවත්ය.
පාස්පෝට් ගන්න වෙන්නේ අගෝස්තු සිට
එක් දින සේවාව යටතේ විදෙස් ගමන් බලපත්‍ර ලබා ගැනීමේ සේවාව ලබා ගැනීම සඳහා 2025.02.05 වන දින ආගමන විගමන දෙපාර්තමේන්තුවේ වෙබ් අඩවියේ පෙර දිනයක් ලබා ගැනීමේ පහසුකම යටතේ අත්‍යවශ්‍ය සේවාව හරහා විදෙස් ගමන් බලපත්‍රයක් ලබා ගැනීමට දිනයක් වෙන් කරගැනීමට ආරම්භ කරන අවස්ථාවේදී ම එම වෙබ් අඩවියේ මුලින්ම දිස්වන්නේ එක් දින සේවාව යටතේ කොළඹ ප්‍රධාන කාර්යාලයෙන් ගමන් බලපත්‍රයක් ලබා ගැනීමට ළඟම දිනය ලෙස සඳහන් වන්නේ 2025 අගෝස්තු මාසයේ 04 දින සිටය. මාතර ශාඛාවෙන් 2025 වර්ෂයේ අගෝස්තු 15 වන දින සිටත්, නුවර කාර්යාලයෙන් 2025 වර්ෂයේ සැප්තැම්බර් 01 වන දා සිටත්, වව්නියා කාර්යාලයෙන් 2025 වර්ෂයේ අගෝස්තු 04 දින සහ කුරුණෑගල 2025 වර්ෂයේ අගෝස්තු 15 වන දින සිටත්ය. ඒ පෙබරවාරි මාසයේ සිට මාස 06ක් වැනි දීර්ඝ කාලයකට පසුවය.
වෙබ් අඩවියේ දිස්වන ආකාරයට සාමාන්‍ය සේවාව යටතේ ගමන් බලපත්‍රයක් ලබා ගැනීමට කොළඹ ප්‍රධාන කාර්යාලයෙන් ළඟම දිනය ලෙස සඳහන් වන්නේ 2025 ජූනි මාසයේ 12 දින සිටය. මාතර ශාඛාවෙන් 2025 වර්ෂයේ ජුනි 27 වන දින සිටත්, නුවර කාර්යාලයෙන් 2025 වර්ෂයේ ජූලි 23 වන දා සිටත්, වව්නියා කාර්යාලයෙන් 2025 වර්ෂයේ ජුනි 09 දින සහ කුරුණෑගල 2025 වර්ෂයේ ජූනි 27 වන දින සිටත්ය.
