මුදල් විශුද්ධිකරණය පනත යටතේ ජනවාරි 25 වන දින බෙලිඅත්ත පිවිසුම් මාර්ගය අසළදී අත්අඩංගුවට ගෙන රක්ෂිත බන්ධනාගාර ගත කර සිටි හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ ජනවාරි 27 වන දින ඇප මත මුදා හරින ලෙස කොළඹ මහේස්ත්‍රාත් අධිකරණය නියෝග කර තිබිණි.
දීර්ඝ කරුණු සලකා බැලීමකින් පසුව, යෝෂිත රාජපක්ෂ රුපියල් ලක්ෂ 500 බැගින් වූ ශරීර ඇප දෙකක් මත මුදා හැරීමට නියම කර තිබුණි. සැකකරුගේ විදේශ ගමන් තහනම් කළ අධිකරණය සෑම මසක ම අවසන් ඉරු දින පොලිස් මූල්‍ය අපරාධ විමර්ශන කොට්ඨාසයට වාර්තා කළ යුතු බවද සාක්ෂිකරුවන්ට බලපෑම් කිරීමෙන් වැළකිය යුතු බවද නියෝග කර තිබිණි.
යෝෂිතතවදුරටත් රක්ෂිත බන්ධනාගාරගත කිරීමට තරම් සහ අධිකරණය සෑහීමකට පත්වන ආකාරයේ කරුණු ඉදිරිපත් කිරීමට අපරාධ පරීක්ෂණ දෙපාර්තමේන්තුව අසමත් වීම හේතුවෙන් ඇප පනතේ ප්‍රතිපාදනවලට අනුව සැකකරු ඇප මත මුදා හරින බවත් මහේස්ත්‍රාත්වරයා දැනුම් දී තිබිණි.
අත්අඩංගුවට ගත්තේ ඇයි?
මුදල් විශුද්ධිකරණය සම්බන්ධයෙන් විමර්ශන තුනක් යෝෂිත රාජපක්ෂට එරෙහිව පැවැත්වෙන අතර ඒ විමර්ශන මාලාව අතරින් එක් විමර්ශනයකට ඔහු මෙසේ අත්අඩංගුවට ගෙන තිබුණි. ඒ 2012 වසරේ රත්මලාන, සිරිමල් මාවතේ රුපියල් මිලියන 350ක මුදලකට සැකකරු නිවසක් සහිත පර්චස් 31.5ක ඉඩමක් මිල දී ගැනීම සම්බන්ධයෙන් පැවැත්වෙන විමර්ශනයකි.
ජනවාරි 27 වන දින රත්මලානේ ඉඩමට අදාළ නඩුකරය කැඳවූ අවස්ථාවේදී විමර්ශන කරන අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසය වෙනුවෙන් පෙනී සිටි අතිරේක සොලිසිටර් ජෙනරාල් දිලීප පීරිස් මුදල් විශුද්ධිකරණය සම්බන්ධයෙන් යෝෂිත රාජපක්ෂට එරෙහිව අධිකරණය ඉදිරියේ කරුණු දක්වා තිබිණි. ‘රත්මලාන, සිරිමල් මාවතේ රුපියල් මිලියන 350ක මුදලකට සැකකරු විසින් නිවසක් සහිත පර්චස් 31.5ක ඉඩමක් මිල දී ගැනීම සම්බන්ධයෙන් විමර්ශන සිදු කරනවා. ඩේසි ෆොරස්ට් නමැති කාන්තාවගේ නමක් මෙම ප්‍රශ්නගත ඉඩමේ ඔප්පුවේ සඳහන් වෙනවා. මේ කාන්තාව සැකකරුගේ මිත්තණිය බව විමර්ශනවලින් හෙළි වී තිබෙනවා. එම කාන්තාව මෙම නඩු කටයුත්තේ පළමු වන සැකකාරිය වශයෙන් නම් කර තිබෙනවා. මෙම තැනැත්තිය සුලේමන් රෝහලේ මෙන් ම ගුරුවරියක ලෙසත් සේවය කර තිබෙනවා. ඊට අමතරව ඇය ශාන්ත තෝමස් විද්‍යාලයේ නේවාසිකාගාර පාලිකාව වශයෙන්ද කටයුතු කළ තැනැත්තියක්. ඇයට මුල දී හිමි වී තිබෙන්නේ රුපියල් 250 ක හෝ 300 ක වැටුපක් පමණයි. මේ තරම් විශාල දේපළක් මිලදී ගැනීමට තරම් මුදලක් ඇය සතුව තිබී නැහැ. ඇය මුලින් ම පොලිසියට ලබා දුන් ප්‍රකාශයේ පවසලා තියෙනවා තමන් සතුව නිශ්චල දේපළ නැහැ කියලා. ඇය යළිත් වතාවක් කියලා තිබෙනවා දෙවන සැකකාර යෝෂිත රාජපක්ෂ මේ දේපළ මිල දී ගත්තා කියලා. තවත් අවස්ථාවක ඇය පොලිසියට ලබා දුන් කටඋත්තරයේ සඳහන් කර තියෙනවා මුස්ලිම් ජාතිකයෙක් ලබා දුන් මැණික් මල්ලක් විකුණා ලැබුණු මුදල්වලින් මේ දේපළ මිල දී ගත්තා කියලා. පසුව මේ ඉඩමේ ඔප්පුව පොලිසිය සොයා ගෙන තිබෙන්නේ පාලිත ගමගේ නමැත්තෙක් භාරයේ තිබිලා. පොලිසියට ඔහු පවසා තිබෙනවා, මහින්ද රාජපක්ෂ හිටපු ජනාධිපතිවරයාගෙන් මේ ඔප්පුව ලැබුණා කියලා. මේ කරුණු සලකා බලද්දී, මෙම ඉඩමේ ඩේසි ෆොරස්ට් නමැති කාන්තාවගේ නම සඳහන්ව තිබුණත් එය පාලනය කර තිබෙන්නේ වෙනත් පිරිසක්’
යෝෂිතගේ ආදායම
යෝෂිත රාජපක්ෂ 2006 වසරේ ලු‍තිනන්වරයෙකු වශයෙන් නාවික හමුදාවට බැඳී 2016 පෙබරවාරි 28 දින වැඩ තහනමට ලක් විය. නාවික හමුදාවේ සේවය කරන විට ඔහුට ලැබී ඇත්තේ මාසිකව රුපියල් 73000ක වැටුපකි. එම මුදල සෘජුවම ඔහුගේ ගිණුමට බැර වී ඇති අතර එම ගිණුමෙන් කිසිදු මුදලක් ඔහුගේ ගිණුමෙන් ආපසු ලබා ගෙන නොතිබුණු බව අධිකරණයට කරුණු දක්වමින් අතිරේක සොලිසිටර් ජෙනරාල් දිලීප පීරිස් පවසා තිබුණි. 2006 දෙසැම්බර් 14 දින නාවික හමුදාවට බැඳී ඇති යෝෂිත රාජපක්ෂට එරෙහිව චෝදනා කිහිපයක් එල්ල වී ඇති අතර ඔහුවනාවික හමුදාවට ඇතුළත් කරගැනීමේදී සලකා බැලූ අධ්‍යාපන සුදුසුකම්, නාවික හමුදාව තුළ ඔහුට ලැබුණ විදේශ පුහුණු පාඨමාලා ඒ අතරට ඇතුළත්ය.
අතීත කතාව
යෝෂිත රාජපක්ෂ මහතා 2016 වසරේ ජනවාරි 30 වන දින සීඑස්එන් නාලිකාව සම්බන්ධයෙන් මූල්‍ය අපරාධ කොට්ඨාසය අත්අඩංගුවට ගෙන තිබුණි. එම අවස්ථාවේදී ඔහු ඇතුළු සැකකරුවන් සිව්දෙනකු පුරා මාස 1 1/2කට ආසන්න කාලයක් රක්ෂිත බන්ධනාගාරගත කොට තිබූ අතර මහාධිකරණය කළ නියෝගය අනුව 2016 මාර්තු 14 වන දින ඔවුන් ඇප මත නිදහස් කෙරුණී. එහිදී ඔවුන්ට එරෙහිව, සී.එස්.එන්. නාලිකාව ස්ථාපිත කිරීමේදී යොදවා ඇති රුපියල් මිලියන 234ක ප්‍රාග්ධනය අතරින් කොටසක් ව්‍යාජ ගනුදෙනු හා නීත්‍යනුකූල නොවන ආකාරයෙන් උපයා ගැනීම, කූඨ ලේඛන සකස් කිරීම, සාපරාධී විශ්වාසය කඩකිරීම, සාපරාධී පරිහරණය, රේගු පනත යටතේ ගැනෙන වැරදි සිදුකිරීම හා සමාගම් පනත උල්ලංඝනය කිරීම යන චෝදනා එල්ල වී තිබිණි.
යෝෂිත ගැන විමර්ශන
මුදල් වංචා විමර්ශනවලට අනුව සේවය අත්හිටුවීමෙන් අනතුරුව හමුදා මූලස්ථානයේ අවසරයකින් තොරව යෝජිත රාජපක්ෂට නාවික හමුදා කඳවුරකට ඇතුළුවිය නොහැකි බවටද තහනමක් පනවා තිබිණි. එහෙත් එම තීරණය ආපසු හරවමින් 2016 වසරේ පෙබරවාරි මස 28 වනදා සිට බලපැවැත්වෙන පරිදි හිටපු ජනාධිපති මෛත්‍රීපාල සිරිසේනගේ විශේෂ නියෝගයකට අනුව යෝෂිත රාජපක්ෂ නාවික හමුදා ලුතිනන් තනතුරේ යළි පිහිටුවනු ලැබිණි. එම පත්කිරීමේ නියෝගයෙන් දින කිහිපයක පසුව යෝෂිත රාජපක්ෂගේ විවාහ මංගල්‍යය සිදු කෙරුණු අතර එහිදී යෝෂිත රාජපක්ෂට නාවික හමුදා නිල ඇඳුමෙන් සැරසී, නාවුක හමුදා සමාචාරයන් සිදු කරන ලදි.
පළමු කරුණ ලෙස විමර්ෂනයේදී යෝෂිත රාජපක්ෂගේ අධ්‍යාපන සුදුසුකම් පරීක්ෂණ මණ්ඩලය නිරීක්ෂණය කර ඇත. යෝෂිත රාජපක්ෂ නාවික හමුදාවට ඇතුළත් වූ පාඨමාලා අංක 45 සඳහා ඉරිදා පුවත්පත්වල දැන්වීම් පළකර ඇත්තේ 2006 ඔක්තෝබර් මාසයේදීය. එහි දක්වා ඇත්තේ නාවික හමුදාවේ විධායක අංශයට කැඩෙට් නිලධාරීන් බඳවා ගැනීම පිළිබඳවය. විද්‍යා, වාණිජ හා කලා විෂය ධාරා යටතේ අපොස උසස්පෙළ සාමාර්ථ දෙකක් ඒ සඳහා සුදුසුකම් වශයෙන් ඉල්ලා ඇත. ඒ අපොස සාපෙළ ගණිතය, විද්‍යාව, ඉංග්‍රීසි, සිංහල හෝ දෙමළ යන විෂයන් සම්මාන සාමාර්ථ 6ක් සමඟින් සමත් විය යුතු බව සඳහන් කරමිනි.
නාවික හමුදාවේ විධායක අංශය සඳහා කැඩෙට් නිලධාරීන් බඳවා ගැනීම සඳහා එතෙක් පැවති සුදුසුකම වී ඇත්තේ අපොස උසස්පෙළ විද්‍යා, ගණිත විෂය ධාරාවන්ගේ සුදුසුකම්ය. එයට වාණිජ හා කලා විෂය ධාරාවන් එකතු කිරීම මුල්වරට සිදුවී ඇත්තේ එම කණ්ඩායම බඳවා ගැනීමේදීය.
යෝෂිත රාජපක්ෂ කලා විෂයන්වලින් උසස්පෙළ හැදෑරුවෙකි. ඔහුට ඇත්තේ උසස්පෙළ සාමාන්‍ය සාමාර්ථ දෙකක් පමණය. පරීක්ෂණ මණ්ඩලය යෝෂිත රාජපක්ෂගේ පෞද්ගලික ලිපිගොනුව පරීක්ෂා කර ඇත. ඔහුට අපොස සාපෙළ විභාගයේ සිංහල සඳහා සම්මාන සාමාර්ථයක් ඔහු සුදුසුකම් ඉදිරිපත් කරන 2003 වසරට අදාලව තිබී නැති අතර බී සාමාර්ථයක් ලැබී ඇත්තේ 2004 වසරේ විභාගයේදීය. විභාග ප්‍රතිඵලයන් සඳහන් වී ඇත්තේ ඔහුගේ අයදුම්පත්‍රයේ පමණක් බවත් ඔහුගේ අපොස සාමාන්‍ය පෙළ හා අපොස උසස්පෙළ විභාගවලට අදාල මුල් සහතික හෝ ඡායා පිටපත් ඔහුගේ ලිපිගොනුවේ ඇතුළත් වී නැති බව පරීක්ෂණයේදී හෙළි වී තිබුණි. පරීක්ෂණ මණ්ඩලය මුල් සහතික හෝ ඡායා පිටපත් ඉදිරිපත් කරන ලෙස යෝෂිත රාජපක්ෂගෙන් ඉල්ලීමක් කර ඇති අතර එහිදී ඔහු පවසා ඇත්තේ එම මුල් සහතික නාවික හමුදාවට භාරදුන් බවය.
යෝෂිතට වෙනම ආරක්ෂකයන්
ත්‍රිකුණාමල නාවික පුහුණු ඇකඩමියේ පුහුණු වන කාලයේදී යෝෂිත රාජපක්ෂගේ ආරක්ෂාව සඳහා ජ්‍යෙෂ්ඨ නාවික නිලධාරීන් තුන්දෙනෙකු යොදවා ඇත. ඊට අමතරව ජනාධිපති ආරක්ෂක අංශයේ සාමාජිකයන්ද ඔහුගේ ආරක්ෂාවට පුහුණු කලාපයේ ස්ථානගතව සිට ඇත.
යෝෂිත රාජපක්ෂ ඔහුගේ පළමු විදේශ පුහුණු පාඨමාලාව සඳහා ගොස් ඇත්තේ බි්‍රතාන්‍යයේ ඩාත්මවුන්ට්හි බි්‍රටානියා රෝයල් නාවල් කොලේජ් වෙතය. ඒ කැඩෙට් පුහුණුව සඳහාය. එම පාඨමාලාවේ නම රෝයල් නාවල් යන්ග් ඔෆිසර්ස් කෝස්ය. ඔහු එහි ගියේ 2007 ජනවාරි 07 දිනදීය. ඔහු නාවික හමුදාවට ඇතුළත්වී මාසයකත් අඩු කාලයකදීය. ඒද බි්‍රතාන්‍ය රජයෙන් ලබාදුන් ශිෂ්‍යත්වයක් මත නොවේ. ඔහුගේ වියදම් සදහා ලංකා රජයෙන් මුදල් ගෙවා තිබුණි.
ඉන්පසු උප ලුතිනන් පාඨමාලාවක් සඳහා ඔහු හැම්ෂයර් කොලින්වුඞ්හි මැරිටයිම් වෝෆාරි ස්කූල් වෙත ඇතුළත් වී තිබුණි. ඒ 2008 මැයි 15 සිට ඔක්තෝබර් 10 දක්වා පාඨමාලාවකටය. ඒ සඳහාද මුදල් ලංකා රජය ගෙවා ඇත. මේ පාඨමාලා තුනම යෝෂිත රාජපක්ෂට අදාළ ඒවා නොවන අතර ඒ සඳහා අනුමැතිය ලබාදී ඇත්තේ ආරක්ෂක අමාත්‍යාංශයෙනි.
ඔහු ලංකාවට පැමිණීමෙන් පසු මිඩ්ෂිප්මන් විභාගය සඳහා 2009 ජනවාරි 26 සිට 30 දක්වා සයුර නැවට අනුයුක්ත කර ඇත. එය සිදුකර ඇත්තේ පාඨමාලාව අවසන්ව විසිරයෑමේදී ඔහුට උප ලුතිනන් තනතුර ලබාගැනීම සඳහාය. ඒ අනුව යෝෂිත රාජපක්ෂ අයත් 45 වැනි පාඨමාලා කණ්ඩායම 2009 මාර්තු 07 දින විසිර ගොස් ඇත. එම විසිරයෑමේ උත්සවයේදී පාඨමාලාවට ඇතුළත්වූ කාලයේ සිට පාඨමාලාව අවසන් වන කාලය දක්වාම විදේශගතව සිටි යෝෂිත රාජපක්ෂට එම පාඨමාලා කණ්ඩායමේ ‘බෙස්ට් මිඩ්ෂිප්මන්’ සම්මානයට හිමි ගෞරවනීය අසිපත පිරිනමා තිබිණි.
2009 ඔක්තෝබර් 29 සිට 2010 අගෝස්තු 31 දක්වා ඔහුව යුක්රේනයේ නැෂනල් යුනිවර්සිටි ඔෆ් ඩිෆෙන්ස් ඇකඩමිහි මාස්ටර්ස් ඩිප්ලෝමා පාඨමාලාවකට යවා තිබුණි. එහි කාලය 2011 අගෝස්තු 01 සිට 2014 මාර්තු 20 දක්වා විහිදී තිබුණු අතර ඒ සඳහා ඔහු විටින් විට සහභාගි වී ඇත. එම පාඨමාලාවද ඔහු සම්පූර්ණ කර නැත. එම පාඨමාලාව සඳහාද ඔහුට අනුමැතිය දී ඇත්තේ ආරක්ෂක අමාත්‍යාංශයය.
