කතරගම මැණික් ගඟ රක්ෂිතයේ පිහිටි ඉඩමක 2010 වර්ෂයේ ඉදිකළ නිවසක් සම්බන්ධයෙන් නැවත අපරාධ පරීක්ෂණ දෙපාර්තමේන්තුව විමර්ශන ආරම්භ කර ඇති බව පසුගිය සති කිහිපය පුරා දක්නට ලැබුණි. මෙම නිවස ඉදිකිරීම් කටයුතු කර ඇත්තේ මහින්ද රාජපක්ෂගේ පාලන සමයේදීය. වාරිමාර්ග දෙපාර්තමේන්තුවට අයත් මැණික් ගඟ රක්ෂිතයේ මෙම නිවස ඉදිකර ඇති අතර මෙම නිවසට අමතරව එම ප්‍රදේශයේ තවත් මෙවැනිම නිවාස ගණනාවක් සෙල්ල කතරගම සිට නාගහ ඉවුර ප්‍රදේශය දක්වා ඉදිකර ඇති බව පසුගිය කාලයේ සිදු කළ විමර්ශනවලදී අනාවරණය වී තිබිණි.
වාරිමාර්ග නීතිවලට අනුව ගඟ ඉවුරේ සිට මීටර් 60ක ප්‍රදේශයක ඉඩක් ගඟ ඉවුරේ සිට තබා ගොඩනැගිලි හෝ වෙනත් ඉදිකිරීම් සිදු කළ යුතු අතර මෙම නිවස ඉදිකර ඇත්තේ පාරිසරික නීති කඩා නිවසේ සිට මැණික් ගඟට පඩිපෙළක් ද ඉදිකරමිනි.
රාජපක්ෂ පවුලේ සාමාජිකයන් පරිහරණය කළ දේපළ ඉදිකිරීමට හමුදාව යෙදවීම මෙන්ම, ඔවුන්ගේ ආරක්ෂාවට කියා යෙදවූ හමුදා සෙබළුන් පුද්ගලික කාරණාවලට අවභාවිත කිරීම ගැන චෝදනා ගණනාවක් පසුගිය කාලය පුරා එල්ල වී තිබුණි. වරක් රාවය පුවත්පත හෙළිකළ පරිදි බැසිල් රාජපක්ෂ මහතාගේ බිරිඳගේ හැට්ට කට්ට ගැසීමට සහ බල්ලන් නෑවීමට පවා නාවික හමුදා සෙබළියන් හා සෙබළුන් යොදවා තිබුණු අතර, නාවික හමුදා නිලධාරියෙකු ලෙස කටයුතු කළ යෝෂිත රාජපක්ෂට සහායට හා ආරක්ෂාවට පවා විශාල හමුදා සෙබළුන් ප්‍රමාණයක් යොදවා තිබුණු බව පසුගිය කාලයේ සිදුකළ විමර්ශනවලදී අනාවරණය විය. මෙම නිවසද ඒ ආකාරයෙන්ම හමුදා නිලධාරීන් යොදවා ඉදිකළ නිවසක් බව විමර්ශනවලදී අනාවරණය වී තිබුණි.
අදාල ගොඩනැඟිල්ල සම්බන්ධයෙන් 2015 සමයේ පැවැති යහපාලන ආණ්ඩුව සමයේ විමර්ශනයක් ආරම්භ කර තිබුණු අතර ගෝඨාභය රාජපක්ෂ ජනාධිපතිවරයා වීමෙන් අනතුරුව එම විමර්ශනය ඇණහිට තිබුණි.
ඒ අනුව කතරගම මැණික් ගඟ රක්ෂිතයේ පිහිටි මෙම නිවස සම්බන්ධයෙන් හිටපු ජනාධිපති මහින්ද රාජපක්ෂගේ ආරක්ෂක ප්‍රධානී විශ්‍රාමික මේජර් නෙවිල් වන්නිආරච්චිගෙන් 2024 වර්ෂයේ දෙසැම්බර් 27 දින ප්‍රකාශයක් ලබා ගෙන තිබුණි. ඒ මහතාගෙන් අපරාධ පරීක්ෂණ දෙපාර්තමේන්තුව ප්‍රකාශයක් ලබා ගෙන ඇත්තේ ඔහු යටතේ සේවයට යොදවා තිබූ හමුදා සාමාජිකයන් ප්‍රශ්නගත කතරගම නිවසේ ඉදිකිරිම් කටයුතුවලට යොදාගෙන තිබීම නිසාය.
මෙම නිවසේ ඉදිකිරීම්වලින් පසු නිවසේ ආරක්ෂක කටයුතු සිදු කර ඇත්තේ නාවික හමුදාවේ සාමාජිකයෙකි. හිටපු ජනාධිපති මහින්ද රාජපක්ෂ මහතාගේ පුත්‍රයෙකු වන යෝෂිත රාජපක්ෂ මහතාගේ ආරක්ෂාවට අනුයුක්ත කර තිබූ නාවික හමුදා නිලධාරියකු එම නිවසේ සේවයට යොදවා තිබුණු නිසා 2025 වර්ෂයේ ජනවාරි 03 වන දින අපරාධ පරීක්ෂණ දෙපාර්තමේන්තුව යෝෂිත රාජපක්ෂගෙන් ප්‍රකාශයක් ලබාගෙන තිබුණි. නිවස ගැන විමසීමට යෝෂිත රාජපක්ෂ කැඳවූ මොහොතේ ඔහු විමර්ශන නිලධාරීන්ට පවසා ඇත්තේ කතරගම නිවස ගැන තමන් කිසි දෙයක් නොදන්නා බවත්, තමන්ට කිසිදෙයක් මතක නැති බවත්ය.
ජල බිල්පත් ගෝඨාභයගේ නමට
මැණික් ගඟ රක්ෂිතයේ වනාන්තර කොටසක් කපා ඉදිකළ නිවස කාමර 12ක් සහිත නිවසකි. මැණික් ගඟ දෙසට මෙම නිවසේ සිට මාර්ගයක් ඉදිකර ඇත. එම නිවසේ ලිපිනය වන්නේ වනරාජ පෙදෙස, ඩිපෝ පාර, කතරගමය. තවද එම නිවසට ජල සැපයුම් සහ විදුලිය ලබා ගෙන තිබුණි. එම ලිපිනය සහිත නිවසේ ජලය ලබාදීමේ ගිණුම් අංකය 32/07/012/035/17 වන අතර, ඉන්වොයිස් අංක 201508 යටතේ ජූලි මාසයේ රුපියල් 5522ක වතුර බිලක් අදාළ නිවසට ගෙවිමට ජල සම්පාදන හා ජලාපවහන මණ්ඩලය නිකුත් කර තිබුණු අතර එම බිල්පතෙහි ගෙවිය යුතු මුළු මුදල ලෙස රුපියල් 10,423.75 ක් සටහන් කර තිබුණි. 2015 ජූලි 29 දින ජාතික ජල සම්පාදන හා ජලාපවහන මණ්ඩලය නිකුත් කර තිබුණු ජල බිල්පතේ සඳහන් කර ඇති ආකාරයට නිවසේ හිමියා ලෙස සඳහන් කර ඇත්තේ ගෝඨාභය රාජපක්ෂ මහතාගේ නමය.
ලංකා පුවත්පතේ කර්තෘ අත්අඩංගුවට ගැනීම
2010 ජනවාරි 26 පැවති ජනාධිපතිවරණයෙන් මහින්ද රාජපක්ෂ ජයග්‍රහණය කිරීමෙන් පසු, කතරගම රක්ෂිතයේ පිහිටි සුඛෝපභෝගී නිවස සම්බන්ධයෙන් ලංකා පුවත්පතේ ලිපියක් පළ කිරීම සම්බන්ධයෙන් 2010 ජනවාරි 29 වන දින ලංකා පුවත්පතේ හිටපු කර්තෘ චන්දන සිරිමල්වත්ත අපරාධ පරීක්ෂණ දෙපාර්තමේන්තුවෙන් අත්අඩංගුවට ගත් අතර ලංකා පුවත්පතට සීල් තැබීය. තවද සිරිමල්වත්ත මහතාව ත්‍රස්ත මර්දන පනත යටතේ දින 18ක රැඳවුම් නියෝගයක් මත අපරාධ පරීක්ෂණ දෙපාර්තමේන්තුවේ රඳවා තබාගෙන සිටියහ. 2010 පෙබරවාරි 16 දින සිරිමල්වත්ත මහතා අධිකරණයට ඉදිරිපත් කළ අවස්ථාවේදී ඒ මහතා නිදහස් කරන ලෙස ගංගොඩවිල මහේස්ත්‍රාත් අධිකරණය නියමකර තිබුණි. එහිදී සිරිමල්වත්ත මහතාට එරෙහිව කිසිදු චෝදනාවක් ඉදිරිපත් කිරීමට අපරාධ පරීක්ෂණ දෙපාර්තමේන්තුව අසමත් වූ නිසා, සිරිමල්වත්ත මහතා කිසිදු ඇප කොන්දේසියක් නොමැතිව නිදහස් කරන ලෙස මහේස්ත්‍රාත්වරයා අපරාධ පරීක්ෂණ දෙපාර්තමේන්තුවට නියෝග කර තිබුණි.
එවකට රටේ ජනාධිපතිවරයා මහින්ද රාජපක්ෂ වූ අතර, ගෝඨාභය රාජපක්ෂ ආරක්ෂක ලේකම්වරයා විය.
ලංකා පුවත්පතේ හිටපු කර්තෘ චන්දන සිරිමල්වත්ත ඔහු මුහුණ දුන් සිදුවීම සම්බන්ධයෙන් අනිද්දාට අදහස් දක්වමින් මෙසේ පැවසීය.
‘2010 ජනවාරි මාසයේ මූල් සති කිහිපයේ කතරගම සුඛෝපභෝගී නිවස ගැන ලංකා පත්තරයෙන් හෙළිදරව්වක් කළා. ඉන්පස්සේ 2010 ජනවාරි 28 වෙනිදා අපරාධ පරීක්ෂණ දෙපාර්තමේන්තුවේ නිලධාරියෙක් දූරකථන ඇමතුමක් දීලා ප්‍රකාශයක් ලබා දෙන්න කියලා අපරාධ පරීක්ෂණ දෙපාර්තමේන්තුවට එන්න කීවා. මට පොලිස් පණිවිඩයක් එවන්න කියා, මම ඒ නිලධාරියට කිව්වා. මිරිහාන පොලිසිය හරහා මට පොලිස් පණිවිඩයක් එවනවා කියා ඔහු පොරොන්දු වුණා. ඒත් පසුවදා පොලිසිය ලංකා පුවත්පතේ කාර්යාලයට අපරාධ පරීක්ෂණ දෙපාර්තමේන්තුවේ නිලධාරීන් පිරිසක් ඇවිත් කිව්වා මගෙන් පුවත්පතේ පළ වූ විශේෂාංගයක් සම්බන්ධයෙන් කට උත්තරයක් ලබාගන්න ඕනෑ, ඒ නිසා අපරාධ පරීක්ෂණ දෙපාර්තමේන්තුවට එන්න කියලා.
අපරාධ පරීක්ෂණ දෙපාර්තමේන්තුවේ විශේෂ විමර්ශන අංශයෙන් මගෙන් පැය 3ක පමණ ප්‍රකාශයක් ලබා ගත්තා. නිශ්චිතව කතරගම ගෙදර ගැන අපි ලියපු විශේෂාංගය ගැන මගෙන් අහන්නැතුව විවිධ දේවල් ගැන මගෙන් ප්‍රශ්න ඇහුවා. රාජපක්ෂ පවුල සමඟ මට ප්‍රශ්නයක් තියෙනවාද කියලා ඔහුන් මගෙන් ප්‍රශ්න කළා. රාජපක්ෂ පවුලේ කිසිම කෙනෙකු එක්ක මට පෞද්ගලික ප්‍රශ්නයක් නැහැ, මාධ්යවේදියෙක් විදියට රටේ ප්‍රශ්න ගැන රටේ ජනතාවට හෙළිදරව් කිරීම වගකීමක් නිසා ලංකා පුවත්පතේ කර්තෘ මණ්ඩලයේ සමාජිකයන් දූෂණ, චංචා හෙළිදරව් කරන්න වැඩ කරනවා කියලා මම ඔවුන්ට කීවා. මාව අපරාධ පරීක්ෂණ දෙපාර්තමේන්තුවට ගෙන්නුවේ කතරගම නිවස ගැන පළ කළ විශේෂාංගය නිසා වුණත් මගෙන් ප්‍රශ්න කළ නිලධාරියා මට කීවේ, ලංකා පුවත්පතේ පළවුණු විශේෂංග ගණනාවක් ගැන මගෙන් ප්‍රශ්න කරන්න අවශ්‍යයි කියලා.
එදා හවස පහට විතර අපරාධ පරීක්ෂණය දෙපාර්තමේන්තුවේ නිලධාරීන් මට කිව්වා, මාව රැඳවුම් භාරයේ තබාගන්න නියෝගයක් ලබාගෙන තියෙනවා කියලා. ජනවාරි 29 වෙනිදා ලංකා පුවත්පත් කාර්යාලයට රැගෙන ඇවිත් ලංකා පුවත්පත් කාර්යාලය සිල් කළා. දින කීපයක් මාව ලංකා පුවත්පත් කාර්යාලයට, පුවත්පත මුද්‍රණය කළ මුද්‍රණාලයට සහ මගේ නිවසට රැගෙන ඇවිත් විවිධ අය ප්‍රශ්න කළා. ඒත් පෙබරවාරි 16 වෙනකොට අපරාධ පරීක්ෂණ දෙපාර්තමේන්තුවට නීතිපති උපදෙස් ලැබිල තිබුණා මාව අධිකරණයට ඉදිරිපත් කරන්න කියලා. මාව අත්අඩංගුවට ගත්ත කාලයේ ලංකාවේ මාධ්‍යවේදීන්ට විවිධ හිරිහැර වුණ, මාධ්‍යවේදීන්ව මරා දමපු කාලයක්. මාව නිදහස් කරගන්න ලංකාවේ මාධ්‍ය සංවිධාන ගොඩක් වැඩ කළා. ඒ නිසායි මට බොරු චෝදනා දාලා හිරිහැරයක් කරන්න බැරි වුණේ.’
ගෝඨාභයගේ ප්‍රකාශය
කතරගම ප්‍රදේශයේ නිවසේ අයිතිය සම්බන්ධයෙන් අපරාධ පරීක්ෂණ දෙපාර්තමේන්තුව හිටපු ජනාධිපති ගෝඨාභය රාජපක්ෂ මහතාගෙන් 2025 ජනවාරි 17 දින පැය තුනකට ආසන්න කාලයක් ප්‍රශ්න කර ප්‍රකාශ සටහන් කර තිබුණි. ප්‍රකාශය ලබා දෙමින් ගෝඨාභය රාජපක්ෂ මහතා අපරාධ පරීක්ෂණ දෙපාර්තමේන්තුව හමුවේ පවසා තිබුණේ එම ගොඩනැගිල්ල සඳහා ජී. රාජපක්ෂ නමින් ලැබෙන විදුලි බිල සම්බන්ධයෙන් තමා කිසිවක් නොදන්නා බවත් එම ගොඩනැඟිල්ලට තමාගේ කිසිදු සම්බන්ධයක් නොමැති බවත් හිටපු ජනාධිපති ගෝඨාභය රාජපක්ෂ අපරාධ පරීක්ෂණ දෙපාර්තමේන්තුව හමුවේ පවසා තිබේ.
වතුර බිල තවමත් ගෝඨාභයගේ නමට
මගේ සම්බන්ධයක් නැහැ කියා ගෝඨාභය රාජපක්ෂ මහතා 2025 ජනවාරි 17 වන දින අපරාධ පරීක්ෂණ දෙපාර්තමේන්තුවට පැවසුවද, ජාතික ජල සම්පාදන හා ජලාපවහන මණ්ඩලයේ වෙබ් අඩවියේ අන්තර්ජාලය හරහා බිල්පත් ගෙවීමේ පහසුකම යටතේ ජල ගිණුම් අංක 32/07/012/035/17 ඇතුළත් කළ විට 2025 වර්ෂයේ ජනවාරි 22 වන දිනය දක්වා එම ජලය ගිණුම් අංකයට අයත් බිල්පත් හිමියා ලෙස, එනම් කතරගම සුඛෝපභෝගි නිවසේ ලිපිනය ලෙස සඳහන් ‘වනරාජ පෙදෙස, ඩිපෝ පාර, කතරගම’ යන ලිපිනයේ අයිතිකරු ලෙස ජලසම්පාදන හා ජලාලවහන මණ්ඩලයේ දත්තවල සඳහන් වන්නේ පී. රාජපක්ෂ නොව ගෝඨාභය රාජපක්ෂගේ නමය. ඒ අනුව 2025 ජනවාරි මාසයේ කතරගම නිවසේ ගෙවිය යුතු ජල බිල්පතේ අගය ලෙස රුපියල් 1846.56ක මුදලක් ජාතික ජල සම්පාදන හා ජලාපවහන මණ්ඩලයේ වෙබ් අඩවියේ සඳහන් වේ.
