රවීට හා ශානිට එරෙහිව බොරුව ඇත්ත කිරීමේ නිර්දේශ

ලසන්ත රුහුණගේ

ප්‍රසිද්ධ කිරීමට නියමිත කමිටු වාර්තාවල පාස්කු ඉරුදින ප්‍රහාරයට සම්බන්ධ මෙතෙක් හෙළිදරව් නොවූ පුද්ගලයන් පිළිබඳ විස්තර තිබේදැයි අප පසුගිය සතියේ උදය ගම්මන්පිල මහතාගෙන් කළ විමසීමේදී ඒ පිළිබඳ ආන්දෝලනාත්මක තොරතුරු තිබෙන ඔහු කීවේය. එහෙත් ඔහු ඔක්තෝබර් 21 වැනිදා ඉදිරිපත් කළ හිටපු මහාධිකරණ විනිසුරු ජයකි ද අල්විස් කමිටු වාර්තාවේ තොරතුරුවලින් නම් එවැන්නක් හෙළිදරව් වූයේ නැත. ඒ වෙනුවට ඔහු කළේ වත්මන් මහජන ආරක්ෂක අමාත්‍යාංශයේ ලේකම්, අපරාධ පරීක්ෂණ දෙපාර්තමේන්තුව භාර හිටපු ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න සම්බන්ධයෙන් සහ දැනට කොන්ත්‍රාත් පදනම මත පොලිස් සේවයට කැඳවා ඇති අපරාධ පරීක්ෂණ දෙපාර්තමේන්තුවේ අධ්‍යක්ෂ ලෙස කටයුතු කළ ශානි අබේසේකර පිළිබඳ එම කමිටු වාර්තාවේ ඇති නිර්දේශයක් හුවා දක්වමින් කාගේ හෝ කොන්ත්‍රාත්තුවක් ඉටු කිරීමය.

මෙහිදී උදය ගම්මන්පිල සඳහන් කරන ජයකි ද අල්විස් මහත්මියගේ කමිටු වාර්තාව කුමක්ද යන්න මුලින්ම තේරුම් ගත යුතුය. එය පාස්කු ඉරුදින ප්‍රහාර සම්බන්ධයෙන් එතෙක් ඇණහිට තිබූ හා අවසාන වශයෙන් අනාවරණය නොවී තිබු කරුණු ගැන කිසි විමර්ශනයක් ආරම්භ නොකළ  හිටපු අනුප්‍රාප්තික ජනාධිපති රනිල් වික්‍රමසිංහ විසින් 2024 ජුනි මස 12 වැනිදා පත්කරන ලද එකකි. එම කමිටුවට සැප්තැම්බර් 15 දින හෝ ඊට පෙර එම වාර්තාව බාරදෙන ලෙසද දැනුම් දී තිබුණි. ඒ අනුව එම කමිටුව සැප්තැම්බර් 15 වැනිදා හිටපු ජනාධිපති රනිල් වික්‍රමසිංහට එම වාර්තාව බාරදී තිබේ. ඒ ඔහු ජනපති ධුරයෙන් බැස යෑමට දින කිහිපයක් තිබියදීය. කිසිදු මාධ්‍ය ආවරණයකින් තොරව රහසිගතව බාරදීම සිදුවී ඇති එය මෙතෙක් පාස්කු ප්‍රහාරය සම්බන්ධයෙන් නොවිසඳුණු ප්‍රශ්න හෙළිදරව් කරගත යුතු යැයි වචනයක්වත් කියා නැති උදය ගම්මන්පිලට නම් ලැබී ඇත.

විශ්‍රාමික පොලිස් සාමූහිකය

එම කමිටුව පත්කරන විට නිල වශයෙන් මැතිවරණ කොමිසම ජනාධිපතිවරණය ප්‍රකාශයට පත්කර නොතිබුණද, ජනාධිපතිවරණයට අදාළ සංවිධාන කටයුතු දේශපාලන පක්ෂ විසින් සිදුකරමින් පැවතියේය. ජාතික ජන බලවේගයද විවිධ වෘත්තිකයන්ගේ හා සේවාවල සංවිධාන ගොඩනඟමින් තිබුණ අතර ඉන් එකක් වූයේ විශ්‍රාමික පොලිස් සාමූහිකයයි. එහි මංගල රැස්වීම ජුනි 09 වැනිදා මහරගම යොවුන් රඟහලේදී පැවැත්වුණු අතර එයට විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න මෙන්ම විශ්‍රාමික ජ්‍යෙෂ්ඨ පොලිස් අධිකාරි ශානි අබේසේකරද සම්බන්ධ වූහ. ඔවුන් දෙදෙනා ඒ සඳහා සම්බන්ධ වන බව ඊට පෙරම මාධ්‍ය මගින් ප්‍රචාරය විය. වර්තමානයේ වාර්තා වන්නේ එම ප්‍රචාරයන් නිසාම රවී සෙනෙවිරත්න මහතා රනිල් වික්‍රමසිංහගේ සහායට කැඳවා ගැනීමට සාගල රත්නායක මහතා එම දිනවල උත්සාහයක් ගෙන ඇති බවයි.

එය ව්‍යර්ථ වූ තැන කරළියට ගෙනෙන්නේ ඉහතින් සඳහන් කළ ජයකි ද අල්විස් කමිටුවයි. එය කිසිසේත්ම ජනාධිපති කොමිෂන් සභා නීතිය යටතේ ස්ථාපිත කරන ලද ජනාධිපති විශේෂ විමර්ශන කොමිසමක් නොවේ. එවැනි කමිටුවක අවශ්‍යතාවක් එම අවස්ථාවේ කිසිසේත් නොතිබුණ අතර එය ඉදිරි තුරුම්පුවක් වෙනුවෙන් හිටපු ජනාධිපති රනිල් වික්‍රමසිංහ නිර්මාණය කළ එකක් බව පෙනී යයි. මන්ද එම කමිටුවට විමර්ශනය කිරීමට ලබාදී තිබුණේ ‘පාස්කු ඉරුදින ප්‍රහාරයට පෙර මඩකලපුව වව්නතිව් ප්‍රදේශයේ මුරපලක සිටි පොලිස් නිලධාරීන් දෙදෙනෙකු ඝාතනය කිරීම සම්බන්ධ පරීක්ෂණයේදී එය සහරාන් හෂීම්ගේ ජාතික තවුහිත් ජමාත් සංවිධානය සිදුකළ එකක් බව හඳුනා ගැනීමට මාස 4ක කාලයක් ගතවීම සහ පාස්කු ඉරුදින ත්‍රස්ත ප්‍රහාරය සම්බන්ධයෙන් විදේශයකින් ලැබී තිබුණ බුද්ධි තොරතුරු සම්බන්ධයෙන් රාජ්‍ය බුද්ධි සේවය, ජාතික බුද්ධි ප්‍රධානි හා අනෙකුත් ආයතන විසින් ප්‍රමාණවත් පියවර ගෙන තිබේද යන්න හා ගෙන ඇති පියවර කවරාකාරද යන්න සොයා බැලීම’ නිසාය.

කමිටුවට පෙර කොමිෂන්

මෙහිදී අප අමතක නොකළ යුතු කරුණ වන්නේ මෙම පාස්කු ප්‍රහාරය සම්බන්ධයෙන් හිටපු ශ්‍රේෂ්ඨාධිකරණ විනිසුරු විජිත් මලල්ගොඩගේ ප්‍රධානත්වයෙන් හිටපු ජනාධිපති මෛත්‍රීපාල සිරිසේන විසින් කමිටුවක් පත්කර තිබූ බව, එම කමිටුවේ නිර්දේශ අනුව තවදුරටත් එම ප්‍රහාරය සම්බන්ධයෙන් සොයා බැලීම සඳහා ජනාධිපති කොමිෂන් සභා නීතිය යටතේ හිටපු ශ්‍රේෂ්ඨාධිකරණ විනිසුරු ජනක් ද සිල්වාගේ ප්‍රධානත්වයෙන් විශේෂ ජනාධිපති විමර්ශන කොමිසමක් පත්කළ බව, පාර්ලිමේන්තු තේරීම් කාරක සභාවක් පත්කළ බව හා එම ප්‍රහාරයේ වගවීම සම්බන්ධයෙන් ශ්‍රේෂ්ඨාධිකරණයට ඉදිරිපත් කරන ලද පෙත්සම් ගණනාවක් හත් දෙනෙකුගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් විනිශ්චය කර තීන්දුවක්ද ලබාදී ඇති බවයි.

එම ශ්‍රේෂ්ඨාධිකරණ නඩු විභාගයේදී අපරාධ පරීක්ෂණ දෙපාර්තමේන්තුව බාරව සිටි හිටපු ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න වගඋත්තරකරුවකු ලෙස නම්කර තිබුණද. රාජකාරිමය නොතකා හැරීම සම්බන්ධයෙන් කිසිදු දඬුවමක් හෝ වන්දි මුදලක් ශ්‍රේෂ්ඨාධිකරණය ඔහුට නියම කළේ නැත. එමෙන්ම ජනක් ද සිල්වා ජනාධිපති විශේෂ විමර්ශන කොමිසම හමුවට අපරාධ පරීක්ෂණ දෙපාර්තමේන්තුව බාරව සිටි හිටපු ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න හා අපරාධ පරීක්ෂණ දෙපාර්තමේන්තුවේ අධ්‍යක්ෂ ලෙස කටයුතු කළ හිටපු ජ්‍යෙෂ්ඨ පොලිස් අධිකාරි ශානි අබේසේකර සාක්ෂිකරුවන් ලෙස නොව වගඋත්තරකරුවන් ලෙස කැඳවා තිබුණද එම කොමිසම ඔවුන් දෙදෙනාට එරෙහිව නඩු පවරන ලෙස හෝ විනය පියවර ගන්නා ලෙස නිර්දේශ කර තිබුණේද නැත.

එසේ වුවද ජනක් ද සිල්වා කොමිසම නිර්දේශ කර තිබුණේ පාස්කු ඉරුදින ප්‍රහාරයේ හෙළිදරව් වූ එතෙක් නොවිසඳුණු කරුණු සම්බන්ධයෙන් තවදුරටත් විමර්ශනය කළ යුතු බවයි.

ඉන් එක් කරුණක් වූයේ කටුවාපිටිය දේවස්ථානයේ මරාගෙන මැරෙන ප්‍රහාරකයා වූ හස්තුන්ගේ බිරිඳ ලෙස කටයුතු කළ සාරා ජෙස්මින් හෙවත් පුලස්තිනීට සිදුවූයේ කුමක්ද යන්න සෙවිය යුතු බවයි. ‘පාස්කු ඉරිදා ප්‍රහාරයෙන් පසු සාරා ජීවතුන් අතර සිටින බවට සාක්ෂි දුන් සාක්ෂිකරුවන් දෙදෙනෙකුගේ සාක්ෂි පරීක්ෂණ කොමිසම වෙත ලැබුණි. හාදියා සිය සාක්ෂියේ සඳහන් කර ඇත්තේ 2019 අප්‍රේල් 26 වන දින සයින්දමරුදුහි සිදුවූ පිපිරීමෙන් පසු ඇය සිහිසුන්වූ බවයි. ඇය යථා තත්වයට පත්වීමෙන් පසු සාරා මෙන් හඬ නඟන කාන්තාවකගේ කටහඬක්ද ඇසිණි. සාරාගේ මව සමඟ කළ ඩීඑන්ඒ විශ්ලේෂණයෙන් පිපිරීමෙන් සාරා මියගිය බව තහවුරු වී නැත. මෙම සාක්ෂිය සැලකිල්ලට ගනිමින් පරීක්ෂණ කොමිසම නිර්දේශ කරන්නේ සාරා පිළිබඳ පරීක්ෂණ දිගටම කරගෙන යන ලෙසයි.’

සාරා ජෙස්මින්

සාරා ජෙස්මින් සයින්දමරුදු බෝම්බ පුපුරුවා ගැනීමේදී මියගිය බව පෙන්නීමට පසුගිය ගෝඨාභය රාජපක්ෂ ආණ්ඩු සමයේදී තුන්වන ඩීඑන්ඒ පරීක්ෂණයක් සිදුකරමින් උත්සාහයක් ගත්තද එය කිසිවකු පිළිනොගත් බවද සඳහන් කළ යුතුය. එමෙන්ම එම තුන්වන ඩීඑන් පරීක්ෂණය සිදුකරනු ලැබුවේ රවී සෙනෙවිරත්න හා ශානි අබේසේකර වරදකට පැටලීම සඳහා පරීක්ෂණයක් පසුගිය කාලයේ සිදුකළ ඉන්දුක ද සිල්වා නැමැති පොලිස් නිලධාරියා බවද මෙහිදී අප අමතක කළ යුතු නැත. මන්ද ඔහු රාජකාරි විෂමතාව සම්බන්ධයෙන් රවී සෙනෙවිරත්නගේ දෝෂ දර්ශනයට ඊට පෙර ලක්වූවකු බැවිනි.

එමෙන්ම එම කොමිෂන් සභා වාර්තාව සහරාන්ට ඉහළින් සිටියේ යැයි කියන අබු හින්ද් සම්බන්ධයෙන්ද විමර්ශන කළ යුතු බව කියයි.

‘අබු හින්ද්ගේ අනන්‍යතාව පිළිබඳව විමර්ශනය කරන බව පරීක්ෂණ කොමිෂන් සභාව ඉදිරියේ රහස් පොලීසිය විසින් සාක්ෂි ලබාදෙන ලදි. එම පරීක්ෂණ ඉදිරියට යා යුතුයි. අබු හින්ද්ගේ භුමිකාව පිළිබඳ පවත්නා සම්පත් සහ කාර්යභාරය තුළ රැඳී සිටිමින් අධ්‍යයනය කිරීමට පරීක්ෂණ කොමිසම බැඳී සිටියේය. අප විසින් අපගේ අනාවරණය ඉහත දක්වා ඇත.’

එමෙන්ම එම කොමිෂන් සභා වාර්තාව සඳහන් කරන්නේ, සහරාන් සහ ඔහුගේ කණ්ඩායම විසින් පමණක් මෙම ප්‍රහාර සිදුකර නොමැති බව හා ප්‍රහාර පිටුපස විදේශීය හස්තයක් ඇති බව සාක්ෂිකරුවන් කිහිපදෙනෙකු සාක්ෂි ලබාදුන් බවයි. එහෙත් ඔවුන්ගෙන් කිසිවෙකු හුදෙක් තහවුරු නොකරන ලද අනුමාන හැරෙන්නට එම කරුණ විමසා බැලීමට පරීක්ෂණ කොමිසමට සහාය දැක්වීමට කිසිදු සාක්ෂියක් ලබා නොදුන් බවයි.

බාහිර හස්තයක්

තවදුරටත් සඳහන් කරන්නේ, මෙම ප්‍රහාරය පිටුපස බාහිර හස්තයක් හෝ කුමන්ත්‍රණයක් ඇති බවට සාක්ෂිකරුවන් කිහිප දෙනෙකු ඇඟවුම් හෝ පැහැදිලිවම සාක්ෂි ලබාදුන් බවයි. එම අය වන්නේ,  කොළඹ අගරදගුරු මැල්කම් කාදිනල් රංජිත් හිමි, හිටපු ජනාධිපති මෛත්‍රීපාල සිරිසේන,  හිටපු අමාත්‍ය රවුෆ් හකීම්, හිටපු අමාත්‍ය රිෂාඩ් බදියුදීන්, හිටපු ආණ්ඩුකාර අසාත් සාලි, හිටපු පාර්ලිමේන්තු මන්ත්‍රී මුජිබර් රහුමාන්, රාජ්‍ය බුද්ධි සේවයේ හිටපු අධ්‍යක්ෂ නිලන්ත ජයවර්ධන,  විශේෂ කාර්ය බලකාය අණදෙන නිලධාරි  හිටපු ජ්‍යෙෂ්ඨ නියෝජ්‍ය පොලිස්පති එම් ලතීෆ්, විශ්‍රාමික ආරක්ෂක මාණ්ඩලික ප්‍රධානී රවීන්ද්‍ර විජේගුණරත්න,  අපරාධ පරීක්ෂණ දෙපාර්තමේන්තුව බාර හිටපු ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න හා එම දෙපාර්තමේන්තුවේ අධ්‍යක්ෂ ලෙස කටයුතු කළ ශානි අබේසේකරය.

වගවීම සම්බන්ධයෙන් එම කොමිෂන් සභාව සඳහන් කරන්නේ, 2019 අප්‍රේල් 21 වන දින සිදුවූ ත්‍රස්ත ප්‍රහාරය වැළැක්වීමට අපොහොසත්වීම සම්බන්ධයෙන් වගකිවයුතු සියලු බලධාරීන් හඳුනාගැනීමත්, සිය රාජකාරි ඉටුකිරීමට අපොහොසත්වූ සහ නොහැකියාව හේතුවෙන් නිසි පියවර නොගත් බලධාරීන් හඳුනා ගැනීමත් පරීක්ෂණ කොමිෂන් සභාව පිහිටුවන ලද නියෝගය මඟින් ඉල්ලා සිටි බවයි.

ඒ අනුව කොමිෂන් සභාවේ සහායට සිටි විමර්ශන කණ්ඩායම ප්‍රකාශ 1588ක් සටහන් කරගෙන ඇති අතර එම ප්‍රකාශවල ඇති සාක්ෂි සලකා බැලීමෙන් අනතුරුව සාක්ෂිකරුවන් 457 දෙනෙකුගෙන් කොමිෂන් සභාව සාක්ෂි විභාග කර තිබේ. එම සාක්ෂි පිටුවල ප්‍රමාණය 30,102කට අධික වන අතර පොත් 206ක්, ශ්‍රව්‍ය දෘශ්‍ය පටිගත කිරීම් ඇතුළු ලේඛන 2377ක් සාක්ෂි ලෙස ඉදිරිපත් වී ඇත. විමර්ශන කොමිෂන් සභාව ආසන්න වශයෙන් මාස 15ක කාලයක් ක්‍රියාත්මක වි ඇත.

නඩු පැවරිය යුතු අය

වගවීම සම්බන්ධයෙන් වගකිවයුත්තන් සඳහන් කරමින් සිය නිර්දේශයන් කොමිෂන් සභාව ඉදිරිපත් කර ඇත්තේ එවැනි දීර්ඝ ක්‍රියාවලියකින් පසුවය. ඒ අනුව අපරාධ නඩු පැවරීම සම්බන්ධයෙන් නීතිපතිවරයා සලකා බැලිය යුතු බව සඳහන් කර ඇත්තේ හිටපු ජනාධිපති මෛත්‍රීපාල සිරිසේන, ආරක්ෂක අමාත්‍යාංශයේ හිටපු ලේකම් හේමසිරි ප්‍රනාන්දු, හිටපු ජාතික බුද්ධි ප්‍රධානි සිසිර මෙන්ඩිස්, රාජ්‍ය බුද්ධි සේවයේ ප්‍රධානි නිලන්ත ජයවර්ධන, හිටපු පොලිස්පති පූජිත් ජයසුන්දර, හිටපු ජ්‍යෙෂ්ඨ නියෝජ්‍ය පොලිස්පති නන්දන මුණසිංහ, එවක පොලිස් අධිකාරි සංජීව බණ්ඩාර, එවක පොලිස් අධිකාරි චන්දන අතුකෝරාල, එවක පොලිස් අධිකාරි බීඊඅයි ප්‍රසන්න, එවක ප්‍රධාන පොලිස් පරීක්ෂක සරත් කුමාරසිංහ හා එවක ප්‍රධාන පොලිස් පරීක්ෂක සාගර ලියනගේ සම්බන්ධයෙන් පමණය.

විනය පරීක්ෂණ පැවැත්විය යුතු යැයි කියන්නේ, එවක නියෝජ්‍ය පොලිස්පති දේශබන්දු තෙන්නකෝන්, එවක සහකාර පොලිස් අධිකාරි සිසිල කුමාර හා එවක කටාන පොලිස් ස්ථානාධිපතිවරයා සම්බන්ධයෙන් පමණය.

අභියාචනාධිකරණ විනිසුරු ජනක් ද සිල්වා, අභියාචනාධිකරණ විනිසුරු නිශ්ශංක බන්දුල කරුණාරත්න, විශ්‍රාමික අභියාචනාධිකරණ විනිසුරු නිහාල් සුනිල් රාජපක්ෂ, විශ්‍රාමික මහාධිකරණ විනිසුරු අතපත්තු ලියනගේ බන්දුල කුමාර අතපත්තු. විශ්‍රාමික අමාත්‍යාංශ ලේකම් ඩබ්ලිව්එම්එම්ආර් අධිකාරි මහත්මිය එම කොමිෂන් සභාවේ සාමාජිකයෝ වූහ.

ඉදිරි පරීක්‍ෂණ නැහැ

හිටපු ජනාධිපති රනිල් වික්‍රමසිංහ එම විශේෂ ජනාධිපති විමර්ශන කොමිසමේ ඇති කරුණු සම්බන්ධයෙන් ඉදිරි පරීක්ෂණ නොකර ජනාධිපති ධුරයෙන් බැස යෑමට මාස දෙකක පමණ කාලයක් තිබියදී ජයකි ද අල්විස් කමිටුවක් පත් කරන්නේ පාස්කු ඉරුදින පරීක්ෂණ ඉදිරියට ගෙනයෑමට වැඩිම හැකියාවක් ඇති, එම ප්‍රහාරය සම්බන්ධයෙන් අනාවරණය වූ තොරතුරු හෙළිදරව් කර ගැනීමට නායකත්වය දුන් නිලධාරීන් දෙදෙනාට එම පරීක්ෂණ ඉදිරියට ගෙන යෑමට බාධා කිරීමට බව පැහැදිලිය. නොඑසේනම් ජනාධිපති විමර්ශන කොමිසමක් විසින් සලකා බැලූ කරුණක් සම්බන්ධයන් නැවත කරුණු සලකා බැලීමක් අවශ්‍ය වන්නේ නැත.

ජයකි ද අල්විස් කමිටුව එම වාර්තාවේ සඳහන් කරන ආකාරයට, ඔවුන්ට ජනක් ද සිල්වා ජනාධිපති විශේෂ විමර්ශන කොමිසමේ සියලු වාර්තා හා ලිපි ලේඛන අඩංගු තැටි ලබාදී ඇත. එම කමිටුව සාක්ෂි ලබාගෙන ඇත්තේ සාක්ෂිකරුවන් 51 දෙනෙකුගෙන් පමණය. මේ මගින් ජනාධිපති කොමිසමේ හා රනිල් වික්‍රමසිංගේ කමිටුවේ බර පිළිබඳ අවබෝධකර ගන්නට අපහසු වන්නේ නැත.

එම විමර්ශන කමිටුව විසින් ජනාධිපති විමර්ශන කොමිසමේ සොයා ගැනීම් හා නිර්දේශවලට අමතරව සිය වාර්තාවේ දක්වා ඇත්තේ වව්නතිව් මුරපලේ පොලිස් නිලධාරීන් ඝාතනය සම්බන්ධයෙන් විමර්ශන සිදු කිරීමේදී සිදුකර ඇති නොසැලකිලිමත්භාවයට රවී සෙනෙවිරත්නට හා ශානි අබේසේකරට එරෙහිව නඩු පැවරිය යුතු බවයි.

වව්නතිව් ඝාතනය එල්ටීටීඊ නොවේ

වව්නතිව් ඝාතන එල්ටීටීඊ දෙසට බැර කිරීම සඳහා හා පරීක්ෂණ වෙනතකට යොමු කිරීම සඳහා යුද හමුදා බුද්ධි අධ්‍යක්ෂ එකපිට එක බොරු වාර්තා ලබාදීම එම කමිටුවේ අවධානයට ලක්වී නැත.  ඝාතකයා ලෙස හිටපු එල්ටීටීඊ සාමාජිකයෙකු හැඟවෙන පරිදි ජැකට්ටුවක් දමා යෑම හා ඊට අදාළ තොරතුරු මත මෙම ඝාතන සිදුකර ඇත්තේ එල්ටීටීඊ සංවිධානය නොවන බවට කරුණු අනාවරණය කරගත්තේ රවි සෙනෙවිරත්නගේ සහ ශානි අබේසේකරගේ නායකත්වයෙන් බව කමිටුව කියන්නේ නැත. එම සැබෑ තොරතුරු සඟවා එවැනි නිර්දේශයක් කිරීමට තරම් එම කමිටුව කටයුතු කර ඇත්තේ ඔවුන්ට ලැබුණ කොන්ත්‍රාත්තුවක් අනුවද යන සැකය බැහැර කළ නොහැකිය.

එමෙන්ම පාස්කු ඉරුදින ප්‍රහාරය සම්බන්ධයෙන්ද රවි සෙනෙවිරත්නට එරෙහිව නඩු පැවරිය යුතු බව එම කමිටුව නිර්දේශ කරයි. ඒ සඳහා එක් හේතුවක් වශයෙන් සඳහන් කරන්නේ, අපරාධ පරීක්ෂණ දෙපාර්තමේන්තුවට ක්ෂණික ප්‍රහාරයක් අවමකර ගැනිමට නොහැකි වුවද, ප්‍රහාරයට පෙර ප්‍රහාරකයින් අත්අඩංගුවට ගැනීමට නොහැකි වීම මතයි.

තවත් හේතුවක් ලෙස සඳහන් කරන්නේ රවී සෙනෙවිරත්න මහතා විදේශගතව සිටියදී රාජ්‍ය බුද්ධි සේවයේ ප්‍රධානී නිලන්ත ජයවර්ධනගෙන් ලැබුණු ලිපිය ඔහු යටතේ සිටි නිලධාරීන්ට යැවීමට ප්‍රමාද වීමයි. උදය ගම්මන්පිලද බෙරිහන් දෙන මෙම ලිපිය වූ කලී නිලන්ත ජයවර්ධන රවී සෙනෙවිරත්නට යවනු ලැබූ ලිපියක් නොවේ. නිලන්ත ජයවර්ධන පොලිස්පතිවරයාට යවනු ලැබූ ලිපියකි. එහි පිටපතක් වෙනත් නියෝජ්‍ය පොලිස්පතිවරුන්ට යොමු කරන විට සෙනෙවිරත්න මහතාට ද යොමු කර තිබේ. නොඑසේව නිලන්ත ජයවර්ධනට ලැබී තිබුණු බුද්ධි තොරතුරු සම්බන්ධයෙන් පියවර ගන්නා ලෙස ඉල්ලා සෘජුව රවී සෙනෙවිරත්න මහතාට යොමු කරන ලද ලිපියක් නොවේ.

අපරාධ පරීක්ෂණ දෙපාර්තමේන්තුව

කෙසේ වෙතත් එම කමිටු වාර්තාවම පොලිසියේ එක් එක් අංශවල වගකීම හා ක්‍රියාකාරිත්වය සම්බන්ධයෙන් පැහැදිලි කරමින් අපරාධ පරීක්ෂණ දෙපාර්තමේන්තුව පිළිබඳව සඳහන් කරන්නේ, එය ශ්‍රී ලංකා පොලිසියේ විශේෂ විමර්ශන අංශයක් බවත්, පොලිස්පතිවරයාගේ උපදෙස් මත එය විමර්ශන ආරම්භ කරන බවත් හා මූල්‍ය වංචා සහ සයිබර් අපරාධ සම්බන්ධයෙන් ලිඛිත පැමිණිලි මත එය විමර්ශන සිදුකරන බවත්ය.

ඒ අනුව පැහැදිලි වන කරුණ වන්නේ අපරාධ පරීක්ෂණ දෙපාර්තමේන්තුව පාස්කු ඉරුදින ප්‍රහාරය සම්බන්ධයෙන් වගකිව යුතු නොවන බවය. ඒ අවසන් මොහොතේ ලැබුණු බුද්ධි තොරතුරු සම්බන්ධයෙන් ක්‍රියාකිරීමේ කිසිදු නියෝගයක් ඔවුන්ට පොලිස්පතිවරයාගෙන් ලැබී නොතිබුණු නිසාය.

එහෙත් මුලින් සඳහන් කළ ආකාරයටම රනිල් වික්‍රමසිංහ මහතාට මෙවන් ජයකි ද අල්විස් වාර්තාවක් අවශ්‍ය වන්නේ පාස්කු ප්‍රහාරයේ ඇත්ත හෙළිදරව් කර ගැනීමට නොව එම ඇත්ත වසා දැමීමට අවශ්‍ය වන නිසාය.

නැත්ත ඇත්ත කිරීම

මෙය හරියටම මහ බැංකු බැඳුම්කර වංචාව සම්බන්ධයෙන් චෝදනා එල්ල වෙද්දී එක්සත් ජාතික පක්ෂයට සම්බන්ධ නීතිඥයින් තිදෙනෙකුගේ කමිටුවක් මගින් එවැනි බැඳුම්කර වංචාවක් සිදුවී නොමැති බවට රනිල් වික්‍රමසිංහ මහතා වාර්තාවක් ලබා ගත්තා වැනිය. වෙනසකට ඇත්තේ එහි ඇත්ත නැත්ත කිරීමත් මෙහි නැත්ත ඇත්ත කිරීමත් පමණය.

ඒ ගැන තේරුම් ගැනීම තවත් කරුණු කිහිපයකින්ද කළ හැකිය. එකක් ජයකි ද අල්විස් මහත්මිය යනු අධිකරණ සේවයේදී වැඩ තහනම් කර සිටියාට අමතරව  රනිල් වික්‍රමසිංහ ජනාධිපති ධුරයට පත්වීමෙන් පසු සුරැකුම්පත් හා විනිමය කොමිසමේ සාමාජිකාවක ලෙසද පත්කළ තැනැත්තියක වීමයි.

වත්මන් ආණ්ඩුව සිදුකරනවා යැයි කියන විමර්ශන පාස්කු ඉරුදින ප්‍රහාරයට පමණක් සීමා නොවේ. එය  ලසන්ත වික්‍රමතුංග ඝාතනය ඇතුළු යට ගැසූ තවත් අපරාධ රැසක්ද සම්බන්ධයෙන් සිදුවීමට නියමිත එකක්ය. එහිදී එම අපරාධවලට සම්බන්ධ බොහෝ පිරිසක් බිය වීම සිදුවේ. එම අපරාධ හෙළිදරව් වීම වැළැක්වීමට ඔවුන් ඕනෑම දෙයක් කරති. ජයකි ද අල්විස් වාර්තාවේ ඇති රවී සෙනෙවිරත්න හා ශානි අබේසේකර සම්බන්ධයෙන් වන නිර්දේශ කියා පාන්නේ එම ඇත්තයි.