ලසන්ත රුහුණගේ
යුද හමුදාවේ උසස් වීම් හොර පාරෙන් යනුවෙන් යුතු ප්‍රවෘත්තියක් අප පුවත්පත විසින් පළකරනු ලැබුයේ ඔක්තෝබර් 06 වැනිදාට නියමිත පුවත් පතේය. ඒ ඔක්තෝබර් 10 වැනිදාට නියමිතව තිබූ යුද හමුදා දිනය හෙවත් යුද හමුදාවේ 75 වන සංවත්සර සැමරුමට අදාළවය.
එහිදී අප පෙන්වා දුන්නේ යුද හමුදා උසස් කිරීම් මණ්ඩලය විසින් අනුමත නොකරන ලද කිහිප දෙනෙකු යුද හමුදාපතිවරයාගේ අභිමතය පරිදි මේජර් ජෙනරාල් නිලයට උසස් කිරීම සඳහා උත්සාහයක් පවතින බවත් හා එම ක්‍රියාව සම්බන්ධයෙන් යුද හමුදා උසස් කිරීම් මණ්ඩලය විරුද්ධත්වය පළකර ඇති බවත්ය.
එමෙන්ම එසේ නියමිත සුදුසුකම් නොමැතිව උසස් කිරීමට යන අය අතර යුද හමුදාපතිවරයා නියෝජනය කරන ගජබා රෙජිමේන්තුවේ සාමාජිකයන්ද සිටින බවද අපි වාර්තා කළෙමු.
මෙම සටහන ලියන මොහොත වනවිට හිටපු හමුදාපතිවරුන්ගේද සහභාගිත්වයෙන් පැවැත්වූ යුද හමුදා දිනය හෙවත් යුද හමුදාවේ 75 වන සංවත්සරය අවසන් වී ඇති අතර පුදුමයකට මෙන් එම දිනයට සමගාමීව ප්‍රකාශයට පත්කර යුතු මේජර් ජෙනරාල්වරුන්ගේ හා බ්රිගේඩියර්වරුන්ගේ උසස් කිරීම් මෙතෙක් සිදුවී නැත.
ඒ සඳහා හේතුව වශයෙන් අපට වාර්තා වන්නේ එම උසස් කිරීම් සඳහා වන නිර්දේශ ඇතුළත් නාම ලේඛන වාර්තා ජනාධිපතිවරයාගේ අනුමැතිය සඳහා ආරක්ෂක අමාත්‍යාංශයට යොමු කර ඇතත්, අවස්ථා කිහිපයකදීම ආරක්ෂක අමාත්‍යාංශය එම වාර්තා ප්‍රතික්ෂේප කරමින් සුදුස්සන් තෝරා එවන ලෙසට හරවා එවා ඇති බවයි.
සේනාධිනායකයා වශයෙන් යුද හමුදා නිලධාරීන් අධිකාරියට පත්කිරීම සහ උසස් කිරීම ජනාධිපතිවරයා සිදුකරන අතර යුද හමුදාපතිවරයා විසින් නිර්දේශ කිරීමෙන් පසු අනුමැතිය සඳහා ඔහුට ඒවා ලැබෙන්නේ ආරක්ෂක අමාත්‍යාංශය මගිනි. යුද හමුදාපතිවරයා කරන්නේ ආරක්ෂක අමාත්‍යාංශයේ ලේකම්වරයාට එම උසස් වීම් නිර්දේශ ඉදිරිපත් කිරීමය.
එහෙත් යුද හමුදා සංවත්සරයට සමගාමීව සන්නද්ධ හමුදා සේනාධිනායක ජනාධිපති අනුර කුමාර දිසානායකගේ අනුමැතිය සහ ආරක්ෂක අමාත්‍යාංශයේ හා යුද්ධ හමුදාපති ලුතිනන් ජෙනරාල් විකුම් ලියනගේගේ නිර්දේශය මත ශ්‍රී ලංකා යුද්ධ හමුදා නිත්‍ය හා ස්වෙච්ඡා බලසේනාවන්හි නිලධාරීන් 139 දෙනෙක් සහ සෙසු නිලයන් 1273 දෙනෙකු වෙත නිල උසස්වීම් ලබාදුන් බව යුද හමුදා වෙබ් අඩවිය ඔක්තෝබර් 10 වැනිදා වාර්තා කර තිබේ.
එම වාර්තාවට අනුව ශ්‍රී ලංකා යුද්ධ හමුදා නිත්‍ය හා ස්වෙච්ඡා බලසේනාවන්හි ලුතිනන් නිලයේ නිලධාරීන් සහ උපකරණ පාලක නිලධාරීන් 131 දෙනෙකු කපිතාන් නිලයටත්, දෙවන ලුතිනන් නිලයේ නිලධාරීන් 08 දෙනෙකු ලුතිනන් නිලයටත් උසස්වීම් ලබා ඇත.
එමෙන්ම නිත්‍ය හා ස්වෙච්ඡා බලසේනාවන්හි බලලත් නිලධාරි 11 නිලයේ ජ්‍යෙෂ්ඨ කොමිෂන් නොලත් නිලධාරීන් 99 දෙනෙකු බලලත් නිලධාරි 1 නිලයටත්, මාණ්ඩලික සැරයන් නිලයේ ජ්‍යෙෂ්ඨ කොමිෂන් නොලත් නිලධාරින් 185 දෙනෙකු බලලත් නිලධාරි 11 නිලයටත්, සැරයන් නිලයේ ජ්‍යෙෂ්ඨ කොමිෂන් නොලත් නිලධාරීන් 380 දෙනෙකු මාණ්ඩලික සැරයන් නිලයටත්, කෝප්‍රල් නිලයේ කොමිෂන් නොලත් නිලධාරීන් 346 දෙනෙකු සැරයන් නිලයටත්, ලාන්ස් කෝප්‍රල් නිලයේ කොමිෂන් නොලත් නිලධාරීන් 111 දෙනෙකු කෝප්‍රල් නිලයටත් සහ සාමාන්‍ය සෙබලුන් 152 දෙනෙකු ලාන්ස් ක්‍රෝපල් නිලයටත් උසස් වීම් ලබා ඇත.
මෙම උසස් වීම් දෙස බලන විට පෙනෙන්නේ කපිතාන් නිලයෙන් ඉහළට එනම් මේජර්, ලුතිනන් කර්නල්, කර්නල්, බි්‍රගේඩියර් හා මේජර් ජෙනරාල් නිලවලට උසස් වීම් මෙවර ලැබී නැති බවයි.
මෙහිදී වඩාත්ම අසාධාරණයට පත් වන්නේ යුද හමුදාපති ධුරයට හිමි ලුතිනන් ජෙනරාල් තනතුරට පහළින් ඇති මේජර් ජෙනරාල් තනතුරට පත්වීමට නියමිතව සිටි පිරිසයි. මන්ද අවුරුදු 55 සම්පූර්ණ වීමේදී ඔවුන් විශ්‍රාම යා යුතු අතර එහිදී විශ්‍රාම යෑමට සිදුවන්නේ නියමිත නිලයට වඩා අඩු නිලයකින් වීම නිසාය. ඒ මගින් නිලය පමණක් නොව ඔවුන්ට හිමි විශ්‍රාම වැටුපද කප්පාදු වීම සිදුවේ.
මෙවන් තත්වයක් යුද හමුදාවට ඇති වූයේ ඇයි? අප විමසා බැලිය යුතු ප්‍රශ්නය වන්නේ එයයි. අපට ලැබී ඇති තොරතුරු අනුව මේජර් ජෙනරාල් තනතුරේ පුරප්පාඩු ඇති වූ විට ඒ සඳහා සුදුසුකම් සපුරා ඇති අය ඊළඟ තනතුරට උසස් වීම් ලබාදී පත් කිරීම සිදුකරයි. සාමාන්‍ය ලෙස එය යුද හමුදා දිනය එනතෙක් උසස් කිරීම සඳහා කල් ලබා ගන්නක් නොවේ. එහෙත් අවුරුදු 55 පසුවීමෙන් පසු පැරෂුට් පුහුණුව ලබා ඊට අදාළ ලාංඡනයද සතුකර ගැනීමේ බොළඳ ආශාවකින් පෙළුණු සේවා දීර්ඝ කිරීම් මත සිටින යුද හමුදාපතිවරයා මෙවර සිහින දැක ඇත්තේ ඔහුගේ පාලනයක් යටතේ යුද හමුදා දිනයට සමගාමීව මේජර් ජෙනරාල් තනතුරට විශාල පිරිසක් උසස් කරන්නටය.
එහෙත් සුදුසුකම් නොමැති තමාට කැමති පිරිසත් ඒ ගොඩට දා ගැනීමට ගොස් ඔහුගේ එම බලපොරොත්තු දැන් සුනේ සුන්වී ඇත. එහිදී අසාධාරණයට ලක්වී ඇත්තේ මේජර් ජෙනරාල් නිලයට උසස් වීම් ලැබීමට සිටි පිරිසටය. යුද හමුදාපතිවරයා ඔහුට ලබාදී ඇති සේවා දීර්ඝය කලින් අවසන් නොකළහොත් මෙම වසර අවසානයේදී විශ්‍රාම යනු ඇත. ඔහුට නව ජනාධිපතිවරයාගෙන් තවදුරටත් සේවා දීර්ඝයක් ලැබෙතැයි සිතිය නොහැකිය.
යුද හමුදාව තුළ නිලධාරීන්ගේ ජ්‍යෙෂ්ඨත්වය තීරණය කරනු ලැබුයේ පුහුණු පාඨමාලාවෙන් පසු නිකුත් කරනු ලබන ලේඛනයේ අනුපිළිවෙළටය. හමුදා උසස්වීම්වලට අදාළව තිබූ එම ක්‍රමය සම්බන්ධයෙන් වන නියෝගයක් රජයේ අති විශේෂ ගැසට් පත්‍රයක් මගින් පනවා තිබුණේ 1993 අගෝස්තු 17 වැනිදාය. එවක ජනාධිපති ආර් ප්‍රේමදාස විසින් එම අති විශේෂ ගැසට් පත්‍රය නිකුත් කර තිබු අතර එය හඳුන්වා තිබුණේ 1992 යුද්ධ හමුදා නිලධාරී නිත්‍ය බලසේනා සේවා නියෝග යනුවෙනි. ඒ 1992 ඔක්තෝබර් මස 08 දින සිට ක්‍රියාත්මක වන පරිදිය.
එහි කර්නල් හා ඊට ඉහළ නිලවලට කරන උසස් කිරීම් සම්බන්ධයෙන් මෙසේ සඳහන් කර ඇත. ‘කර්නල් සහ ඊට ඉහළ නිල සඳහා උසස් කළ යුත්තේ තෝරා ගැනීමෙනි. කර්නල් නිලයට උසස් කිරීමේදී උසස් කිරීමට අදාළ නිලය හා පත්වීම සඳහා හොඳම සුදුසුකම් ඇතැයි සැලකෙන නිත්‍ය ලුතිනන් කර්නල්වරයාට පමණක් එම උසස් වීම දිය යුතුය. බි්‍රගේඩියර් නිලයට උසස් කිරීමේදී උසස් කිරීමට අදාළ එම නිලය හා පත්වීම සඳහා හොඳම සුදුසුකම් ඇතැයි සැලකෙන නිත්‍ය කර්නල්වරයාට පමණක් එම උසස්වීම දිය යුතුය.
එසේ කෙරෙන සෑම තෝරා ගැනීමකදීම, නිලධාරියාගේ පසුගිය කාලයේ සේවා වාර්තාව හා ඔහු උසස් කිරීම පැහැදිලිවම යුද්ධ හමුදාවේ උපරිම යහපතට හේතුවේද යන ප්‍රශ්නය සලකා බැලිය යුතුය.’
එහි ජ්‍යෙෂ්ඨත්වය සම්බන්ධයෙන් සඳහන් කරන්නේ එම නියෝග ප්‍රකාශයට පත් කිරීමට පෙර අධිකාර ලත් නිලධාරීන්ගේ ජ්‍යෙෂ්ඨත්වය එක් එක් අනුප්‍රාප්තික අවුරුද්ද ආරම්භයේ ප්‍රකාශයට පත්කරනු ලබන නිලධාරීන්ගේ ප්‍රවර්තන ජ්‍යෙෂ්ඨත්ව ලැයිස්තුව අනුව නිගමනය කරනු ලැබිය යුතුය යන්නය.
එමෙන්ම එම නියෝග ප්‍රකාශයට පත්කිරීමෙන් පසු අධිකාරලත් නිලධාරීන්ගේ ජ්‍යෙෂ්ඨත්වය නිගමනය කළ යුත්තේ ගැසට් පත්‍රයේ ප්‍රකාශයට පත්කර ඇති ඔවුන් අධිකාරි ලබා ඇති ඒ ඒ දින අනුව විය යුතු බවය.
තවද එකම දවසේ අධිකාර ලබන ශිෂ්‍ය භටයන්ගේ ජ්‍යෙෂ්ඨත්වය නිගමනය කළ යුත්තේ ඔවුන් ස්වකීය ශිෂ්‍ය භට පුහුණුව ලබාගත් අභ්‍යාස ආයතතනවලින් සමත්වීමෙන් පසු පිට කරනු ලැබූ අනු පිළිවෙළ අනුව බව ද සඳහන් කර ඇත.
තමන්ට කැමති අයට විශේෂයෙන් සලකා උසස් කිරීම සඳහා මෙන්ම තම රෙජිමේන්තුවේ සමාජිකයන් ජ්‍යෙෂ්ඨත්වයෙන් ඉහළ තැනක තබා හමුදාපති ධුරය දක්වා පෙළ ගැස්සීමට මෙම නියෝග පසුගිය කාලයේ බාධාවක් වී තිබුණි. එම නිසාම ශවේන්ද්‍ර සිල්වා යුද හමුදාපතිවරයා ලෙස පත්වීමෙන් පසු ඉහත සඳහන් කරන ලද අති විශේෂ ගැසට් පත්‍රයේ 12 වන කරුණ ලෙස සඳහන් කර්නල් සහ ඊට ඉහළ නිල සඳහා උසස් කිරීම වෙනුවෙන් ලකුණු ක්‍රමයක් සකස් කර තිබුණි. එම ලකුණු ක්‍රමය ගුණාත්මක ඇගැයීම හා ප්‍රමාණාත්මක ඇගැයීම යනුවෙන් කොටස් දෙකකට වෙන්කර තිබූ අතර එම කොටස් යටතේ ලකුණු ලබාදීමට අදාළ කරුණු තවදුරටත් වර්ගීකරණය කර තිබේ.
ගුණාත්මක ඇගැයීම යටතේ සඳහන් කරන කරුණු වන්නේ, නිලධාරියකු බි්‍රගේඩියර් නිලය දැරීම, අණදෙන පත්වීමකින් ඉවත් කළ නිලධාරියකු නොවීම, කළමනාකරණ කුසලතා, පරිණතභාවය, අවංකභාවය හා පක්ෂපාතිත්වය, සෞඛ්‍ය තත්වය, පරීක්ෂණ හා නඩු කටයුතු ආදියයි.
එහිදි සිවිල් හා හමුදා දඬුවම් ලබා තිබීම. මූල්‍ය අවභාවිතය, ලිංගික අපචාරය, ද්වි භාර්යා සේවනය, ලේඛන සාවද්‍ය පරිහරණය, ද්‍රෝහිකම, වංචා යනාදි වැරදි ඇති නිලධාරීන් සලකා නොලබන බව දක්වා ඇත. නිවාඩු නොමැතිව නොපැමිණීමද සලකා නොබැලීමට හේතුවක් වේ.
ප්‍රමාණාත්මක ඇගැයීම යටතේ සඳහන් කරන්නේ නිලධාරියකු ගුණාත්මක ඇගැයීම යටතේ සලකා නොලබන්නේ නම් ප්‍රමාණාත්මක ඇගැයීමටද සලකා නොබලන බවයි.
ලකුණු ලබාදීම යටතේ මුළු ලකුණු 175ක ප්‍රමාණයක් ලබාදී ඇති අතර ඒ විනය වාර්තා සඳහා ලකුණු 20, විධාන පත්වීම් සඳහා ලකුණු 35, උපදේශක පත්වීම් සඳහා ලකුණු 15, කාර්ය මණ්ඩල පත්වීම් සඳහා ලකුණු 15, වෘත්තීය/අධ්‍යාපන සුදුසුකම් සඳහා ලකුණු 15, විශේෂ පැවරුම් සඳහා ලකුණු 10, වාර්ෂික රහස්‍ය වාර්තාව සඳහා ලකුණු 10, පදක්කම් සඳහා ලකුණු 10, ක්‍රීඩා ජයග්‍රහණ සඳහා ලකුණු 05, උසස් කිරීමේ මණ්ඩල සාමාජිකයන් ලබාදෙන ලකුණු 15 හා යුද හමුදාපතිවරයා විසින් ලබාදෙන ලකුණු 20ක් වශයෙනි.
මෙම ලකුණු ක්‍රමයේ යුද හමුදාපතිවරයා ලබාදෙන ලකුණු 20 හා උසස් කිරීමේ මණ්ඩල සාමාජිකයන් විසින් ලබාදෙන ලකුණු 15න් ඕනෑම නිලධාරියකු ඊළඟ නිලයට උසස් කිරීම හෝ නොකිරීම තීරණය කළ හැකි තරම් වන ලකුණු ප්‍රමාණයකි. පසුගිය කාලයේ ගජබා රෙජිමේන්තු සාමාජිකයන් ඊලඟ හමුදාපති ධුරය සඳහා පෙළගස්වනු ලැබුයේ මෙම ලකුණු ලබාදීමේ ක්‍රමය මගින් ලකුණු ලබාදීම මගින් බව බැහැර කළ නොහැකිය.
යුද හමුදාවේ ස්වෙච්ඡා බලසේනාව සම්බන්ධයෙන් ගත්කල ද එම ලකුණු ක්‍රමයේ වෙනසක් නැත. එම ලකුණු ක්‍රමයට අමතර වශයෙන් එකතු කර ඇත්තේ සේවා කාලය සඳහා වසරකට එක් ලකුණ බැගින් ලකුණු 39ක් ලබාදීම පමණය. ඒ අනුව ස්වෙච්ඡා බලසේනාවේ මේජර් ජෙනරාල් නිලයට උසස් කිරීමේ මුළු ලකුණු සංඛ්‍යාව 214ක් වී ඇත. සේවා කාලයේ ලකුණු උසස් කිරීමකදී වෙනසක් කිරීම සඳහා බලපෑමක් ඇති නොකරන තරම්ය. මන්ද බොහෝ විට එකම පාඨමාලාවක පිරිසක් උසස් වීමට නියමිතව සිටින නිසාය.
හමුදාපතිවරයා විසින් විශේෂයෙන් සැලකීමට යැම නිසා නිත්‍ය හමුදාවේ මේජර් ජෙනරාල්වරුන්ගේ පුරප්පාඩු ගණනාවක් පවතින ලෙසම ස්වෙච්ඡා බල සේනාවේද එහි උපරිම නිලය හෙවත් එකම මේජර් ජෙනරාල් තනතුර පුරප්පාඩුව පවතී. එම මේජර් ජෙනරාල් තනතුර ස්වෙච්ඡා බල සේනාවේ නියෝජ්‍ය අණදෙන නිලධාරි ධුරය වීමද බැරෑරුම් තත්වයකි.
එහෙත් තවත් මාසයකට මදක් වැඩි කාලයකදී සේවා දීර්ඝය අවසන් වන වත්මන් යුද හමුදාපතිවරයාට නම් හමුදාව තුළ ඔහුගේ දායකත්වයෙන්ද ඇතිකර ඇති මෙම තත්වය පිළිබඳ වගේ වගක් නැති බව පෙනේ. ඒ නිසා හමුදාව තුළ ඇතිවී ඇති මෙම තත්වය පිළිබඳ සේනාධිනායක වන ජනාධිපතිවරයාගේ ඉක්මන් අවධානය යොමු වීම වැදගත්ය. එහිදී හමුදා උසස් කිරීම් සම්බන්ධයෙන් හඳුන්වා දී ඇති තාර්කික නොවන ලකුණු ක්‍රමයද අනිවාර්යෙන් යළි සලකා බැලිය යුතු එකක් බව අවධාරණය කළ යුතුය.
