දේශපාලනඥයන්ගේ ඥාතීන් කීදෙනෙකු රජයේ විශ්‍රාම වැටුප් ලබනවාද?

ජනාධිපති, අගමැති, කතානායක, ඇමති, ඇතුළු තනතුරුලාභීන්ගේ පෞද්ගලික කාර්ය මණ්ඩලයටත් අවුරුදු 5න් විශ්‍රාම වැටුප්

ලසන්ත රුහුණගේ

‘ඔබට රජයේ විශ්‍රාම වැටුපක් ලබා ගැනීමට නම් පළමුවෙන්ම රජයේ විශ්‍රාම වැටුප් සහිත ස්ථිර පත්වීමක් තිබිය යුතුය. එහිද අවුරුදු තුනක පරිවාස කාලයක් සම්පූර්ණ කිරීමෙන් පසු ස්ථීර සේවයට ඇතුළත් බවට ලිපියකින් සනාථ කළ යුතුය.

එය ඉන් නවතින්නේද නැත. රජයේ විශ්‍රාම වැටුපක් ලබා ගැනීම සඳහා ඔබ අවම වශයෙන් වසර 10ක කාලයක් සේවය කළ යුතුය. එමෙන්ම ඔබව විධිමත් ලෙස විශ්‍රාම ගන්වාද තිබිය යුතුය. මෙසේ අවුරුදු 10ක කාලයකින් විශ්‍රාම යෑමේ හිමිකම ලැබුණද ඒ සඳහා විශ්‍රාම වැටුප ලැබෙන්නේ අවුරුදු 55න් පසුය. මේ ආකාරයට අවුරුදු 10ක සේවා කාලයකින් පසු විශ්‍රාම වැටුප් හිමිකම ලැබෙන්නේ රාජ්‍ය ආයතනයක් රජයේ අවශ්‍යතාවය අනුව වසා දැමුවහොත් එවැනි අවස්ථාවක එහි සේවකයන්ටය.

එහෙත් අවුරුදු 10ක සේවා කාලයකින් පසු වෛද්‍ය මණ්ඩලයක් මගින් වෛද්‍ය හේතූන් මත තවදුරටත් සේවය කළ නොහැකි බවට නිර්දේශ කළහොත් පමණක් ඊට අතිරේකව එම අවස්ථාවේ සිටම විශ්‍රාම වැටුප් ලබාගත හැකිය.

ගුරුවරියන්ට, හෙදියන්, පොලිස් සේවයේ කාන්තාවන්, බන්ධනාගාර සේවයේ කාන්තාවන් ආදීන්ට වෙනත් ව්‍යාතිරේකයක් ඇති අතර ඒ වයස අවුරුදු 50 සම්පූර්ණ වීම හෝ අවුරුදු 20ක සේවා කාලයකින් විශ්‍රාම ගැනීමේ හැකියාවය.

මේ කොහි ආකාරයට රජයේ සේවයෙන් විශ්‍රාම ගියත් විශ්‍රාම වැටුප ලෙස උපරිමය ලැබෙන්නේ අවසාන වැටුපෙන් සියයට 90කට අඩු විශ්‍රාම වැටුපක්ය. වසර 10ක සේවා කාලයකට බොහෝ විට ලැබිය හැක්කේ අවසාන වැටුපෙන් සියයට 50ක පමණ විශ්‍රාම වැටුපක්ය.’

ඉහත සඳහන් පැහැදිලි කිරීම අප පසුගිය සතියේ කළේ පාර්ලිමේන්තු මන්ත්‍රීවරුන්ගේ හා ජනාධිපතිවරුන්ගේ විශ්‍රාම වැටුප් පිළිබඳ අනාවරණය කළ ලිපියේය.

ඊට සමාන දේශපාලනයට සම්බන්ධ තවත් විශ්‍රාම වැටුපක් තිබේ. එය තනතුරු දරන දේශපාලනඥයන්ගේ පෞද්ගලික කාර්ය මණ්ඩලයට ලබාදෙන විශ්‍රාම වැටුපක් ලෙස සරලව හැඳින්විය හැක. එහි ඇත්තේ මන්ත්‍රීවරුන්ගේ හා ජනාධිපතිවරුන්ගේ විශ්‍රාම වැටුපට වඩා එක් වෙනසක් පමණය. ඒ එම විශ්‍රාම වැටුපට දායකත්වයක් හෙවත් රාජ්‍ය සේවා අර්ථසාධක මුදල් එම පෞද්ගලික කාර්ය මණ්ඩලයෙන් ලබා ගැනීමය. ඒ නිසාම එම විශ්‍රාම වැටුප රජයේ අනෙකුත් විශ්‍රාමිකයන්ට මෙන්ම ගෙවනු ලබන්නේ විශ්‍රාම වැටුප් දෙපාර්තමේන්තුව මගිනි. නමුදු එම පෞද්ගලික කාර්ය මණ්ඩලයේ සාමාජිකයන් අවම අවුරුදු 10ක කාලයක් විශ්‍රාම වැටුප් ලබා ගැනීම සඳහා සේවය කළ යුතු නැත. මන්ත්‍රීවරුන්ට හා ජනාධිපතිවරුන්ට වාගේම ඔවුන්ට අවුරුදු 5ක කාලයකින් විශ්‍රාම වැටුපට හිමිකම් කිව හැකිය.

විශ්‍රාම වැටුප් දෙපාර්තමේන්තුවේ වෙබ් අඩවියට උඩුගත කර ඇති තොරතුරු අනුව ඒ සම්බන්ධයෙන් වන අතීතම චක්‍රලේඛය ලෙස අපට හමුවන්නේ  05/2010 යනුවෙන් 2010.05.25 දින එවක විශ්‍රාම වැටුප් දෙපාර්තමේන්තුවේ අධ්‍යක්ෂ ජනරාල් කේඒ තිලකරත්න  විසින් සියලුම අමාත්‍යාංශ ලේකම්වරුන්, පළාත් සභා ප්‍රධාන ලේකම්වරුන්, දෙපාර්තමේන්තු ප්‍රධානීන්, දිසා ලේකම්වරුන්  හා ප්‍රාදේශීය ලේකම්වරුන් අමතමින් යවන ලිපියකි. එහි උද්ධෘතය ‘විශ්‍රාම වැටුප් ව්‍යවස්ථා සංග්‍රහයේ “ට” උපලේඛනය අර්ථකතනය කිරීම’ යනුවෙන් නම්කර ඇත.

‘ගරු අමාත්‍යවරුන්ගේ කාර්ය මණ්ඩලයන්හි ඇතැම් තනතුරු වෙනුවෙන් විශ්‍රාම වැටුප් හිමිකම ලබාදිමට “ට” උපලේඛනය සකස්කොට ඇත. ඒ අනුව 1989-11-29 දිනැති ශ්‍රී ලංකා ප්‍රජාතාන්ත්‍රික සමාජවාදී ජනරජයේ ගැසට් පත්‍රය ප්‍රකාරව හා වරින් වර ඊට සිදුකරන ලද සංශෝධන වලට අනුව පහත සඳහන් තනතුරු “ට” උපලේඛනයට අයත්වේ’ යනුවෙන් එහි සඳහන් කර තිබේ. ඒ අනුව අනුමාන කළ හැක්කේ පෞද්ගලික කාර්ය මණ්ඩල මෙම විශ්‍රාම වැටුප 1989 දි හඳුන්වා දී ඇති එකක් බවය. ඉහත සඳහන් 05/2010 චක්‍රලේඛයේ අර්ථකතනයට අනුව විශ්‍රාම වැටුප් හිමිකම ඇති ජනාධිපතිවරයාගේ පෞද්ගලික කාර්ය මණ්ඩලය පෞද්ගලික ලේකම්, සම්බන්ධීකරණ ලේකම්. මහජන සම්බන්ධතා නිලධාරී යන තනතුරු සඳහා පමණක් අර්ථකතනය කර ඇති අතර අගමැතිවරයාගේ පෞද්ගලික ලේකම් පමණක් ඒ යටතේ අර්ථකථනය කර ඇත.

එහෙත් කතානායකවරයාගේ, කැබිනට් ඇමතිවරුන්ගේ, විපක්ෂ නායකවරයාගේ, ව්‍යාපෘති ඇමතිවරුන්ගේ, දිස්ත්‍රික් ඇමතිවරුන්ගේ, නියෝජ්‍ය ඇමතිවරුන්ගේ, නියෝජ්‍ය කතානායකගේ, නියෝජ්‍ය කාරක සභාපතිගේ පෞද්ගලික කාර්ය මණ්ඩලය ලෙස  පෞද්ගලික ලේකම්, සම්බන්ධීකරණ ලේකම් හා මහජන සම්බන්ධතා නිලධාරී යන තනතුරු දරන්නන් විශ්‍රාම වැටුප් හිමිකම ඇති නිලධාරීන් වශයෙන් අර්ථකථනය කර ඇත.

ඊට අමතරව ජනාධිපති ලේකම්ගේ පෞද්ගලික ලේකම් හා පෞද්ගලික සහකාර ද, කැබිනට් අමාත්‍යාංශ ලේකම්වරුන්ගේ සම්බන්ධීකරණ ලේකම් ද,  පළාත් සභා ප්‍රධාන ලේකම්වරුන්ගේ සම්බන්ධීකරණ ලේකම් ද විශ්‍රාම වැටුප් හිමි තනතුරු ලාභීන් ලෙස  අර්ථකථනය කර ඇත.

ඉහත සඳහන් තනතුරු විශ්‍රාම වැටුප් සහිත වූවත් නොවූවත්, තනතුර ස්ථීර බව නොසලකා වසර 05ක සේවා කාලයක් සම්පූර්ණ කර ඇත්නම් විශ්‍රාම වැටුප් ව්‍යවස්ථා සංග්‍රහයේ 2 සහ “අ අ” වගන්තිය යටතේ විශ්‍රාම වැටුපට පමණක් හිමිකම ඇති බව එහි සඳහන් කර ඇත. වසර 05ක සේවා කාලයක් සඳහා අවසන් වරට ලැබූ වැටුපෙන් 1/3 ක විශ්‍රාම වැටුපක් හිමිවන බවද, වසර 15ක සේවා කාලයක් සපුරා ඇත්නම් අවසන් වරට ලැබූ වැටුපෙන් 2/3 ක විශ්‍රාම වැටුපක් පාරිතෝෂිකයක් රහිතව හිමිවන බවද එහි සඳහන් කර ඇත.

විශ්‍රාම වැටුප් හිමිකම සඳහා අවම සේවා කාලය සම්බන්ධයෙන් එහි සඳහන් කරන්නේ කවර හෝ සේවා කඩවීම් පවතින්නේ නම් ඒවා නොතකා වසර 5ක සේවා කාලයක් තිබිය යුතු බවයි. ඒ අනුව ජනාධිපති, අගමැති, කැබිනට් ඇමති, කතානායක හෝ ඉහතින් සඳහන් කළ ඕනෑම දේශපාලන තනතුරුලාභියෙක් යටතේ අඛණ්ඩව නොවන අවුරුදු 5ක සේවා කාලයක් සම්පූර්ණ කිරීමෙන් එම විශ්‍රාම වැටුපට හිමිකම ලැබේ. 

එසේම එහි තවදුරටත් සඳහන් කරන්නේ රජයේ සේවයේ නියුක්ත ස්ථීර විශ්‍රාම වැටුප් සහිත නිලධාරීන් ඉහත සඳහන් කළ කළ කාර්ය මණ්ඩලයේ තනතුරුවල නියුක්ත වීම සඳහා රාජ්‍ය සේවයෙන් මුදාහැර ඇත්නම් එවැනි නිලධාරියෙකුගෙන් “ට” උපලේඛනගත තනතුරට අදාළ සේවා කාලය තුළ අයකළ යුතු වන්නේ වැන්දඹු හා අනත්දරු විශ්‍රාම වැටුප් දායක මුදල් පමණක් බවය.  එවැනි නිලධාරීන් වසර 5ක් සම්පූර්ණ කොට ඇති විට “ට” උපලේඛනය යටතේ විශ්‍රාම ගැන්වීම හෝ යළි පෙර රාජ්‍ය සේවා තනතුරට යා හැකි බවත්, වසර 5ට අඩු සේවා කාලයක් පවතී නම් නැවත රාජ්‍ය සේවයට යා යුතු බවත් එහි සඳහන් කර ඇත. දේශපාලන කාර්ය මණ්ඩල සඳහා රජයේ සේවයෙන් අනුයුක්ත වන පුද්ගලයින්ට එම තත්වයද නරක නැත. මන්ද අවුරුදු 5ක කාලයකින් විශ්‍රාම වැටුපකට හිමිකම් කිව හැකි නිසාය.

ඉන්පසු විශ්‍රාම වැටුප් චක්‍රලේඛ 13/2010 යටතේ 2010.12.16 දින විශ්‍රාම වැටුප් අධ්‍යක්ෂ ජනරාල් කේඒ තිලකරත්න වැන්දඹු/ වැන්දඹු පුරුෂ හා අනත්ද්‍රරු විශ්‍රාම වැටුප් පනතේ සංශෝධන ක්‍රියාත්මක කිරීම සම්බන්ධයෙන් දැනුවත් කිරීමක් සිදුකරයි.

එහි සඳහන් කරන්නේ ඉහතින් සඳහන් කර ඇති “ට” උපලේඛනයේ නිශ්චිතව සඳහන් කර ඇති දේශපාලන තනතුරුලාභීන්ගේ පෞද්ගලික කාර්ය මණ්ඩලයේ නිලධාරීන්ටද වැන්දඹු, වැන්දඹු පුරුෂ හා අනත්දරු විශ්‍රාම වැටුප් ගෙවිය යුතු බවයි. ඉන් සිදුකරන්නේ රජයේ සාමාන්‍ය විශ්‍රාම වැටුප් මෙන්ම මෙම විශ්‍රාම වැටුප්ලාභීන්ගේ මරණයෙන් පසු ඔවුන්ගේ වැන්දඹුවන්ට හා දරුවන්ට එම විශ්‍රාම වැටුප් හිමිකම ලබාදීමයි.

එම දේශපාලන තනතුරුලාභීන්ගේ පෞද්ගලික කාර්ය මණ්ඩලය සම්බන්ධයෙන් තවත් චක්‍රලේඛයක් නිකුත් වන්නේ 2011.07.04 දිනදිය. ඒ 06/2011 චක්‍රලේඛය නමිනි. එහි ‘ට‘ උපලේඛනය නැවත වරක් අර්ථකථනය කර ඇති අතර එහිදී කර ඇත්තේ එම පෞද්ගලික කාර්ය මණ්ඩලය තවදුරටත් පුළුල් කිරීමය.

ඒ අනුව ජනාධිපතිවරයාගේ පෞද්ගලික කාර්ය මණ්ඩලය පෞද්ගලික ලේකම්, ප්‍රවෘත්ති ලේකම්, සහකාර ලේකම් (ප්‍රවෘත්ති) , අතිරේක පෞද්ගලික ලේකම්, මාධ්‍ය ලේකම්, ජනාධිපති ලේකම්ගේ පෞද්ගලික සහකාර, මහජන සම්බන්ධතා නිලධාරි යන තනතුරු දක්වා පුළුල් කර තිබේ.

අගමැතිවරයාගේ පෞද්ගලික කාර්ය මණ්ඩලය ද පෞද්ගලික ලේකම්, සම්බන්ධීකරණ ලේකම්, මහජන සම්බන්ධතා නිලධාරී, මාධ්‍ය ලේකම් ලෙස පුළුල් කර තිබේ.

කතානායකවරයාගේ, කැබිනට් අමාත්‍යවරුන්ගේ, විපක්ෂ නායකවරයාගේ, නියෝජ්‍ය ඇමතිවරුන්ගේ, නියෝජ්‍ය කතානායකගේ, නියෝජ්‍ය කාරක සභා සභාපතිගේ,  පෞද්ගලික කාර්ය මණ්ඩලය සම්බන්ධයෙන් මාධ්‍ය ලේකම් විශ්‍රාම වැටුප් හිමි තනතුරක් ලෙස අලුතින් ඇතුළත් කර තිබේ.

ව්‍යාපෘති ඇමතිවරුන්, දිස්ත්‍රික් ඇමතිවරුන් හා රාජ්‍ය ඇමතිවරුන්ගේ පෞද්ගලික කාර්ය මණ්ඩලය සම්බන්ධයෙන් පෞද්ගලික ලේකම් තනතුර පමණක් අර්ථකථනය කර ඇති අතර එහිදී කියා ඇත්තේ හිටපු කාර්ය මණ්ඩලයට එය අදාළ වන බවය.

එමෙන්ම කැබිනට් අමාත්‍යාංශයක ලේකම්ගේ සම්බන්ධීකරණ ලේකම්, පළාත් සභාවක ප්‍රධාන ලේකම්ගේ සම්බන්ධීකරණ ලේකම්, භාණ්ඩාගාර නියෝජ්‍ය ලේකම්ගේ සම්බන්ධීකරණ ලේකම්, කැබිනට් අමාත්‍යාංශයන්හි ජ්‍යෙෂ්ඨ සහකාර ලේකම් (ප්‍රවෘත්ති) යන්න ද අර්ථකතනය කරමින් සඳහන් කර ඇත්තේ එම තනතුරු ඒ වනවිට අහෝසි වී ඇති බවයි. එහෙත් එහි සඳහන් කර ඇති භාණ්ඩාගාර නියෝජ්‍ය ලේකම්ගේ සම්බන්ධීකරණ ලේකම් තනතුර විශ්‍රාම වැටුප් හිමි පෞද්ගලික කාර්ය මණ්ඩලයේ තනතුරක් බවට ඊට පෙර චක්‍රලේඛවල කිසිදු අර්ථකථනයක් නැත.

තවදුරටත් එම ‘ට’ උපලේඛනය 2012.06.22 දින 06/2011 (සංශෝධන 1) චක්‍රලේඛය මගින් සංශෝධනය කර ඇති අතර එහිදී ජනාධිපතිවරයාගේ පෞද්ගලික කාර්ය මණ්ඩලය නැවත අර්ථකතනය කිරීම සිදුකර  කර ඇත. ඒ  අනුව විශ්‍රාම වැටුප් හිමි ජනාධිපතිවරයාගේ කාර්ය මණ්ඩලය වන්නේ පෞද්ගලික  ලේකම්, ප්‍රවෘත්ති ලේකම්, සහකාර ලේකම් (ප්‍රවෘත්ති), අතිරේක පෞද්ගලික ලේකම්, ජනාධිපති ලේකම්ගේ පෞද්ගලික සහකාර, මහජන සම්බන්ධතා නිලධාරී, සම්බන්ධීකරණ ලේකම් හා සම්බන්ධීකරණ නිලධාරි යන තනතුරුලාභීන්ය.

ජනාධිපති හා අගමැති හැර විශේෂයෙන් කතානායක, ඇමති, නියෝජ්‍ය ඇමති හා අනෙකුත් තනතුරු සම්බන්ධයෙන් ගත්කළ අප දන්නා සත්‍යය වන්නේ එම පෞද්ගලික කාර්ය මණ්ඩලයේ එක් තනතුරක් හෝ තනතුරු කිහිපයක් එම තනතුරු දැරූ දේශපාලනඥයාගේ පවුලේ සාමාජිකයන්ගෙන් පුරවා තිබූ බවයි. බිරිඳ, සැමියා දුව, පුතා, බෑනා, ලේලි, සහෝදර සහොදරියන් ඒ අතර සිටිති. මේ කිසිවෙක් එම තනතුරුවලට ගන්නේ ඒ සම්බන්ධයෙන් වන රජයේ සුදුසුකම් අනුව නොවේ. ඥාතිත්වය මත හෝ දේශපාලන හිතවත් කම මතය.

අවසානයේ මෙතෙක් කල් සිදුවී ඇත්තේ නියමිත සුදුසුකමක් අනුව නොව තම අභිමතය අනුව දේශපාලනඥයන් බඳවා ගන්නා පෞද්ගලික කාර්ය මණ්ඩලය හෙවත් එකී දේශපාලන කාර්ය මණ්ඩලයටද අවුරුදු 5ක සේවා කාලයකින් රජයේ විශ්‍රාම වැටුප් දෙපාර්තමේන්තුව මගින් ලබාදෙන විශ්‍රාම වැටුපකට හිමිකම් ලැබීමය.

විශ්‍රාම වැටුප් දෙපාර්තමේන්තුව මෙම විශ්‍රාම වැටුප්ලාභීන් වෙනම ලේඛනයක පවත්වාගෙන යනවාදැයි අප දන්නේ නැත. එසේ වෙනම ලේඛනයක ඔවුන් පවත්වාගෙන යන්නේ නම් දේශපාලනඥයන්ගේ පවුල්වල සාමාජිකයන් කොතරම් ප්‍රමාණයක් රජයේ විශ්‍රාම වැටුප් ලබනවාද යන්න හඳුනාගත හැකි වනු ඇත.

දේශපාලනඥයන්ගේ පෞද්ගලික කාර්ය මණ්ඩලයේ මෙම විශ්‍රාම වැටුප ද අහෝසි කළ යුතු හෝ සමාලෝචනයට ලක්කළ යුතු එකක් බවට විවාදයක් තිබිය නොහැකිය. ඒ සම්බන්ධයෙන් මන්ත්‍රීවරුන්ගේ හා ජනාධිපතිවරුන්ගේ විශ්‍රාම වැටුප් හා වරප්‍රසාද සම්බන්ධයෙන් මෙන් වර්තමාන ආණ්ඩුවේ අවධානය යොමු විය යුතුවේ.