ගෝඨාට 110, රනිල්ට 60, මහින්දට 36
ලසන්ත රුහුණගේ
හිටපු මැති ඇමතිවරුන් ඇතු`ඵ දේශපාලනඥයන් සඳහා ලබාදී තිබූ ප්‍රභූ ආරක්ෂ නිලධාරීන් යළි කැඳවූ බව නිවේදනය කළද හිටපු ජනාධිපතිවරුන් වන රනිල් වික්‍රමසිංහ, ගෝඨාභය රාජපක්ෂ හා මහින්ද රාජපක්ෂගේ ආරක්ෂාව වෙනුවෙන් සැලකිය යුතු කොමාන්ඩෝ සෙබ`ඵන් සංඛ්‍යාවක් හා තවත් හමුදා සාමාජිකයන් සංඛ්‍යාවක් තවමත් යොදවා සිටින බව අපගේ ආරක්ෂක අංශ මූලාශ්‍ර තහවුරු කරයි.
ලැබී ඇති තොරතුරු අනුව හිටපු ජනාධිපති ගෝඨාභය රාජපක්ෂගේ ආරක්ෂාව සඳහා කොමාන්ඩෝ සෙබ`ඵන් 110ක ප්‍රමාණයක් ලබාදී තිබෙන අතර ඒ ඔහු වෙනුවෙන් යොදවා ඇති සාමාන්‍ය යුද හමුදා සාමාජිකයන්ට අමතරවය. මීට පෙර හිටපු ජනාධිපති ගෝඨාභය රාජපක්ෂ වෙනුවෙන් කොමාන්ඩෝ සෙබ`ඵන් 180කගේ ආරක්ෂාවක් ලබාදී තිබී ඇති අතර ඉන් 70 දෙනෙකු පසුගිය කාලයේදී ඉවත් කරගෙන තිබේ.
හිටපු ජනාධිපති රනිල් වික්‍රමසිංහගේ ආරක්ෂාව සඳහා මේ වනවිට කොමාන්ඩෝ සෙබ`ඵන් 60ක් යොදවා ඇති අතර ඒද ඔහු වෙනුවෙන් යොදවා ඇති සාමාන්‍ය යුද හමුදා සාමාජිකයන්ට අමතරවය.
හිටපු ජනාධිපති මහින්ද රාජපක්ෂ වෙනුවෙන් කොමාන්ඩෝ සෙබ`ඵන් 36ක ප්‍රමාණයක් යොදවා ඇති අතර ඒද ඔහු වෙනුවෙන් යොදවා ඇති සාමාන්‍ය යුද හමුදා සාමාජිකයන්ට අමතරවය.
හිටපු ජනාධිපතිවරුන්ට ලබාදී ඇති මෙම අති විශාල කොමාන්ඩෝ හා අනෙකුත් හමුදා ආරක්ෂාව ඉවත් කිරීම සම්බන්ධයෙන් ඔක්තෝබර් 02 වැනිදා රැස්වූ ආරක්ෂක මණ්ඩලය තීරණයක් ගන්නා බව වාර්තා වූවත් ඒ සම්බන්ධයෙන් වන වැඩිදුර තොරතුරු වාර්තා වූයේ නැත.
හිටපු ජනාධිපතිවරුන්ට ලබාදී ඇති කොමාන්ඩෝ හා අනෙකුත් හමුදා ආරක්ෂාව අඩු කිරීම සම්බන්ධයෙන් ශ්‍රී ලංකා යුද හමුදාවට දැනුම් දීමක් ලැබී ඇත්දැයි යුද හමුදා මාධ්‍ය ප්‍රකාශක මේජර් ජෙනරාල් රසික කුමාරගෙන් කළ විමසීමකදී ඔහු පැවසුවේ එවැනි දැනුම් දීමක් ලැබී නැති බවයි.
ශ්‍රී ලංකා පොලීසිය මගින් ලබාදී ඇති ප්‍රභූ ආරක්ෂාව සම්බන්ධයෙන් සැප්තැම්බර් 27 දින නිවේදනයක් නිකුත් කරමින් පොලිස් මාධ්‍ය කොට්ඨාසය සඳහන් කළේ පාර්ලිමේන්තුව විසුරුවා හැර ඇති බැවින් ඇමතිවරුන්, රාජ්‍ය ඇමතිවරුන්, මන්ත්‍රීවරුන්, හිටපු මැති ඇමතිවරුන්, පළාත් සභා නියෝජිතයන්, ආණ්ඩුකාරවරුන් ඇතු`ඵ පිරිසට ලබාදී ඇති ප්‍රභූ ආරක්ෂකයන් නැවත කැඳවූ බවයි.
කතානායකවරයා, විපක්ෂ නායකවරයා, නියෝජ්‍ය කතානායකවරයා සඳහා ලබාදී ඇති ප්‍රභූ ආරක්ෂාව තවදුරටත් ලබාදෙන බවයි. ඊට අමතරව වින්දිතයන් හා සාක්ෂිකරුවන් ආරක්ෂා කිරීමේ පනත යටතේ හා අධිකරණ නියෝග මත ප්‍රභූ ආරක්ෂාව ලබාදෙන හිටපු පළාත් සභා මන්ත්‍රීවරුන්ට, පාර්ලිමේන්තු මන්ත්‍රීවරුන්ට හා ආණ්ඩුකාරවරුන්ට තවදුරටත් ප්‍රභූ ආරක්ෂාව ලබාදෙන බවයි.
