ජනාධිපති, ආරක්‍ෂක ලේකම්, ආගමන විගමන පාලක යන සියල්ලන් දැන සිටි ඩයනාගේ බොරුව

‘ඩයනා බි්‍රටිෂ්’ යනුවෙන් අනිද්දා පුවත්පත හෙළිදරව් කළේ 2020 දෙසැම්බර් 27 දිනය. මෙම සටහන ලියන 2024 මැයි 8 වැනිදා රාජ්‍ය ඇමතිවරියක ලෙස කටයුතු කළ ඩයනා ගමගේ බි්‍රතාන්‍ය පුරවැසියෙකු බව ශ්‍රේෂ්ඨාධිකරණය තීරණය කර තිබේ. ඒ අනුව ඇයට පාර්ලිමේන්තුව නියෝජනය කිරීමට නොහැකි වන අතර ඇයගේ මන්ත්‍රී ධුරය අහෝසි වේ. එදා ඩයනා බි්‍රටිෂ් යනුවෙන් අපගේ හෙළිදරව්වට නිමිත්ත වූයේ ශ්‍රී ලංකා පුරවැසියෙකු නොවන ඇය ශ්‍රී ලංකා ගමන් බලපත්‍රයක් ලබාගෙන ඇති බවට ඕෂල හේරත් විසින් පොලිසියට කරන ලද පැමිණිල්ලක් නිමිති කර ගනිමින් ඇයගෙන් අප කරන ලද ප්‍රශ්න කිරීමේදී ඇය ඇගේ බි්‍රතාන්‍ය පුරවැසිභාවය පිළිගැනීමයි.

ඒ අනුව ඕෂල හේරත්ගේ පැමිණිල්ලෙන් ආරම්භ වූ ඇයගේ පුරවැසිභාවය පිළිබඳ ප්‍රශ්නය නිරාකරණය සඳහා අවුරුදු 3කුත් මාස 4කට වඩා කාලයක් මේ වන විට ගතවී තිබේ. වඩා වැදගත් වන්නේ එම කාලය තුළ සිදුවූ සිදුවීම් හා හෙළිදරව් වූ කරුණුය.

ඕෂල හේරත්ගේ පැමිණිල්ල අනුව කළ විමර්ශනයේ කරුණු අපරාධ පරීක්ෂණ දෙපාර්තමේන්තුව කොළඹ ප්‍රධාන මහේස්ත්‍රාත් අධිකරණයට ඉදිරිපත් කළේය. එහිදී අගාමික හා විගාමික පනත යටතේ ඩයනා ගමගේ හිටපු මන්ත්‍රීවරිය වරදක් කර ඇති බවට ඕෂල හේරත් විසින් කරන ලද පැමිණිල්ල අනුව විමර්ශනයක් කළ බවත්, ඒ අනුව ඇය එම පනත යටතේ වන වරදවල් සිදුකර ඇති බවට නිරීක්ෂණය වන බවටත් කරුණු වාර්තා කරනු ලැබීය. නීතිපති දෙපාර්තමේන්තුවේ සහාය ලබා ගැනීමට අවසර ඉල්ලූ අතර විමර්ශනයට අදාළව ලබාගත් ප්‍රකාශවල සියලු උද්ධෘත අධිකරණයට ඉදිරිපත් කිරීමද සිදුකරනු ලැබීය.

අධිකරණයට වාර්තා කළ කරුණු අනුව නියෝජ්‍ය ආගමන විගමන පාලක හංසිකා මිහිරි කුමාරසිංහ ප්‍රකාශ කර ඇත්තේ ඩයනා ගමගේ 094425352 හා 521398876 දරන බි්‍රතාන්‍ය ගමන් බලපත්‍ර භාවිත කරමින් 2014.10.05 වන දින දක්වා මෙරටට වරින් වර පැමිණ ඇති බවත් 2015.07.16 වන දින දක්වා ශ්‍රී ලාංකික වීසාවක් ලබාගෙන තිබෙන බවත්ය.

එයට අමතරව නියෝජ්‍ය ආගමන විගමන පාලක දිනූෂාන් රාමවික්‍රමගේ ප්‍රකාශය අනුව ඩයනා ගමගේ භ5091386 සහ ධඛ5654794 දරන මෙරට විදේශ ගමන් බලපත්‍ර දෙක අවස්ථා දෙකකදී ලබාගෙන ඇති බව හා ඇය බි්‍රතාන්‍ය විදේශ ගමන් බලපත්‍ර භාවිත කරන අවස්ථාවේදී මෙරට විදේශ ගමන් බලපත්‍ර ලබාගෙන ඇති බවයි. එසේම 1948 අංක 18 දරන පුරවැසි පනත අනුව විදේශ රටක පුරවැසිභාවය ලබා ගන්නා ශ්‍රී ලාංකිකයකුට මෙරට පුරවැසිභාවය අහෝසි වන බව ඔහු ප්‍රකාශ කර ඇත.

එමෙන්ම නියෝජ්‍ය ආගමන විගමන පාලක ඉවන හැන්නදිගේ ගයානාත් ප්‍රසංගගේ ප්‍රකාශය අනුව ඩයනා ගමගේ 2023.03.30 වන දින දක්වා ශ්‍රී ලංකාවේ පුරවැසිභාවයට ඉල්ලුම් කිරීමක් හෝ ඇයට ශ්‍රී ලංකාවේ පුරවැසිභාවය ප්‍රදානය කිරීමක් සිදුකර නැත. ආගාමික හා විගාමික පනත යටතේ වරෙන්තුවක් නොමැතිව අත්අඩංගුවට ගත හැකි එතරම් කරුණු ප්‍රමාණයක් තිබියදීත් ඇය අපරාධ පරීක්ෂණ දෙපාර්තමේන්තුව හෙවත් සීඅයිඩීය අත්අඩංගුවට නොගැනීම සම්බන්ධයෙන් පැමිණිලිකාර ඕෂල හේරත් වෙනුවෙන් පෙනී සිටි නීතිඥයින් අධිකරණයේ අවධානය යොමු කර තිබූ අතර එතරම් සාක්ෂි තිබියදීත් අපරාධ නඩු විධාන සංග්‍රහය යටතේ නඩු කටයුතු ආරම්භ නොකිරීමට හේතු වශයෙන් අපරාධ පරීක්ෂණ දෙපාර්තමේන්තුව කියා තිබුණේ බි්‍රතාන්‍ය මහ කොමසාරිස් කාර්යාලයෙන් කැඳවා ඇති වාර්තා එන තෙක් ඔවුන් සිටින බවය.

එසේ වුවද කොළඹ ප්‍රධාන මහේස්ත්‍රාත්වරයාගේ මතය වී තිබුණේ නඩු කටයුත්තක් ආරම්භ කිරීම සඳහා ආගමන හා විගමන නිලධාරීන්ගෙන් ලැබී තිබුණු එම සාක්ෂි ප්‍රමාණවත් බවයි.
එමෙන්ම අත්අඩංගුවට ගැනීම සම්බන්ධයෙන් අධිකරණයේ කරුණු දක්වමින් නීතිපතිවරයා වෙනුවෙන් පෙනී සිටි රජයේ නීතිඥවරයා කියා තිබුණේද අත්අඩංගුවට ගැනීම හෝ නොගැනීම පොලිසියේ අභිමතය අනුව සිදුකළ හැකි බවයි. එහෙත් මහේස්ත්‍රාත්වරයාගේ මතය වී තිබුණේ අපරාධ නඩු විධාන සංග්‍රහය අනුව පොලිස් නිලධාරීන්ට එවැනි අත්තනෝමතික අභිමතයක් නොමැති බවයි. ඇය වරෙන්තුවක් නොමැතිව අත්අඩංගුවට ගත හැකි බවත්, ඒ නිසාම ඒ සම්බන්ධයෙන් නියෝග නිකුත් කිරීමේ අවශ්‍යතාවක් මහේස්ත්‍රාත්වරයාට නැති බවත්, ඇය අත්අඩංගුවට ගැනීම පොලිසියේ වගකීමක් බවත්ය.

කෙසේ හෝ මහේස්ත්‍රාත් අධිකරණයේ බී වාර්තාව අනුව ඇය අත්අඩංගුවට ගැනීමක් සිදු නොවුණි. ඇයට එරෙහිව නඩු පැවරීමක්ද සිදු නොවුණි. ඒ අතර පැමිණිලිකාර ඕෂල හේරත් අභියාචනාධිකරණයට පෙත්සමක් ගොනු කරමින් ඉල්ලා සිටියේ පාර්ලිමේන්තු මන්ත්‍රී ධුරයක් දැරීම සඳහා ඇය සුදුසු නොවන බැවින් ඒ පිළිබඳ නියෝගයක් නිකුත් කරන ලෙසයි. මේ නිසාම මහේස්ත්‍රාත් අධිකරණයේ බී වාර්තාව පිළිබඳ කැඳවීම් අභියාචනාධිකරණයේ තීන්දුව ලැබෙන තෙක් බහා තැබුණි.

මේ කරුණු මෙසේ තිබියදී ආගමන හා විගමන දෙපාර්තමේන්තුවේ හිටපු ආගමන හා විගමන පාලක ජනරාල් යූ වී සරත් රූපසිරි 2021.12.15 දින ආරක්ෂක අමාත්‍යාංශයේ ලේකම් විශ්‍රාමික හමුදා ජෙනරාල් කමල් ගුණරත්නට ලිපියක් යොමු කරමින් විශේෂ කරුණක් දැනුම් දී තිබෙන බව අනාවරණය විය. ඒ රාජ්‍ය ඇමති ඩයනා ගමගේ මන්ත්‍රීවරියට රාජ්‍ය තාන්ත්‍රික ගමන් බලපත්‍රයක් නිකුත් කිරීම සම්බන්ධයෙනි.

එම ලිපිය ආරම්භ කරමින් ආගමන හා විගමන පාලක ජනරාල්වරයා සඳහන් කරන්නේ, පාර්ලිමේන්තු මන්ත්‍රී ඩයනා ගමගේ විසින් පාර්ලිමේන්තු මහ ලේකම්වරයාගේ 2021.09.21 දිනැති ලිපියක් සමඟින් 2021.12.15 දින රාජ්‍ය තාන්ත්‍රික ගමන් බලපත්‍රයක් ලබාගැනීම සඳහා සිය උප්පැන්න සහතිකය, ජාතික හැඳුනුම්පත සහ මින් පෙර ලබාගත් රාජකාරි ගුවන් ගමන් බලපත්‍රය සහිතව අයැදුම්පතක් ඉදිරිපත් කර ඇති බවයි.

එසේ නමුත් ඩයනා ගමගේ මන්ත්‍රීවරියගේ පුරවැසිභාවය පිළිබඳ එම වසරේ මුල් භාගයේදී අපරාධ පරීක්ෂණ දෙපාර්තමේන්තුව විසින් පරීක්ෂණයක් පැවැත්වූ බවත්, ආගමන හා විගමන දෙපාර්තමේන්තුවේ පරිගණක දත්ත පද්ධතිය අනුව අනාවරණය වූ කරුණු කිහිපයක් අපරාධ පරීක්ෂණ දෙපාර්තමේන්තුවට ලබාදුන් බවත්ය.

ආගමන විගමන පාලක ජනරාල්වරයා සඳහන් කරන එම කරුණු වන්නේ, ඩයනා ගමගේ මන්ත්‍රීවරිය 2004 වර්ෂයේ සිට බි්‍රතාන්‍ය පුරවැසිභාවය ලබාගෙන අංක 521398876 දරන බි්‍රතාන්‍ය ගුවන් ගමන් බලපත්‍රය භාවිත කරන බව, ඒ අනුව, එම කාලසීමාව තුළ ආගාමික හා විගාමික පනතේ ප්‍රතිපාදන අනුව ඩයනා ගමගේ මන්ත්‍රීවරියගේ ශ්‍රී ලාංකීය පුරවැසිභාවය අහෝසි වී ඇති බව, නමුත්, ඩයනා ගමගේ මන්ත්‍රීවරිය විසින් ඇයගේ විදේශීය පුරවැසිභාවය පිළිබඳ තොරතුරු හෙළි නොකොට 2014.01.24 දින නැවත අංක භ 5091386 දරන ශ්‍රී ලාංකීය ගුවන් ගමන් බලපත්‍රය ලබාගෙන ඇති බව, ඉන්පසු 2018.11.05 දින මුදල් අමාත්‍යාංශයේ නිර්දේශය මත නැවතත් සිය විදේශ පුරවැසිභාවය හෙළි නොකොට ධඛ 5654794 දරන රාජකාරි ගුවන් බලපත්‍රය ලබාගෙන ඇති බව, එමෙන්ම ඩයනා ගමගේ මන්ත්‍රීවරිය විසින් නැවතත් ගුවන් බලපත්‍රයක් අයැදුම් කිරීමේදී සිය විදේශීය පුරවැසිභාවය හෝ එම පුරවැසිභාවය ඉවත් කරගත් බවට ලේඛනයක් ඉදිරිපත් කර නොමැති බව, ඒ අනුව ආගමන විගණන පාලකවරයා ආරක්ෂක අමාත්‍යාංශ ලේකම්වරයාට දැනුම් දී තිබුණේ ඩයනා ගමගේ මන්ත්‍රීවරියට ශ්‍රී ලාංකීය ගුවන් බලපත්‍රයක් ලබාදිය නොහැකි බව නිරීක්ෂණය කරන බවයි.

ඩයනා ගමගේ මන්ත්‍රීවරිය විසින් බි්‍රතාන්‍ය ගුවන් බලපත්‍රය භාවිත කරමින් ලබාගෙන ඇති වීසා පිළිබඳ ලේඛනය සහ එම ගමන් බලපත්‍රය භාවිත කරන ලද විස්තර ඒ සමඟ අමුණා එවන බවත්, තවද ඒ සම්බන්ධයෙන් උපදෙස් ලබාදෙන ලෙසත් ආගමන හා විගමන පාලක ජනරාල්වරයා ආරක්ෂක අමාත්‍යාංශ ලේකම් විශ්‍රාමික ජෙනරාල් කමල් ගුණරත්නගෙන් ඉල්ලා තිබේ. එහෙත් කසාය බිව් ගොළුවකු ලෙස, ඒ පිළිබඳ කිසිදු උපදෙසක් නම් ආරක්ෂක අමාත්‍යාංශ ලේකම් කමල් ගුණරත්න ලබා දී තිබුණු බවට නම් වාර්තා වූයේ නැත. ආගමන විගමන පාලක සරත් රූපසිංහගේ තීරණය එසේ වුවද ඉන්පසු එම තනතුරට පත් හර්ෂ ඉලුක්පිටිය මහතා ඩයනා ගමගේ මන්ත්‍රීවරියට රාජ්‍යතාන්ත්‍රික ගුවන් ගමන් බලපත්‍රයක් ලබාදී තිබේ. එහි අංකය ෘ 5659363ය. 2022 සැප්තැම්බර් 12 වැනිදා ඉදිරිපත් කරන අයැදුම් පත්‍රයක් අනුව එම දිනයේම ‘හදිසි’ වර්ගීකරණය යටතේ එම ගමන් බලපත්‍රය නිකුත් කර ඇති ඒ සඳහා ඇය රාජ්‍ය ඇමතිවරියක වශයෙන් දිව්රුම් දීමෙන් පසු ජනාධිපති රනිල් වික්‍රමසිංහ නිකුත් කළ 2022 සැප්තැම්බර් 08 දින දරන අක්ත පත්‍රයද ඉදිරිපත් කර තිබේ.

මේ පිළිබඳ කළ විමර්ශනයේදී තවත් කරුණක්ද හෙළිදරව් වී තිබුණි. ඒ ඇය විසින් පළමු ශ්‍රී ලංකා ගුවන් ගමන් බලපත්‍රය ලබා ගැනීම සඳහා ඉදිරිපත් කර ඇති අංක 6553 දරන උප්පැන්න සහතිකය පරිගණක දත්ත පද්ධතියේ නැති බවත්, එය ව්‍යාජ උප්පැන්න සහතිකයක් බවත්, එම උප්පැන්න සහතිකයේ කොට්ඨාසය දකුණු කොළඹ ලෙස සටහන්ව ඇති බවත්, එවැනි කොට්ඨාසයක් කොළඹ දිස්ත්‍රික්කයේ නොමැති බවත්ය.

අභියාචනාධිකරණයේ මුල් අවස්ථාවේදී මේ නඩුව විභාග කරන ලද්දේ, එහි සභාපති නිශ්ශංක බන්දුල කරුණාරත්න හා එම්ඒආර් මරික්කාර් විනිසුරු විසිනි. තීන්දුව නිකුත් කරන්නට නියමිත දිනයේ දැනගන්නට ලැබුණේ විනිසුරුවරුන් දෙදෙනා එකිනෙකට වෙනස් ස්ථාවර දෙකක් දරන බවයි. ඒ අනුව, තවත් විනිසුරුවරයකු පත්කිරීමට තීරණය කරන ලද අතර, එම විනිසුරුවරයා නම් කරන ලද්දේ සභාපති විනිසුරු නිශ්ශංක බන්දුල කරුණාරත්න විසිනි. නඩුවේ එතෙක් ඉදිරිපත් කළ කරුණු නව විනිසුරු ඉදිරියේදීද පිළිගැනීමට පාර්ශ්ව එකඟ විය. ඒ අනුව, අලුතෙන් පත්කරන ලද්දේ අභියාචනාධිකරණ විනිසුරු ඛේමා ස්වර්ණාධිපතිය. තීන්දුව 2:1 ලෙස බෙදුණු එකක් විය.

2023 ඔක්තෝබර් 31 දා දුන් අභියාචනාධිකරණ නඩුවේ බහුතර විනිසුරු තීන්දුව වූයේ ඇගේ මන්ත්‍රීධුරයට එරෙහි පෙත්සම ගාස්තුවට යටත්ව නිෂ්ප්‍රභ කළ යුතු බවයි. එම බහුතර තීන්දුව ලබා දුන්නේ අභියාචනාධිකරණ සභාපති විනිසුරු නිශ්ශංක බන්දුල කරුණාරත්න, විනිසුරු ඛේමා ස්වර්ණාධිපති යන දෙදෙනා විසිනි. ඔවුන්ගේ තීරණය වුණේ, ඩයනා ගමගේ මන්ත්‍රීවරියට අදාළ චෝදනා සාධාරණ සැකයෙන් ඔබ්බට ඔප්පු කිරීමට පෙත්සම්කරු වන ඕෂල හේරත් මහතා අසමත්වීම නිසා පෙත්සම නිෂ්ප්‍රභ කරන බවයි.

බහුතර විනිසුරු තීන්දුව ප්‍රකාශයට පත් කළ (එම තීන්දුව ලියූ) අභියාචනාධිකරණ සභාපති විනිසුරුවරයාගේ ප්‍රකාශය මෙසේය: ‘මෙවැනි ඉල්ලීමක් ඉදිරිපත් කර අධිකරණයෙන් සහන පැතීම සඳහා ප්‍රමාණවත් සාක්ෂි අධිකරණයට ඉදිරිපත් කර තිබිය යුතුයි. එහෙත් පෙත්සම්කරු අධිකරණයට පැමිණ තිබෙන්නේ ප්‍රමාණවත් සාක්ෂි නොමැතිව යි. පෙත්සම්කරු සාක්ෂි වශයෙන් අධිකරණයට ඉදිරිපත් කර තිබෙන්නේ වගඋත්තරකාරියට තිබෙන අපරාධ නඩුව පමණකි. ඒ වගේම පෙත්සම්කරු නියෝජ්‍ය ආගමන හා විගමන පාලකවරයා පොලිසියට ලබාදුන් ප්‍රකාශ කීපයක් මත විශ්වාසය තබා අධිකරණයට පැමිණ තිබේ. සාක්ෂි ආඥා පනත ප්‍රකාරව මෙම සාක්ෂි පිළිගන්න පුළුවන් ද කියන ගැටලුව අධිකරණයටත් මතුවෙයි. ඒ නිසා පෙත්සම්කරු ඉදිරිපත් කර තිබෙන සාක්ෂි ඔහු විසින් අධිකරණයෙන් ඉල්ලා සිටින ඉල්ලීම තහවුරු කිරීමට ප්‍රමාණවත් නැත. ශ්‍රේෂ්ඨාධිකරණ රීතීන්ට අනුව පෙත්සම්කරු අධිකරණයට පැමිණ තිබෙන්නේ ඔප්පු කිරීමට ප්‍රමාණවත් තරම් සාක්ෂි නොමැතිවය.” (පරිවර්තනය, බීබීසී සිංහල වෙතිනි.)

එයින් නොනැවතුණු සභාපති විනිසුරුවරයා මෙවැනි නඩුවක් ගෙනඒම සම්බන්ධයෙන් පෙත්සම්කාර ඕෂල හේරත් දෝෂදර්ශනයට ලක්කළේය. ‘මහජන සුභසාධන නඩුකරයක් වශයෙන් මෙම පෙත්සම ඉදිරිපත් කළ බව පෙත්සම්කරු පවසයි. මහජන සුභසාධනය සඳහා නඩු ඉදිරිපත් කිරීමේ දී ඒ පිටුපස සැඟවුණු දේශපාලන න්‍යායවලින් තොරව එය ඉදිරිපත් කළ යුතුය. එවැනි නඩුකරවලින් සදාචාර විරෝධී ලෙස ලාභ ප්‍රයෝජන අපේක්ෂා නොකළ යුතුය. එසේම සද්භාවයකින් යුතුව ඉදිරිපත් කළ යුතුය. වගඋත්තරකාර ඩයනා ගමගේ මන්ත්‍රීවරිය අපකීර්තියට පත් කිරීම සහ ද්වේෂසහගත ලෙස ඇයගේ හොඳ නම පළුදු කිරීමේ අරමුණින් සිය පෞද්ගලික න්‍යායපත්‍රය ක්‍රියාත්මක කිරීමේ අරමුණින් පෙත්සම්කරු මෙය ඉදිරිපත් කර තිබේ. එය අධිකරණයෙන් සහනයක් ලබාගැනීමට සුදුසුකමක් නොවේ.” (පරිවර්තනය, බීබීසී සිංහල වෙතිනි.)

එහෙත් එම නඩුවේ සුළුතර තීන්දුව ලබා දෙමින් විනිසුරු එම්ඒආර් මරික්කාර් කියා තිබුණේ, මෙය අපරාධ නඩුවක් නොවන බවත්, අපරාධ නඩුවකදී නම් සාධාරණ සැකයෙන් ඔබ්බට පැමිණිල්ල විසින් චෝදනා ඔප්පු කළ යුතුයැයි නියමයක් තිබෙන නමුත්, මෙවැනි ක්වෝ වොරන්ටෝ රිට් පෙත්සමකදී, අදාළ තනතුර දැරීමට තමා සුදුසු බව ඔප්පු කර පෙන්විය යුත්තේ වගඋත්තරකරු (මේ නඩුවේදී ඩයනා ගමගේ සිය ලාංකික පුරවැසිභාවය තහවුරු කිරීම) බවත්ය. තමා ලාංකික පුරවැසියකු බව නඩු විභාගයේදී ඔප්පු කර පෙන්වීමට ඇය අපොහොසත් වීමෙන් මන්ත්‍රීධුරය දැරීමට ඇය නුසුදුසු වන බව බැලු බැල්මටම පෙනී යන බවද මරික්කාර් විනිසුරුවරයා සිය තීන්දුවෙන් කියා තිබුණි. ඇයගේ සුපිළිපන්බව, අවංකභාවය, විනිවිදභාවය සහ වගවීම ප්‍රශ්න සහගත බවද විනිසුරුවරයා වැඩිදුරටත් කියා තිබුණි. වගඋත්තරකාරිය පාර්ලිමේන්තු මන්ත්‍රීවරියක වශයෙන් මහජනතාවට වගවීමට හා විනිවිදභාවයකින් යුතුව කටයුතු කිරීමට බැඳී සිටින බවද ඔහු සඳහන් කර තිබේ.

වගඋත්තරකාරිය සිය ශ්‍රී ලාංකික පුරවැසිභාවය පිළිබඳව කරුණු තහවුරු කිරීමට අසමත් වී ඇති බැවින් ආණ්ඩුක්‍රම ව්‍යවස්ථා ප්‍රකාරව පාර්ලිමේන්තු මන්ත්‍රී ධුරයක් දැරීමට ඇයට සුදුසුකමක් නොමැති බවත්, ඒ අනුව යමින් රිට් ආඥාවක් නිකුත් කරන බවත් ඇය විසින් පෙත්සම්කරුට නඩු ගාස්තු ගෙවිය යුතු බවත් මරික්කාර් විනිසුරුවරයා නිකුත් කළ සුළුතර තීන්දුවේ වැඩිදුරටත් සඳහන් වෙයි.

මැයි 08 දින දරන ශ්‍රේෂ්ඨාධිකරණ තීන්දුවට නිමිත්ත වූයේ පැමිණිලිකාර ඕෂල හේරත් මහතා අභියාචනාධිකරණයේ එම බහුතර තීන්දුවට එරෙහිව ශ්‍රේෂ්ඨාධිකරණයට කළ අභියාචනයයි.
ශ්‍රේෂ්ඨාධිකරණ තීන්දුව ලියන ලද්දේ විනිසුරු ජනක් ද සිල්වා විසිනි. ගාමිණී අමරසේකර සහ කුමුදුනී වික්‍රමසිංහ යන ශ්‍රේෂ්ඨාධිකරණ විනිසුරුවරුන්ගේ එකඟත්වය ඇතිවය. තමාගේ ශ්‍රී ලාංකික පුරවැසිභාවය අධිකරණය හමුවේ ඔප්පු කිරීමට ඩයනා ගමගේ අසමත් වී ඇති බව ශ්‍රේෂ්ඨාධිකරණ විනිසුරුවරයා තීන්දුව ප්‍රකාශයට පත් කරමින් සඳහන් කළේය. ආණ්ඩුක්‍රම ව්‍යවස්ථාවේ 89 ව්‍යවස්ථාව යටතේ ශ්‍රී ලංකික පුරවැසිභාවය අහිමි අයෙකුට මෙරට පාර්ලිමේන්තුවේ අසුන් ගැනීමට නොහැකි බව තීන්දුවේ සඳහන් වෙයි.

තවදුරටත් තීන්දුවේ මෙසේ සඳහන් වෙයි. ‘වගඋත්තරකාර ඩයනා ගමගේ මහත්මිය බි්‍රතාන්‍ය විදේශ ගමන් පත්‍රයක් හිමි තැනැත්තියක් බව ඇය විසින් නඩු විභාගයේදී පිළිගෙන තිබුණි. බි්‍රතාන්‍ය ගුවන් ගමන් බලපත්‍රයකින් 2014 ඔක්තෝබර් 05දා ඇය දිවයිනට පැමිණි බව නඩු විභාගයේදී අනාවරණය විය. ඉන් අනතුරුව ඇය රාජතාන්ත්‍රික විදේශ ගමන් බලපත්‍රයක් සහ රාජකාරී ගමන් බලපත්‍රයක් ලබාගත් බවත් නඩු විභාගයේදී සඳහන් විය. පුරවැසි පනත අනුව යම් ලාංකිකයෙකු විදේශයක පුරවැසිභාවය ලබාගත් විගස ඔහුගේ හෝ ඇගේ හෝ මෙරට පුරවැසිභාවය ඉබේම අහෝසි වෙයි. ඒ අනුව වගඋත්තරකාර ඩයනා ගමගේ බි්‍රතාන්‍ය පුරවැසිභාවය ලබාගත් විගස ඇගේ ශ්‍රී ලාංකික පුරවැසිභාවය අහෝසි වී යාම පැහැදිලි කරුණකි. එසේ තිබියදී වගඋත්තරකාරිය මෙරට විදේශ ගමන් බලපත්‍ර ලබාගෙන තිබෙන්නේ බලය අයුතු ලෙස පරිහරණය කරමිනි.’ (පරිවර්තනය, බීබීසී සිංහල වෙතිනි.)

ඩයනා ගමගේ අත්අඩංගුවට ගැනීමට අවශ්‍ය නම්, ඊට තමාගේ විශේෂ නියෝගයක් අවශ්‍ය නොවන බවත්, සීඅයිඩීයට එය කළ හැකි බවත් කොළඹ ප්‍රධාන මහේස්ත්‍රාත්වරයා මීට පෙර කියා තිබිණි. එහෙත් ඇය අත්අඩංගුවට ගැනීමට සීඅයිඩීය කටයුතු නොකළේය. ශ්‍රේෂ්ඨාධිකරණ තීන්දුවේ එම කාරණය මෙසේ නිරීක්‍ෂණය කරයි. ‘වගඋත්තරකාර ඩයනා ගමගේ මහත්මියට එරෙහිව ආගමන හා විගමන පනත යටතේ අපරාධ පරීක්ෂණ දෙපාර්තමේන්තුව විසින් කොළඹ මහේස්ත්‍රාත් අධිකරණය හමුවේ කරුණු වාර්තා කර තිබුණි. එම විමර්ශනයට අදාළව ආගමන හා විගමන පාලකවරයා විසින්ද පොලිසියට ප්‍රකාශයක් ලබා දී තිබේ. එම ප්‍රකාශය විශ්ලේෂණය කිරීමේදී පෙනීයන්නේ ඩයනා ගමගේ බි්‍රතාන්‍ය පුරවැසිභාවය හිමි තැනැත්තියක බවයි. එවැනි වාතාවරණයක් මත වගඋත්තරකාරියට එරෙහිව ආගමන හා විගමන පනත යටතේ චෝදනා ඉදිරිපත් කිරීමට ප්‍රමාණවත් කරුණු තිබෙන බව මහේස්ත්‍රාත්වරයා විසින් ද නිගමනය කර තිබුණි. අධිකරණය විසින් නියෝගයක් නිකුත් නොකළත් වග උත්තරකාරිය අත්අඩංගුවට ගෙන ඉදිරිපත් කිරීමට පොලිසියට බලය තිබෙන බව මහේස්ත්‍රාත්වරයා සඳහන් කර තිබුණි.

එහෙත් අපරාධ පරීක්ෂණ දෙපාර්තමේන්තුව ඒ අනුව කටයුතු කළේ නැත. එසේ කටයුතු නොකිරීමට අපරාධ පරීක්ෂණ දෙපාර්තමේන්තුවට ඕනෑ තරම් හේතු තිබෙන්න පුළුවන්. නමුත් නීතියේ දෙවඟනගේ ඇස් බැඳ තිබෙන්නේ නිලය, බලය, ධනය වැනි කරුණු ඉදිරියේ වෙනස්කම් නොවීමට වග බලාගැනීමටය. ආණ්ඩුක්‍රම ව්‍යවස්ථාවේ 12(1) වගන්තිය යටතේ නීතිය ඉදිරියේ සෑම පුරවැසියෙකුම සමාන සැලකිලි ලැබිය යුතු බවත් අවධාරණය කර තිබේ.” (පරිවර්තනය, බීබීසී සිංහල වෙතිනි.) ඩයනා ගමගේගේ නඩුව ඇසූ අභියාචනාධිකරණය දුන් තීන්දුව ගැන ශ්‍රේෂ්ඨාධිකරණ තීන්දුවේ මෙසේ කියයි.

‘අභියාචනාධිකරණය ඉදිරියේ පැවතුණු නඩු විභාගයේ දී එම නඩුකරයට අදාළව ඉදිරිපත් කෙරුණු ලේඛනවල මුල් පිටපත් ඉදිරිපත් නොකිරීම නිසා එය ප්‍රතික්ෂේප කරන බව එම අධිකරණය සඳහන් කර තිබූ එක් කරුණකි. එහෙත් එම ස්ථාවරය පිළිගත නොහැකිය. අපරාධ නඩු විධාන සංග්‍රහයට අදාළ කාරණා රිට් පෙත්සම්වලදී අදාළ කරගත නොහැකිය.

අභියාචනාධිකරණයේ බහුතර විනිසුරුවරුන්ගේ නඩු තීන්දුව පිරික්සීමේදී පෙනීයන්නේ එම අධිකරණයට වගඋත්තරකාර ඩයනා ගමගේ ඉදිරිපත් කළ ලිඛිත දේශනයේ බොහොමයක් කොටස් පිටපත් කර (ජදචහ ච්ිඑැ) ඒවා ඒ ආකාරයෙන්ම තීන්දුවේ අලවා තිබෙන බවයි. එවැනි ස්ථාන 80ක් පමණ නඩු තීන්දුවේ ඇතුළත්ව තිබේ. අලුතින් ඇතුළත් කර තිබෙන්නේ ඡේද සුළු සංඛ්‍යාවක් පමණි. ඒවාද වැරදි සහගතය.’ (පරිවර්තනය, බීබීසී සිංහල වෙතිනි.)
‘මෙරට ආණ්ඩුක්‍රම ව්‍යවස්ථාවේ 89 වන ව්‍යවස්ථාවට අනුව පාර්ලිමේන්තුවට තේරී පත්වීම, අසුන් ගැනීම සහ ඡන්දය ප්‍රකාශ කිරීම සඳහා ශ්‍රී ලාංකික පුරවැසිභාවය අත්‍යවශ්‍ය සුදුසුකමක් බව දක්වා තිබේ. එහෙත් ඩයනා ගමගේ මහත්මිය සිය බි්‍රතාන්‍ය පුරවැසිභාවය අත් හළ බවක් කිසිදු අවස්ථාවක සඳහන් කර නැත. එසේම ඇය ශ්‍රී ලාංකික පුරවැසිභාවය විෂය භාර අමාත්‍යවරයාගෙන් ලබාගත් බවක්ද කිසිදු අවස්ථාවක ප්‍රකාශ කර නැත. ඒ අනුව ඇයට මෙරට පාර්ලිමේන්තුව සඳහා තේරී පත්වීමට, අසුන් ගැනීමට සහ ඡන්දය ප්‍රකාශ කිරීමට නීත්‍යානුකූල සුදුසුකමක් නොමැති බව පැහැදිලි වෙයි. ඒ අනුව ඩයනා ගමගේගේ පාර්ලිමේන්තු මන්ත්‍රී ධුරය බලශුන්‍ය කරන ලෙස ඉල්ලා ගොනු කර තිබූ පෙත්සම නිෂ්ප්‍රභ කරමින් අභියාචනාධිකරණය විසින් ප්‍රකාශ කර තිබු පෙර තීන්දු සියල්ල ඉවත දමනු ලැබේ.’ (පරිවර්තනය, බීබීසී සිංහල වෙතිනි.)

ඒ අනුව ඇයට පාර්ලිමේන්තු මන්ත්‍රී ධුරය දැරීමට සුදුසුකමක් නොමැති බව තහවුරු කරමින් ‘ක්වෝ වොරන්ටෝ’ රිට් ආඥාවක් නිකුත් කරන බවත් විනිසුරුවරයා සිය තීන්දුව ප්‍රකාශය කරමින් වැඩිදුරටත් සඳහන් කර සිටියේය.

මෙම සමස්ත සිදුවීම් දාමය තුළ පෙනෙන්නට තිබුණු කරුණු වූයේ වරෙන්තුවක් නොමැතිව අත්අඩංගුවට ගත හැකිව තිබියදී සීඅයිඩීය ඩයනා ගමගේ හිටපු රාජ්‍ය ඇමතිවරිය අත්අඩංගුවට ගත්තේ නැති බව, ඇය ශ්‍රී ලංකා පුරවැසිභාවය අහිමි බි්‍රතාන්‍ය පුරවැසියෙකු බව, එම තොරතුරු වසන් කරමින් ඇය ශ්‍රී ලංකා ගුවන් ගමන් බලපත් ලබාගෙන ඇති බව, එම ගමන් බලපත් ලබා ගැනීම සඳහා ව්‍යාජ උප්පැන්න සහතිකයක් ලබාදී ඇති බව, මේ පිළිබඳ ලිඛිතව සැලකළ කරුණු ආරක්ෂක අමාත්‍යාංශයේ ලේකම් විශ්‍රාමික මේජර් ජෙනරාල් කමල් ගුණරත්න පවා දැන සිට ඇති බව, මේ පිළිබඳව ජනාධිපති රනිල් වික්‍රමසිංහ පවා දැනසිට ඇති බව (ඩයනා ගමගේ පාස්පෝර්ට් සිදුවීම පිළිබඳ මුජිබර් රහුමාන් මන්ත්‍රීවරයා පාර්ලිමේන්තුවේ ප්‍රකාශයක් සිදුකරන අවස්ථාවේදී ජනාධිපති රනිල් වික්‍රමසිංහ මන්ත්‍රීවරයාගෙන් පෙරළා අසන්නේ, මුජිබර් රහුමාන් මන්ත්‍රීවරයාට පාර්ලිමේන්තුවට ඒමට පක්ෂයක් ලබාදුන් ඇයට රතු පාස්පෝට් එකක් ලබාදීම -රාජ්‍යතාන්ත්‍රික ගමන් බලපත්‍රයක්- වරදක්ද යන්නයි) හා එම තොරතුරු ආගමන විගමන දෙපාර්තමේන්තුවද දැන සිට ඇති බවයි.

එහෙත් ශ්‍රේෂ්ඨාධිකරණයේ තීන්දුව එනතෙක් ඇයට නිරුපද්‍රැතව සිටින්නට ලැබෙන්නේ දේශපාලන බලපුළුවන්කාරකම නිසා බව පැහැදිලිය. ඒ අනුව ඩයනා ගමගේ හිටපු රාජ්‍ය ඇමතිවරිය පාර්ලිමේන්තුවට පිවිස ඇත්තේ ඇය පිළිබඳ ඇත්ත තොරතුරු වසන් කරමින් ව්‍යාජ තොරතුරු ඉදිරිපත් කරමින්ය. ඒ මගින් ඇය පාර්ලිමේන්තු මන්ත්‍රීවරියක ලෙසත්, රාජ්‍ය ඇමතිවරියක ලෙසත් ලබාගත් වැටුප්, දීමනා, වාහන පහසුකම් ඇතුළු අනෙකුත් පහසුකම් අවභාවිත කර තිබේ. මේවා මේ රටේ ජනතාවට අයිති ඒවා මිස ජනාධිපති රනිල් වික්‍රමසිංහටවත් ඔහුගේ ආණ්ඩුවටවත් අයිති ඒවා නොවේ. එම නිසා දැන් සිදුවිය යුත්තේ ඇය විසින් භාවිතයට ගත් එම රාජ්‍ය මුදල් හා සම්පත් නැවත අයකර ගැනීම සඳහා කටයුතු කිරීමය.

එසේම ව්‍යාජ තොරතුරු ඉදිරිපත් කරමින් ගුවන් ගමන් බලපත් ලබා ගැනීම සම්බන්ධයෙන් ඇයට එරෙහිව කටයුතු කිරීමේ හැකියාව හා ඒ සඳහා ඇයට ආධාර අනුබල දුන් අයට එරෙහිව කටයුතු කිරීමේ හැකියාවද දැන් සීඅයිඩීයට ලැබී තිබේ.