මෙවර පළමු වතාවට තමයි ජාතික ජන බලවේගය විදියට මැයි දින හතරක් පැවැත්තුවේ. හැම මැයි රැලියකටම විශාල ජන සහභාගිත්වයකුත් පේන්න තිබුණා. ඒ තුළින් ජාතික ජන බලවේගය පිළිබඳව මොනවගේ තක්සේරුවක්ද ලබා ගත්තේ? ඒ තුළින් ලබා දෙන්න ඕනෑ වුණ පණිවිඩය කුමක් ද?
මේ මැයි දිනය තමයි ජාතික ජන බලවේගය විදියට කරපු පළවෙනි මැයි දිනය. අපිට ජාතික ජන බලවේගය විදියට මැයි දින හතරක් පවත්වලා පෙන්වන්න ඕනෑ වුණා මේ කාලය තුළ ජාතික ජන බලවේගය ජනතා ව්‍යාපාරයක් විදියට ගොඩනගපු ප්‍රමාණය. පහුගිය කාලයේ අපි කළ වැඩ හරහා එකතු කර් ගත්ත පිරිසට ඒ අවස්ථාව ලබා දෙන්නත් ඕනෑ වුණා. ඒ වගේම අපි මැතිවරණයකට සූදානම් කියන පණිවිඩයත් අපිට පෙන්නන්න ඕනෑ වුණා. අපි හදාගෙන ආව ජාතික ජන බලවේගයේ ව්‍යුහය හරහා මේ දේ කර ගන්න පුළුවන් වෙච්ච එක අපි දකිනවා සාර්ථකත්වයක් කියලා.
මැයි දිනය දවසේ එක්සත් ජාතික පක්ෂයේ මැයි දිනය අමතමින් ජනාධිපතිවරයා විශේෂ ප්‍රකාශයක් කළා, ඔහු ගෙන යන සංවර්ධන වැඩසටහන් එක්ක එකට එකතුවෙලා වැඩ කරන්න සමගි ජන බලවේගයට සහ ජාතික ජන බලවේගයට ගිවිසුමකට එන්න කියලා.
අපිට ජනාධිපති එක්ක ගිවිසුම් නැහැ. අපේ ගිවිසුම තියෙන්නේ ජනතාව එක්ක. ඒ නිසා මහජනතාවගේ කැමැත්තක් නැතිව පත් වෙච්ච ජනාධිපති කෙනෙක් එක්ක මොකට ද අපි ගිවිසුම් ගහන්නේ.
ජාතික ජන බලවේගය මේ වෙලාවේ දී ඉතාමත් විශ්වාසයෙන් කියනවා එන ඕනෑම මැතිවරණයක් ජයග්‍රහණය කරනවා කියන එක. ජාතික ජන බලවේගය බලය ලබා ගත්තාට පස්සේ ක්‍රියාත්මක කරන්නේ මොන වගේ ආර්ථික ප්‍රතිපත්තියක් ද සහ ඒ ආර්ථික ප්‍රතිපත්තිය දැනට ක්‍රියාතමක කරන ආර්ථික ප්‍රතිපත්තියෙන් වෙනස් වෙන්නේ කොහොමද?
රනිල් වික්‍රමසිංහ අවුරුදු ගණනාවක් තිස්සේ ගෙනියන්නේ අසාර්ථක වුණ නව ලිබරල්වාදී ආර්ථික ප්‍රතිපත්තියක්. අපේ ආර්ථික ක්‍රමය නව ලිබරල් ආර්ථික ක්‍රමයට වෙනස් එකක්. ආර්ථික ප්‍රජාතන්ත්‍රවාදය තුළ අපි රජයේ ආදායම වැඩි කරන විදියත්, වියදම පාලනය කරන විදියත් කියන මේ දෙකම අපි බලන්න ඕනෑ. අනිත් එක නිෂ්පාදන ආර්ථික ක්‍රියාවලියක් වෙත යා යුතුයි කියලා අපි යෝජනා කරනවා. ආර්ථිකයක් හැම තිස්සේම හිර කරගෙන ගෙනගිය අතිශය අස්ථාවර ආර්ථිකයක් තමයි මෙතෙක් කල් ගෙනිහිල්ලා තියෙන්නේ. අපි ඊට වඩා ස්ථාවරව වැඩි පිරිසකට සහභාගි වෙන්න පුළුවන් ආර්ථිකයක් ගොඩනගන එක තමයි අපේ ඉලක්කය. ඒ වගේම අපේ පැහැදිලි වෙනසක් තියෙනවා ආර්ථිකයට රාජ්‍ය මැදිහත්විය යුත්තේ කොහොමද කියන එක ගැන. රනිල්ගේ ක්‍රමයට අනුව ආර්ථිකයට රජයේ කිසිම මැදිහත්වීමක් අවශ්‍ය නැහැ සියලු දේම විකුණලා අත්හරින එක තමයි ඔහුගේ ප්‍රතිපත්තිය. අපි ඒ ප්‍රතිපත්තිය අනුමත කරන්නේ නැහැ. සමහර ක්ෂේත්‍රවල රජයට මැදිහත් වෙන්න අවශ්‍ය තැන් තියෙන්න පුළුවන්. ඒවා නියාමනය කිරීමට විතරක් නෙමෙයි ආර්ථිකයේ වර්ධනය වෙනුවෙන්, ආර්ථිකය සාධාරණව ගෙන යාම වෙනුවෙන් රජයට මැදිහත් වෙන්න වෙන අවස්ථා තියෙනවා. අපි දකින ආර්ථිකය තුළ කාර්යක්ෂම රජයකුත්, පුද්ගලික අංශයත්, ජන සහභාගිත්වයත් කියන මේ තුනම තියෙන්න ඕනෑ.
පෞද්ගලීකරණය පිළිබඳව අනුගමනය කරන්නේ මොන වගේ ප්‍රතිපත්තියක් ද?
ඒක අපේ ආර්ථික උපාය මාර්ගය අනුව, ක්ෂේත්‍රය අනුව වෙනස් වෙනවා. උදාහරණයක් විදියට අපි හිතන්නේ නැහැ අධ්‍යාපනය පෞද්ගලීකරණය කළ යුතුයි කියලා. රජයට වගකීමක් තියෙනවා අධ්‍යාපනය ලබා දෙන්න. නමුත් අවුරුදු ගණනාවක් තිස්සේ ආණ්ඩුව තමන්ගේ වගකීම ඉෂ්ට නොකිරීම නිසා අපේ රට තුළ මේ වෙලාවේ පුද්ගලික අධ්‍යාපන ක්ෂේත්‍රයක් නිර්මාණය වෙලා තියෙනවා. අපේ ආණ්ඩුවක් යටතේ පුද්ගලික අධ්‍යාපනය නියාමනය කරන්න අපි බලාපොරොත්තු වෙනවා. හැබැයි අපේ අරමුණ රාජ්‍ය අධ්‍යාපනය පුළුල් කරන එකත්, ශක්තිමත් කරන එකත්, රාජ්‍ය අධ්‍යාපනයේ ගුණාත්මකභාවය දියුණු කරන එකත් ඒ හරහා සියලුම දෙනාට රාජ්‍ය අධ්‍යාපනය තුළ අවස්ථාවක් ලබ දෙන එක. ඒ අතර පුද්ගලික ක්ෂේත්‍රයත් පවතින්න පුළුවන්. ඒක අපි නියාමනය කරනවා. ඒ වගේ අපිට එක් එක් ක්ෂේත්‍රවල තියෙන ඒ ක්ෂේත්‍රයේ අපේ ආර්ථික සංවර්ධන සැලැස්මත් උපාය මාර්ගික වැදගත්කමත් අනුව කොච්චරක් දුරට ඒ ක්ෂේත්‍රය රජය සතුව තියෙන්න ඕනෑ ද, කළමනාකරණය කළ යුතු ද එහෙම නැත්නම් රජය අත්හැරිය යුතුද කියන තීරණය අපි ගන්නවා.
මේ වන තෙක් පැවතිච්ච ආණ්ඩු රාජ්‍ය ආයතන, රාජ්‍ය සම්පත්, මේ රටේ භූමිය වගේ දේවල් පිළිබඳව කටයුතු කරපු ආකාරය සහ එළඹිලා තියෙන ගිවිසුම් සම්බන්ධව කුමන් ආකාරයකින්ද සමාලෝචනය කරන්නේ?
මේ වෙනකොටත් අත්සන් කරලා තියෙන රටට හානිදායක ගිවිසුම් කොහොම හරි නතර කරන්නත් පරක්කු කරන්නත් අපිට මැදිහත් වෙන්න වෙනවා. මැන්ඩේට් එකක් නැති ආණ්ඩුවකට අපිට ඉඩ දෙන්න බැහැ හිතුමතේට දේවල් කරලා අනාගත පරපුරකුත් මේවාට හිර කරන්න. ඒ නිසා ඒවා නවත්වන්නත් වැඩ කරන්න වෙනවා. රටට, රටේ ජනතාවට හානිදායක තීරණ අපි බලයට පත් වුණාම එක් එක් ආයතනය අනුව ක්ෂේත්‍රය අනුව සමාලෝචනය කරලා ඒවා රටට වාසියක් වෙන විදියට හරවා ගන්නේ කොහොමද කියලා අපි සැලසුම් කරනවා.
ජාතික ජන බලවේගයට එල්ල කරන බරපතළ චෝදනාවක් තමයි ඉන්දියානු මැදිහත්වීම් ගැන කතාවක්වත් නැහැ කියන එක.
අපි අවශ්‍ය තැන්වල අවශ්‍ය විදියට අපේ විරෝධතාවත් පෙන්නුම් කරලා තියෙනවා. ඒක පාර්ලිමේන්තුව තුළත්, ඉන් පිටත් අපි පෙන්නලා තියෙනවා. නමුත් අපිට වෙන අයගේ ඇජෙන්ඩාවලට අනුව අපිට විරෝධතාව පෙන්නන්න ඕනෑකමක් නැහැ. අපි යම්කිසි සැලැස්මක් තුළ ක්‍රමානුකූලව අවශ්‍ය තැන්වල අවශ්‍ය විදියට අපි අපේ විරෝධය ප්‍රකාශ කරනවා. කවුරුහරි විරුද්ධ වෙන පළියට අපිත් විරෝධය දැක්වීමේ තේරුමක් නැහැ. අනුර සහෝදරයා ඉන්දියාවේ ගිය අවස්ථාවේ වුණත් අපේ ස්ථාවරය අපි ඉන්දියාවට පැහැදිලිවම කියලා තියෙනවා. උදාහරණයක් හැටියට අමුල් එක්ක සාකච්ඡා කරනකොට ඔහු කිව්වා අපේ ආණ්ඩුවක් යටතේ අපි අපේ ගොවිපොළ සියල්ලම අමුල් එකට දෙන්න සූදානම් නැහැ කියලා. ඒ විදියට අපේ ස්ථාවරය ඉතාමත් පැහැදිලිව ප්‍රකාශයට පත් කරලා තියෙන්නේ. ඒ වෙනුවෙන් අපි පෙනී ඉන්නත් සූදානම්.
භූ දේශපාලනය ක්‍රියාත්මක වන ආකාරය ගැනත් එය ලංකාවට ඇති කරන බලපෑම ගැනත් ජාතික ජන බලවේගයට අදහසක් ඇති.
ජාතික ජන බලවේගයට පැහැදිලි දැක්මක් තියෙනවා අපේ රට තියෙන්න ඕනෑ තැන සහ ඉන්න ඕනෑ විදිය ගැන. ඒ පදනමෙන් ඉඳගෙන තමයි අපි රටවල් එක්ක ගනුදෙනු කරන්නේ. අපි ගැන අධි තක්සේරුවකුත් අපිට නැහැ. අපි මේ වෙලාවේ හතර වටේට ණය වෙලා, අපිට කැමති විදියටම මේ වෙලාවේ ඉන්න බැහැ කියන එකත් අපි තේරුම් ගන්න වෙනවා. ජාත්‍යන්තර සම්බන්ධතා තුළ රටේ ජනතාවට හානියක් නොවන විදියට අපේ සම්බන්ධතා සියලුම පාර්ශ්ව එක්ක තියාගන්න වෙනවා. එතැනදි අපි හිතනවා අපේ සම්බන්ධතා පුළුවන් තරම් පුළුල් කරන එක. පාර්ශ්ව දෙක තුනක් මත පමණක් යැපෙන එක හෝ ඒ මත සියල්ල තීරණය කරන එක අඩු කරන්න පුළුවන් වෙන්නේ අපිට තියෙන ජාත්‍යන්තර සම්බන්ධතා පුළුල් කර ගැනීමෙන්. අපි මතක තියාගන්නත් වෙනවා මේ මොහොතේ අපි ඉන්න තැන මොකද්ද කියලා. ඒ අනුව තමයි අපිට ක්‍රියාත්මක වෙන්න වෙන්නේ.
අයිඑම්එෆ් එකත් එක්ක මේ වෙනකන් ගෙන ආ වැඩපිළිවෙළ ගැන ජාතික ජන බලවේගය බලයට ආවාම ක්‍රියා කරන්නේ මොන විදියකටද?
රනිල් වික්‍රමසිංහ වැඩ කරන්නේ අයිඑම්එෆ් එකට ඕනෑ විදියට කියන එක ඉතාම පැහැදිලියි. නමුත් අපි පළමුවෙන්ම වගකියන්නේ මේ රටේ ජනතාවට. අපි ආණ්ඩුවක් හදනවා නම් ඒ ආණ්ඩුව හැදෙන්නේ මේ රටේ ජනතාවගෙන් ලැබෙන වරමක් එක්ක. අපි පළමුව වගකියන්නේ ඒ වරමට. අපි තෝරා ගත්ත මාර්ගයක් නෙවෙයි මේක. අපිට අයිඑම්එෆ් නොයා මේ ප්‍රශන විසඳා ගැනීමට පුළුවන් නම් අපේ තෝරාගැනීම ඒක. නමුත් අපේ පාලනයෙනුත් බාහිරව තියෙන හේතූන් නිසා අපි ආණ්ඩුවක් හදනකොට යම් තාක් දුරක් අයිඑම්එෆ් එකත් එක්ක ගිය රටක් හැටියටනේ අපිට බලය ගන්න වෙන්නේ. ණය කළමනාකරණය කිරීමේ ක්‍රියාවලියක් තුළ අයිඑම්එෆ් එකත් එක්ක අපිට ගනුදෙනු කරන්න සිද්ධ වෙනවා. නමුත් අපේ ආර්ථිකය වර්ධනය කිරීමට අපේ අවධානය දෙනකොට එතැනදී අපිට අයිඑම්එෆ් එකත් එක්ක කතා කරන්න වෙනවා. අපේ ආර්ථික සැලැස්ම මොකද්ද සහ ඒ සඳහා අයිඑම්එෆ් කොන්දේසි නැවත සලකා බලන්නත් අපිට සිදු වෙනවා. තුන්වෙනි කාරණය තමයි ජනතාවට අසීමිත විදියට බර පටවාගෙන සූරා කාගෙන මේ ආර්ථිකය දියුණු කරන්නත් බැහැ. ඒ නිසා ජනතාවගේ මූලික අවශ්‍යතාවන් තහවුරු වෙන විදියේ ආර්ථික සැලැස්මක් අපිට අවශ්‍යයි. ඒක කරන්නේ කොහොමද කියන එක ගැන අපි අයිඑම්එෆ් එකත් එක්ක කතාකරලා තියෙනවා. අපි ඒ ගැන ඉදිරියටත් කතාකරනවා.
මේ ආර්ථික අර්බුදය දවසෙන් දෙකෙන් විසඳන්න බැහැ කියන එක අපි හැමෝම පිළිගන්නවා. නමුත් ආර්ථික වශයෙන් ජනතාව ඉන්න පීඩනයෙන් යම් කිසි ආකාරයකට ඔවුන්ට සහනයක් අවශ්‍යයි. රටේ ජනතාවත් ඒ දේ බලාපොරොත්තුවෙන් ඉන්නේ. ඒ සඳහා ජාතික ජන බලවේගයට තියෙන කෙටි කාලීන සැලැස්ම මොකද්ද?
අපි හිතනවා අපේ ආණ්ඩුවක් යටතේ මීට වඩා හොඳට ආර්ථිකය කළමනාකරණය කරන්න පුළුවන් කියලා. ඒ වගේම අපේ ආණ්ඩුවේ ආර්ථික සැලැස්ම තුළ රාජ්‍ය ආදායම බදු වැඩි කිරීමෙන්ම පමණක් ලබා ගන්න අපේ බලාපොරොත්තුවක් නැහැ. අපි හිතනවා අපේ බදු ප්‍රතිපත්තිය ආර්ථික සංවර්ධන සැලැස්ම එක්කත් යා යුතුයි කියලා. ඒ නිසා යම්කිසි විදියකට ඒ බදු ප්‍රතිපත්තිය අපිට නැවත වරක් රිවීව් කරන්න සිද්ධ වෙනවා. ජනතාව අපෙන් බලාපොරොත්තු වෙන්නේ ආර්ථික සහන පමණක්ම නෙමෙයි. දේශපාලන සංස්කෘතියේ පරිවර්තනයක් තමයි මුලින්ම බලාපොරොත්තු වෙන්නේ. ජනතාවට බර පටවන ජනතාවට අසංවේදී පාලනයක් වෙනුවට ජනතාව ප්‍රමුඛ කර ගත්ත, ජනතාවාදී පාලනයක් මොකද්ද කියලා අත්විඳින්න ජනතාවට පුළුවන් වෙනවා ජාතික ජන බලවේගය බලයට ආව පළවෙනි දවසේ ඉඳන්ම.
මෑත කාලයේ ජාතික ජන බලවේගයේ නැගීමත් සමග දැනට පාර්ලිමේන්තුවේ ඉන්න ඇතැම් මන්ත්‍රීවරුන් පිළිබඳව යම්කිසි කතාබහක් ඇතිවෙලා තියෙනවා ඔවුන් ජාතික ජන බලවේගය සමග එකතුවීමට සිටිනවා කියලා. ජාතික ජන බලවේගය සූදානම් ද එලෙස පැමිණෙන මන්ත්‍රීවරුන්ව පිළිගන්න.
ඒගොල්ලන්ගේ කැමත්ත විතරක් නෙමෙයි මෙතන අදාළ වෙන්නේ. ජනතාවගේ කැමැත්ත තමයි අංක එක. අපි ජාතික ජන බලවේගය ගොඩනගලා තියෙන්නේ නිකන්ම දේශපාලන පක්ෂයක් විදියට නෙමෙයි. ජාතික ජන බලවේගය කියන්නේ ජනතා ව්‍යාපාරයක්. ජනතාව ප්‍රතික්ෂේප කරපු අයත් එක්ක අපිට ගනුදෙනු කරන්න බැහැ. ඒක අපේ ව්‍යාපාරයටත් ලොකු හානියක්. සෘජුවම හොරකම් කරපු නැති එක විතරක් නෙමෙයි හොරුන් වෙනුවෙන් යම්කිසි විදියකට පෙනී හිටියා හෝ හොරකම්වලට ඉඩ දුන්නා කියන එකත් මේ වෙලාවේ ජනතාව ප්‍රතික්ෂේප කරන දෙයක්. ඒ නිසා අපිත් එක්ක එකට වැඩ කරන්න නම් ඒ ජනතා වරම අවශ්‍ය වෙනවා. ජාතික ජන බලවේගයට එන්න ඉන්න අය ගැන ඔවුන්ව ජනතාව පිළිගන්නවා කියන සංඥාවක් ජනතාවගෙන් ලැබුණොත් තමයි අපිට ඒ අය එක්ක වැඩ කරන්න පුළුවන් වෙන්නේ.
