අප්‍රේල් 17 දින රජයේ ගැසට් මගින් ප්‍රකාශයට පත්කර ඇති ලංකා විදුලි බල මණ්ඩලය ප්‍රතිව්‍යුහගතකරණයට අදාළ ‘ශ්‍රී ලංකා විදුලිබල’ පනත් කෙටුම්පතට අනුව 2007 අංක 7 දරන සමාගම් පනත යටතේ ස්ථාපිත කෙරෙන සමාගම් ගණනාවකට එම මණ්ඩලයේ කර්තව්‍යය පවරා දෙනු ලබන අතර එම මණ්ඩලයට අයත් ගල් අඟුරු, තාප සහ සුළං විදුලි බලාගාරවල අයිතිය පෞද්ගලික අංශයට ලබා ගැනීමේ හැකියාව ලබාදී ඇත.
ඊට අමතරව විදුලිය බෙදා හැරීමට හා සම්ප්‍රේෂණයට අදාළව ඇති කරන සමාගම්වල කොටස් අයිතියද පෞද්ගලික අංශයට ලබා ගැනීමේ හැකියාව ලබාදී ඇත. එම පනත් කෙටුම්පතට අනුව ශ්‍රී ලංකා රජයේ සියයට සියයක කොටස් හිමිකාරිත්වය යටතේ ඇති සමාගම් ලෙස තබාගත යුතු බවට සඳහන් කර ඇත්තේ ජල විදුලි බලාගාරවල වත්කම් පවරන සමාගම, විදුලි බලය උත්පාදනය සහ සම්ප්‍රේෂණය දත්ත හා ධාරිතාව සැලසුම් කිරීමේ කර්තව්‍ය පැවරෙන සමාගම හා එම මණ්ඩලයේ සේවක අර්ථ සාධක අරමුදල හා විශ්‍රාම වැටුප් අරමුදල පවත්වාගෙන යෑමේ හා කළමනාකරණය කිරීමේ සමාගම පමණය.
ඒ අනුව ලංකා විදුලි බල මණ්ඩලයේ ජල විදුලි බලාගාරවල වත්කම් පවරා ගැනීම සඳහා ශ්‍රී ලංකා රජයට සියයට සියයක කොටස් හිමි එක් සමාගමක්ද, ලංකා විදුලි බල මණ්ඩලය මෙන්ම ලංකා ගල් අගුරු සමාගම විසින් හිමිකාරිත්වය දරන සහ ක්‍රියාත්මක කරනු ලබන ගල් අගුරු විදුලි බලාගාර හිමිකාරිත්වය ලබා ගැනීම සඳහා එක් සමාගමක්ද, ලංකා විදුලි බල මණ්ඩලයේ තාප විදුලි බලාගාර සඳහා එක් සමාගමක්ද, ලංකා විදුලි බල මණ්ඩලය විසින් සන්තකය හා හිමිකාරිත්වය දරන සුළං විදුලි බලාගාර සඳහා එක් සමාගමක්ද, ශ්‍රී ලංකාවේ ජාතික ජාලකයේ භෞතික යටිතල පහසුකම් වැඩි දියුණු කිරීම, පවත්වාගෙන යෑම සහ ක්‍රියාත්මක කිරීම සම්බන්ධයෙන් වන ලංකා විදුලි බල මණ්ඩලයේ කර්තව්‍ය පවරා ගැනීමට එක් සමාගමක්ද, උත්පාදන කාල සටහන්ගත කිරීම, වගකීම සහ උත්පාදන පිරියතවල පිරිමැසුම්දායක ප්‍රේෂණය සම්බන්ධයෙන් වන කර්තව්‍ය සහ ලංකා විදුලි බල මණ්ඩලයේ අනාගත විදුලි සහ සම්ප්‍රේෂණ ධාරිතාව සැලසුම් කිරීම සම්බන්ධයෙන් වන කර්තව්‍ය පවරා ගැනීමට ශ්‍රී ලංකා රජය විසින් සියයට සියයක කොටස් දරනු ලබන එක් සමාගමක්ද, ලංකා විදුලි බල මණ්ඩලයේ බෙදා හැරීම් අංශවල බෙදා හැරීමේ කර්තව්‍ය පවරා ගැනීමට වෙන් වූ සමාගම්ද, ලංකා විදුලි බල මණ්ඩලයේ අවශේෂ කර්තව්‍ය කළමනාකරණය කිරීම සඳහා අවශ්‍ය වන සමාගම් යම් ගණනක්ද පිහි්ටුවීමට නියමිතය.
එම අවශේෂ කර්තව්‍ය කළමනාකරණය කිරීම සඳහා පිහිටුවන සමාගම් අතරින් සංස්ථාගත කරන ලද සමාගම්වලට පැවරූ කර්තව්‍ය හා කටයුතු හැර ලංකා විදුලි බල මණ්ඩලයේ කටයුතු පවරා ගැනීම සඳහා එක් සමාගමකුත්, ලංකා විදුලි බල මණ්ඩලයේ අර්ථසාධක අරමුදලේ සහ විශ්‍රාම වැටුප් අරමුදලේ කර්තව්‍ය පවරා ගැනීමට සහ එහි භාරකරු ලෙස ක්‍රියා කරමින් කළමනාකරණය කිරීම සඳහා සම්පූර්ණ කොටස් හිමිකම රජය සතු සමාගමකුත් පිහිටුවීමට නියමිතය.
මෙම පනත ක්‍රියාත්මක වීමත් සමග ලංකා විදුලි බල මණ්ඩලය පිහිටුවීමට අදාළ 1969 අංක 17 දරන ලංකා විදුලි බල මණ්ඩල පනත සහ 2009 අංක 20 දරන ශ්‍රී ලංකා විදුලි බල පනත අහෝසි වේ. මෙම පනත හඳුන්වා දී ඇත්තේ විදුලි බල කර්මාන්තයට සිදු කරනු ලබන ප්‍රතිසංස්කරණ ක්‍රියාත්මක කිරීමට විධිවිධාන සැලැස්වීමේ හා විදුලි බලය උත්පාදනය කිරීම, සම්ප්‍රේෂණය කිරීම, බෙදා හැරීම, වෙළෙඳාම් කිරීම, සැපයීම් සහ ප්‍රසම්පාදනය කිරීම සම්බන්ධ සියලු කටයුතු පැවරී ඇති සංස්ථාමය අස්ථිත්ව 2007 අංක 07 දරන සමාගම් පනත යටතේ සංස්ථාිගත කිරීමට අදාළ ව්‍යවස්ථාමය පියවර සැපයීම සඳහා වන පනත වශයෙනි.
මෙම පනත් කෙටුම්පත සම්බන්ධයෙන් අප්‍රේල් 18 දින මාධ්‍ය සාකච්ඡාවක් පවත්වමින් ලංකා විදුලි බල මණ්ඩලයේ ඉංජිනේරු සංගමය පෙන්වා දී තිබුණේ එම පනත් කෙටුම්පතෙන් සමාගම් තුනක හැර අනෙක් සමාගම්වල කොටස් පෞද්ගලික අංශයට විකිණීමේ බලය කැබිනට් මණ්ඩලයට පමණක් ලබාදී ඇති බවත්, එය පාර්ලිමේන්තුවෙන් ගත යුතු තීරණයක් ලෙස තබාගෙන එම සමාගම්වල රජය සතු අවම කොටස් අයිතිය ප්‍රතිපත්තියක් වශයෙන් තීරණය කළ යුතු බවය. එසේ නොවුණහොත් ඒ මගින් රටේ ස්වෙරීත්වයට හා ඒකීයත්වයට හානි පැමිණවිය හැකි බවය.
එමෙන්ම ජාතික විදුලි ප්‍රතිපත්තියක් ගැන කීවද ස්ථාවර විදුලිය සැපයීම පිළිබඳ පැහැදිලි අර්ථකථනයක් හෝ විදුලිය නිෂ්පාදනයේ අවම පිරිවැය පිළිබඳ සහතික කිරීමක් අරමුණක් ලෙස නැති බවය. ලංකා විදුලි බල මණ්ඩලය අහෝසි කර නව සමාගම් ඇති කිරීම සඳහා කාලය ලෙස දක්වා ඇත්තේ මාස 06ක් බවත්, එය කෙටි කාල සීමාවක් බවත් හා ප්‍රමාණවත් කාල සීමාවක් නොවන බවත්ය.
තවද මහජන උපයෝගිතා කොමිසමේ කටයුතු තවදුරටත් දුර්වල කර ඇති බවද, විසි අවුරුදු ජනන සැලැස්ම අනුමත කිරීමේ බලය ඇමතිවරයා හා කැබිනට් මණ්ඩලය ලබාගෙන ඇති බවද කියා ඇත. මෙම පනත මගින් විදුලි බල ක්ෂේත්‍රයේ පුද්ගලික ඒකාධිකාරයක් සඳහා ප්‍රතිපාදන සලසා ඇති බවද වැඩිදුරටත් අවධාරණය කර ඇත.
