ජනාධිපති රනිල් වික්‍රමසිංහ ප්‍රකාශ කළ පරිදි රතු මුහුදේ මෙහෙයුම් සඳහා ශ්‍රී ලංකා නාවික හමුදාව සූදානම් බව එහි මාධ්‍ය ප්‍රකාශක කපිතාන් ගයාන් වික්‍රමසූරිය මාධ්‍යයට කියා ඇති අතර අප කළ විමසුමේදීද ඔහු ඒ බව තහවුරු කළේය. කොළඹ සිරිමා බණ්ඩාරනායක සම්මන්ත්‍රණ ශාලාවේ පැවති ‘ශිල්ප අභිමානි 2023’ ජනාධිපති හස්ත කර්මාන්ත සම්මාන උළෙලට සහභාගි වෙමින් ජනාධිපතිවරයා ඒ බව මුලින්ම කියා තිබුණි. එම මෙහෙයුම් සඳහා දෙසතියකට රුපියල් මිලියන 250ක පමණ මුදලක් වැයවන බවද කියා තිබුණි.
රතු මුහුදේ මෙහෙයුම්වලට යුද නැවක් යැවීමේ ජනාධිපතිවරයාගේ එම තීරණය විවේචනය කරමින් විපක්ෂ නායක සජිත් ප්‍රේමදාස මෙන්ම ජාතික ජන බලවේගයේ නායක අනුර කුමාර දිසානායකද කියා තිබුණේ ආර්ථික වශයෙන් දැඩි අර්බුදයකට ලක්වී සිටින ශ්‍රී ලංකාවේ ප්‍රමුඛතා අතර මෙම අවස්ථාවේ රතු මුහුදේ මෙහෙයුමක් තිබිය නොහැකි බවත්, එවැනි වියදමක් මෙම අවස්ථාවේ කෙසේවත් සාධාරණීය කළ නොහැකි බවත්ය.
ගාසා තීරයේ ඊශ්‍රායලය විසින් සිදුකරන පහරදීම්වලට එරෙහිව රතු මුහුද හරහා ගමන් කරන ඊශ්‍රායල හා එයට සම්බන්ධ වාණිජ නැව්වලට හුති කැරලිකරුවන් විසින් මිසයිල හා ඩ්‍රෝන යානා යොදා ගනිමින් පහරදීම් සිදුකරයි. ඒ සඳහා ප්‍රතිප්‍රහාරයන් එල්ල කිරීම සඳහා ඇමරිකා හා බි්‍රතාන්‍ය යුද නැව් එම ප්‍රදේශයට මුලින්ම ගිය අතර ලෝකයේ තවත් බලවත් රටවල්ද දැන් එම මෙහෙයුම් සඳහා එක්වී තිබේ. හුති කැරලිකරුවන් අන්තර් මහද්වීපික බැලසිටික් මිසයිල පවා එල්ල කරමින් සිටියි. ඒ යේමනයේ සිටය. හුති කැරලිකරුවන්ට යේමනයට අමතරව ඉරානයේ මෙන්ම ඇමරිකානු කඳවුරට ප්‍රතිවිරුද්ධ රටවල සහාය ලැබෙන බවද කියවේ.
ජනාධිපති රනිල් වික්‍රමසිංහ එම රකු මුහුදේ ගැටුම සම්බන්ධයෙන් මෙම වසරේ මුල අදහස් දක්වමින් කීවේ රතු මුහුද හරහා ගමන් කරන නැව්වලට බාධා ඇති වුවහොත් එමගින් ශ්‍රී ලංකාවට සිදුකරන ආනයනවලට බලපෑමක් එල්ල විය හැකි බව හා ඒ නිසා ශ්‍රී ලංකාවේ ආනයන වියදම් වැඩිවිය හැකි බවයි. ඒ නිසා එම රතු මුහුදේ මෙහෙයුම්වලට ශ්‍රී ලංකා නාවික හමුදාවේ නැවක් යැවීමට තමා තීරණය කර ඇති බවද, ඒ සඳහා සති දෙකක පමණ කාලයකට රුපියල් මිලියන 250ක මුදලක් වැයවිය හැකි බවද ඔහු කියා තිබුණි.
ඉන්පසු ඔහු ඇමති මණ්ඩල සාමාජිකයන් පිරිසක් හමුවෙමින් කියා තිබුණේ රතු මුහුදේ ගමන් කරන නැව්වලට ආරක්ෂාව නොදුන්නොත් ඒ මගින් කොළඹ ඇතුළු ශ්‍රී ලංකාවේ වරායවලට දැඩි තර්ජනයකට මුහුණ දීමට සිදුවනු ඇති බවත්, ශ්‍රී ලංකාවේ නැව් යවන්නේ රතු මුහුදේ හරහා භාණ්ඩ ප්‍රවාහනය කරන නැව්වලට ආරක්ෂාව ලබාදීමට මිස රටවල් අතර යුද්ධයකට නොවන බවත්ය. එමෙන්ම මහ පරාක්‍රමබාහු රජ සමයෙන් පසු ජාත්‍යන්තර මුහුදේ ආරක්ෂාවට ශ්‍රී ලංකාවෙන් නැව් යවන පළමු අවස්ථාව මෙය බවද, රතු මුහුදට නැව් යැවීමට වැයවන මුදල දෙස බලා එම කටයුත්තෙන් ඉවත් වුවහොත් ශ්‍රී ලංකාවට නැව් නොපැමිණීමෙන් ඊට වඩා පාඩුවක් සිදුවන බවද ඔහු එම ඇමතිවරුන්ට කියා තිබුණ බව මාධ්‍ය වාර්තා කර තිබුණි.
එමෙන්ම එම ප්‍රකාශයෙන් දින කිහිපයකට පසු ජනාධිපති රනිල් වික්‍රමසිංහ මැද පෙරදිග හා මුස්ලිම් රටවල තානාපතිවරුන් කැඳවමින් ඊශ්‍රායල හමාස් ගැටුම සම්බන්ධයෙන් සිය ස්ථාවරය පැහැදිලි කරමින් කළ සාකච්ඡාවේදී අවධාරණය කර තිබුණේද රතු මුහුදේ හුති කැරලිකරුවන් සිදුකරමින් පවතින ප්‍රහාර හමුවේ ශ්‍රී ලංකාවේ ආර්ථිකයට සිදුවන අහිතකර බලපෑම් අවම කර ගැනීම සඳහා හා නාවික ගමනාගමනයේ නිදහස ආරක්ෂා කිරීම වෙනුවෙන් රතු මුහුදේ ආරක්ෂක මෙහෙයුම්වලට ශ්‍රී ලංකාව සම්බන්ධ වන බවයි. එමෙන්ම එම සාකච්ඡාවේදී ඊශ්‍රායල පලස්තීන ගැටුම සම්බන්ධයෙන් රටවල් දෙකක විසඳුම තමා පිළි ගන්නා බවද ඒ වෙනුවෙන් පෙනී සිටින බවද ජනාධිපතිවරයා කියා තිබුණි.
පසුගිය සතියේ උගන්ඩාවේ කම්පාලා නුවර පැවති නොබැඳි ජාතීන්ගේ රාජ්‍ය නායක සමුළුවේදීද ජනාධිපති රනිල් වික්‍රමසිංහ පවසා තිබුණේ ඊශ්‍රායලය හා පලස්තීනය යන රටවල් දෙකක විසඳුමක් අවශ්‍ය බවත් ඔහු ඒ වෙනුවෙන් පෙනී සිටින බවත්ය. එමෙන්ම ගාසා තීරයද, බටහිර ඉවුරද, නැගෙනහිර ජෙරුසලමද පලස්තීනයට අයත් බවය.
එහෙත් පසුගිය සතියේ නිවේදනයක් නිකුත් කරමින් ශ්‍රී ලංකා වරාය අධිකාරිය කියා තිබුණේ රතු මුහුදේ අර්බුදකාරී තත්වය මත එම මුහුදු කලාපයෙන් නැව් ගමන් නොකර දකුණු අප්‍රිකාව හරහා ගමන් කිරීම නිසා ශ්‍රී ලංකාවේ කොළඹ වරාය අනිවාර්ය නැව් ගමනාන්තයක් බවට පත්වී ඇති බවත්, ඒ නිසා ශ්‍රී ලංකා වරාය අධිකාරියේ ආදායම සියයට 80කින් වැඩිවී ඇති බවත් හා කොළඹ වරාය තුළ නැව් තදබදයක් ඇති වී ඇති බවත්ය.
ඒ අනුව රතු මුහුදේ අර්බුදය නිසා ශ්‍රී ලංකාවේ ආර්ථිකයට සිදුවිය හැකි බලපෑම ගැන ජනාධිපතිවරයා කියන දෙය හා ශ්‍රී ලංකා වරාය අධිකාරිය කියන දෙය අතර පරස්පරයක් තිබේ. කොළඹ වරායට වැඩිපුර නැව් ඒම යනු රටේ ආර්ථිකයට ලැබෙන අමතර දායකත්වයකි. අනෙක් පැත්තෙන් සිදුවිය හැක්කේ රටට ආනයනය කිරීම් සිදුකිරීමේදී මුහුදු ගමන් මාර්ගය දිගුවීම නිසා නැව් ගාස්තුවේ වැඩි වීමකි. එහිදී විමසා බැලිය යුත්තේ අප රටට කරන වැඩිම ආනයනයන් ඇත්තේ රතු මුහුද හරහා ගමන් කරන නැව්වලින්ද යන්නය. සහල්, අල, ළුෑණු, මිරිස් ආදිය අප ආනයනය කරන්නේ ඉන්දියාව, පාකිස්ථානය වැනි අසල්වැසි රටවලිනි. අනෙකුත් ආනයනයන්ගෙන් වැඩි හරියක් සිදුකරන්නේ චීනයෙනි.
එසේම කොළඹ වරාය යනු අප රටේ ආනයන හා අපනයන නිසා කාර්යක්ෂමතාවක් තිබෙන වරායක් නොවේ. කොළඹ වරායේ ප්‍රධාන කාර්යයය වන්නේ ප්‍රති අපනයන කටයුතුය. විශේෂයෙන්ම ප්‍රධාන නැව් ගමන් මාර්ගයට දුරින් පිහිටි ඉන්දියාවේ වරායන්වලට ප්‍රතිඅපනයන සේවා සැපයීමය. ප්‍රධාන නැව් ගමන් මාර්ගයේ විශාල නැව් මගින් එන භාණ්ඩ එම ඉන්දීය වරායන්වලට වෙනත් නැව් මගින් යැවීමත්, එම ඉන්දීය වරායන්වලින් එන භාණ්ඩ කොළඹ වරායෙන් ප්‍රධාන ගමන් මාර්ගයේ නැව්වලට ලබාදීමත් මෙහිදී සිදුකෙරේ. ඒ නිසා ජනාධිපති රනිල් වික්‍රමසිංහ කියන ආකාරයට රතු මුහුදේ ප්‍රශ්නයට අනිවාර්යෙන්ම සම්බන්ධ වීමේ අවශ්‍යතාවක් ශ්‍රී ලංකාවට ඇතිද යන්න ප්‍රශ්නාර්ථයකි. මන්ද බලවත්කම අතින් ගතහොත් අපට පෙර අසල්වැසි ඉන්දියාව ඒ සඳහා මැදිහත් විය යුතුව ඇති හෙයිනි.
අනෙක් පැත්තෙන් ජනාධිපති රනිල් වික්‍රමසිංහම කියා ඇති පරිදි හා කියන ආකාරයට රට ඇත්තේ ආර්ථික වශයෙන් ඉතාමත් අසීරු තත්වයකය. රටේ රෝහල් පද්ධතියේ අත්‍යවශ්‍ය බෙහෙත් හා උපකරණවත් මිලදී ගැනීමට හැකි තත්වයක දැන් ශ්‍රී ලංකාව නැත. රෝහල් පද්ධතියේ අඩුපාඩු මෙන්ම ඖෂධ හිගය ගැන අපට අසන්නට ලැබෙන්නේ ඒ නිසාය. පසුගිය කාලයේත් රජයේ රෝහල් පද්ධතිය යන්තම් ගැටගසා ගත්තේ ඉන්දීය ණය ආධාරය යටතේ ඉන්දියාවෙන් ලබාගත් ඖෂධ හා අනෙකුත් ද්‍රව්‍ය නිසාය.
එවැනි තත්වයක් තුළ මෙම රතු මුහුදේ මෙහෙයුම් සඳහා ශ්‍රී ලංකාවට සති දෙකක කාලයකට වැය වෙතැයි ජනාධිපතිවරයා කියූ රුපියල් මිලියන 250ක මුදලක් යනු සැලකිය යුතු මුදලකි. රතු මුහුදේ මෙහෙයුම් සඳහා ශ්‍රී ලංකා නාවික හමුදාවේ නැවක් එක්කිරීම යනු සති දෙකක කාලයකින් අවසන් වන්නක් නොවේ. නාවික හමුදා මාධ්‍ය ප්‍රකාශක කපිතාන් ගයාන් වික්‍රමසූරියගෙන් අප කළ විමසීමේදී ඔහු ප්‍රකාශ කළේද දීර්ඝ කාලයක් මුහුදේ සිටිය හැකි විශාල නැවක් ඒ සඳහා යෙදිය යුතු බවයි. ඒ අනුව මාස දෙකක කාලයක් ශ්‍රී ලංකාව එම මෙහෙයුමට සම්බන්ධ වුවත් ඒ සඳහා රුපියල් බිලියනයක මුදලක් වැය කිරීමට සිදුවේ. නමුත් රතු මුහුදේ වත්මන් අර්බුදයද සති කිහිපයකින් අවසන් වෙතැයි කිව නොහැකිය. මන්ද එය ඊශ්‍රායල හමාස් ගැටුමට වෙළී ඇති එකක් නිසා එම ගැටුම පවතින තාක් එයද පවතිනු ඇතැයි අපට අනුමාන කළ හැකි නිසාය.
රතු මුහුදට තවම ගොස් නැතත් රතු මුහුදට ගොස් කරන්නට බලාපොරොත්තු වන කාර්ය පිළිබඳව ශ්‍රී ලංකා නාවික හමුදාවේ මාධ්‍ය ප්‍රකාශක කපිතාන් ගයාන් වික්‍රමසූරිය කරන ප්‍රකාශ අනුවත්, හුති කැරලිකරුවන් සමග ඇමරිකාව ඇතුළු රටවල් එම මුහුදේ මේ වනවිට කරමින් සිටින කාර්යය සමග ගත් කලත් විශේෂ කාර්යයක් කිරීමට අප එහි යන්නේ නැත. අඩුම තරමේ හුති කැරලිකරුවන් ප්‍රහාර එල්ල කරන කලාපයටවත් යන්නට අපේ සූදානමක් නැති බව නාවික හමුදා මාධ්‍ය ප්‍රකාශකවරයා කියයි. එකක් ඒ සඳහා නවීන නාවික යුද බලයක් අපට නැතිකම නිසා විය හැකිය. කොහොමටවත් මිසයිලවලින් ආරක්ෂා වීම සඳහා මිසයිල ආරක්ෂණ පද්ධතියක්වත් අපේ යුද නැව්වලට නැත. ඒ නිසා මේ මොහොතේ රටක් වශයෙන් කෙසේවත් දැරීමට නොහැකි අති විශාල වියදමක් දරමින් තීරණාත්මක කාර්යභාරයක්වත් නොමැතිව රතු මුහුද ප්‍රදේශයට යුද නැවක් යවනවා යන්නම ජනාධිපතිවරයාගේ උද්දච්ඡ තීන්දුවක් මිස වෙනකක් නොවේ. මන්ද රතු මුහුදු කලාපයේ පවතින තත්වය අනුව සහ අපේ යුද නැව්වල තත්වය අනුව හා ඇමරිකාව ඇතුළු රටවල් එහි කරමින් සිටින දෙය අනුව අපට කරන්නට දෙයක් එහි නැති බව පෙනෙන නිසාය.
අපි රතු මුහුදේ යුද කලාපයට යන්නේ නෑ – නාවික හමුදා මාධ්‍ය ප්‍රකාශක කපිතාන් ගයාන් වික්‍රමසූරිය
- ප්‍රශ්නය – රතු මුහුදේ මෙහෙයුම්වලට යෑමට සූදානමින් සිටින බවට මාධ්‍ය වාර්තා පලවෙනවා එය ඇත්තක්ද
- පිළිතුර -අපි යන්න සූදානමින් ඉන්නේ. තවම යන දවසක් ගැන තීරණය කරලා නෑ. අපි යන්නේ වෙළඳ නැව්වලට ප්‍රශ්නයක් වුනොත් ඒවා බේරා ගන්න.
- ප්‍රශ්නය – එම ආරක්ෂාව ලබාදෙන්න යන්නේ කොහොමද, නැව්වලට නැගලා ආරක්ෂාව දෙනවද?
- පිළිතුර – අපි වෙළඳ නැව්වලට නගින්නේ නෑ. සන්නිවේදනය මගින්, තොරතුරු ලබාදීම මගින්, තොරතුරු බෙදාගැනීම මගින් අපිට එම කටයුතු කරන්න පුළුවන්. අපි කා එක්කවත් යුද්ධ කරන්න යන්නේ නෑ. මොනම හේතුවකටත් හුති කැරලිකරුවන් සමග සටන් කරන්න යන්නේ නෑ.
- ප්‍රශ්නය – හුති කැරලිකරුවෝ මිසයිල් හා ඩෝන වලින් ප්‍රහාර එල්ල කරන්නේ, අපේ නැව්වලට මිසයිල ආරක්ෂණ පද්ධතියක් තියෙනවද?
- පිළිතුර – රතු මුහුදු කලාපය කියන්නේ විශාල ප්‍රදේශයක්. හුති කැරලිකරුවන්ට මිසයිල් ගහන්න පුළුවන් දුරක් තියෙනවා. අපි රතු මුහුද ඇතුලට ගිහින් යුද කලාපයට යන්නේ නෑ. එයට සම්බන්ධ අරාබි මුහුද ආදිය තියෙනවා.
- ප්‍රශ්නය – අපේ නැව්වලට දැනට මිසයිල් ආරක්ෂණ පද්ධතියක් නැහැනේ
- පිළිතුර – අපි ඒ ගැන සාකච්ඡා කරමින් ඉන්නේ. අපිට නැති වුනාට ගුවන් හමුදාවට තියෙනවනේ. ඒක අපිට ෂෙයා කරගන්න පුළුවන්.
- ප්‍රශ්නය – මේ සඳහා දැනට නාවික හමුදාව සතුව ප්‍රතිපාදන තියෙනවද?
- පිළිතුර – දැනටත් අපි සෝදීසි මෙහෙයුම්වලට (පෙට්රෝල්) යනවා. ලංකාවේ මුහුදු සීමාවේ පමණක් නෙමේ. කිලෝ මීටර් දාහක් විතර ජාත්‍යන්තර මුහුද දක්වා ගිහින් කුඩු බෝට්ටු අල්ලා ගන්නවා. කොහොමත් නැවක් මුහුදට යනකොට වියදමක් තියෙනවා. ඒක අතිරේක වියදමක් නෙමේ.
