මිග් යානා ගනුදෙනුවට අදාළ රාජ්‍යයන් දෙකක් අතර අත්සන් කළ මුල් ගිවිසුම අස්ථානගත වී ඇතැයි ජනාධිපති නීතිඥ මෛත්‍රී ගුණරත්න කොටුව මහේස්ත්‍රාත් තිළිණ ගමගේට දැනුම් දී ඇත.
ඒ ඩොලර් මිලියන 15ක වටිනාකමක් ඇති මිග් යානා ගනුදෙනුව පිළිබඳ නඩුව මෝසමක් මගින් ජනවාරි 09 දින කැඳවූ අවස්ථාවේදීය.
එහිදී ජනාධිපති නීතිඥ මෛත්‍රී ගුණරත්න කියා ඇත්තේ අපරාධ පරීක්ෂණ දෙපාර්තමේන්තුවට ප්‍රකාශයක් ලබා දෙමින් එයාර් වයිස් මාර්ෂල් කුමාරසිංහ මිග් යානා ගනුදෙනුවට අදාළ මුල් ගිවිසුම අස්ථානගත වී ඇතැයි හෙළිකොට ඇති බවයි. වසර 8ක කාලයක් ගතවී ඇතත් ඒ සම්බන්ධයෙන් එම දෙපාර්තමේන්තුව කිසිදු පියවරක් ගෙන නැති බවයි.
මිග් යානා ගනුදෙනුවට අදාළ මුල් ගිවිසුම අස්ථානගත කළ අය සම්බන්ධයෙන් කිසිදු පියවරක් නොගත් අපරාධ පරීක්ෂණ දෙපාර්තමේන්තුව එම ගනුදෙනුවේ තැරැව්කරුවන් ලෙස පමණක් කටයුතු කළ පුද්ගලයන් එම නඩුවේ සැකකරුවන් ලෙස නම් කර ඇතැයි අධිකරණය හමුවේ කියා ඇත.
