ශ්‍රී ලංකා ක්‍රිකට් කණ්ඩායමේ ලෝක කුසලාන තරගාවලියේ පරාජය පිටුපස, එක්තරා කණ්ඩායමක් සිටි බවත්, ඔවුන්ගේ කුමන්ත්‍රණකාරී වැඩපිළිවෙළ නිසා මෙම ඛේදනීය පරාජය අත් වූ බවත් ශ්‍රී ලංකා ක්‍රිකට් තේරීම් කමිටුවේ සභාපති ප්‍රමෝද්‍යය වික්‍රමසිංහ ශ්‍රී ලංකා ක්‍රිකට් කණ්ඩායම දිවයිනට පැමිණි අවස්ථාවේ කටුනායක ගුවන් තොටුපොළේ දී පැවසීය. මේ පිළිබඳ සියලු තොරතුරු දින දෙකකින් ශ්‍රී ලාංකීය ජනතාවට දැන ගැනීමට සළස්වන බවත් කියා සිටියේය.
ඒ අනුව ප්‍රමෝද්‍යය වික්‍රමසිංහ මාධ්‍ය නිවේදනයක් නිකුත් කළේ ක්‍රිකට් අර්බුද, සටන් අලකලංචි මධ්‍යයේය. ශ්‍රී ලංකා ක්‍රිකට් ආයතනයේ බලය සඳහා වන බල පොරයට සබැඳි පුද්ගලයන්, තරග පාවාදීමේ සූදුවේ නිරත තැරැව්කාරයින්, හුදු ආත්මාර්ථකාමය මත පදනම්ව ජාතික කණ්ඩායම තුළ තම ස්ථානය තහවුරු කර ගැනීමට වෙරදරන පුද්ගලයන් මෙම කුමන්ත්‍රණය පසුපස සිටි බව ඔහුගේ නිවේදනයේ සදහන්ය.
හිටපු ක්‍රීඩා ඇමතිවරයා විසින් ප්‍රමෝද්‍යයගේ ප්‍රකාශය පිළිබඳව විමර්ශනයක් කරන ලෙස සුගතදාස ගෘහස්ථ ක්‍රීඩා පිටියේ පිහිටි ක්‍රීඩා වැරදි වැළැක්වීමේ විශේෂ විමර්ශන ඒකකය වෙත නියෝග කෙරිණි. ඒ අනුව කළ කැඳවීම් මත ප්‍රමෝද්‍යය වික්‍රමසිංහ කිහිප වරක් එම ඒකකයට ගොස් කරුණු ඉදිරිපත්කළ බව වාර්තාවිය.
ප්‍රමෝද්‍යයගේ නිවේදනයේ සඳහන් බල පොරයට සබැඳි පුද්ගලයන්, තරග පාවාදීමේ සූදුවේ නිරත තැරැව්කාරයින්, හුදු ආත්මාර්ථකාමය මත පදනම්ව ජාතික කණ්ඩායම තුළ තම ස්ථානය තහවුරු කර ගැනීමට වෙරදරන පුද්ගලයන් ඔවුන්ගේ නම්ගම්, තරාතිරම්, දේශපාලන සබැඳියාවන්, මේ කුමන්ත්‍රණ කරුවන්ගේ සියලු තොරතුරු, දේශපාලන සමාජ සබඳතා, මාධ්‍ය සබඳතා , විශේෂයෙන්ම සමාජ මාධ්‍ය සබඳතා ගැන තොරතුරු විශේෂ විමර්ශන ඒකකය වෙත ඉදිරිපත් කරනු ඇතැයි ක්‍රිකට් ලෝලීහු, රටේ බොහෝ මිනිසුන් ද බලාපොරොත්තුවෙන් සිටියහ.
අවසානයේ සිදුව ඇත්තේ කුමක්ද ?
ශ්‍රී ලංකා ක්‍රිකට් කණ්ඩායමේ ලෝක කුසලාන තරගාවලියේ පරාජය පිටුපස කුමන්ත්‍රණයක් පැවති බවට ප්‍රමෝද්‍යය වික්‍රමසිංහ කළ ප්‍රකාශය තහවුරු කරගැනීමට ප්‍රමාණවත් සාක්ෂි සහ තොරතුරු ඔහු වෙතින් ලැබී නොමැති නිසා ක්‍රීඩා වැරදි වැළැක්වීමේ විශේෂ විමර්ශන ඒකකය ආරම්භ කළ විමර්ශනය නවතා දැමීමට යන බව මාධ්‍ය වාර්තා කර ඇත. ශ්‍රී ලංකා ක්‍රිකට් ආයතනය සහ කණ්ඩායම සම්බන්ධව පාර්ලිමේන්තුවේ ඇමතිවරුන් සහ මන්ත්‍රීවරුන් කළ ප්‍රකාශ මෙන්ම සමාජ මාධ්‍ය තුළ සංසරණය වූ තොරතුරු, ඔහුගේ සාක්ෂි වශයෙන් ලබාදී ඇති බවද මාධ්‍ය වාර්තා කර ඇත. ඒවා අනුව ශ්‍රී ලංකා ක්‍රිකට් කණ්ඩායමේ පරාජය පිටුපස කුමන්ත්‍රණයක් පැවති බව තමන්ට දැනුණු බවද ඔහු කියා ඇත.
ප්‍රමෝද්‍යය වික්‍රමසිංහ එක්වරම තොත්ත බබෙකු වූයේ මෙම නිවේදනය යනු දෙබර කූඩුවක් කඩාගෙන, තමන්ගේම හිස මතට තමන්ම දමාගන්න යනවා යැයි දැනුණ නිසාද ? ශ්‍රී ලංකා ක්‍රිකට් ගැන දේශපාලනඥයන් සහ සමාජ මාධ්‍ය තුළ කියූ දේවල් තොරතුරු අප කවුරුත් දන්නා ප්‍රසිද්ධ දේවල්ය. ඒවා කියන්න විශේෂ නිවේදන අවශ්‍ය නොවේ. ශ්‍රී ලංකා ක්‍රිකට් තේරීම් කමිටුවේ සභාපති වශයෙන් ඔහු කළ ප්‍රකාශය අතිශයින්ම බරපතළය. ඔහු චෝදනා එල්ල කල නිශ්චිත පාර්ශ්වයන් වූයේ ශ්‍රී ලංකා ක්‍රිකට් ආයතනයේ බලය ලබාගැනීමට සබැඳි පුද්ගලයන්, තරග පාවාදීමේ සූදුවේ නිරත තැරැව්කාරයින්, හුදු ආත්මාර්ථකාමය මත පදනම්ව ජාතික කණ්ඩායම තුළ තම ස්ථානය තහවුරු කර ගැනීමට වෙරදරන පුද්ගලයන් වශයෙනි. අවම තරමින් තරග පාවාදීමේ සූදුවේ නිරත තැරැව්කාරයින් කවුරුන්ද යන්න හෝ හෙළිකිරීමට අවශ්‍යය.
ප්‍රසිද්ධියේ කීමට නොහැකි නම් විමර්ශන ඒකකයට හෝ හෙළිදරව් කිරීමට හැකිය. නීතිපතිවරයාට යොමුකරන ඔහුගේ ප්‍රකාශ තුළින් එවැන්නක් හෙළිවේද යන්න කාලයට භාර දෙයකි. එක් අතකට ප්‍රමෝද්‍යය හිතලු කියා ඇත, නැතිනම් අවසානයේදී යම් පාර්ශ්වයක් බේරාගැනීමට උත්සාහ කර ඇති බව කෙනෙකුට කිව හැකිය. ප්‍රමෝද්‍යය කියූ කුමන්ත්‍රණය සත්‍ය නම් එය හෙළිකිරීම ඔහුගේ වගකීමයි. එසේ නොකිරීම තුළින් ඔහු ශ්‍රී ලංකා ක්‍රිකට් ක්‍රීඩාවට කරන්නේ බලවත් අපරාධයකි. ඇත්තටම එවැනි කුමන්ත්‍රණයක් නොමැති නම් ඔහු ඒවෙලේ ගැලවීමට දුන් අහඹු උත්තරයක් නැතිනම් කාගේ හෝ පිටපතක පූරකයෙක් වන්නට පුළුවන.
කෙසේ නමුත් ප්‍රමෝද්‍යය වික්‍රමසිංහ විසින් ක්‍රීඩා වැරදි වැළැක්වීමේ විශේෂ විමර්ශන ඒකකය වෙත ලබාදුන් ප්‍රකාශ නීතිපතිවරයාට යොමුකරන නිසා ඉදිරියේදී කවර ක්‍රියාමාර්ග ගනු ඇත්දැයි බලාසිටිය යුතුය. ශ්‍රී ලංකා ක්‍රිකට් කණ්ඩායමේ පරාජයන් සහ අසාර්ථකත්වයන්ට ක්‍රීඩකයන්, පුහුණුකරුවන් වගේම තේරීම් කමිටුව ද සපුරා වගකිව යුතුය. එම වරදෙන්, වගකීමෙන් මිදෙන්නට කුමන්ත්‍රණ නාටකය කරළියට ගෙන ඒමෙන් පලක් නැත. අවසානයේ ප්‍රමෝද්‍යය වික්‍රමසිංහ ගහපු බෙරේකුත් නැත, බෙරේ පලුවකුත් නැත.
