මීළඟ ජනාධිපතිවරණයේදී පොදුජන පෙරමුණේ අපේක්ෂකත්වය පාර්ලිමේන්තු මන්ත්‍රී ධම්මික පෙරේරාට ලබාදිය යුතු යැයි දැඩි මතයක බැසිල් රාජපක්ෂ සිටින බව වාර්තා වෙයි.
පක්ෂය පවත්වාගෙන යාම සඳහා ධම්මික පෙරේරා අවශ්‍ය බවත් රාජපක්ෂ පවුලේ පාලනයට නතුවෙන පුද්ගලයෙක් හට පක්ෂයේ අපේක්ෂකත්වය ලබාදිය යුතු බවත් මෙහිදී බැසිල් රාජපක්ෂගේ මතය වී ඇතැයි දැන ගන්නට ලැබෙයි.
මේ වනවිට පොදුජන පෙරමුණු කාර්යාලයේ නඩත්තු කටයුතු වල සිට පසුගිය පක්ෂ සම්මේලනය දක්වා පක්ෂයේ සියලු වියදම් දරන පුද්ගලයා බවට ධම්මික පෙරේරා පත්වී තිබෙන අතර ඔහු එම දේවල් සිදුකරමින් සිටින්නේ අපේක්ෂකත්වය දිනාගැනීම වෙනුවෙන් බව එම පක්ෂයේ ආරංචි මාර්ග ප්‍රකාශ කරයි. පක්ෂයේ වියදම් වලට අමතරව පොදුජන පෙරමුණේ සැලකිය යුතු මන්ත්‍රී කණ්ඩායමකට ඔහු ආර්ථික වශයෙන් උදව් කරමින් සිටින බවද එම කණ්ඩායමේ සහාය ද ධම්මික පෙරේරාට ලැබෙන බවද කරුණු වාර්තා වෙයි.
එළබෙන ජනාධිපතිවරණයෙන් රනිල් වික්‍රමසිංහ හට හෝ තම පක්ෂයට හෝ ජයග්‍රහනය කරන්නට බැරිබව බැසිල් රාජපක්ෂගේ දැඩි මතය වී ඇති අතර ඔහුගේ ස්ථාවරය වී ඇත්තේ රාජපක්ෂ පවුලට හිතවත් සහ පවුලට අවනතව කටයුතු කරන පුද්ගලයෙකුගේ නායකත්වයෙන් ඊළඟ පාර්ලිමේන්තු මැතිවරණයේ දී විපක්ෂයේ ප්‍රධාන පක්ෂය බවට පත්වීමට උත්සාහ කිරීම යෝග්‍ය බවයි. එහෙත් මහින්ද රාජපක්ෂ ප්‍රමුඛ අනෙකුත් රාජපක්ෂවරුන්ගේ මතය වී ඇත්තේ රනිල් වික්‍රමසිංහ හට ඉදිරි ජනාධිපතිවරණයේදී සහාය ලබාදිය යුතු බවයි.
රාජපක්ෂ පවුලේ තත්ත්වය එසේ වුණත් ධම්මික පෙරේරාට සමීප දේශපාලන ආරංචි මාර්ග ප්‍රකාශ කරන්නේ තමන්ගේ අධ්‍යාපන වැඩසටහනට සමාජය තුළ තිබෙන ජන ප්‍රසාදය නිසා පොහොට්ටු අපේක්ෂකත්වය හිමිවුණොත් එළබෙන ජනාධිපතිවරණයෙන් තමන්ට ජයග්‍රහනය කිරීමට හැකියාව ඇති බව ධම්මික පෙරේරා තදින් විශ්වාස කරන බවය.
