එළඹෙන වසරේ ජනවාරි 01 වැනිදා සිට ක්‍රියාත්මක වන අත්‍යවශ්‍ය පාරිභෝගික භාණ්ඩ වැට් බද්දෙන් ඉවත් කරන බවට වැට් බදු සංශෝධන පනත පිළිබඳ විවාදයේදී ආණ්ඩුව පාර්ශවයෙන් ප්‍රකාශ වුවද එම බද්දෙන් නිදහස් භාණ්ඩ සම්බන්ධයෙන් දේශීය ආදායම් දෙපාර්තමේන්තුව විසින් නිකුත් කර ඇති නිවේදනය අනුව පෙට්‍රල්, ඩීසල් හා එල්පී ගෑස් එම බද්දට යටත් වන බව පෙන්නුම් කෙරේ.
ඒ අනුව කිලෝ ග්‍රෑම් 12.5ක ගෘහස්ත ගෑස් සිලින්ඩරයක මිල දළ වශයෙන් රුපියල් 640කින් ඉහළ යෑමට නියමිත අතර ඔක්ටේන් 92 පෙට්‍රල් ලීටරයක මිල දළ වශයෙන් රුපියල් 62කින් ඉහළ යෑමට නියිමිතය. ඔටෝ ඩීසල් ලීටරයක මිල දළ වශයෙන් රුපියල් 60කින් ඉහළ යෑමට නියමිතය.
ඉන්ධන සම්බන්ධයෙන් ගත් කළ වැට් බද්දෙන් නිදහස් කර ඇත්තේ බොරතෙල්, භූමි තෙල්, ගුවන් යානා ඉන්ධන, නැව් තෙල් හා දැවි තෙල් පමණය.
භාණ්ඩ හා සේවා සඳහා සියයට 15ක්ව පවතින වැට් බද්ද ජනවාරි 01 වැනිදා සිට සියයට 18ක් දක්වා වැඩි වීමට නියමිත අතර මෙතෙක් වැට් බද්දට යටත් නොවූ භාණ්ඩ හා සේවාද අලුතින් වැට් බද්දට යටත් වීමට නියමිතය.
දේශීය ආදායම් දෙපාර්තමේන්තුව ප්‍රකාශයට පත්කර ඇති වැට් නිදහස් ලැයිස්තුව අනුව පොදු මගී ප්‍රවාහන සේවා වැට් බද්දෙන් නිදහස් කර ඇතත් කුලී රථ සේවා වැට් බද්දට යටත් කර තිබේ. කුකුළු ආහාරද වැට් බද්දට යටත් කර තිබේ. එමෙන්ම රෝහල් කාමර ගාස්තුද වැට් බද්දට යටත් කර තිබේ.
උපාය මාර්ගික සංවර්ධන ව්‍යාපෘති පනත යටතේ හඳුනාගෙන ඇති භාණ්ඩ හා සේවා වැට් බද්දෙන් නිදහස් කර ඇත. වැට් බද්දෙන් නිදහස් කළ අනෙකුත් භාණ්ඩ අතර තිරිගු සහ තිරිගු පිටි, ළදරු කිරිපිටි, ඖෂධ නිෂ්පාදන හා ඖෂධ, කෘෂිකාර්මික බීජ හා කෘෂිකාර්මික පැල, අධ්‍යාපනික සේවා, විදුලිය, සහල්, සහල් පිටි සහ පාන් තිබේ.
