වැට් බදු නැංවීම තුළින් රජය බිලියන 600 කට අධික ප්‍රමාණයක් එකතු කර ගැනීමට බලාපොරොත්තු වන බවත් එය දළ දේශීය නිෂ්පාදිතයෙන් 2.2% ක් බවත් ප්‍රකාශ කරන පාර්ලිමේන්තු මන්ත්‍රී පාඨලී චම්පික රණවක 2024 ආරම්භයේදීම ආණ්ඩුව එක් පුද්ගලයෙක්ගෙන් රු. 30,000ක මුදලක් බදු වශයෙන් උදුරා ගැනීමට අපේක්ෂා කරන බවත් ප්‍රකාශ කරයි.
2022 වසරේ පැවති ආණ්ඩුවේ ආදායමට වඩා 2025 වර්ෂය වනවිට ආණ්ඩුවේ ආදායම දළ දේශීය නිෂ්පාදනයෙන් 6.5%ක ප්‍රමානයකින් වැඩි කරගැනීමට අන්තර් ජාතික මූල්‍ය අරමුදල දැනුම් දී ඇතැයිද වසර 3ක් වැනි කෙටි කාළයක් තුළ ලොව කිසිදු රටකට එවැනි ඉලක්කයක් වෙත ළඟා විය නොහැකි බවද ප්‍රකාශ කරන ඒ මහතා එම ඉලක්ක වෙත ගමන් කිරීම සඳහා ආණ්ඩුව මෙවැනි අත්තනෝමතික තීන්දු තීරණ ගනිමින් ඇතැයි ප්‍රකාශ කරයි.
කොළඹ පැවති මාධ්‍ය හමුවක් අමතමින් ඔහු මෙහිදී වැඩිදුරටත් ප්‍රකාශ කළේ මෙම වැඩිකරගත යුතු ප්‍රමාණය ආසන්න වශයෙන් රුපියල් බිලියන 2000 කට අධික ප්‍රමාණයක් බවත් ඒ අනුව කුඩා දරුවෙකුගේ සිට මහල්ලෙක් දක්වා සියලුම පුරවැසියන් රුපියල් ලක්ෂයකට අධික ප්‍රමාණයක් අවුරුදු තුනක් ඇතුළත ආණ්ඩුවට බදු වශයෙන් ගෙවීම සිදු කළ යුතු බවත් ය.
තෙල් සංස්ථාවේ ලාභය බිලියන 88ක් වුවද එම ආයතනය ද බදු නොගෙවා ඇති බව ප්‍රකාශ කරන ඒ මහතා රාජ්‍ය ආයතන 52ක ලාභය බිලියන 303ක් බවත් එම ආයතන වලින් ද රජය බදු අය කර ගත යුතු බව පෙන්වා දෙයි.
ජනතාව මත බදු බර නොදමා සීනි, පිටි, පොල්තෙල් වලින් බදු වංචා කළ අයගේ බදු ආදායම් සොයා ඒවා ආණ්ඩුව අය නොකර ගන්නේ මන්දැයි ප්‍රශ්න කරන ඒ මහතා බදු නොගෙවූ මත්පැන් නිෂ්පාදන ආයතනයක බලපත්‍රය අහෝසි කිරීමට මුදල් අමාත්‍යාංශය කටයුතු නොකිරීම හේතුවෙන් සෑම සතියකම කෝටි 10.6 ක් රටට අහිමි වන බව පෙන්වා දෙයි.
