මාර්ග සංවර්ධන සේවකයින් වර්ජනය කරමින් අසයි
ආණ්ඩුවේ වත්කම් පෙන්නන්න බව බන්දුල කියයි
ආපදා තත්වයන් වැනි හදිසි අවස්ථාවකදී ගලවා ගැනීමේ මෙහෙයුම් සඳහා මෙන්ම අනෙකුත් කටයුතු සඳහා හමුදාව යෙදවීම ඕනෑම රටක් සිදුකරන කටයුත්තකි. එමෙන්ම වැඩ වර්ජන වැනි අවස්ථාවකදීත් බාධාවකින් තොරව මහජන සේවය සැපයීම සඳහා හමුදාව යොදා ගනී. බස් වර්ජන අවස්ථාවන්හිදී හමුදා රියැදුරන් යොදවා ඒවා ධාවනය කළ හැකි වුවද, දුම්රිය වර්ජනයකදී නම් ඒවා ධාවනය විශේෂ කටයුත්තක් නිසා හමුදාව යොදවා සිදුකළ හැකි වන්නේ නැත. මේ ආකාරයට හමුදාව යොදවා කළ හැකි හා කළ නොහැකි කටයුතු ද තිබේ.
මාර්ග සංවර්ධන අධිකාරියේ සේවකයින් විසින් අසනීප නිවාඩු වාර්තා කරමින් නොවැම්බර් 22 දින ක්‍රියාත්මක කළ එක්දින සංකේත වැඩ වර්ජනයේදීත් අධිවේගී මාර්ගවල ප්‍රවේශ පත්‍ර නිකුත් කිරීමේ කටයුතු සඳහා හමුදාව යොදාගත්තත්, නිල ප්‍රවේශපත්‍ර නිකුත් කිරීමේ හැකියාවක් හමුදාවට තිබුණේ නැත. ඒ ඊට අදාළ ප්‍රවේශ පත්‍ර නිකුත් කිරීමේ උපකරණ පරිපාලන අංශවලින් ලැබුණ උපදෙසක් හේතුවෙන් වැඩ වර්ජන අවස්ථාවට පෙර එම කටයුතුවල යෙදෙන සේවකයන් විසින් ආරක්ෂිත ලෙස වගකිවයුත්තන්ට බාරදීම හේතුවෙනි.
අධිවේගී මාර්ග මෙහෙයුම්, නඩත්තු හා කළමනාකරණ අංශයේ අධ්‍යක්ෂ විසින් ඊට අදාළ උපදෙස් ලිඛිතව අධිවේගී මාර්ගවල සේවකයින්ට ලබාදී ඇත. ඒ අනුව සහකාර අයකැමි අධිකාරිවරුන්, ප්‍රධාන අයකැමි නිලධාරීන් හා අයකැමි නිලධාරීන් වෙත යොමු කරන ලද එම ලිපිය මගින් දැනුම් දී ඇත්තේ නොවැම්බර් 22 දින අධිවේගී මාර්ග රාජකාරි කටයුතු සම්බන්ධයෙන් එදින අලුයම 2.30ත් 3ත් අතර වට්ස්ඇප් මාර්ගයෙන් දැනුම්දුන් පණිවිඩය හා සම්බන්ධව එම උපදෙස් ලබාදෙන බවයි.
එම උපදෙස් වන්නේ, නොවැම්බර් 21 දින රාත්‍රී 7 සිට නොවැම්බර් 22 දින පෙරවරු 7 දක්වා සේවා මුරයේදී රාජකාරියේ යෙදී සිටින අයකැමි නිලධාරීන් විසින් සේවා මුරය අවසන් වීමෙන් පසු එකතු වී ඇති මුදල් ප්‍රමාණය ප්‍රධාන අයකැමි නිලධාරීන්ට බාරදීමට කටයුතු කළ යුතු බවත්, ප්‍රධාන අයකැමි නිලධාරීන් විසින් එම මුදල් මුදල් තැන්පත් කරනු ලබන කාමරයේ තැන්පත් කිරීමටට කටයුතු කළ යුතු බවත් හා ඊලඟ සේවා මුරය සඳහා පැමිණෙන ප්‍රධාන අයකැමි නිලධාරියාට එම මුදල් හා උපාංග නිසි පරිදි බාරදිය යුතු බවත්ය.
එමෙන්ම අධිවේගී මාර්ග සතු උපාංගවල හා මුදල් අය කිරීමේ පද්ධතියේ සුරක්ෂිතභාවය ආරක්ෂා කළ යුතු බවත්, යම් උපාංගයකට හෝ මුදල් අයකිරීමේ පද්ධතියට අලාභානි සිදුවුවහොත් ඒ පිළිබඳ වගකීම ප්‍රධාන අයකැමි නිලධාරීන් බාරගත යුතු බවත්, අන්තර් හුවමාරු කාර්යාලවල සම්පූර්ණ සුරක්ෂිතභාවය සහකාර අයකැමි අධිකාරිවරුන් බාරගත යුතු බවත් එම උපදෙස්වලින් වැඩිදුරටත් දන්වා ඇත.
ගාස්තු අයකිරීමේ එම උපාංග නැති තත්වය මත හමුදාව කරනු ලැබුයේ අතින් ලියූ කොළ කැබලි රිසිට් ලෙස අධිවේගි මාර්ගයේ ගමන් කරන වාහනවලට ලබාදීමත් ඒ සඳහා මුදල් අය කිරීමත්ය. වර්ජනයේ නිරත මාර්ග සංවර්ධන අධිකාරියේ වෘත්තීය සමිති එම තත්වය සම්බන්ධයෙන් ජනතාව දැනුවත් කරමින් පැවසුවේ නිල රිසිට් පතක් නොමැති නම් මුදල් ගෙවීම් සිදු නොකරන ලෙසයි. අධිවේගී මාර්ග පිවිසුම් විවෘත කර සිදුවන අපහසුතාවයෙන් මහජනතාව හමුදාව මුදා ගත්තේ නම් එහි ප්‍රශ්නයක් නැත. එහෙත් අතින් ලියූ කොළ කැබලි සඳහා මුදල් අයකර ගැනීමට හමුදාව යෙදවීම නම් සාධාරණය කළ නොහැකි එකකි. මන්ද අධිවේගී මාර්ගයේ ගාස්තු අයකිරීම් සම්බන්ධයෙන් නිවැරදි ගණනය කිරීමක් එහිදී සිදුවේද යන ප්‍රශ්නය පැන නඟින නිසාය.
දක්ෂිණ අධිවේගි මාර්ගය සඳහා යුද හමුදාවද, මීරිගම සිට කුරුණෑගල දක්වා අධිවේගී මාර්ග කොටසට නාවික හමුදාවද, කටුනායක අධිවේගී මාර්ගයට ගුවන් හමුදාවද එම වර්ජන කාලයේ යොදා ඇති බව මේ සම්බන්ධයෙන් කරන ලද විමසීමකදී හමුදා මාධ්‍ය ප්‍රකාශකවරයා පවසා ඇති අතර ඔහු වැඩිදුරටත් පවසා ඇත්තේ එම මුදල් අය කිරීම් හමුදාව නීත්‍යනුකූල පදනමක් යටතේ සිදුකරන බව හා ඒ සම්බන්ධයෙන් වූ සටහන් පවත්වාගෙන යන බවයි.
කෙසේ වෙතත් මාර්ග සංවර්ධන අධිකාරියේ සේවකයින්ගේ මෙම වෘත්තීය ක්‍රියාමාර්ගයට හේතු වී ඇති හේතු අතර ප්‍රධානම එකක් වන්නේ රටේ ඇති අධිවේගි මාර්ග පද්ධතිය මහා භාණ්ඩාගාරය යටතේ අලුතින් පිහිටුවන සමාගමකට පවරාගෙන එය පෞද්ගලීකරණය කිරීමේ ආණ්ඩුවේ වුවමනාවයි. එහි වෘත්තීය සමිති සමඟ විෂයභාර ඇමති බන්දුල ගුණවර්ධන සමඟ පැවැත්වූ සාකච්ඡාවකදී මහා භාණ්ඩාගාරය යටතේ ආරම්භ කරන සමාගමකට අධිවේගී මාර්ග පද්ධතියත්, ඒවාහී සේවය කරන සේවකයිනුත් ඇතුළත් කරන බවට ප්‍රකාශ කර ඇත. මේ අතර මේ සම්බන්ධයෙන් නොවැම්බර් 22 දින පාර්ලිමේන්තුවේ ප්‍රශ්න කරනු ලැබූ අවස්ථාවේදී විෂය භාර ඇමති බන්දුල ගුණවර්ධන කිවේ එසේ මහා භාණ්ඩාගාරය යටතේ ඇතිකරන සමාගමකට අධිවේගී මාර්ග පද්ධතිය ඇතුළත් කර ගන්නේ රටේ වත්කම් ප්‍රමාණය වැඩිකර පෙන්නීම සඳහා බවයි. මේ උත්තරය මතක් කර දෙන්නේ ගහට නැග්ගේ තණකොළ කපන්නට යැයි කියූ ගහට නැග්ග මිනිහාටත් කියන්නට කතාවක් තිබූ බවට වන පිරුළයි.
එම අවස්ථාවේදී විපක්ෂයේ ප්‍රධාන සංවිධායක ලක්ෂ්මන් කිරිඇල්ල කියා ඇත්තේ 2023 ජුනි 23 දින සහිතව අධිවේගී මාර්ග මහා භාණ්ඩාගාරය යටතේ ඇතිකරන සමාගමක් යටතට පත්කර රාජ්‍ය පෞද්ගලික හවුල්කාරිත්වය යටතේ පවත්වාගෙන යෑමේ කැබිනට් පත්‍රිකාවක් ඉදිරිපත් වී ඇති බවත්, ඒ පිළිබඳ සැබෑ විස්තර ඉදිරිපත් පාර්ලිමේන්තුවට ඉදිරිපත් කරන ලෙසත්ය.
අධිවේගී මාර්ග භාණ්ඩාගරය යටතේ ඇති සමාගමකට ගැනීමට යන්නේ රටේ වත්කම් පෙන්නීමට යැයි බන්දුල ගුණවර්ධන ඇමතිවරයා ලබාදී ඇති පිළිතුර ඇත්තක් නම් රටේ තිබෙන අනෙකුත් සියලුම රාජ්‍ය සම්පත් මහා භාණ්ඩාගාරය යටතට ගත යුතුය. මන්ද ඒ මගින් රටේ වත්කම් විශාල කර පෙන්නිය හැකි නිසාය. බන්දුල ගුණවර්ධන ඇමතිවරයාගේ එම පිළිතුර අනුව රටේ වත්කම් යනු මහා භාණ්ඩාගාරය යටතේ සමාගමක් ලෙස පවතින සම්පත් යැයි අලුත් අර්ථකතනයක්ද සාදාගත හැකිය. එහිම අනෙක් පැත්ත ලෙස රටේ මහා භාණ්ඩාගාරය යටතේ නොමැති අනෙක් රාජ්‍ය සම්පත් රටේ වත්කම් නොවන බවටද අපට අර්ථකථනය කළ හැකිය.
මහා භාණ්ඩාගාරය යනු මුදල් අමාත්‍යාංශය යටතේ පවතින එක් ආයතනයක් වන අතර ඒ යටතේ තවත් ආයතන හෝ සමාගම් ඇත්තේ නැත. මහා භාණ්ඩගාරය යටතේ පවතින්නේ යම් රාජ්‍ය ආයතන හෝ රාජ්‍ය සමාගම් සතු කොටස් අයිතීන් පමණය. උදාහරණයකට ලංකා ඉන්දියන් ඔයිල් සමාගමට ලංකා ඛනිජ තෙල් නීතිගත සංස්ථාව සතු ඉන්ධන පිරවුම්හල් ලබාදීමේදී අලුතින් ඇතිකරන ලද සිලෝන් පෙට්‍රෝලියම් ස්ටෝරේජ් ටර්මිනල් ලිමිටඩ් නම් වූ සමාගම ගත හැකිය. එහි කොටස් අයිතියෙන් තුනෙන් එකක් රජය වෙනුවෙන් දැරුවේ මහා භාණ්ඩාගාරයයි. මේ වනවිට සයිනෝපෙක් සමාගමට ලබාදී ඇත්තේද, ඉදිරියේදී ඇමරිකානු සමාගමට ලබාදීමට නියමිතව ඇත්තේද රජය වෙනුවෙන් මහා භාණ්ඩාගාරය සතු මෙම කොටස් අයිතියයි. ශ්‍රී ලංකා ටෙලිකොම් සමාගම සම්බන්ධයෙන් මේ වනවිට විකිණීම සඳහා යෝජනා කැඳවා ඇත්තේද එම සමාගමේ රජය හෙවත් මහා භාණ්ඩාගාරය සතු කොටස් අයිතියයි.
ඒ නිසා මහා භාණ්ඩාගාරය යටතේ පිහිටුවන සමාගමකට අධිවේගී මාර්ග පද්ධතිය ගන්නට යනවා යැයි කියන කතාවේ විය හැකි ඇත්ත වන්නේ එම අධිවේගී මාර්ග පද්ධතියේ සේවය කරනු ලබන සේවකයින්ද සමඟ කළමනාකරණය පෞද්ගලික සමාගමකට ලබාදීමත්, අවශ්‍ය නම් මහා භාණ්ඩාගාරය සතුව එම සමාගම යටතේ යම් කොටස් අයිතියක් තබා ගැනීමත්ය. නැත්නම් අධිවේගී මාර්ග පද්ධතිය සම්පූර්ණයෙන්ම පෞද්ගලික සමාගමකට ලබාදීමක්ද සිදුවිය හැකිය.
එවැනි අදහසක් ආණ්ඩුවට නැත්නම් අධිවේගී මාර්ග පද්ධතිය මහා මාර්ග අමාත්‍යාංශය යටතේම පිහිටුවන සමාගමක් යටතට පත් කිරීමේ බාධාවක් පැන නඟින්නේ නැත. මන්ද ඕනෑ තරම් රාජ්‍ය සමාගම් මේ වනවිට පිහිටුවා ඇති බැවින් හා ඒ කිසිවක් මහා භාණ්ඩාගාරය යටතේ නොපවතින නිසාය. මේ අධිවේගී මාර්ග පද්ධතියත් කිනම් නමකින් හෝ ක්‍රමයකින් පෞද්ගලිකකරණය කිරීමට ඉදිරිපත් කරන වැඩපිළිවෙලක් බව පැහැදිලිය. එහෙත් ජාතික සම්පත් බේරා ගැනීමේ සටන් පාඨයෙන් ජනතාව ගොනාට අන්දවා බලයට පැමිණ රනිල් වික්‍රමසිංහගේ අයවැයටද ඡන්දය දුන් පොහොට්ටු පක්ෂයේ සාමාජිකයන් මේ තත්වය තුළ හැසිරෙන්නේ කිසිත් නොදන්නා කසාය බී ගොළුවන් සේය. ජාතික සම්පත් සටන් පාඨ දැන් ඔවුන්ට නැතිවා වාගේය.
