පාර්ලිමේන්තු මන්ත්‍රී ඩයනා ගමගේ මහත්මියගේ බහු පුරවැසිභාවය සම්බන්ධයෙන් නඩුවක්, ඇයට එරෙහිව ගොනු කෙරුණේ, නවතම ව්‍යවස්ථා සංශෝධනය අනුව, වෙනත් රටක පුරවැසිභාවය ඇති ලාංකිකයෙකුට, ජනපති හෝ පාර්ලිමේන්තු මන්ත්‍රී ධුරයක් හෙබවීමට ඉඩකඩ ඇහිරීම හේතුවෙනි. අභියාචනාධිකරණයේ ඇසුණු මෙම නඩුවේ ඇපෑලක් පැමිණිලිකාර පක්ෂය මේ වන විට ශ්‍රේෂ්ඨාධිකරණයට යොමු කර ඇත.
ගමගේ මහත්මිය දැනට මාසයකට පමණ පෙර ද කතාබහට ලක් වුයේ පාර්ලිමේන්තුවේ සභා ගර්භයෙන් පිටත තවත් පාර්ලිමේන්තු මන්ත්‍රීවරයෙකු සමග කෙරුණු දරුණු බහින් බස් වීම හා එය තරමක ප්‍රචණ්ඩ ශාරීරික හුවමාරුවක් දක්වා ගොඩනැඟුණු හෙයිනි. මීට පෙර ද ගමගේ මහත්මිය පාර්ලිමේන්තුවේ ඉතාම සැරෙන් හා අවධාරණයෙන් කාන්තාවක ලෙස තමන්ට හෝ සෙසු පාර්ලිමේන්තු මන්ත්‍රීවරියන්ට නින්දා කිරීම, අපහාස කිරීම හා වාචික හිංසනය පිරිමි මන්ත්‍රීවරුන් කිරීම දැඩි ලෙස අභියෝගයට ලක් කළා ය.
මේ අවස්ථාවේදී ප්‍රධාන ධාරාවේ පක්ෂ නොවන පක්ෂ නියෝජනය කරනවා යැයි කිවහැකි කිහිපදෙනෙකු එම මහත්මියගේ චර්යාව අරභයා කළ ප්‍රකාශය මගේ දැඩි අවධානයට ලක් විය. ඔවුන්ගෙන් සමහරෙක් කීවේ ‘මනී කැනොට් බයි ක්ලාස්..’ එනම්, සල්ලිය බාගෙ තිබුණ පමණින් ඉහළ සමාජ තලයකට එන්නට බැරි බව ය. මෙලෙස මේ බොහෝ අය ද අයිති වන්නේ ප්‍රභූ හෝ ඉහළ සමාජ තලවලට නොවන බව මගේ නිරීක්ෂණය යි. එහෙත් ඔවුන් ගමගේ මහත්මිය පන්ති කෝණයෙන් අවඥා සහගතව හෙළා දැකීම ඔවුන් නිතර දෙවේලේ කතා කරන පන්ති භේදය මුලිනුපුටා දැමීම අතර පරස්පරතාවක් තිබේදැයි මට සිතුණු වාර අනන්ත ය.
ගමගේ මහත්මියට පන්ති පදනමෙන් පහර කෑමට ලක්වන තවත් හේතුවක් වන්නේ ඇය නිතර නිතර පාර්ලිමේන්තුවේ ඉස්මතු කරන ලිංගික සේවාව හෙවත් සෙක්ස් වර්ක් හා කංසා වගාව නීතිගත කිරීමය. මේ කාරණා දෙක ම ආන්දෝලනාත්මක බව සැබැවි. සමාජයේ ප්‍රධාන ධාරාවේ මතය මේ කාරණා දෙකට ම එරෙහි ව ඉදිරිපත් වේ. සංඛ්‍යාවෙන් කුඩා වුව ද හඬක් ඇති කුඩා පිරිසක් ප්‍රධාන ධාරාවට එරෙහි ව තම මතය ඉදිරිපත් කරති. ගමගේ මහත්මිය ද සිටින්නේ ඒ කණ්ඩායම සමඟ ය. එහෙත් ඒ කණ්ඩායමේ බොහෝ පිරිසක්, ගමගේ මහත්මිය දරන දේශපාලන මත හා පවත්වන දේශපාලන සම්බන්ධතා නිසා දෝ, එතුමියව තමන්ගේ ගොඩට දමා ගැනීම ප්‍රතික්ෂේප කරති. මනී කැන්නොට් බයි ක්ලාස් කියන්නේ ද මේ පිරිස ම ය.
ගමගේ මහත්මිය ප්‍රසිද්ධියේ ඉදිරිපත් කරන කංසා නීතිගත කිරීම බොහෝ දෙනා ප්‍රසිද්ධියේ කතා කරන්න කැමති මාතෘකාවක් නොවේ.
ඊට හේතුව කංසා සහිත දුම්වැටි බීම නීති විරෝධී පමණක් නොව, එක්තරා ආකාරයකට සමාජ විරෝධී ක්‍රියාවක් ලෙස ද අවතක්සේරු කර ඇති බැවිනි. මතුපිටින් මේ තත්ත්වය අපට දැකගත හැකි වූවත්, කංසා පදනම් කරගත්, වෙනත් නම්වලින් හැඳින්වෙන දුම්වැටි භාවිතය ලංකාවෙ අප සිතනවාට වඩා ව්‍යප්තව හා ප්‍රචලිතව ඇත. කලකට පෙර මෙය සමාජයේ පහළ තීරු අතර ප්‍රචලිත දෙයක් වූවත්, මිලෙන් හා ගුණයෙන් ඉහළ කන්සා දුම්වැටි, සමාජයේ ඉහළ තීරු අතර ද නැතිව ම බැරි දෙයක් ලෙස මේ වන විට පත් වී ඇත. මෙය නීති විරෝධී දෙයක් නිසා, කංසා නිෂ්පාදනය, ආනයනය හා අලෙවිය ගැන සංඛ්‍යාත්මක වශයෙන් අපට අදහසක් ගැනීම අපහසු ය. එහෙත් කංසා ආර්ථිකයේ, දිග පළල හා ගැඹුර සිතනවාට වඩා විශාල විය හැක. ඒ අනුව ඩයනා ගමගේ මහත්මිය හඬගා කියන දේ ආර්ථිකමය වශයෙන් වැදගත් දෙයක් වනු ඇත.
දුම් පානය ආසියානු සමාජයන්හි අමුතු දෙයක් නොවේ. නිකොටියානා නම් ශාකයේ කොළ වේලා ගෙන දුම්වැටි සාදන අතර, එම ශාකය උතුරු හා දකුණු ඇමෙරිකාවේ මුලින් වැඩුණු එකක් ලෙස සැලකේ. එහෙත් මෙම ශාකය ආසියාවට පැමිණ ඇත්තේ ශතවර්ෂ ගණනාවකට පෙර ය. ඖෂධීය මූලාශ්‍රයක් ලෙසත්, දේව නමස්කාරයට යොදා ගන්නා මාධ්‍යයක් ලෙසත්, විනෝදයට දල්වාගෙන ඉරීමටත් දුම්කොළ ආශ්‍රිත නිෂ්පාදන අතීතය පුරා භාවිත වූ බව සඳහන් වේ. දුම්වැටි භාවිතය සම්බන්ධයෙන් ගණනය කෙරෙන දර්ශකයන්හි පදනම ලෙස ගැනෙන්නේ, අවුරුදු 15 හෝ 20 ට වැඩි පිරිමි ජනගහනයෙන් කොපමණ ප්‍රතිශතයක් දුම්වැටි භාවිත කරනවාද යන්නයි. ඒ අනුව බලන විට, ආසියාවේ වැඩි ම දුම් බොන්නන් සිටින්නේ ඉන්දුනීසියාවේ ය. වැඩිහිටි පිරිමි ජනගහනයෙන් 72%ක් ඉන්දුනීසියාවේ සිගරට් බොති. මේ අරභයා ලාංකීය දර්ශකය 29%ක් වේ.
මා සිගරට් බොන්නේ නැති වුවත් (මා එසේ නොකිරීම විශාල දෙයක් ලෙස මෙයින් අවධාරණය නොකරන බව සලකන්න) ඉඳහිට සිගරැට්ටුවක් බොන්නට සිතෙන්නේ ඉන්දුනීසියාවට ගිය විට ය. ඊට හේතුව ඉන්දුනීසියාවේ ඇති විශේෂ සිගරැට් වර්ගයක් නිසා ය. මෙම ඉන්දුනීසියානු සිගරැට් වර්ගය හඳුන්වන්නේ ක්‍රෙටෙක් නමිනි. අනෙක් දුම් වැටි මෙන්ම ක්‍රෙටෙක් සිගරට්ටුවේත් පදනම වන්නේ වේලාගෙන සකසාගත් දුම්කොළ යි. එහෙත් මෙහි විශේෂත්වය වන්නේ, දුම්කොළ සමඟ කරාබුනැටි මිශ්‍ර කර තිබීම යි. ඊට අමතරව රසය හා සුවඳ ජනනය කිරීමට විවිධ රස හා සුවඳ කාරක සිගරැට්ටුවට මිශ්‍ර කර තිබේ. සිගරැට්ටුව දල්වා උරන විට එහි ඇති කරාබු නැටි ඇට දැවී පිපිරී සිහින් සද්දයක් ද කරමින් අමුතු සුවඳක් රසයක් දුමත් සමඟ මුසු කරයි.
මේ අමුතු ධූම අත්දැකීම ගැන මාගේ රස මතකය නැවත ඇවිස්සුවේ අසංක දොඩන්තැන්න මිතුරා ය. ඕස්ටේ්‍රලියාවේ වාසය කරන අසංක වඩාත් ප්‍රසිද්ධ වූයේ තම සොයුරු තුමිඳු ප්‍රධාන භූමිකාව රඟපෑ ලක්මාල් ධර්මරත්න අධ්‍යක්ෂණය කළ ලංකාවේ මෑත ඉතිහාසයේ වඩාත් ම ජනප්‍රිය වූ එකක් ලෙස අවිවාදයෙන් ගැනෙන ‘කූඹියෝ’ ටෙලි නාටකයෙහි නිෂ්පාදක ලෙස ය. අසංක තම සමාජ මාධ්‍යයේ සටහනක් තබමින් කීවේ ක්‍රෙටෙක් බොන ලෙස හෝ ඒවා අලෙවිකරණ තැන් ගැන විස්තර නොවේ.
ඉන්දුනීසියාවේ ක්‍රෙටෙක් කර්මාන්තයේ ඉතිහාසය පදනම් කරගත් විශිෂ්ට නෙට්ෆ්ලික්ස් ටෙලිනාටක මාලාවක් ගැන ය. සාමාන්‍යයෙන් මා ලාංකීය ටෙලිනාට්‍ය හෝ නෙට්ෆ්ලික්ස් චිත්‍රපට හෝ ටෙලි නාටක පුරුද්දක් මෙන් නොබලන නමුත්, අසංකගේ රෙකමදාරුව නිකමට හෝ සලකා බැලීමට සිත් විය. මා ක්‍රෙටෙක් සිගරැට්ටුවට ඇබ්බැහි වුණා මෙන් ම, අවසානයේ දී සිදු වුණේ අදාල ටෙලි නාටකය පැය හත අටක් එක දිගට ම නැරඹී ය. එම ටෙලි නාටකය එතරම් ඇබ්බැහි වෙන ගතියක් ඇත.
ටෙලි නාටකයේ නම ගාඩිස් ක්‍රෙටෙක් ය. බහසා ඉන්දුනීසියා බසින් ගාඩිස් කියන්නේ කාන්තාවට හෝ ස්ත්‍රියට වූවත්, එහි නිශ්චිත අර්ථය වන්නේ කෙල්ල ය. ඒ අනුව මේ ටෙලි නාටකයේ නම ‘ක්‍රෙටෙක් කෙල්ල’ ය. ක්‍රෙටෙක් සිගරැට් ඉන්දුනීසියාවෙ නිෂ්පාදනය වන්නේ ඕලන්ද යටත් විජිතවාදී සමයේ අවසාන කාලයේ සිට ය. මුලින් මෙම කර්මාන්තය කර ඇත්තේ පවුල් හිමිකාරිත්වයක් ඇති ව්‍යාපාර හා කර්මාන්තශාලා මගිනි. ටෙලි නාටකයේ කතාවට පදනම වන්නේ මෙවැනි ව්‍යාපාරික පවුලක් ගැන ය.
කථාවේ විශේෂත්වය වන්නේ දැඩි පුරුෂ මූලික සමාජයක් වන ඉන්දුනීසියාවේ, පුරුෂයන්ගේ නායකත්වයෙන් කෙරෙන මෙවැනි කර්මාන්තශාලාවක අයිතිකරුගේ දියණිය ක්‍රෙටෙක් නිෂ්පාදනය ගැන මහත් ලාලසාවක් වඩාගෙන කර්මාන්තයේ නවෝත්පාදන කිරීමට දරන උත්සාහය යි. එක අතකින් කතාව දිග හැරෙන්නේ, ඉන්දුනීසියාවේ පශ්චාත් යටත් විජිතවාදී ඉතිහාසය සමග ය. ඉන්දුනීසියාවේ කොමියුනිස්ට්වාදය වර්ධනය වීම හා ඊට එරෙහි ව නැගෙන ඒකාධිපති හමුදා පාලන සමය, එනම් 1950 හා 60 දශක මෙය ටෙලිනාටකයේ ඉතිහාසීය සන්දර්භය ය. අනෙක් අතින්, ඉතාමත් ළගන්නා පෙම් කතාවක් ද ටෙලි නාටකයෙන් දිග හැරෙයි. ක්‍රෙටෙක් සිගරට්ටුවක ඇති මනා දුම්කොළ හා කරාබු නැටි සම්මිශ්‍රණය මෙන් ගැඹුරු දේශපාලන / ඉතිහාස සන්දර්භීය කැන්වසයක් මත හැඟුම්බර පෙම් කතාවක් සිත්තම් කිරීම මේ ටෙලි නාටක නාටකයේ සුවිශේෂත්වය යි.
